Pregunta di Lector

Dicon e sistema di numera e Salmonan ta varia di un traduccion di Bijbel pa otro?

E prome Bijbel completo cu tawatin e division segun capitulo y versiculo ta un traduccion Frances publica door di Robert Estienne na 1553. Sinembargo, ta parce cu hopi prome cu esei e buki di Salmonan tawata dividi caba, ya cu e tawata un compilacion di salmonan (of, canticanan) individual componi door di varios hende.

Evidentemente, na prome instante Yehova a manda David compila un coleccion di salmo pa uza den adoracion publico. (1 Cronicanan 15:16-24) Hende ta kere cu ta Esdras, un sacerdote y “escriba bon siña”, tawata esun cu mas despues a compila henter e buki di Salmo den su forma actual. (Esdras 7:6) Pesei nos ta saca afo cu e buki di Salmo a consisti di salmonan individual ora nan a compil’e.

Den un discurso cu apostel Pablo a duna den e sinagoga na Antiokia (Pisidia) durante su prome biahe como misionero, el a cita for di e buki di Salmonan y a bisa: “Manera ta para scirbi tambe den Salmo dos: ‘Bo ta mi yiu; awe mi a engendra bo.’” (Echonan 13:33) Den Bijbelnan djawe, ainda e palabranan ei ta na Salmo 2, versiculo 7. Sinembargo, den varios traduccion di Bijbel hopi di e salmonan tin un otro sistema di numeracion. Esaki ta pasobra algun traduccion ta basa riba e texto Masoretico na Hebreo, mientras cu otronan ta basa riba e Septuaginta na Griego, cu ta un traduccion di e texto Hebreo cu a ser completa den siglo 2 prome cu nos era. Por ehempel, e version Vulgata na Latin, for di cua nan a traduci hopi Bijbel catolico, ta uza e numbernan di salmo segun e Septuaginta, mientras cu Traduccion di Mundo Nobo y tambe Beibel Santu na Papiamento, y otronan ta sigui e texto Hebreo.

Kico ta e diferencianan spesifico? E texto Hebreo tin na total 150 salmo. Sinembargo, e Septuaginta ta combina Salmo 9 cu 10 den un solo salmo, y tambe Salmo 114 cu 115 den un solo salmo. Ademas, e ta parti Salmo 116 i 147 cada un den dos salmo. Aunke e total di salmo ta keda mescos, e numbernan di Salmo 10 te cu Salmo 146 den Septuaginta ta uno menos cu den e texto Hebreo. Pesei den Douay Version, e conocido Salmo 23 ta Salmo 22 ya cu e version aki ta sigui e numeracion di Vulgata na Latin, cu na su turno ta sigui e Septuaginta.

Por ultimo, e number di versiculo di algun salmo tambe por ta diferente serca cada traduccion. Dicon? Pasobra algun traduccion a sigui “e custumber Hudiu di conta e titulo cu tin riba algun salmo como e prome versiculo”, segun e Cyclopedia di McClintock y Strong. De echo, si e titulo ta largo, hopi bes nan a cont’e como dos versiculo, y e cantidad di e versiculonan di e salmo ei ta aumenta cu dos.