Con pa Cultiva un Punto di Bista Balansa di Trabou

DEN e mundo djawe yen di presion riba mercadonan mundial, cu competencia agresivo y produccion en masa, hopi hende no ta masha ansioso pa bai traha tur dia. Sinembargo, nos lo mester gusta nos trabou. Dicon? Pasobra nos a ser crea segun e imagen di Dios—y Dios tin placer den su trabou. Por ehempel, na final di e seis “dianan” of periodonan largo di creacion, ora E tawata repasa loke El a crea, “Dios a mira tur loke El a traha, y ata, tur cos tawata masha bon”, segun Genesis 1:31.

Sin duda Yehova su amor pa trabou ta un motibo pakico E ta ser yama “e Dios bendiciona [“felis”, NW].” No ta logico anto cu mas nos imit’e, mas nos felicidad ta aumenta? Relaciona cu esaki, Rei Salomon di Israel di antiguedad, un excelente constructor y organisado, a skirbi: “Tur hende [mester] por come y bebe y mira e bon cu tin den tur su trabou—esaki ta e regalo di Dios.”—Eclesiastes 3:13.

No ta facil pa cultiva un punto di bista balansa di trabou ya cu awendia e mercado laboral ta cambiando rapidamente. Sinembargo, Yehova Dios ta bendiciona esnan cu ta haci caso di su guia amoroso. (Salmo 119:99, 100) Hende asina ta bira trahadonan balioso y confiabel y pesei nan tin menos chens di perde nan trabou. Tambe nan ta siña mira bida y trabou no meramente for di e punto di bista economico sino for di e punto di bista spiritual. Esaki ta yuda nan tuma decisionnan responsabel den bida y compronde cu nan felicidad y sentido di siguridad no ta mara na nan trabou ni na e mercado laboral cu hopi bes ta inconfiabel y impredecibel. (Mateo 6:31-33; 1 Corintionan 2:14, 15) E punto di bista aki ta yuda nan cultiva norma y etica di trabou cu ta realmente balansa.

Cultiva Norma y Etica di Trabou Cu Ta Agrada Dios

Tin hende ta adicto na trabou y nan ta pone nan trabou prome cu tur otro cos. Tin otronan cu ta desea pa ora pasa pa caba pa nan por bai cas. Kico ta un punto di bista balansa? Bijbel ta  contesta: “Un man yen di sosiego ta miho cu dos mokete yen di trabou y coremento tras di biento.” (Eclesiastes 4:6) De echo, trabou mucho duro of pa mucho ora largo ta contraproducente: un ‘coremento en vano tras di biento.’ Dicon? Pasobra door di esei kisas nos ta perhudica net e cosnan cu ta duna nos mayor felicidad: nos relacion cu famia y amigonan, nos spiritualidad, nos salu y asta e largura di nos bida. (1 Timoteo 6:9, 10) Un punto di bista balansa ta nifica keda contento cu menos recurso material compaña pa un grado rasonabel di pas en bes di ta carga cu trabou hunto cu problema y un bida infelis.

Aunke Bijbel ta anima tal punto di bista balansa, e no ta aproba flohera. (Proverbionan 20:4) Flohera ta caba tiki tiki cu nos respet propio, y cu e respet cu otro hende lo por tin pa nos. Y piyo ainda, e ta caba cu nos relacion cu Dios. Bijbel ta declara francamente cu un persona cu no kier traha no merece di haya cuminda serca otronan. (2 Tesalonicensenan 3:10) Mas bien, e tin cu cambia su manera y traha duro pa e por percura di un manera honorabel pa su necesidadnan y pa di esnan cu ta depende di dje. Door di traha duro e por asta yuda hende cu realmente ta den necesidad, algo cu e Palabra di Dios ta anima.—Proverbionan 21:25, 26; Efesionan 4:28.

Entrena for di Infancia pa Balora Trabou

Bo no ta haya bon norma y etica di trabou pa casualidad; ta di chikito bo ta siña nan. Pesei Bijbel ta haci e siguiente apelacion na mayornan: “Instrui un mucha den e caminda cu e mester cana, y asta ora cu e bira bieu e lo no aparta su mes for di dje.” (Proverbionan 22:6) Fuera di pone un bon ehempel door di ser personanan trahado, mayornan sabi ta cuminsa train nan yiunan for di chikito door di duna nan trabou di cas pa haci di acuerdo cu nan edad. Maske e muchanan kisas ta cunsumi ora nan tin cu haci trabou di cas, nan lo bin sinti cu nan tambe ta conta como miembro di e famia, specialmente ora Mama cu Tata ta elogia nan pa loke nan a haci bon. Lamentablemente tin mayornan cu ta haci casi tur cos pa nan yiunan, keriendo cu ta bon nan ta haci asina. E mayornan ei mester pensa riba Proverbionan 29:21 [NW] cu ta bisa “Si bo mima bo sirbido [of yiu] desde hubentud padilanti, mas despues den su bida lo e asta bira malagradicido.”

 Tambe mayornan responsabel ta mustra profundo interes den e yiunan su lesnan di scol, y nan ta anima nan pa siña y haci nan best na scol. Esaki lo beneficia e muchanan despues ora nan subi mercado laboral.

Sea Sabi Ora di Scohe Trabou

Aunke Bijbel no ta bisa nos ki trabou nos tin cu scohe, si e ta duna nos bon guia pa nos no laga nada pone nos progreso spiritual, sirbishi na Dios y otro responsabilidadnan importante na peliger. Por ehempel, apostel Pablo a skirbi: “Tempo ta cortico, . . . esnan cu ta haci uzo di e cosnan di mundo, [sea] como si fuera nan no a haci uzo completo di nan; pasobra e mundo aki den su forma actual ta pasando.” (1 Corintionan 7:29-31) No tin nada permanente ni completamente stabil den e sistema di cosnan aki. Si nos ta dedica tur nos tempo y energia na dje, ta como si fuera nos ta invertiendo tur e placa cu nos a spar henter nos bida den un cas situa den un area cu ta conoci pa inundacion. Esta un mal inversion!

Otro traduccionnan di Bijbel ta traduci e frase “no a haci uzo completo di nan” como “no uzand’e plenamente”, y “no ta completamente ocupa cu e cosnan ei.” (The Jerusalem Bible; Beibel na papiamentu koriente.) Hende sabi nunca ta perde for di bista e echo cu e tempo cu a resta e sistema actual “ta cortico” y ken cu ta “uzand’e plenamente” of cu ta “completamente ocupa cu e cosnan ei” sigur sigur lo lamenta esei y keda desilusiona.—1 Huan 2:15-17.

‘Nunca Dios Lo Laga Bo Desampara’

Yehova sa miho cu nos kico ta nos necesidadnan. Tambe E sa unda nos ta para den e coriente di tempo di su proposito. Pesei, E ta recorda nos: “Laga boso caracter ta liber di amor pa placa y sea contento cu loke boso tin; pasobra [Dios] mes a bisa: ‘Nunca lo mi no bandona bo, y nunca lo mi no laga bo desampara.’” (Hebreonan 13:5) E palabranan ei ta un gran consuelo! Imitando e interes amoroso cu Dios tin den hende, Hesus a uza un gran parti di su Sermon Riba Sero pa siña su disipelnan e punto di bista corecto di trabou y di cosnan material.—Mateo 6:19-33.

Testigonan di Yehova ta haci esfuerso pa sigui e siñansanan aki. Por ehempel, un doño di trabou a pidi un electricien Testigo pa traha overtime riba un base regular, pero den e caso aki e trahado a nenga. Dicon? Pasobra e no tawata kier pa su trabou kita di e tempo cu e tawata dedica regularmente na su famia y na cosnan spiritual. Door cu e Testigo tawata un bon trahado y confiabel, e doño di trabou a respeta su decision. Claro cu no ta tur biaha e resultado ta asina, y por sosode cu un ruman tin cu busca un otro trabou pa e por mantene un estilo di bida balansa. Sinembargo, esun cu pone pleno confiansa den Yehova lo ripara cu por lo general su bon conducta y bon etica di trabou ta yud’e gana aprobacion di su doño di trabou.—Proverbionan 3:5, 6.

Ora Cu Tur Trabou Lo Duna Satisfaccion

Den e sistema di cosnan imperfecto aki, semper lo tin problema y insiguridad cu trabou y cu  cupo di trabou. De echo, cosnan por bira piyo segun cu e mundo ta bira mas y mas instabil y economianan ta fluctua of asta cai den otro. Pero e situacion aki ta algo temporal. Pronto ningun hende lo no ta sin trabou. Es mas, tur trabou lo ta fasinante y lo duna satisfaccion. Con esei ta posibel? Kico lo trece e cambio ei?

Mediante profeta Isaias, Yehova a señala na e tempo ei. Yehova a bisa: “Mi ta crea shelonan nobo y un tera nobo; y e cosnan di antes lo no wordo recorda mas ni bin na memoria.” (Isaias 65:17) Aki e tawata papia di su gobierno nobo, bou di cua un sosiedad humano completamente nobo y diferente lo bira un realidad.—Daniel 2:44.

Relaciona cu e manera cu hende lo biba y traha e tempo ei, e profecia ta sigui: “Nan lo traha cas y biba den nan; tambe nan lo planta cunucunan di wendruif y come nan fruta. Nan lo no traha cas pa otro hende biba aden, ni planta pa otro hende come; pasobra manera e dianan di un palo, asina e dianan di mi pueblo lo ta; y mi scohinan lo disfruta di e obra di nan mannan pa hopi tempo. Nan lo no traha en vano, ni haya yiu pa calamidad; pasobra nan ta yiu di esnan cu SEÑOR a bendiciona, y hunto cu nan, nan desendientenan.”—Isaias 65:21-23.

Esta un cambio grandi e mundo nobo di Dios lo trece! Lo bo no kier biba den un mundo unda lo bo “no traha en vano” sino disfruta plenamente di e “fruta” di bo trabou? Pero tuma nota ken ta esnan cu lo disfruta di e bendicionnan ei: “Nan ta yiu di esnan cu SEÑOR a bendiciona.” Abo tambe por ta un di esnan cu Yehova ta “bendiciona” door di siña tocante Yehova y cumpli cu su rekisitonan. Hesus a bisa: “Esaki ta bida eterno, cu nan por conoce bo, e unico Dios berdadero, y Hesucristo, kende bo a manda.” (Huan 17:3) Cu placer Testigonan di Yehova lo kier yuda bo gana e conocemento cu ta duna bida door di studia e Palabra di Dios, Bijbel, cu bo di un manera sistematico.

[Cuadro na pagina 6]

NAN TA “HOPI BUSCA”

Bijbel ta bisa: “Tur loke boso haci, haci boso trabou di curason, como pa SEÑOR y no pa hende.” (Colosensenan 3:23) Ta obvio cu esnan cu laga e excelente principio aki dirigi nan norma y etica di trabou, lo bira trahadonan cu doñonan di trabou ta busca. Pa e motibo ei, den su buki, How to Be Invisible (Con pa Haci Bo Mes Invisibel), J. J. Luna ta conseha doñonan di trabou cu ta busca trahado, pa busca trahado cu ta miembro activo di cierto gruponan religioso. Pero e ta agrega: “Realidad ta cu finalmente nos ta resulta serca e Testigonan [di Yehova].” Un di e motibonan cu el a duna ta cu Testigonan ta conoci pa nan honestidad, y esei ta pone cu riba varios tereno nan ta “hopi busca.”

[Plachi na pagina 5]

Un balansa entre trabou y actividadnan spiritual y recreo ta trece satisfaccion