Pregunta di Lector

E Scritura ta permiti un cristian pone man riba Bijbel y hura den corte cu e lo papia solamente loke ta berdad?

Esaki ta un asunto personal cu cada ken tin cu dicidi pa su mes. (Galationan 6:5) Sinembargo, Bijbel no ta prohibi un persona di hura cu lo e papia berdad den corte.

Pa hopi tempo caba huramento tawata tuma luga rond mundo. Por ehempel den tempo di antiguedad, Griegonan tawata hisa un man na halto of mishi cu un altar ora nan tawata hura. Ora un Romano tawata hura e tawata tene un piedra den su man y hura: “Si mi gaña deliberadamente, ora [e dios] Jupiter ta scapa e stad y su baluarte, lag’e kita for di mi tur loke ta bon, mescos cu mi ta tira e piedra aki afo.”—Cyclopedia of Biblical, Theological, and Ecclesiastical Literature, di John McClintock y James Strong, Volumen VII, pagina 260.

E actonan ei a indica cu hende tin e tendencia di reconoce cu ta existi un Dios cu ta observa hende y na ken nan tin cu rindi cuenta. For di tempo di antiguedad, adoradonan berdadero di Yehova tawata conciente cu E sa loke nan ta bisa y haci. (Proverbionan 5:21; 15:3) Nan tawata hura como si fuera Yehova t’ei presente of cu E ta nan testigo. Por ehempel, esaki ta loke Boaz, David, Salomon y Sedekias a haci. (Rut 3:13; 2 Samuel 3:35; 1 Reinan 2:23, 24; Yeremias 38:16) Adoradonan di e Dios berdadero tambe a permiti otro hende pone nan hura. Esaki a sosode den caso di Abraham y Hesucristo.—Genesis 21:22-24; Mateo 26:63, 64.

Na algun ocasion ora un persona a hura dilanti Yehova e tawata haci un señal hunto cu e huramento ei. Abram (Abraham) a bisa e Rei di Sodoma: “Mi ta hisa mi man den un huramento na Yehova e Dios Haltisimo, Productor di shelo y tera.” (Genesis 14:22, NW) Un angel cu a papia cu profeta Daniel “a hisa su man drechi y su man robes na shelo, y a hura pa Esun cu ta biba pa semper.” (Daniel 12:7) Bijbel ta mustra cu asta Yehova ta hisa su man simbolicamente den huramento.—Deuteronomio 32:40; Isaias 62:8.

Niun caminda Bijbel no ta prohibi hende di hura. Sinembargo, un cristian no tin nodi hura pa duna forsa na cada cos cu e ta bisa. Hesus a bisa: “Ma laga bo ‘si’ ta ‘si’, of bo ‘no’ ta ‘no.’” (Mateo 5:33-37) Disipel Santiago a declara algo similar. Ora el a bisa “no hura”, e tawata adverti contra huramento pa loco. (Santiago 5:12) Ni Hesus ni Santiago no a bisa cu ta robes pa hende hura cu nan lo bisa e berdad den corte.

Pero kico si nan pidi un ruman den corte pa e hura cu su testimonio ta basa riba berdad? Podise e ta haya cu e por hura. Di otro banda, por ta nan por permitie haci un declaracion solem di cu e no ta gaña.—Galationan 1:20.

Si e proceder den corte ta exigi pa un persona hisa man of pone man riba Bijbel ora e ta hura, un cristian por opta pa cumpli cu esei. Kisas e ta haci esei door cu e ta corda riba ehempelnan biblico den cua huramento a bai compaña cu un señal. Pa un cristian, e señal mes no ta asina importante. Ta e echo cu e ta hura dilanti Dios cu e ta bai papia e berdad, ta conta. E huramento ei ta un asunto serio. Si un cristian ta sinti cu e por y mester contesta un pregunta bou dje sircunstancianan ei, e mester tene na mente cu el a hura cu lo e papia e berdad. Claro cu un cristian semper lo kier papia e berdad.