Con Firme Bo Fe Ta?
Con Firme Bo Fe Ta?
“Den boso fe boso ta para firme.”—2 CORINTIONAN 1:24.
1, 2. Pakico nos mester tin fe, y con esaki por bira mas fuerte?
YEHOVA su sirbidonan sa cu nan mester tin fe. Echo ta cu ‘sin fe ta imposibel pa agrada Dios.’ (Hebreonan 11:6) Pesei ta sabi pa nos resa pidi pa spirito santo, y tambe pa fe cu ta parti di su fruta deseabel. (Lucas 11:13; Galationan 5:22, 23) Ora nos ta imita e fe di nos rumannan, nos propio fe tambe lo bira mas fuerte.—2 Timoteo 1:5; Hebreonan 13:7.
2 Nos fe lo bira mas fuerte si nos persisti den haci loke e Palabra di Dios ta manda tur cristian haci. Nos lo por haya mas fe si nos lesa Bijbel tur dia y studia e Scritura diligentemente cu yudansa di e publicacionnan cu ‘e mayordomo fiel’ ta duna nos. (Lucas 12:42-44; Hosue 1:7, 8) Ora nos ta asisti regularmente na reunion-, asamblea- y congresonan cristian, e fe di cada un di nos ta stimula otro. (Romanonan 1:11, 12; Hebreonan 10:24, 25) Y nos fe ta bira mas firme ora nos ta papia cu otro hende den sirbishi.—Salmo 145:10-13; Romanonan 10:11-15.
3. Relaciona cu fe, ki yudansa nos ta haya for di ancianonan cristian amoroso?
3 Door di ofrece conseho y animacion basa riba Bijbel, ancianonan cristian amoroso ta yuda nos edifica nos fe. Nan tin e mesun actitud cu apostel Pablo tawatin, kende a bisa e Corintionan: “Nos ta trahado hunto cu boso pa boso goso; pasobra den boso fe boso ta para firme.” (2 Corintionan 1:23, 24) Un otro traduccion ta bisa: “Nos kier colabora cu boso pa haci boso contento, pasobra boso fe ta firme.” (Contemporary English Version) E husto ta biba pa medio di fe. Claro cu ningun otro hende por eherce fe pa nos ni haci nos leal of integro. Den e sentido aki, ‘nos tin cu carga nos mes carga.’—Galationan 3:11; 6:5.
4. Con relatonan biblico di fiel sirbidonan di Dios por yuda haci nos fe mas firme?
4 E Scritura ta contene hopi relato di personanan cu tawatin fe. Kisas nos conoce algun di nan echonan cu a resalta mas, pero kico di e fe cu nan a desplega den nan bida di tur dia, talbes durante henter nan bida? Door di reflexiona awor riba e manera cu nan a manifesta e cualidad aki den sircunstancianan paresido na esnan di nos, nos fe lo por bira mas firme.
Fe Ta Duna Nos Curashi
5. Ki prueba biblico ta mustra cu fe ta fortalece nos pa declara Dios su palabra cu curashi?
5 Fe ta fortalece nos pa declara e palabra di Dios cu curashi. Cu curashi Enok a predeci e ehecucion di huicio dibino. El a bisa: “Mira, Señor a bin cu hopi miles di su santonan, pa ehecuta huicio contra tur, y pa condena tur e hendenan impio [malbado] pa tur nan echonan di impiedad [maldad] cu nan a comete den impiedad, y pa tur e cosnan duro cu pecadonan impio a papia contra dje.” (Hudas 14, 15) Ora e enemigonan malbado di Enok a tende e palabranan ei, casi sigur nan lo kier a mat’e. Pero cu fe el a papia sin miedo, y Dios “a tum’e” door di termina su bida, aparentemente, sin lag’e pasa den agonia di morto. (Genesis 5:24; Hebreonan 11:5) Yehova no ta haci e milagernan ei cu nos, pero si E ta contesta nos oracionnan pa asina nos por declara su palabra cu fe y curashi.—Echonan 4:24-31.
6. Con e fe y curashi cu Dios ta duna a yuda Noe?
6 Pa medio di fe Noe “a prepara un arca pa salbacion di e hendenan di su cas.” (Hebreonan 11:7; Genesis 6:13-22) Tambe Noe tawata “un predicado di husticia” kende cu curashi a declara e spiertamento di Dios na e hendenan di su tempo. (2 Pedro 2:5) Nan lo mester a haci bofon di su mensahe tocante un benidero Dilubio mescos cu awe algun hende ta haci bofon ora nos duna prueba biblico cu e sistema di cosnan actual lo ser destrui pronto. (2 Pedro 3:3-12) Sinembargo, mescos cu Enok y Noe, nos por presenta e tipo di mensahe ei pasobra Dios ta duna nos fe y curashi.
Fe Ta Duna Nos Pasenshi
7. Con Abraham y otronan a mustra fe y pasenshi?
7 Nos mester tin fe y pasenshi, specialmente awor cu nos ta warda e fin di e mal sistema di cosnan aki. Un di esnan cu ‘pa medio di fe y pasenshi lo hereda e promesanan’ ta Abraham, e patriarca cu a teme Dios. (Hebreonan 6:11, 12) Pa medio di fe el a bandona e stad di Ur, cu tur su comodidadnan, y a bira stranhero den un tera desconoci cu Dios a priminti na dje. Isaak y Yacob tambe tawata heredero di e mesun promesa ei. Sinembargo, “tur esakinan a muri den fe, sin a ricibi e promesanan.” Pa medio di fe nan a “desea un miho pais, esta, un pais celestial.” Conforme esei, Dios a “prepara un stad pa nan.” (Hebreonan 11:8-16) Si, Abraham, Isaak y Yacob—y nan respectivo esposanan cu tambe a teme Dios—a spera cu pasenshi riba e Reino celestial di Dios, bou di cua nan lo ser resusita na bida riba tera.
8. Abraham, Isaak y Yacob a manifesta pasenshi y fe, apesar di kico?
8 Aunke Abraham, Isaak y Yacob no a haya e Tera Priminti ni mira tur nacion bendiciona nan mes pa medio di e simiña di Abraham, nan no a perde fe. (Genesis 15:5-7; 22:15-18) Apesar di e echo cu e ‘stad cu Dios a traha’ lo a bira realidad hopi siglo despues, e hombernan aki a sigui desplega fe y pasenshi durante henter nan bida. Nos sigur lo tin cu haci mescos, pasobra awor e Reino Mesianico ta asta un realidad den shelo.—Salmo 42:5, 11; 43:5.
Fe Ta Duna Nos e Metanan di Mas Eleva
9. Ki influencia fe tin riba meta di hende?
9 Nunca e patriarcanan fiel a adopta e estilo di bida degrada di e Cananeonan, pasobra nan tawatin metanan mucho mas halto. Mescos tambe fe ta duna nos metanan spiritual cu ta yuda nos pa no ser absorba den e mundo cu ta drumi den poder di e malbado, Satanas e Diabel.—1 Huan 2:15-17; 5:19.
10. Con nos por sa cu Yosef a busca pa alcansa un meta mas eleva cu esun di ser prominente den e mundo aki?
10 Dios a guia asuntonan di tal manera cu Yacob su yiu Yosef a sirbi como administrado di alimento den Egipto. Pero su meta no tawata pa e bira un homber importante den e mundo aki. Cu fe den e cumplimento di e promesanan di Yehova, Yosef na edad di 110 aña a bisa su rumannan: “Mi ta bai muri, ma Dios siguramente lo percura pa boso y lo saca boso for di e tera aki hiba na e tera cu El a priminti Abraham, Isaak y Yacob bou di huramento.” Yosef a pidi pa e wordo dera den e tera priminti. Ora el a muri nan a balsam’e y pon’e den un caha di morto na Egipto. Pero ora e Israelitanan a ser libra for di sclabitud na Egipto, profeta Moises a bai cu e wesonan di Yosef pa dera nan den e Tera Priminti. (Genesis 50:22-26; Exodo 13:19) Un fe manera esun di Yosef mester impulsa nos pa alcansa metanan mas eleva cu esun di ser prominente den e mundo aki.—1 Corintionan 7:29-31.
11. Den ki manera Moises a duna evidencia cu e tawatin metanan spiritual?
11 Moises a prefera di ‘sufri maltrato hunto cu e pueblo di Dios, y no gosa di e placernan pasahero di pica’ como miembro bon educa di e famia real di Egipto. (Hebreonan 11:23-26; Echonan 7:20-22) Esaki a cost’e su prestigio den mundo y kisas a pon’e perde un entiero impresionante den un caha di morto tur dorna, na un sitio renombra na Egipto. Pero ki balor esei lo tawatin compara cu e honor di ta un “homber di Dios”, mediado di e pacto di Lei, profeta di Yehova y escritor di Bijbel? (Esdras 3:2) Bo ta desea di bai dilanti den mundo pa haya prestigio, of bo fe a duna bo metanan spiritual hopi mas eleva?
Fe Ta Resulta den un Bida di Satisfaccion
12. Ki efecto fe tawatin riba bida di Rahab?
12 Fe ta duna hende no solamente e metanan di mas eleva sino tambe un bida di satisfaccion. Rahab di Yerico lo mester a sinti cu su bida como prostituta no tawatin ningun proposito. Sinembargo, tur esei a cambia ora el a eherce fe! “Rahab a wordo hustifica tambe pa medio di obranan [di fe], ora cu el a ricibi e mensaheronan [Israelita] y a manda nan bai pa un otro caminda”, di manera cu nan por a scapa di nan enemigonan Cananeo. (Santiago 2:24-26) Reconociendo Yehova como e Dios berdadero, Rahab a demostra su fe tambe door di bandona su bida di prostitucion. (Hosue 2:9-11; Hebreonan 11:30, 31) El a casa cu un sirbido di Yehova, no cu un Cananeo incredulo. (Deuteronomio 7:3, 4; 1 Corintionan 7:39) Den e manera ei, Rahab a haya e grandioso privilegio di bira antepasado di e Mesias. (1 Cronicanan 2:3-15; Rut 4:20-22; Mateo 1:5, 6) Mescos cu otro hende, di cua algun a bandona un bida inmoral, lo e ricibi un recompensa mas: resureccion pa biba den un paradijs riba tera.
13. Con David a peca relaciona cu Batseba, pero ki actitud el a manifesta?
13 Despues cu Rahab a bandona su bida di pica, aparentemente el a sigui hiba un bida recto. Sinembargo, algun persona cu tawatin hopi aña dedica na Dios a peca gravemente. Por ehempel Rei David a comete adulterio cu Batseba (of Betsabe) y a laga mata su casa den bataya. Despues di esei el a tuma Batseba como su esposa. (2 Samuel 11:1-27) Cu un tristesa profundo el a repenti y roga Yehova: “No kita bo spirito santo for di mi.” David no a perde e spirito di Dios. E tawatin fe cu Yehova, den su gran misericordia, lo no a desprecia ‘un curason kibra’ pa motibo di pica. (Salmo 51:11, 17; 103:10-14) Pa motibo di nan fe, David y Batseba a ricibi e privilegio di bira antepasado di e Mesias.—1 Cronicanan 3:5; Mateo 1:6, 16; Lucas 3:23, 31.
Siguransa Cu Dios Lo Yuda Ta Fortalece Nos Fe
14. Ki siguransa Gideon a ricibi, y ki efecto e relato aki por tin riba nos fe?
14 Aunke nos ta cana pa medio di fe, tin biaha nos kier tin e siguransa di cu Dios ta yuda nos. Esei tawata e caso cu Hues Gideon, un di e personanan cu “pa medio di fe a conkista reinonan.” (Hebreonan 11:32, 33) Ora e Madianitanan y nan aliadonan a invadi Israel, e spirito di Dios tawata cu Gideon. E tawatin masha gana pa Yehova dun’e e siguransa di cu e tawata cu ne, pesei el a pidi pa e haya un prueba di esei a base di un pida tela di lana di carne cu lo mester a pasa anochi riba un plenchi di bati maishi. Den e prome prueba, serena a baha solamente riba e tela, mientras cu tera a keda seco. Den e di dos prueba tawata net contrario. Gideon tawata un persona masha cauteloso, pero e siguransanan aki a fortalec’e y el a actua cu fe derotando e enemigonan di Israel. (Huesnan 6:33-40; 7:19-25) E echo cu nos kier haci sigur di un cos prome cu nos tuma un decision no ta nifica cu nos ta falta fe. En realidad nos ta demostra cu nos tin fe door di consulta Bijbel y publicacionnan cristian y door di pidi pa e guia di spirito santo ora nos ta tuma decision.—Romanonan 8:26, 27.
15. Con nos por beneficia door di medita riba e fe di Barak?
15 E fe di Hues Barak a bira mas fuerte ora el a haya siguransa den forma di estimulo. E profeta Debora a anim’e pa e tuma iniciativa pa libra e Israelitanan for di opresion na man di e Rei Cananeo Yabin. Cu fe y siguransa di respaldo dibino, Barak a guia 10.000 homber cu ekipo limita den bataya y a derota Yabin su forsanan mucho mas poderoso comanda pa Sisara. Debora y Barak a celebra e victoria ei cu un cantica emocionante. (Huesnan 4:1–5:31) Debora a anima Barak pa e actua como un lider cu Dios a nombra, y e tawata un di e sirbidonan di Yehova cu mediante fe “a pone ehersitonan stranhero hui.” (Hebreonan 11:34) Pues, te na ora mes cu nos ta duda un poco tocante con pa cumpli cu un tarea dificil den sirbishi di Yehova, si nos medita riba e manera cu Dios a bendiciona Barak pa motibo cu el a actua cu fe, esei lo por impulsa nos na accion.
Fe Ta Promove Pas
16. Ki ehempel magnifico Abraham a pone ora el a conserva pas cu Lot?
16 Mescos cu fe ta yuda nos cumpli cu tareanan dificil den sirbishi di Dios, e ta promove pas y trankilidad tambe. Abraham cu Lot su wardadonan di bestia a pleita obligando nan di separa for di otro. Maske Abraham tawatin hopi mas edad, el a laga su subrino Lot, kende tawata mas jong cu ne, scohe e miho sabananan. (Genesis 13:7-12) Cu fe Abraham lo mester a pidi Dios yud’e resolve e problema aki. En bes di pone su mes interesnan na prome luga, el a soluciona e asunto pacificamente. Si nos mester haya nos mes den un disputa cu un ruman cristian, laga nos haci oracion den fe y “busca pas”, cordando riba Abraham su ehempel di mustra consideracion amoroso.—1 Pedro 3:10-12.
17. Pakico nos por bisa cu e aparente separacion cu a envolve Pablo, Barnabas y Marco a ser resolvi den un manera pacifico?
17 Laga nos wak con aplicacion di principionan cristian cu fe por yuda nos promove pas. Por ehempel, ora Pablo tawata cla pa cuminsa su di dos biahe como misionero, Barnabas a bai di acuerdo cu e proposicion pa nan bolbe bishita e congregacionnan na Chipre y Asia Menor. Sinembargo, Barnabas tawata kier pa su primo Marco compaña nan. Pablo no tawata di acuerdo pasobra Marco a bandona nan na Pamfilia. A surgi ‘un desacuerdo grandi’, y e disputa aki a causa un separacion. Barnabas a biaha cu Marco bai Chipre, mientras cu Pablo a scohe Silas como su compañero y a “biaha door di Siria y Cilicia, fortificando e iglesianan.” (Echonan 15:36-41) Aparentemente cu tempo nan a drecha cu otro, pasobra Marco tawata hunto cu Pablo na Roma, y e apostel a papia bon di dje. (Colosensenan 4:10; Filemon 23, 24) Ora Pablo tawata preso na Roma rond di aña 65 di nos era, el a bisa Timoteo: “Busca Marco y trec’e hunto cu bo, pasobra e ta util pa mi pa e sirbishi.” (2 Timoteo 4:11) Tur cos ta mustra cu Pablo a hinca e asunto di su relacion cu Barnabas y Marco den su oracionnan di fe, y esaki a resulta den e trankilidad cu ta liga cu “e pas di Dios.”—Filipensenan 4:6, 7.
18. Probablemente kico a sosode den e caso di Euodias y Sintike?
18 Claro cu como hende imperfecto, “nos tur ta trompica na hopi manera.” (Santiago 3:2) Tambe a surgi dificultad entre dos mohe cristian, tocante ken Pablo a skirbi: “Mi ta roga Euodias [Evodia] y mi ta roga Sintike pa nan biba den harmonia cu otro den Señor. . . . Yuda e mohenan aki, kendenan a comparti mi lucha pa causa di evangelio.” (Filipensenan 4:1-3) Muy probablemente e mohenan deboto na Dios aki a resolve nan problema den un manera pacifico door di aplica conseho manera esun registra na Mateo 5:23 y 24. Door di aplica principionan biblico cu fe nos lo contribui hopi na promove pas awe.
Fe Ta Yuda Nos Soporta Dificultad
19. Ki situacion dificil no por a caba cu e fe di Isaak cu Yacob?
19 Pa medio di fe tambe nos por soporta contratiempo. Talbes un miembro batisa di nos famia a desobedece Dios door di casa cu un incredulo, y esei ta haci nos hopi tristo. (1 Corintionan 7:39) Isaak y Rebeca a sufri door cu nan yiu homber Esau a casa cu mohenan pagano. Su esposanan Heteo a trece asina tanto “amargura” pa nan, cu Rebeca a bisa: “Mi ta fada di mi bida pa motibo di e yiu mohenan di Het; si Yacob tuma un esposa manera esakinan, for di e yiu mohenan di Het, for di e yiu mohenan di e tera, pakico biba ainda anto?” (Genesis 26:34, 35; 27:46) Toch, e prueba aki no a caba cu e fe di Isaak cu Rebeca. Laga nos tambe mantene un fe fuerte ora nos ta enfrenta sircunstancianan dificil.
20. Ki ehempelnan di fe nos tin den Noemi cu Rut?
20 E biuda Noemi di edad avansa, tawata di e pueblo di Huda, y tawata sa cu cierto mohenan di Huda lo por a haya yiu cu lo a bira antepasado di e Mesias. Pero mirando cu su yiunan a muri sin haya yiu y cu ya e mes a pasa edad di haya yiu, e posibilidad pa su famia bira parti di e liña di desendencia cu a hiba na e Mesias tawata en realidad masha chikito. No obstante, su suegra Rut, biuda di su yiu defunto, a casa cu e anciano Boaz, haya un yiu cu ne y bira antepasado di Hesus, e Mesias! (Genesis 49:10, 33; Rut 1:3-5; 4:13-22; Mateo 1:1, 5) E fe di Noemi cu Rut a supera dificultad y trece hopi goso pa nan. Nos tambe lo por haya un goso grandi si nos mantene nos fe ora nos haya nos cu dificultad.
21. Kico fe ta haci pa nos, y kico mester ta nos determinacion?
21 Aunke nos no por bisa kico mañan lo trece pa nos cada un, pa medio di fe nos por enfrenta cualkier reto den bida. Fe ta duna nos curashi y pasenshi. E ta duna nos e metanan di mas eleva y un bida di satisfaccion. Fe tin un efecto positivo riba nos relacion cu otro hende y ta supera dificultad. Pesei anto, laga nos ta un di “esnan cu tin fe pa preservacion di e alma.” (Hebreonan 10:39) Cu e forsa cu nos ta ricibi di nos Dios amoroso, Yehova, y pa su gloria, laga nos sigui eherce un fe firme.
Con Lo Bo Contesta?
• Ki prueba biblico ta mustra cu fe por duna nos curashi?
• Pakico nos por bisa cu fe ta duna nos un bida di satisfaccion?
• Con fe ta promove pas?
• Ki prueba tin cu fe ta yuda nos soporta dificultad?
[Preguntanan di Estudio]
[Plachi na pagina 16]
Fe a duna Noe y Enok e curashi pa declara Yehova su mensahenan
[Plachi na pagina 17]
Fe manera esun di Moises ta impulsa nos pa busca pa alcansa metanan spiritual
[Plachi na pagina 18]
E siguransa cu Dios lo yuda nan a fortalece e fe di Barak, Debora y Gideon