Nos Tur Tin Mester di Elogio

E DIA ei cos a bai bon pa e mucha mohe chikito. Maske e mama tawatin cu straf e na otro ocasionnan, riba e dia particular aki el a haci hopi co’i bon mucha. Sinembargo, e anochi ei despues cu e mama a pone e mucha drumi, e mama a tend’e ta yora. Ora el a puntr’e pakico e ta tristo, e mucha a contesta yorando: “Mi no tawata bon mucha awe?”

E pregunta ei a duel e mama hopi. Semper e tawata cla pa straf su yiu mohe. Pero awor, maske el a ripara cuanto esfuerso e chikitin a haci pa comporta su mes bon, toch e mama no a elogi’e ningun tiki.

No ta mucha chikito so tin mester di elogio y animacion. Nos tur tin mester di esei, mescos cu nos tin mester di conseho y coreccion.

Con nos ta sinti ora nos haya elogio sinsero? Esaki no ta laga nos sinti bon y e no ta drecha nos dia? Probablemente nos ta pensa cu si e persona a tuma nota di loke nos a haci, e ta interesa den nos. Esei ta duna nos e siguransa cu loke nos a haci a bal e esfuerso, y e ta motiva nos pa sigui traha duro den futuro. No ta nada straño cu elogio sinsero ta pone cu nos ta sinti nos atrai na un persona cu ta tuma tempo pa anima nos.—Proverbionan 15:23.

Hesucristo a compronde cu hende tin mester di elogio. Den su ilustracion tocante talento, e shon (simbolisando Hesus mes) a duna hopi elogio na cada un di e esclabonan fiel, bisando: “Hopi bon, mi bon y fiel esclabo.” Esta un animacion! Maske nan habilidad y logronan tawata diferente, nan a haya e mesun elogio.—Mateo 25:19-23.

Pues, laga nos corda riba e mama di e mucha mohe chikito. Nos no tin nodi warda te ora otronan cuminsa yora pa nos elogia nan. Mas bien, nos por haci esfuerso pa busca oportunidad pa elogia otro. Si, nos tin bon motibo pa duna elogio sinsero na tur oportunidad.