“Paga Mucho Mas Atencion”

“Nos mester paga mucho mas atencion na loke nos a tende, pa nos no aparta nos for di e caminda.”—HEBREONAN 2:1.

1. Ilustra con ora hende laga cosnan distrae nan, esaki por causa desaster.

ACCIDENTE di auto ta costa bida di rond di 37.000 hende pa aña na Merca so. Expertonan ta bisa cu por a evita hopi di e mortonan aki si e conductornan a paga mas tino riba caminda. Algun automobilista ta laga indicacionnan riba caminda y borchi di propaganda of uzo di telefon cellular kita nan atencion. Tambe tin esnan cu ta come y bebe den auto segun cu nan ta maneha esaki. Tur e situacionnan aki ta mustra cu ora hende laga otro cosnan distrae nan, esaki por causa desaster.

2, 3. Ki spiertamento Pablo a duna e cristiannan Hebreo, y pakico su conseho tawata na su luga?

² Casi 2.000 aña prome cu hende a inventa auto, apostel Pablo a identifica un tipo di distraicion cu a bira desastroso pa algun cristian Hebreo. Pablo a enfatisa cu e Hesucristo resusita a haya un posicion superior cu tur e angelnan, pasobra el a sinta na e man drechi di Dios. E tempo ei e apostel a bisa: “Pa e motibo aki nos mester paga mucho mas atencion na loke nos a tende, pa nos no aparta nos for di e caminda.”—Hebreonan 2:1.

³ Pakico e cristiannan Hebreo mester a ‘paga mucho mas atencion na loke nan a tende’ tocante Hesus? Esei ta pasobra a pasa casi 30 aña caba desde cu Hesus a bandona tera. Den e ausencia di nan Maestro, algun cristian Hebreo a cuminsa drif bai for di e fe berdadero. Nan a laga hudaismo, nan forma bieu di adora Dios, distrae nan.

Nan Mester A Paga Mucho Mas Atencion

4. Pakico algun cristian Hebreo lo a sinti nan tenta pa bai bek den hudaismo?

⁴ Pakico un cristian lo a sintie tenta pa bai bek den hudaismo? Wel, e sistema di adoracion bou di e Lei tawatin di aber cu cosnan concreto. Hende por a mira e sacerdotenan y sinti e holo di sacrificionan kima. Pero den algun sentido, cristianismo tawata bastante diferente. E cristiannan tawatin un Sumo Sacerdote, Hesucristo, pero pa trinta aña caba e no tawata riba tera. (Hebreonan 4:14) Nan tawatin un tempel, pero su luga santo tawata den shelo mes. (Hebreonan 9:24) Distinto di e sircunsicion fisico bou di e Lei, sircunsicion cristian tawata “esun di curason, segun e spirito.” (Romanonan 2:29) Pesei, pa e cristiannan Hebreo, cristianismo a cuminsa  parce algo abstracto, sin mucho cos concretamente visibel.

5. Con Pablo a mustra cu e sistema di adoracion cu Hesus a institui tawata superior na esun bou di e Lei?

⁵ E cristiannan Hebreo tawatin cu realisa algo masha significativo tocante e sistema di adoracion cu Cristo a institui. E tawata basa mas riba fe cu riba bista, y toch e tawata superior na e Lei cu a ser duna pa medio di profeta Moises. Pablo a skirbi: “Si e sprengomento di sanger di cabrito y toro y di e shinishi di un bishe mohe, riba esnan cu a wordo contamina, ta santifica pa purificacion di e carni, cuanto mas e sanger di Cristo, kende, pa medio di e spirito eterno, a ofrece su mes sin defecto na Dios, lo purifica boso consenshi di obranan morto pa sirbi e Dios bibo?” (Hebreonan 9:13, 14) Si, e pordon cu nan por a haya a base di fe den e sacrificio di rescate di Hesucristo ta masha superior den hopi sentido na esun cu e Hudiunan por a haya pa medio di sacrificio ofreci bou di e Lei.—Hebreonan 7:26-28.

6, 7. (a) Ki situacion a pone cu a bira urgente pa e cristiannan Hebreo ‘paga mucho mas atencion na loke nan a tende’? (b) Ora Pablo a skirbi su carta na e Hebreonan, cuanto tempo mas a keda Herusalem? (Mira nota na pia di pagina.)

⁶ Tawatin un motibo mas pakico e cristiannan Hebreo mester a presta hopi atencion na e cosnan cu nan a tende tocante Hesus. Hesus a profetisa cu Herusalem lo a ser destrui. El a bisa: “E dianan lo bin pa bo cu bo enemigonan lo lanta un baluarte rond di bo, y rondona bo y sera bo aden di tur banda, y basha bo abou na suela y bo yiunan denter di bo, y nan lo no laga den bo ni un piedra riba otro, pasobra bo no a corda e tempo cu Dios a bishita bo.”—Lucas 19:43, 44.

⁷ Na ki tempo esaki lo a sosode? Hesus no a revela ni e dia ni e ora. Mas bien, el a duna e instruccion aki: “Ora boso mira Herusalem rondona door di ehersitonan, reconoce anto cu su desolacion ta serca. E ora ei laga esnan cu ta na Hudea hui bai na e seronan, y laga esnan cu ta meimei di e stad sali bai, y no laga esnan cu ta den cunucu bai den stad.” (Lucas 21:20, 21) Durante e 30 añanan despues cu Hesus a papia e palabranan ei, algun cristian den Herusalem a perde nan sentido di urgencia y a laga otro cosnan distrae nan. Ta como si fuera nan a kita nan tino for di caya. Si nan no a cambia nan manera di pensa, nan lo a sufri un desaster sigur. Sea cu nan a pensa esei of no, e destruccion di Herusalem tawata tra’i porta! *  Tawata di spera cu e conseho di Pablo lo a lanta e cristiannan den Herusalem for di nan soño spiritual.

Con pa “Paga Mucho Mas Atencion” Awe

8. Pakico nos tin cu “paga mucho mas atencion” na e berdadnan di e Palabra di Dios?

⁸ Mescos cu e cristiannan di prome siglo, nos tin cu “paga mucho mas atencion” na e berdadnan di e Palabra di Dios. Pakico? Pasobra nos tambe ta enfrenta un benidero destruccion, no solamente di un nacion, sino di henter un sistema di cosnan. (Revelacion 11:18; 16:14, 16) Claro cu nos no sa e dia ni ora exacto cu Yehova lo tuma e accion aki. (Mateo 24:36) No obstante, nos ta testigo ocular di e cumplimento di profecia biblico cu ta indica claramente cu nos ta bibando den “e ultimo dianan.” (2 Timoteo 3:1-5) Pesei, nos mester vigila contra tur loke cu por distrae nos. Nos tin cu presta atencion na e Palabra di Dios y mantene un sentido skerpi di urgencia. Ta solamente door di haci esei, nos lo por “scapa di tur e cosnan aki cu ta bai tuma luga.”—Lucas 21:36.

9, 10. (a) Con nos por mustra cu nos ta atento pa cosnan spiritual? (b) Den ki sentido e palabra di Dios ta ‘un lampi pa nos pia’ y ‘un lus pa nos caminda’?

⁹ Den e tempo crucial aki, con nos por mustra cu nos ta pagando “mucho mas atencion” na cosnan spiritual? Un manera ta door di asisti cu regularidad na reunion, asamblea y congreso cristian. Tambe nos mester ta studiantenan diligente di Bijbel pa asina nos por hala serca di su Autor, Yehova. (Santiago 4:8) Si nos gana conocemento di Yehova mediante studio personal y reunion, nos lo ta manera e salmista cu a bisa Dios: “Bo palabra ta un lampi pa mi pia y un lus pa mi caminda.”—Salmo 119:105.

¹⁰ Bijbel ta sirbi como ‘un lus pa nos caminda’ ora e ta conta nos di Dios su proposito pa futuro. Tambe e ta ‘un lampi pa nos pia.’ Cu otro palabra, e por yuda nos dal nos siguiente paso ora nos ta enfrenta problemanan dificil di bida. Pa e motibo ei ta vital pa nos “paga mucho mas atencion” ora nos ta reuni pa ricibi instruccion hunto cu nos rumannan y ora nos ta lesa e Palabra di Dios personalmente. E informacion cu nos ta haya lo yuda nos tuma decision sabi y beneficioso cu ta agrada Yehova y haci su curason contento. (Proverbionan 27:11; Isaias 48:17) Con nos por aumenta nos capasidad di consentracion ora nos ta na reunion y durante e oranan di nos studio personal pa asina nos saca e mayor beneficio for di e percuracionnan spiritual di Dios?

Con pa Concentra Miho na Reunion

11. Pakico tin biaha no ta facil pa presta atencion na reunionnan cristian?

¹¹ Tin biaha no ta facil pa presta atencion na reunionnan cristian. Nos mente por distrae facilmente, talbes door di un baby cu ta yora of un hende cu ta cana yega laat y busca luga pa sinta. Despues di un dia largo di trabou, nos por ta simplemente cansa. Podise e orado cu ta papia riba plataforma no ta esun di mas elocuente, y prome cu nos realisa, ata nos mente a drif bai—kisas nos ta asta cabisha! E informacion cu ta ser presenta ta vital, pesei nos mester haci esfuerso pa por concentra miho na reunion di congregacion. Pero con nos por haci esaki?

12. Kico ta pone cu ta bira mas facil pa presta atencion na reunion?

¹² Por lo general, ta mas facil pa presta atencion na reunion ora nos ta bon prepara. Pues, pakico no aparta tempo pa pensa adelanta riba e informacion cu lo ser considera? Ta tuma nos apenas un par di minuut pa dia pa lesa y medita riba un parti di e capitulonan asigna pa e lesamento semanal di Bijbel. Cu un poco planiamento nos por saca tempo tambe pa prepara pa e Studio di Buki di Congregacion y e Studio di Toren di Vigilancia. No ta importa ki ora nos ta scohe, pero un cos ta sigur: Preparacion lo yuda nos presta atencion na e informacion cu ta ser considera na e reunionnan di congregacion.

13. Kico lo por yuda nos mantene nos consentracion riba e informacion cu ta ser considera na reunion?

 ¹³ Ademas di ta bon prepara, algun ruman ta haya cu nan ta mas atento na reunion ora nan ta sinta mas dilanti den Salon di Reino. Otro cosnan cu por evita cu nos mente ta drif bai ta ora nos ta mantene nos bista riba e orado, ora nos ta sigui e lesamento di texto den nos mes Bijbel y ora nos ta tuma nota. Sinembargo, un curason prepara ta mucho mas importante cu cualkier tecnica di consentracion en particular. Nos tin cu comprende e proposito di nos reunimento hunto. Nos ta reuni cu nos rumannan principalmente pa adora Yehova. (Salmo 26:12; Lucas 2:36, 37) E reunionnan ta un medio importante pa ricibi alimentacion spiritual. (Mateo 24:45-47) Ademas, nan ta duna nos oportunidad pa “stimula otro pa stima y haci bon obra.”—Hebreonan 10:24, 25.

14. Kico realmente ta haci un reunion fructifero?

¹⁴ Algun di nos lo por tin tendencia di husga e calidad di un reunion a base di e capasidad di esnan cu ta instrui. Podise ta si e oradonan ta hopi capas, nos ta bisa cu e reunion tawata bon. Pero si na nos parecer nan manera di siña no tawata na nivel, nos tin chens di cambia di opinion. Ta berdad cu e rumannan cu ta duna parti mester haci nan best pa uza arte di siña y specialmente pa alcansa curason. (1 Timoteo 4:16) Pero nos cu ta scucha no mester bira demasiado critico. E capasidad di esnan cu ta instrui ta importante, pero esei no ta e unico factor cu ta contribui na un reunion fructifero. Bo no ta di acuerdo cu nos interes principal mester ta, no riba con bon e orado ta duna su discurso, sino riba con bon nos ta scucha? Ora nos ta asisti na reunion y ta presta atencion na loke ta ser presenta, nos ta adorando Dios na harmonia cu su boluntad.  Esei ta loke ta haci e reunion fructifero. Si nos ta anhela pa gana e conocemento di Dios, nos lo beneficia di e reunionnan sin importa e capasidad di e orado. (Proverbionan 2:1-5) Laga nos haci tur nos posibel anto pa ta determina pa “paga mucho mas atencion” na nos reunionnan.

Beneficia Plenamente di Studio Personal

15. Con studio y meditacion por beneficia nos?

¹⁵ Door di presta “mucho mas atencion” durante nos studio personal di Bijbel y meditacion riba loke nos a studia, nos ta saca hopi beneficio. E tempo cu nos ta lesa y reflexiona riba Bijbel y publicacionnan cristian lo duna nos oportunidadnan precioso pa inculca e berdadnan di e Palabra di Dios den nos curason. Esaki, na su turno, lo tin un efecto profundo riba e manera cu nos ta pensa y actua. Si, lo e yuda nos haya delicia den haci e boluntad di Yehova. (Salmo 1:2; 40:8) Pesei, nos tin cu desaroya nos capasidad di concentra pa esei por beneficia nos ora nos ta studia. Cosnan ta distrae nos facilmente! Interupcionnan menor manera un yamada di telefon of un zonido por pone nos perde nos consentracion. Of podise nos no ta hende cu por concentra mucho ora tras di otro. Talbes nos ta cai sinta cu bon intencion di alimenta nos mes spiritualmente, pero prome cu nos realisa, nos mente a drif bai. Con nos por “paga mucho mas atencion” durante studio personal di e Palabra di Dios?

16. (a) Pakico ta importante pa nos traha un orario pa studio personal? (b) Con abo a traha tempo pa studia e Palabra di Dios?

¹⁶ Ta bon pa traha un orario y scohe un ambiente faborabel pa e studio. Mayoria di nos tin masha poco tempo. Nos bida druk di tur dia ta lastra nos manera un stroom fuerte di awa ta lastra un taki fini. Realmente, na moda di papia, nos tin cu lucha contra e coriente y busca un isla chikito di trankilidad. Nos no por djis warda te ora un oportunidad pa studia presenta su mes. Apostel Pablo a bisa cu nos mester ‘cumpra tempo oportuno.’ Pesei, nos tin cu controla e situacion door di traha tempo pa studia. (Efesionan 5:15, 16, NW) Algun ta aparta un periodo cortico parti mainta ora lo tin menos distraicion. Otronan ta haya cu parti anochi ta duna nan un miho oportunidad. E punto ta cu nos no mag ignora e necesidad vital pa gana conocemento exacto di Dios y di su Yiu. (Huan 17:3) Pesei, laga nos saca tempo pa studio personal anto pega na e oranan cu nos a programa.

17. Kico ta meditacion, y con e por beneficia nos?

¹⁷ Algo masha importante ta meditacion, esta, e proceso di reflexiona riba loke nos a siña door di nos studio. E ta yuda nos hisa e pensamentonan di Dios for di e inkt y papel y hinc’e den nos curason. Meditacion ta yuda nos mira con nos por aplica conseho di Bijbel pa asina nos bira ‘cumplido di e palabra, y no solamente tendedo.’ (Santiago 1:22-25) Ademas, meditacion ta yuda nos hala mas serca Yehova, pasobra e ta permiti nos reflexiona riba su cualidadnan y e manera cu nan ta resalta den e informacion cu ta ser considera durante periodonan di studio.

18. Ki condicion ta necesario pa meditacion eficas?

¹⁸ Pa nos saca pleno beneficio di studio y meditacion, nos tin cu wak pa nos mente no distrae. Pa por traha luga pa capta informacion nobo ora nos ta medita, nos tin cu evita di laga e precupacionnan di tur dia distrae nos. Pa bo medita bo mester tin tempo y bo mester ta so, pero ki refrescante e alimento spiritual y e awanan di e berdad haya den e Palabra di Dios ta!

19. (a) Relaciona cu studio personal, kico a yuda algun ruman concentra pa un tempo mas largo? (b) Kico mester ta nos actitud pa cu studio, y ki beneficionan nos por saca for di e actividad importante aki?

 ¹⁹ Kico nos por haci si nos no por concentra pa un tempo largo y nos mente cuminsa drif bai djis despues cu nos cuminsa studia? Algun a haya cu nan por mehora nan capasidad di concentra ora nan ta studia door di cuminsa cu periodonan mas cortico di studio y haci esakinan gradualmente mas largo. Nos meta mester ta pa dedica suficiente tempo pa studia en bes di pasa pura pura riba e informacion. Nos tin cu cultiva un interes bibo den e tema cu nos ta studiando. Y nos por bai mas a fondo door di haci investigacion den e cantidad inmenso di informacion cu e clase di esclabo fiel y discreto a percura. E beneficionan di scudriña “e profundidadnan di Dios” ta grandi. (1 Corintionan 2:10) Door di haci esei nos por aumenta nos conocemento di Dios y desaroya nos mente. (Hebreonan 5:14) Si nos ta studiantenan diligente di e Palabra di Dios, nos tambe lo ta “capas pa siña otro hende.”—2 Timoteo 2:2.

20. Con nos por cultiva y mantene un relacion intimo cu Yehova Dios?

²⁰ Asistencia na reunion cristian y studia Bijbel personalmente lo yuda nos hopi pa cultiva y mantene un relacion intimo cu Yehova. Aparentemente, esei tawata e caso cu e salmista cu a bisa Dios: “O cuanto mi ta stima Bo lei! E ta mi meditacion henter dia.” (Salmo 119:97) Laga nos haci tur nos posibel anto pa asisti cu regularidad na reunion, asamblea y congreso. Y laga nos saca tempo pa studia Bijbel y medita riba dje. Ora nos ta “paga mucho mas atencion” na e Palabra di Dios nos lo haya un gran bendicion.

[Nota]

Bo Ta Corda?

• Pakico algun cristian Hebreo a drif bai for di e berdadero fe?

• Con nos por keda atento na reunionnan cristian?

• Kico lo yuda nos beneficia di studia Bijbel personalmente y medita riba dje?

[Preguntanan di Estudio]

[Plachi na pagina 11]

E cristiannan Hebreo mester tawata alerta pa e destruccion di Herusalem cu tawata tra’i porta

[Plachi na pagina 13]

Mayornan por yuda nan yiunan beneficia di reunionnan cristian