Bo Manera di Siña Ta Eficas?

TANTO mayornan como ancianonan y predicadonan di e bon nobo mester ta maestro. Mayornan ta siña nan yiunan, ancianonan ta siña e miembronan di e congregacion cristian y e predicadonan di e bon nobo ta siña hende resien interesa. (Deuteronomio 6:6, 7; Mateo 28:19, 20; 1 Timoteo 4:13, 16) Kico bo por haci pa bo manera di siña bira mas eficas? Imita e ehempel y metodo di maestronan capas cu e Palabra di Dios ta menciona. Un di e maestronan ei tawata Esdras.

Siña for di e Ehempel di Esdras

Esdras tawata un sacerdote cu a bini for di e famia di Aron y cu a biba rond di 2.500 aña pasa na Babilonia. Na aña 468 prome cu Era Comun el a bai Herusalem pa promove adoracion puro entre e Hudiunan cu tawata biba einan. (Esdras 7:1, 6, 12, 13) Pa e cumpli cu e tarea aki, e mester a siña e pueblo Dios su Lei. Kico Esdras a haci pa e garantisa cu su manera di siña tawata eficas? El a dal varios paso esencial. Tuma nota di e pasonan aki na Esdras 7:10:

“Esdras a [1] dedica * su curason [2] pa studia e lei di SEÑOR y [3] pa pon’e na practica, y [4] pa siña e hendenan di Israel su statutonan y ordenansanan.” (Esdras 7:10) Laga nos tira un bista breve riba cada un di e pasonan aki y mira kico nos por siña di nan.

“Esdras A Dedica Su Curason”

Mescos cu un cunukero ta prepara su tera door di ploeg e prome cu e planta simiña, Esdras a resa pidi Dios yud’e prepara su curason pa e ricibi Su palabra. (Esdras 10:1) Cu otro palabra, el ‘a inclina su curason’ na siñansa di Yehova.—Proverbionan 2:2.

Di mesun manera, Bijbel ta declara cu Rei Yehosafat “a dedica [su] curason pa busca Dios.” (2 Cronicanan 19:3) Pero contrario na nan, Bijbel ta describi un generacion di Israel “cu no a prepara su curason” como un generacion “cabesura y rebelde.” (Salmo 78:8) Yehova ta mira “e persona scondi di e curason.” (1 Pedro 3:4) Si, “E  ta siña e humildenan su caminda.” (Salmo 25:9) Pesei anto, ta masha importante pa tur maestro djawe sigui e ehempel di Esdras door di, na prome luga, resa pidi Dios yuda nan pone nan curason den e condicion apropiado!

“Pa Studia e Lei di SEÑOR”

Pa Esdras por a bira un maestro capas, el a studia e Palabra di Dios. Si bo ta bai docter pa haya conseho, bo no ta scuch’e cu atencion y haci sigur cu bo ta comprende tur loke e ta bisa y prescribi? Sin duda lo bo hacie pasobra bo bida ta den wega. Pues anto, nos mester pone mucho mas atencion na loke Yehova ta bisa nos of prescribi mediante su Palabra, Bijbel, y “e esclabo fiel y prudente.” Nos mester presta atencion, pasobra su conseho tin di aber cu nos bida mes! (Mateo 4:4; 24:45-47) Claro cu un docter por faya, pero “e lei di SEÑOR ta perfecto.” (Salmo 19:7) Nos no tin nodi busca un segundo opinion mes.

E bukinan di Bijbel, Cronicanan, (cu Esdras a skirbi originalmente den un solo volumen) ta mustra cu Esdras en berdad tawata un studiante diligente. Pa e por a skirbi e bukinan aki el a consulta varios fuente. * E Hudiunan cu a caba di yega for di Babilonia tawatin mester di un resumen di e historia di nan nacion. Nan no tawatin suficiente conocemento di ceremonianan di nan religion, ni di e sirbishi di tempel ni di e tareanan cu Levitanan mester a cumpli cu ne. E listanan di genealogia tawata masha importante pa nan. Esdras a presta atencion special na e asuntonan aki. Te cu e binida di e Mesias, e Hudiunan mester a keda como un nacion cu su propio tera, un tempel, un sacerdocio y un gobernado. Danki na e informacion cu Esdras a compila, adoracion berdadero y unidad por a ser conserva.

Con ta bai cu bo custumbernan di studia si bo compara nan cu esnan di Esdras? Si bo ta studia Bijbel diligentemente, lo bo por bira mes eficas den bo manera di siña otronan loke Bijbel ta bisa.

“Studia e Lei di SEÑOR” Como Famia

No ta solamente como persona individual nos mester e lei di Yehova. Ta bon pa studia Bijbel tambe den seno di famia.

Jan cu Julia, un pareha di Hulanda, a lesa Bijbel na bos halto pa nan yiunan for di dia cu e muchanan a nace. Actualmente Ivo tin 15 aña di edad y Edo tin 14. Ainda nan tin nan studio di famia un bes pa siman. Jan ta splica: “Durante studio nos meta principal no ta pa cubri hopi material, sino pa e muchanan comprende loke nos ta studia.” E ta agrega: “E muchanan ta haci hopi investigacion. Nan ta busca palabranan desconoci. Tambe nan ta wak na ki tempo personahenan di Bijbel a biba, ken nan tawata, ki trabou nan a haci, etcetera. Asina cu nan por a lesa, nan a cuminsa consulta bukinan manera Perspicasia pa Comprende e Scritura, diccionario y enciclopedia. Esaki ta haci e studio di famia mas dushi. Semper e muchanan ta spera e studio di famia ansiosamente.” Un beneficio adicional di esaki ta cu awor e muchanan ta mas miho den idioma cu nan coleganan di klas.

John cu Tini, un otro pareha na Hulanda, a studia cu nan yiu homber, Esli (kende awor tin 24 aña y ta sirbi como pionero den un otro congregacion), y nan yiu mohe, Linda (kende awor tin 20 aña di edad y ta casa cu un excelente ruman homber). En bes di studia un cierto publicacion via e metodo usual di pregunta y contesta, nan tawata adapta e studio di famia na e edad y necesidadnan di e yiunan. Ki metodo nan a uza?

John ta splica cu su yiunan tawata scohe un tema interesante for di e serienan “Pregunta di Lector” (den E Toren di Vigilancia) y “E Punto di Bista Biblico” (den Spierta!). Despues nan tawata presenta loke nan a prepara, y semper esaki tawata hiba na combersacionnan interesante como famia. Di e manera aki e hobennan a haya experencia den haci investigacion y den papia tocante e resultadonan di loke nan a studia. Abo ta “studia e lei” di Yehova cu bo yiunan? Esaki  no solamente lo mehora bo habilidadnan di siña otro hende, sino tambe lo yuda bo yiunan bira maestronan mas eficas.

“Pa Pon’e na Practica”

Esdras a aplica loke el a siña. Por ehempel, tempo cu e tawata na Babilonia ainda, e por a hiba un bida trankil. Apesar di esei, ora el a realisa cu e por a yuda su pueblo den estranheria, el a bandona e comodidadnan di Babilonia y muda bai e stad leu di Herusalem cu tur su incumbinencia, problema- y peligernan. Ta claro anto cu Esdras no solamente a gana conocemento di Bijbel, pero e tawata cla pa actua na harmonia cu loke el a siña.—1 Timoteo 3:13.

Despues, ora Esdras tawata na Herusalem, el a mustra un bes mas cu e ta aplica loke el a siña y predica. Esaki tawata bisto ora el a tende cu e hombernan Israelita a casa cu mohe pagano. E relato di Bijbel ta conta nos cu el ‘a scheur su paña y su mantel, y a ranca poco cabei for di su cabes y su barba, y a cai sinta tur babuca.’ E tawatin asta ‘berguensa di hisa su cara na’ Yehova.—Esdras 9:1-6.

Su studio di e Lei di Dios tawatin hopi efecto riba dje! Esdras tawatin un bista cla di kico lo tawata e consecuencianan si e pueblo desobedece. E cantidad di Hudiunan cu a bai nan patria bek tawata poco. Si nan a drenta matrimonio cu e paganonan rond di nan, cu tempo nan lo a mescla cu esakinan, y lo tawata facil pa adoracion berdadero disparce for di riba tera!

Felismente, Esdras su ehempel di temor y celo pa Dios a motiva e Israelitanan pa drecha nan bida. Nan a manda nan esposanan stranhero bai. Denter di tres luna tur cos tawata na ordo. Esdras su lealtad personal na Dios su Lei a contribui hopi na su manera eficas di siña.

Mescos ta cierto awe. Un tata cristian a bisa: “Bo yiunan no ta haci loke bo ta bisa; nan ta haci loke bo ta haci!” E mesun principio ta aplicabel den e congregacion cristian. Ancianonan cu ta pone un bon ehempel por spera cu e congregacion ta reacciona riba loke nan ta siña nan.

“Pa Siña e Hendenan di Israel Su Statutonan y Ordenansanan”

Tin un otro motibo pakico Esdras su manera di siña tawata eficas. E no a siña hende su propio ideanan pero el a siña nan e “statutonan y ordenansanan.” Eseinan tawata e statutonan of leinan di Yehova. Como sacerdote, esaki tawata su responsabilidad. (Malakias 2:7) Tambe el a siña hende husticia, y a duna un ehempel di loke el a siña door di cumpli cu e leinan di un manera husto y imparcial, di acuerdo cu e normanan di husticia. Ora esnan cu tin autoridad manifesta husticia, esei lo hiba na stabilidad y resultadonan permanente. (Proverbionan 29:4) Asina tambe, ancianonan cristian, mayornan y predicadonan di Reino cu conoce e Palabra di Dios bon, lo edifica stabilidad spiritual ora nan siña Yehova su statuto y husticia na e congregacion, na nan famia y otro hende interesa.

Bo no ta di acuerdo cu bo manera di siña por bira mas eficas si bo imita e ehempel di fiel Esdras plenamente? Si ta asina, ‘dedica bo curason, studia e lei di Yehova y pon’e na practica, y siña hende Yehova su statutonan y ordenansanan.’—Esdras 7:10.

[Nota]

[Cuadro/Plachi na pagina 22]

KICO A HACI ESDRAS SU MANERA DI SIÑA EFICAS?

1. El a pone su curason den un condicion apropiado

2. El a studia e Lei di Yehova

3. El a pone un bon ehempel den aplica loke el siña

4. El a dedica su mes na siña hende e punto di bista di Bijbel