Bendicion Rico pa Esnan Cu Ta Cana den e Camindanan di Yehova

BO A yega di subi un sero? Si ta asina, probablemente lo bo a sinti como si fuera bo ta riba dak di mundo. Ki dushi tawata pa respira e aire fresco, pa mira cosnan na distancia leu y pa absorba e bunitesa di naturalesa! Podise e ansiedadnan di e mundo eibou a parce di menos importancia.

Masha poco hende ta haci e tipo di excursionnan aki. Pero si bo ta un cristian dedica, kisas pa algun tempo caba bo tin un estilo di bida cu por ser compara cu un paseo den un paisahe yen di sero. Sin duda, mescos cu e salmista di antiguedad, bo a resa pidi: “Haci mi conoce bo camindanan, o SEÑOR; siña mi bo bereanan.” (Salmo 25:4) Bo ta corda con bo a sinti ora cu bo a subi e sero di e cas di Yehova pa prome bes y cuminsa cana den e luganan halto? (Mikeas 4:2; Habacuk 3:19) Fuera di tur duda, no a dura masha cu bo a realisa cu si bo cana den e camindanan eleva aki di adoracion puro bo ta haya proteccion y goso. Bo a cuminsa haya e mesun sintimentonan cu e salmista cu a bisa: “Bendiciona ta e pueblo cu conoce e zonido gososo! Nan ta cana, o SEÑOR, den e lus di bo semblante.”—Salmo 89:15.

Sinembargo, sa sosode cu esnan cu ta cana den terenonan yen di sero tin cu lucha cu subidanan halto y steil. Nan pianan ta cuminsa haci dolo y nan ta cansa. Nos tambe por haya nos cu dificultad den nos sirbishi na Dios. Podise ultimamente nos pianan a cuminsa bira pisa. Con nos por bolbe haya nos vigor y goso? E prome paso ta: Reconoce e superioridad di Yehova su camindanan.

Yehova Su Leinan Eleva

Yehova su camindanan ta ‘mas halto cu esnan di hende’, y su adoracion a ser ‘estableci como hefe di e seronan halsa mas halto cu e seritonan.’ (Isaias 55:9; Mikeas 4:1) Yehova su sabiduria ta “e sabiduria di ariba.” (Santiago 3:17) Su leinan ta superior na tur otro. Por ehempel, tempo cu e Cananeonan tawata haci sacrificio cruel di mucha, Yehova a duna e Israelitanan leinan cu tawata moralmente eleva y caracterisa pa compasion. El a bisa nan: “No faborece e pober, ni honra esun poderoso. . . . “E stranhero . . . mester ta pa boso manera un yiu di tera meimei di boso; stim’e manera bo mes.”—Levitico 19:15, 34.

Diessinco siglo despues, Hesus a duna mas ehempel di Yehova su ‘lei glorioso.’ (Isaias 42:21) Den e Sermon Riba Sero el a bisa su disipelnan: “Stima boso enemigonan, . . . y haci  oracion pa esnan cu ta . . . persigui boso, pa boso por ta yiunan di boso Tata cu ta den shelo.” (Mateo 5:44, 45) “Pesei, tur loke boso kier pa hende haci pa boso, haci mescos pa nan.” Y el a agrega: “Pasobra esaki ta e Lei y e Profetanan.”—Mateo 7:12.

E leinan eleva aki ta influencia curason di hende receptivo, y ta motiva nan pa imita e Dios cu nan ta adora. (Efesionan 5:1; 1 Tesalonicensenan 2:13) Pensa un rato riba e transformacion cu a tuma luga den caso di Pablo. E prome bes cu Bijbel a papia di dje tawata ora el ‘a consenti cu e morto’ di Esteban y a trata di “destrui e iglesia” cruelmente. Djis un par di aña despues el a trata e cristiannan na Tesalonica cu cariño manera “un menchi [mama di lechi cu] ta cuida su mes yiunan cu ternura.” Siñansa dibino a cambia Pablo di un persiguido pa un cristian cariñoso. (Echonan 8:1, 3; 1 Tesalonicensenan 2:7) Nos por ta sigur cu e tawata contento cu e siñansa di Cristo a cambia su personalidad. (1 Timoteo 1:12, 13) Con un gratitud asina por yuda nos sigui cana den e caminda eleva di Dios?

Cana cu Aprecio

Subidonan di sero ta disfruta di bistanan espectacular cu seronan halto ta ofrece. Tambe nan ta siña disfruta di cosnan chikito cu nan ta topa na caminda, manera un baranca straño, un flor bunita of e ratico cu nan haya un animal salbahe mira. Den sentido spiritual nos mester ta atento pa ripara e recompensanan—grandi y chikito—cu esnan cu ta cana cu Dios ta ricibi. Eseinan por duna nos briyo atrobe y transforma un paseo di cansancio den un caminata yen di energia. E ora ei nos lo ta di acuerdo cu e palabranan di David: “Laga mi tende bo misericordia den mainta, pasobra den bo mi ta confia; siña mi e caminda cu mi mester cana.”—Salmo 143:8.

Mary, kende tin hopi aña den e caminda di Yehova, ta bisa: “Ora mi ta observa Yehova su creacion, mi ta mira no solamente e diseño complica sino tambe Dios su personalidad amoroso. Sea cu ta un animal grandi, un parha of un insecto, cada un ta un mundo chikito masha fasinante. E mesun goso nos ta haya segun cu berdadnan spiritual ta bira mas y mas cla atrabes di añanan.”

Con nos aprecio por crece? Di un banda, door di no mira loke Yehova ta haci pa nos como algo hewon. Pablo a skirbi: “Haci oracion sin stop; sea gradicido den tur cos. ”—1 Tesalonicensenan 5:17, 18; Salmo 119:62.

Studio personal ta yuda nos cultiva un spirito gradicido. Pablo a urgi e cristiannan di Colosas pa: “Cana den [union cu Cristo Hesus], . . . y abunda den gradicimento.” (Colosensenan 2:6, 7) Door di lesa Bijbel y medita riba loke nos ta lesa, nos fe ta bira mas fuerte y nos ta haya un relacion mas estrecho cu e Autor di Bijbel. Tur su paginanan ta contene tesoro cu por incita nos pa “abunda den gradicimento.”

Nos caminda ta bira mas facil tambe ora nos ta sirbi Yehova hunto cu nos rumannan. Un salmista a bisa di su mes: “Mi ta compañero di tur esnan cu ta teme bo.” (Salmo 119:63) Algun di nos momentonan mas felis ta esnan cu nos ta pasa na asambleanan cristian of otro caminda hunto cu nos rumannan. Nos ta reconoce cu nos precioso famia cristian rond mundo ta debe su existencia na Yehova su camindanan eleva.—Salmo 144:15b.

Fuera di aprecio, un sentido di responsabilidad lo fortalece nos pa sigui progresa riba Yehova su camindanan eleva.

 Cana na un Manera Responsabel

Hende cu tin un sentido di responsabilidad ta reconoce cu ora nan ta subi sero, nan mester tene cuidou pa nan no perde of desvia y bai mucho na rand di barancanan steil. Como cu nos tin boluntad liber, Yehova ta duna nos un grado rasonabel di libertad den loke nos ta haci den bida. Pero pa uza e libertad ei bon, nos mester tin un sentido di responsabilidad pa nos por cumpli cu nos obligacionnan cristian.

Por ehempel, Yehova ta confia cu su sirbidonan ta cumpli cu nan obligacionnan na un manera responsabel. E no ta fiha pa nos cuanto energia y tempo nos mester dedica na actividadnan cristian ni cuanto nos mester contribui financieramente of den otro manera. Al contrario, Pablo su palabranan na e Corintionan ta conta pa nos tur: “Laga cada un haci manera el a propone den su curason.”—2 Corintionan 9:7; Hebreonan 13:15, 16.

Dunamento cristian na un manera responsabel ta encera comparti e bon nobo cu otro hende. Tambe nos ta mustra cu nos ta responsabel door di contribui cu e obra mundial di Reino. Un anciano cu yama Gerhardt ta splica cu e cu su casa a aumenta nan contribucionnan considerablemente despues cu nan a bishita un asamblea na Europa Oriental. “Nos a ripara cu nos rumannan einan tin masha poco cos material; pero nan ta aprecia nos literatura biblico asina tanto”, el a bisa, “cu nos a dicidi cu nos ta bai duna mas tanto posibel na nos rumannan cu ta den necesidad den otro paisnan.”

Con pa Aumenta Nos Awante

Pa bo por cana den sero bo mester tin resistencia. Hende cu ta cana ta train ki ora cu nan tin chens, y nan ta haci caminatanan cortico pa prepara nan mes pa caminatanan largo. Di mes manera, Pablo a recomenda nos pa keda ocupa den actividadnan teocratico pa nos por keda den bon condicion spiritual. Pablo a bisa cu esnan cu ta desea di “cana na un manera digno di Señor”, y ser “fortifica cu tur poder”, mester “duna fruta den tur bon obra.”—Colosensenan 1:10, 11.

Bon motivacion ta duna e persona cu ta subi sero perseverancia. Con asina? Ora e tin un meta cla na bista manera un sero cu ta keda na un distancia, y e ta enfoca riba dje, esei ta stimul’e pa sigui padilanti. Y ora e yega na sitionan cu e ta reconoce segun cu e ta haci su caminata, e por calcula cuanto mas e falta pa yega su meta final. Ora e wak bek riba e distancia cu el a cana caba, e ta haya un satisfaccion.

Asina tambe nos speransa di biba pa semper ta sostene nos y motiva nos. (Romanonan 12:12) Mientras nos ta cana den e camindanan di Yehova, nos ta haya satisfaccion ora nos ta pone metanan cristian y despues ta logra nan. Y nos ta haya un goso profundo ora nos reflexiona riba nos hopi añanan di fiel sirbishi of ora nos observa e cambionan cu nos a haci den nos personalidad!—Salmo 16:11.

Pa por cubri distancia grandi y conserva energia, ta bon pa cana na un ritmo constante. Di mes manera, un bon rutina cu ta encera sirbishi di veld y asistencia regular na reunion lo yuda nos move padilanti pa logra nos meta. Pesei Pablo a anima su compañeronan creyente: “Laga nos sigui riba e caminda cu nos a recore caba.”—Filipensenan 3:16, Beibel na papiamentu koriente.

Claro cu no ta nos so ta cana riba e camindanan di Yehova. Pablo a skirbi: “Laga nos considera con pa stimula otro pa stima y haci bon obra.” (Hebreonan 10:24) Si nos ta den compania cu otro hende spiritual, lo bira mas facil pa nos sigui cana firme riba e caminda hunto cu nos rumannan.—Proverbionan 13:20.

Finalmente, y loke ta mas importante, nunca nos mester lubida e poder cu Yehova ta duna. Hende cu tin Yehova como nan fortalesa, lo “bai di forsa pa forsa.” (Salmo 84:5, 7) Aunke de bes en cuando nos tin cu pasa door di situacionnan dificil, cu yudansa di Yehova nos por logra.