1. Matrimonio

Hende tin diferente punto di bista tocante di matrimonio y di loke ta necesario pa por tin un matrimonio feliz.

SPLICACION: Matrimonio ta un areglo cu Dios a institui. Pues, e sa loke ta necesario pa un pareha por ta feliz. (Marco 10:​6-9) Ora tanto e esposo como e esposa ta enfoca riba e necesidad di nan casa, nan lo tin un matrimonio feliz. Un esposo cu ta stima su esposa, lo cuid’e y trat’e bon. Anto un esposa cu ta respeta su esposo, lo apoy’e y papia cu ne na un manera respetuoso.

BIJBEL SU GUIA TA DUNA BON RESULTADO: Quang y Thi, di Vietnam, tabata pensa cu nunca nan lo no por tin un matrimonio feliz. Quang hopi bes no tabata amabel. El a bisa: “Mi no tabata worry con Thi tabata sinti, y hopi bes mi tabata humi’e.” Thi tabata kier a divorcia. El a bisa: “Mi tabata sinti cu mi no por a confia ni respeta mi esposo mas.”

Cu tempo, Quang y Thi a siña loke Bijbel ta bisa y con pa aplica Efesionan 5:33 den nan matrimonio. Quang a bisa: “E versiculo aki a yuda mi mira cu mi mester ta amabel, ... y cu mi mester laga Thi sinti cu mi ta stim’e, y cu mi ta cuid’e materialmente, fisicamente y emocionalmente. Ora mi trat’e asina e ta stima mi mas y mi ta gana su respet.” Anto Thi a bisa: “Ora mi aplica e conseho na Efesionan 5:33 y respeta mi esposo, mi ta sinti mi mas trankil, stima y proteha.”

 2. Con pa Trata Otro Hende

Hende hopi bes ta trata otro hende malo pa motibo di nan nacionalidad, religion of orientacion sexual.

SPLICACION: Bijbel no ta siña nos pa odia hende cu tin un nacionalidad diferente of cu ta homosexual. Contrario na esey, Bijbel ta anima nos pa trata tur hende cu respet, sin importa nan nacionalidad of clase social. (Echonan 10:34) Hasta si nos no ta di acuerdo cu loke otro hende ta kere of haci, toch nos por trata nan na un manera amabel y respetuoso.—Mateo 7:12.

BIJBEL SU GUIA TA DUNA BON RESULTADO: Daniel a siña cu e mester a trata hende di Asia comosifuera nan tabata un menasa pa su pais. E tabata odia cualkier persona cu tabatin un background Asiatico, y hopi bes e tabata insulta nan den publico. Daniel a bisa: “Mi tabata pensa cu mi tabata ‘defende mi pais’ ... E no a ni pasa den mi mente cu loke mi tabata pensa y haci tabata robes.”

Eventualmente, Daniel a siña loke Bijbel ta bisa. Daniel a bisa: “Mi mester a cambia mi manera di pensa completamente ... Mi mester a mira hende manera Dios ta mira nan, esta, cu nos tur ta mescos, sin importa di unda nos ta bin.” Daniel a describi con e ta sinti awor ora e cera conoci cu hende. El a bisa: “Awor, mi no ta ni pensa riba nan nacionalidad. Mi ta stima tur sorto di hende, y mi tin amigo rond mundo.”

 3. Placa

Hopi hende ta core tras di placa pa nan por bira feliz y tin un mihor futuro.

SPLICACION: Ta berdad cu nos tin mester di placa, pero placa no ta garantisa nos felicidad ni un futuro sigur. (Proverbionan 18:11; 23:​4, 5) En bes di esey, berdadero felicidad y un futuro sigur ta bin ora nos aplica Dios su sabiduria cu tin den Bijbel.—1 Timoteo 6:​17-19.

BIJBEL SU GUIA TA DUNA BON RESULTADO: Loke tabata importante pa Cardo, un homber na Indonesia, tabata pa acumula rikesa. El a bisa: “Mi tabatin e cosnan cu mayoria di hende ta soña di dje... . Mi por a biaha, cumpra auto, cas y cos luhoso.” Pero, su rikesa no a dura hopi. Cardo a bisa: “Un hende a estafa mi y den un frega di wowo mi a perde tur e placa cu mi a traha asina duro y asina tanto tempo pa haya... . Mi a traha duro pa varios aña pa bira rico. Pero, na final mi a keda desapunta, pasobra mi no tabatin nada, y mi tabata sinti cu mi no tabata bal nada.”

Cu tempo, Cardo a cuminsa aplica Bijbel su conseho tocante placa. E no ta uza tur su energia mas pa core tras di rikesa. El a scoge pa hiba un bida mas simpel. El a bisa: “Awor mi ta sinti cu mi tin berdadero rikesa, pasobra mi tin un bon amistad cu Dios ... Mi por drumi bon anochi, y mi ta realmente feliz.”

 4. Sex

Hende tin diferente opinion tocante loke ta aceptabel relaciona cu sex.

SPLICACION: Bijbel a pone limite na con nos por expresa nos deseonan sexual. E palabra “fornicacion” ta inclui adulterio, prostitucion, relacion sexual entre dos hende cu no ta casa cu otro, homosexualidad y relacion sexual cu bestia. (1 Corintionan 6:​9, 10) Sex ta un bunita regalo di Dios. Anto Dios kier pa solamente un homber y un muher cu ta casa cu otro disfruta di e regalo ey.—Proverbionan 5:​18, 19.

BIJBEL SU GUIA TA DUNA BON RESULTADO: Un señora na Australia cu yama Kylie a bisa: “Tempo mi tabata soltera, mi tabata pensa cu si mi tene relacion sexual, lo mi sinti mi stima y sigur di mi mes, pero a sosode net lo contrario. Mi tabata sinti insigur y cu hende no tabata stima mi.”

Mas despues, Kylie a siña y aplica loke Bijbel ta bisa tocante sex. El a bisa: “Mi por mira cu Dios su normanan ta proteha nos di dolor y tristeza ... Mi ta haci cos manera Jehova kier. Anto awor mi tin un casa cu ta laga mi sinti mi stima y sigur di mi mes. Aplicando Bijbel su guia a scapa mi di hopi dolor di cabes!”