LOKE ALGUN HENDE TA BISA

E Israelitanan tabata adora un “dios di guera” cu gusta dramamento di sanger.

LOKE BIJBEL TA BISA

E nacionnan cu Israel a derota tabata masha malbado; nan tabata sumamente violento y inmoral pasobra nan tabata tene relacion sexual cu bestia, cu nan propio famia y nan tabata sacrifica mucha. Despues cu pa varios siglo Dios a duna nan oportunidad pa cambia, el a bisa e Israelitanan: “Ta cu tur esakinan e nacionnan, cu mi ta bay core cu nan saca nan for di boso dilanti, a wordo contamina.”—Levitico 18:21-25; Jeremias 7:31.

“Ta pa motibo di e maldad di e nacionnan aki SEÑOR bo Dios ta core cu nan for di bo dilanti.”—Deuteronomio 9:5.

LOKE KISAS BO A RIPARA

Ora tin guera, lidernan religioso ta bisa cu Dios ta na nan banda. E buki The Causes of War ta bisa: “Semper religion a hunga un rol importante den tur guera.”

LOKE BIJBEL TA BISA

Dios no a duna autorisacion na cristiannan pa bringa contra nan enemigonan den guera. Apostel Pablo a bisa su compañeronan cristian: “Si ta posibel, te asina leu cu ta depende di boso, keda na paz cu tur hende. No tuma venganza.”—Romanonan 12:18, 19.

Hesus tampoco no a manda su siguidornan pa bay guera. Al contrario, el a bisa nan: “Sigui stima boso enemigonan y haci oracion pa esnan cu ta persigui boso, pa boso por demostra cu boso ta yiu di boso Tata cu ta den cielo.” (Mateo 5:44, 45) Hasta si un nacion bay guera, cristiannan cu ta biba eynan si lo keda neutral pasobra nan “no ta parti di mundo.” (Juan 15:19) Dios kier pa su sirbidornan den tur nacion stima nan enemigonan y pa nan keda separa di mundo. Pues, bo ta kere cu lo e apoya un pais of grupo ora tin guera?

“Mi reino no ta parti di e mundo aki. Si mi reino tabata parti di e mundo aki, mi sirbidornan lo a bringa pa mi no ser entrega den man di e hudiunan. Ma echo ta cu mi reino no ta di aki.”—Juan 18:36.

LOKE ALGUN HENDE TA BISA

Guera ta algo inevitabel. E buki War and Power in the 21st Century ta bisa: “Guera lo no caba pasobra no tin ningun speransa cu paz mundial y permanente lo reina den e siglo aki.”

LOKE BIJBEL TA BISA

Guera lo caba ora hende no ta desea di mata mas y ora no tin arma mas. Pesey e Reino di Dios cu ta un berdadero gobierno den cielo pronto lo elimina tur arma cu tin riba nos planeta y siña hende con pa keda na paz cu otro hende. Bijbel ta priminti cu Dios lo rectifica asunto “pa nacionnan leu y poderoso. E ora ey nan lo bati nan spadanan traha ploeg cu nan, y nan lo bati nan lansanan traha sker-pa-snoei cu nan; nacion lo no lanta spada contra nacion, y nunca mas nan lo no train pa guera.”—Mikeas 4:3.

Bijbel ta bisa cu bou di e Reino di Dios lo no tin ningun gobierno mas cu ta lucha pa e interesnan di nan propio pais, tampoco lo no tin ningun maneho inhusto mas cu ta pone ciudadanonan lanta contra gobierno ni prehuicio cu ta causa division. Como resultado lo no tin guera mas. Dios ta priminti: “Nan lo no causa daño ni destruccion ... pasobra Tera lo ta yen di e conocemento di SEÑOR, manera awa ta tapa lama.”—Isaias 11:9.

“E ta haci gueranan stop te na e fin di Tera; e ta kibra boog y ta corta lansa na dos; e ta kima e garoshinan cu candela.”—Salmo 46:9.