Pero algun pareha no ta haci bon uzo di tecnologia. Esey por causa e siguiente problemanan:

• Nan ta pasa menos tempo hunto.

• Nan ta trece trabou cas sin cu esaki ta necesario.

• Nan por cuminsa sconde cos for di otro y hasta bira infiel.

ORA BOSO TA HUNTO

Un esposo cu yama Micheal a bisa: “Tin biaha ora ami cu mi esposa ta hunto, ta comosifuera e no t’ey. E ta mucho ocupa riba su telefon y e ta bisa: ‘Ta awor mi tin tempo pa ta riba mi telefon.’” Un esposo cu yama Jonathan a bisa cu na momentonan asina “un pareha por ta fisicamente banda di otro y toch sinti cu nan ta leu for di otro.”

PENSA RIBA ESAKI: Bo tin custumber di atende yamada of mensahe di telefon ora bo mester ta dedicando tempo na bo casa?—EFESIONAN 5:33.

TRABOU

Cierto tipo di trabou ta rekeri pa nan trahadornan ta disponibel tur ora. Pero tin hende ta pasa demasiado tempo ta traha ora nan ta na cas, aunke nan trabou no ta exigi esey. Un esposo cu yama Lee a admiti cu “ta dificil pa keda sin wak cada yamada of mensahe di telefon cu mi ta haya for di trabou durante e tempo cu mi a aparta pa pasa cu mi casa.” Un esposa cu yama Joy a bisa: “Mi ta traha for di cas. Pues, ta dificil pa sa ki ora trabou mester stop. No ta facil pa haya un balansa.”

PENSA RIBA ESAKI: Bo ta scucha cu atencion ora bo casa ta papia cu bo?—LUCAS 8:18.

FIELDAD

Un encuesta a mustra cu hopi pareha casa sa pleita pasobra loke esun a pone riba red social a lanta sospecho cerca e otro. Dies porciento di esnan cu a participa den e encuesta a admiti cu nan a yega di pone cos online cu nan no tabata kier pa nan pareha haya sa di dje.

No ta pornada hopi hende ta haya cu red social por tin yen di peliger scondi pa un pareha casa y e por hasta habri e caminda pa nan comete adulterio. De echo, hopi abogado ta bisa cu red social ta hiba na hopi divorcio.

PENSA RIBA ESAKI: Bo sa sconde bo combersacionnan cu un hende di sexo opuesto for di bo casa?—PROVERBIONAN 4:23.

PONE PRIORIDAD

Un persona cu keda sin come, lo haya problema di salud. Di mes manera, un persona cu keda sin pasa tempo cu su casa, lo haya problema den su matrimonio. —Efesionan 5:28, 29.

Papia cu bo casa pa wak cua di e sugerencianan akibou boso lo kier aplica, of skirbi otro cos cu boso lo kier haci pa stop tecnologia di tin un efecto negativo riba boso matrimonio.

• Tur dia come por lo menos un cuminda hunto

• Scoge momento specifico cu nos tur dos ta pone nos aparatonan electronico un banda

• Schedule tempo pa haci cos leuk hunto

• Paga nos aparatonan electronico anochi of pone nan leu for di unda nos ta drumi

• Aparta 15 minuut tur dia pa papia cu otro sin cu nos aparatonan electronico ta banda di nos

• Scoge un orario tur dia pa paga Internet