Dicon Hende No Tin Respet Mas pa Otro?
DICON TA IMPORTANTE PA MUSTRA RESPET NA OTRO HENDE?
Ora nos mustra respet na otro hende, esey por calma un situacion tenso y evita cu un situacion malo ta bira pio.
-
Un proverbio den Bijbel ta bisa: “Un contesta suave ta calma rabia, pero palabra cu ta causa dolor ta lanta rabia.” (Proverbionan 15:1) Ora hende papia of haci cos cu ta mustra falta di respet, ta como si fuera nan ta agrega gasolin na un candela y hopi biaha e consecuencia ta desastroso.
-
Hesus a bisa: “Loke curason ta yen di dje, boca ta papia.” (Mateo 12:34) Si nos ta demostra falta di respet ora nos ta papia cu otro hende, esey por ta indicacion di un problema mas serio. De echo, nos falta di respet por mustra con realmente nos ta sinti di hende di otro rasa, tribu, nacionalidad of posicion social.
Den un encuesta recien cu ser haci cu mas cu 32.000 hende for di 28 pais, 65 porciento di e participantenan a bisa cu nunca prome nan no a yega di mira asina tanto hende ta falta otro respet.
LOKE BO POR HACI
Sea cu bo ta na scol of na trabou, respeta tur hende, hasta hende cu no tin mesun punto di bista cu bo. Busca cos cu boso por tin en comun. Esey lo yuda bo pa no critica of husga un persona.
Trata otro hende manera bo kier pa nan trata bo. Si bo ta trata otro hende bon y na un manera husto, e chens ta grandi cu nan lo trata bo mescos.
Sea cla pa pordona. No pensa mesora cu un persona cu a hurt bo a haci esey pa malo. Kisas no tabata su intencion y ta mihor pa laga e ofensa pasa.
LOKE TESTIGONAN DI JEHOVA TA HACI
Sin importa unda nos ta biba of traha, testigonan di Jehova ta trata tur hende cu respet, y nos ta anima otro hende pa haci mescos.
Nos ta ofrece curso di Bijbel gratis na tur hende, pero nos no ta forsa niun hende pa acepta nos creencianan of nos punto di bista. En bes di esey, nos ta sigui e conseho cu tin den Bijbel y ta papia tocante nos creencianan “na un manera suave y cu respet profundo.”—1 Pedro 3:15; 2 Timoteo 2:24.
Nos no ta discrimina hende. Tur hende cu kier siña loke Bijbel ta bisa ta bon bini na nos reunionnan. No ta importa ki nacionalidad of posicion social nan tin. Nos ta haci nos best pa “respetá tur hende,” hasta si nos no ta di acuerdo cu e decisionnan cu nan ta tuma.—1 Pedro 2:17, Bijbel na papiamentu koriente.
Nos ta respeta e autoridad di e gobierno caminda nos ta biba. (Romanonan 13:1) Nos ta obedece ley y paga belasting. Maske nos ta keda neutral den asunto politico, nos ta respeta e derecho cu otro hende tin pa tuma nan propio decision pa loke ta trata asunto politico.
