LES 05
Bijbel Ta Dios Su Mensahe pa Nos
Jehova a duna nos un regalo maraviyoso: Bijbel. Bijbel ta consisti di 66 buki chikito. Awor, kisas bo ta puntra bo mes: Con hende a logra haya e regalo aki? Ken ta Bijbel su autor? Laga nos wak kico ta contesta pa e preguntanan ey.
1. Si hende a skirbi Bijbel, dicon nos ta bisa cu e mensahe cu tin den Bijbel ta bin di Dios?
Mas o menos 40 homber a skirbi Bijbel. Bijbel a ser skirbi durante un periodo di mas o menos 1.600 aña, cuminsando for di aña 1513 prome cu Cristo te cu mas o menos aña 98 despues di Cristo. E escritornan di Bijbel tabata masha diferente for di otro. Por ehempel, algun di nan tabata wardador di carne, piscador of rey. A pesar di esey, loke e escritornan a skirbi no ta contradeci otro. Con esey ta posibel? Wel, pasobra ta Dios ta Autor di Bijbel. Cu otro palabra, tur loke tin skirbi den Bijbel ta bin di Dios. (Lesa 1 Tesalonicensenan 2:13.) E escritornan no a skirbi nan mes pensamentonan. Mas bien, nan “a papia di parti di Dios segun cu spirito santo tabata guia nan.” a (2 Pedro 1:21) Dios a uza su spirito santo pa inspira of guia e hombernan aki pa skirbi su pensamentonan.—2 Timoteo 3:16.
2. Ken por beneficia di loke Bijbel ta siña?
Hende di “tur nacion, tribu, idioma y pueblo” por beneficia di e bon noticia cu tin den Bijbel. (Lesa Revelacion 14:6.) Dios a percura pa Bijbel ta den mas tanto idioma cu cualkier otro buki. Awe, casi tur hende por haya un Bijbel pa nan lesa, sin importa unda nan ta biba of ki idioma nan ta papia.
3. Con Jehova a proteha Bijbel?
E escritornan a skirbi Bijbel riba material cu no tabata duradero, manera cuero di bestia. Pero pa Bijbel por a keda te awe, algun hende cu tabatin masha aprecio pa Bijbel a traha varios copia di Bijbel na man. Nan a haci sigur di copia exactamente loke tabatin skirbi. Aunke algun gobernante y lider religioso a purba di caba cu Bijbel, tin hende a risca nan bida pa preserva Bijbel. Jehova no a laga nada ni niun hende strob’e di laga su Palabra yega cerca nos. Bijbel ta bisa: “E palabranan di nos Dios ta keda pa semper.”—Isaias 40:8.
KICO MAS NOS POR SIÑA?
Laga nos wak con Dios a inspira algun homber pa skirbi Bijbel, con el a proteha Bijbel y con el a haci Bijbel disponibel pa tur hende.
4. Bijbel ta bisa ken ta su Autor
Pasa e VIDEO. Despues, lesa 2 Timoteo 3:16 y analisa e siguiente preguntanan:
-
Si ta hende a skirbi Bijbel, dicon Bijbel ta ser yama Dios su Palabra?
-
Bo ta kere cu di berdad Dios por a laga e escritornan sa kico ta su pensamentonan?
Un doño di trabou ta laga un secretario skirbi un carta. Pero e mensahe cu tin den e carta ta bin di e doño di trabou. Den caso di Bijbel ta mescos, hende a skirbie, pero tur loke tin skirbi den Bijbel ta bin di Dios
5. Bijbel a keda te awe a pesar cu algun hende a purba di destruye
Bijbel ta bin di Dios. Pesey, Dios a haci sigur pa Bijbel keda te den nos tempo. A traves di historia, algun hende cu tin autoridad a purba di destrui Bijbel. Ademas, e lidernan religioso no tabata kier pa hende lesa Bijbel. A pesar di oposicion y menasa di morto, hopi hende a risca nan bida pa preserva Bijbel. Pa wak ehempel di un homber cu a haci esaki, pasa e VIDEO. Despues, analisa e siguiente preguntanan:
-
Awor cu bo sa loke algun hende a haci pa preserva Bijbel, bo a haya mas gana di les’e? Dicon bo ta bisa esey?
Lesa Salmo 119:97. Despues, analisa e siguiente pregunta:
-
Kico a motiva hopi hende pa risca nan bida pa traduci y distribui Bijbel?
6. Bijbel ta un buki pa tur hende
Bijbel ta e buki cu mas a ser traduci y distribui den historia. Lesa Echonan 10:34, 35. Despues, analisa e siguiente preguntanan:
-
Dicon Dios kier pa su Palabra, Bijbel, ser traduci den asina tanto idioma y distribui na gran escala?
-
Di loke nos a trata den e les aki, kico bo ta gusta tocante Bijbel?
Casi
100%
di poblacion di mundo
por haya Bijbel na un idioma cu nan ta compronde
Bijbel ta disponibel na mas cu
3.000
idioma,
sea completo of un parti di dje
5.000.000.000
E cifra aki ta indica mas o menos cuanto Bijbel a ser produci,
mucho mas tanto cu cualkier otro buki
LOKE HENDE SA BISA: “Bijbel ta djis un buki cu hende a skirbi hopi tempo pasa.”
-
Kico abo mes ta pensa?
-
Ki prueba tin cu Bijbel ta Dios su Palabra?
RESUMEN
Bijbel ta Dios su Palabra. Ademas, Dios a haci sigur cu Bijbel ta disponibel pa henter humanidad.
Repaso
-
Con Dios a yuda algun homber skirbi Bijbel?
-
Kico bo ta pensa tocante loke a ser haci pa Bijbel por ta disponibel pa nos awe?
-
Con bo ta sinti bo awor cu bo sa cu Dios a haci asina tanto esfuerso pa comunica cu bo?
MAS INFORMACION INTERESANTE
Lesa tocante historia di Bijbel: For di tempo di manuscrito antiguo te na traduccion moderno.
Con Bijbel A Keda Existi te den Nos Tempo? (¡Despertad! di november 2007)
Wak con Bijbel a keda te awe a pesar di tres peliger grandi.
“Bijbel Su Storia di Sobrevivencia” (E Toren di Vigilancia Num. 4 2016)
Wak con algun hende a risca nan bida pa traduci Bijbel.
Hende a traha hopi copia di Bijbel na man y a traduci Bijbel diferente biaha. Con bo por sa sigur cu loke tin skirbi den Bijbel no a cambia?
“Bijbel A Cambia a Traves di Añanan?” (articulo riba jw.org)
You May Also Like
PREGUNTA CU HOPI HENDE SA HACI
Con un Curso di Bijbel cu Testigonan di Jehova Ta Bay?
Pa sigui un curso di Bijbel interactivo gratis cu testigonan di Jehova, bo por uza cualkier traduccion di Bijbel cu bo ta prefera. Sinti bo liber pa invita henter bo famia of amigonan pa join bo.
