Panon ya Nipapasal Iray Tasi nen Jehova Parad Ministeryo Da?

I-PLAY

Tuloytuloy ya nipapasal iray Tasi nen Jehova ed amin ya parte na bilay da bilang Kristiano, kaiba lad satan so ministeryo da. Sayan ministeryo et amay ingganggan nen Jesus ed saray papatumbok to: say pangipulong tan pangibangat ed maong a balita na Panarian na Dios. (Mateo 24:14; 28:19, 20) Nipapasal kami ed saray sinimban aral mi tan ed saray tinaon ya kombension tan asemblea mi. Balet saray Tasi nen Jehova ya walaay responsabilidad ed kongregasyon odino diad organisasyon et makakaawat ni na kaaruman ya panangipasal diad saray espesipikon eskuelaan ya nibased Biblia.

Diad sayan artikulo

Anto ran panangipasal so nanaawat na saray Tasi nen Jehova?

Saray pantitipon na kongregasyon. Kada simba onaatendi kami ed duaran pantitipon o aral diad saray pasen ya pandadayewan mi ya say tawag et Kingdom Hall. Say sakey ya aral mi et diad midweek, tan say sakey et diad weekend. Nayarin onatendi so anggan siopa tan anggapoy bayaran.

Aral ed midweek. Nipapasal kamin manbasa, mitongtong, manpaliwawa ed arap na totoo, manpulong, tan manbangat. Naaawat mi panangipasal panamegley na saray paliwawa, sakey ya teman pantongtongan, demonstrasyon, tan saray video ya nabantayan. Makakatulong iyan panangipasal ed sikami pian epektibo min ninabang so mensahe na Biblia ed arum tan ikondukta so panangiyaral na Biblia diad saray interesado. Amin ya onatendi ed sayan aral et makapinabang ed sayan panangipasal. Pero say sankaimportantian ed amin, papabiskegen na sayan aral mi so pananisia mi ed Dios tan panangaro mi ed sikato tan ed saray kapananisiaan mi.
Aral ed weekend. Walay duaran parte na sayan aral. Unona, walay paliwawa ya nibased Biblia ya parad amin, lalo la ed saray aliwan Tasi. Say komaduan parte na sayan aral et pantongtongan so sakey ya artikulo ed panaralan ya edisyon na Say Panag-bantayan. a Wala ray tepet tan nayarin onebat iray inmatendi. Ipapaliwawa na saray artikulo iray topic tan prinsipyo na Biblia ya makatulong ed ministeryo mi tan ed inagew-agew ya panagbilay mi.

Saray asemblea tan kombension. Walay taloran angkabaleg ya pantitipon mi kada taon, tan dakel so onaatendi ed satan ya nanlapud nanduruman kongregasyon. Akapokus irayan makapaliket ya pantitipon mi ed sakey ya espisipikon tema ya nibased Biblia tan wala ra diay paliwawa, demonstrasyon, interbyu, tan saray video. Singa met ed saray aral mi ed kongregasyon, makakatulong iray asemblea tan kombension pian onaralem so kakabatan mi ed Biblia tan magmaliw kami ya mas epektibo ya mangipulong ed maong a balita. Nayari met ya onatendi so anggan siopa tan anggapoy bayar.

Saray eskuelaan ya nibased Biblia parad saray Tasi nen Jehova

Wala ray arum ya Tasi nen Jehova ya naimbitaan ya manaral ed nanduruman eskuelaan ya nibased Biblia parad kaaruman ya panangipasal. Anto iratan ya eskuelaan? Antoy gagala na saratan tan panon karukey so panaral? Siopa ray nayarin manaral?

Pioneer Service School

Gagala: Pian ipasal iray full-time ya ministro ya tatawagen ya payunir b pian magmaliw iran mas epektibo ya manpulong tan manbangat. Diad klase wala ray topic ya pantongtongan, demonstrasyon, paliwawa, tan workshop.
Karukey: Anemiran agew.
No siopa ray nayarin manaral: Naimbitaan ya manaral iray aka-sakey taon lan manlilingkor bilang regular payunir. Nayarin naimbitaan lamet iray abayag lan payunir ya limay taon lay linmabas manlapud samay sampot ya impanaral da.

School for Kingdom Evangelizers

Gagala: Pian naikdan na espisipikon panangipasal iray eksperiensyadon full-time ya ministro. Mas napaaligwas na saray estudyante so dunong da ed panagpulong tan panagbangat, tan mas napaaralem day panag-aral da ed saray topic ed Biblia. Dakel ed saray nan-graduate ed sayan eskuelaan so ibabaki ed saray lugar ya kaukolan so mas dakel ya manpulong.
Karukey: Duaran bulan.
No siopa ray nayarin manaral: Nayarin man-aplay iray payunir no naabot da ray kakaukolanen tan sarag na kipapasen da so manlingkor inerman ya walay pankaukolan.

School for Congregation Elders

Gagala: Pian natulongan iray elder c ya gawaen iray responsabilidad da ed kongregasyon, singa say pambangat tan pan-shepherding, tan pian napaaralem day panangaro da ed Dios tan saray kapananisiaan da.—1 Pedro 5:2, 3.
Karukey: Limaran agew.
No siopa ray nayarin manaral: Naimbitaan ya manaral iray balo nin elder, ontan met ed saray abayag lan elder ya limay taon lay linmabas manlapud samay sampot ya impanaral da.

School for Circuit Overseers and Their Wives

Gagala: Pian ipasal iray ombiabiahen ministro ya tatawagen ya manangasikaso na sirkito d pian nagawaan dan mas epektibo iray responsabilidad da. (1 Timoteo 5:17) Makatulong met so klase ed sarayan Kristianon elder tan saray kaasawaan da pian mas onaralem so kakabatan da ed Biblia.
Karukey: Sakey bulan.
No siopa ray nayarin manaral: Naimbitaan ya manaral iray manangasikaso na sirkito tan saray kaasawaan da no aka-sakey taon la ra ed asainmin da. Insan naimbitaan ira lamet ya manaral kada limay taon.

Kingdom Ministry School

Gagala: Pian natulongan iray elder tan saray ministeryal a lingkor e ya gawaen iray responsabilidad da ed kongregasyon base ed kaplesan ya situasyon tan pankaukolan. (2 Timoteo 3:1) Nagagawa iyan eskuelaan kada duara o taloran taon.
Karukey: Nanduruma, kaslakan et sakey agew.
No siopa ray nayarin manaral: Saray manangasikaso na sirkito, elder, tan ministeryal a lingkor.

Bethel Service School

Gagala: Pian natulongan iray manlilingkor ed Bethel f ya nagawaan iray kimey ya inter ed sikara tan napaelet day panangaro da ed Dios tan ed saray kakaiba da ed Bethel.
Karukey: Limara tan kapalduan agew.
No siopa ray nayarin manaral: Kaukolan ya manaral so amin ya balon manlilingkor ed Bethel. Nayarin naimbitaan lamet ya manaral iray abayag lan manlilingkor ed Bethel ya limay taon lay linmabas manlapud samay sampot ya impanaral da.

Watchtower Bible School of Gilead

Gagala: Pian napaaralem na saray estudyante so pakatalos da ed Biblia tan natulongan iran iyaplika iray nanaaralan da. (1 Tesalonica 2:13) Saray matoor ya Kristianon lalaki tan bibii ya manaral ed Gilead et magmaliw ya mas lalon mausausar ed organisasyon nen Jehova tan ed kimey ya panagbangat na Biblia ed interon mundo. Saray nan-graduate ed sayan eskuelaan et nayarin niyasain bilang misionero o manlingkor ira ed branch office diad bansan nanlapuan da odino diad arum ya bansa.
Karukey: Limaran bulan.
No siopa ray nayarin manaral: Saray branch office so manpili na saray full-time ya ministro ya nayarin man-aplay. Sayan eskuelaan et walad Watchtower Educational Center ed Patterson, New York diad United States.

School for Branch Committee Members and Their Wives

Gagala: Pian ipasal iray membro na Branch Committee g ya asikasoen so kimey na sakey ya branch office. Aasikasoen da met iray gagawaen na saray Tasi nen Jehova ed bansa odino saray bansa ya walad sakop na branch office da.
Karukey: Duaran bulan.
No siopa ray nayarin manaral: Say World Headquarters na saray Tasi nen Jehova so manpili na saray membro na Branch Committee tan kaasawaan da ya manaral ed sayan eskuelaan ya walad Watchtower Educational Center diad Patterson, New York.

Antoy pangibabasiyan ed saray panangipasal ya nanaawat na saray Tasi nen Jehova?

Lanang ya say Biblia so manunan pangibabasiyan ed panangipasal ya naaawat na saray Tasi nen Jehova. Manisia kami ya nanlapud Dios so Biblia tan wadtan iray sankaabigan ya bilin ya onaplika ed amin ya parte na bilay na sakey ya Kristiano.—2 Timoteo 3:16, 17.

Kasin walay bayaran na saray Tasi nen Jehova no manaral ira?

Anggapo. Libre so manaral ed saratan ya eskuelaan. Saray kimey na saray Tasi nen Jehova et susuportaan na boluntaryon donasyon.—2 Corinto 9:7.

a Walad website mi ya jw.org so Biblia tan uusaren ed panag-aral na Biblia.

b Say payunir et sakey ya bautismadon Tasi ya laki odino bii ya maong so alimbawa to tan boluntaryon manguusar na espisipikon karakel na oras kada bulan pian ipulong so mensahe na Biblia.

c Saray elder et matoor ya Kristianon lalaki ya saray ibabangat da et manlalapud Biblia tan tutulongan tan papasesegen da ray totoo nen Jehova panamegley na pan-shepherding ed sikara. Anggapoy sueldo da ed saray gagawaen da.

d Say manangasikaso na sirkito et full-time ya ministro ya ombibisita ed nanduruman kongregasyon ed sirkito to ed loob na sakey simba. Papasesegen to ray kaagian to ed sakey ya kongregasyon panamegley na paliwawa ya nibased Biblia tan uulopen to ra diad ministeryo.

e Saray ministeryal a lingkor et manggagaway nanduruman praktikal a kimey pian natulongan iray kaagian da. Lapud satan et naikdan na mas dakel ya panaon iray elder ed pambangat tan pan-shepherding.

f Bethel so tawag ed saray branch office na saray Tasi nen Jehova. Saray gagawaen na saray full-time ya ministro ya walad Bethel et onsusuporta ed saray kimey na saray Tasi ya walad sakop na branch da.

g Taloran lalaki odino masulok ni so manlilingkor bilang Branch Committee. Amin da et matoor tan mabiskeg so pananisia da ed Dios.

Panon ya agunggonaan iray Tasi nen Jehova ed naawat dan panangipasal?

“Mabaing ak kanian naiirapan ak ya mitongtong ed saray agko kabat no nipaakar ed Biblia. Balet akatulong so panangipasal ya naawat ko diad midweek ya aral pian nawalaan ak na kompiyansa ed sarilik tan napaaligwas koy paraan na panagbangat ko. Apaaligwas ko met so pitotongtong ko ed arum diad kongregasyon tan diad trabahok.”—Natasha, United States.
“Akatulong ed siak so impanaral ko ed School for Kingdom Evangelizers pian naalig ko iray kualidad nen Jehova tan magmaliw ak ya mas maaro, maanos, tan maomaong. Lapud satan nagmaliw ak ya mas maong ya Kristiano tan kaaro ed arum. Naaralan ko met ed sayan eskuelaan no panon kon i-research iray topic ed Biblia tan no panon kon ipaliwawa so Biblia diad paraan ya nasabik so puso na totoo.”—Stephen, Nigeria.
“Akatulong ed siak so impanaral ko ed School for Congregation Elders pian magmaliw ak ya mas mapaabeba ta atan so kaukolan pian magmaliw ak ya maong ya elder. Diad saray paliwawa, nidanet ed siak ya kaukolan kon aligen so alimbawa nen Jesus.”—Luca, Italy.
“Naaralan ko ed Kingdom Ministry School ya kaukolan koy magmaliw ya mainomay ya asinggeran. Kaukolan met ya maaro tan maomaong so pantratok ed arum. Naaralan ko ya no walay gawaen ko parad arum, kaukolan kon gawaen itan lapud inarok ira, aliwa labat ya lapud atan so dugan gawaen ko.”—Samuel, United Kingdom.
“Atulongan kami na Gilead school pian nausisa mi sarili mi ed espiho na Salita na Dios. (Santiago 1:22-25) Kanian anengneng mi no anto ray kaukolan min umanen ed sarili mi tan ed panaglingkor mi ed si Jehova. Naaralan mi met ya mas nonoten so arum nen say sarili mi tan seguroen mi ya amin ya ibabaga tan gagawaen mi et lapud panangaro.”—Elnathan tan Princess, Philippines.