Kada taon, mantitipon iray Tasi nen Jehova kaiba iray minilyon ya inimbitaan da pian selebraan so Memoryal na impatey nen Jesus, ta atan so ingganggan to. (Lucas 22:19) Makatulong iyan okasyon pian natalosan tayo ya importante so ginawa nen Jesus​—say impangiter toy bilay to parad sikatayo. Naamtaan tayo met no antoy epekto na satan ed bilay tayo natan tan diad arapen.​—Juan 3:16.

 Akaatendi ka man odino andi ed Memoryal diad sayan taon, panon kan nagunggonaan ed impansakripisyo nen Jesus? Walay duaran imbangat nen Jesus ya dapat tayon gawaen:

1.  1. Kabaten so Dios tan si Jesus. Oniay imbaga nen Jesus nen nampikasi ed Ama to: “Saya so mankabaliksay bilay ya andi-anggaan, a kabaten da ka, say saksakey a tuan Dios, tan samay imbakim, si Jesu-Kristo.”​—Juan 17:3.

2.  2. Iyaplikam so naaralan mo. Indanet nen Jesus ya kaukolan tayon iyaplika ed bilay tayo iray bangat to. Singa bilang, diad sampot na Sermon to ed Palandey, kinomendaan to iray ‘ondedengel ed saray salita to tan manggagawa ed saratan.’ (Lucas 6:46-48) Indanet to lamet itan diad arum ya pagkakataon, say kuan to: “Lapud amta yo la iraya, maliket kayo no gawaen yo.”​—Juan 13:17.

 Kasin labay mo nin mas nakabat so Dios tan si Jesus? Kasin labay mon natulongan ka pian mas naiyaplikam iray naaralan mo? Nia ray pigaran paraan ya makatulong ed sika.

 Dakel lan totoo so natutulongan na libren interactive ya panag-aral na Biblia pian naamtaan day ibabangat na satan tan niyaplika da itan ed bilay da.

•   Ombisita ed page ya Panag-aral na Biblia ya Walay Manbangat ed Sika pian mas nakabisadom iya.

•   Bantayan so video ya Welcome ed Panag-aral na Biblia pian walay ideyam no panon ya gagawaen so panag-aral na Biblia kaiba iray Tasi nen Jehova.

 Saray Tasi nen Jehova et mantitipon ya mamidua ed sakey simba diad pasen ya pandadayewan da ya say tawag et Kingdom Hall. Diad saray pantitipon mi, aaralen mi so Biblia tan no panon min iyaplika iratan ed kabibilay mi.

 Welcome so amin ya onatendi, anggan saray aliwan Tasi. Depende ed situasyon ed lugar yo, walay opsyon mo no kasin onatendi ka ya face-to-face odino diad videoconference.

•   Bantayan so video ya Antoy Gagawaen Diad Kingdom Hall? pian naamtaan mo no anto ray talaranan mo no onatendi ka.

•   Ombisita ed page ya Aral ed Kongregasyon na Saray Tasi nen Jehova pian makaanap na pantitipon o aral ya asingger ed sikayo.

 Dakel ya artikulo tan video diad sayan website so makatulong ed sika pian mas naamtaan mo ray bangat nen Jesus tan mas napablim so impansakripisyo to parad sikatayo.

 Singa bilang, pian naamtaan mo no panon ya lapud impatey na sakey ya too et abendisyonan so minilyon ya totoo, basaen iray artikulo ya “Iliktar Ka nen Jesus​—Panon?” tan “Akin a Nanirap tan Inatey si Jesus?” odino bantayan so video ya Akin ya Inatey si Jesus?