Wala tay kaarom ya agmo amtay ngaran to? Seguradon anggapo. Duga so imbaga nen Irina ya taga Bulgaria: “Imposible so magmaliw ya maapit ed Dios no agmo amtay ngaran to.” Makapaliket ta singa abitlad inmunan artikulo, labay na Dios ya onapit kad sikato. Kanian panamegley na Biblia, singa to ipapakabat so sarili to ed sika ya ibabaga ton: “Siak si Jehova, satan so ngaran ko.”—Isaias 42:8.

Kasin importantid si Jehova no antam tan uusaren moy ngaran to? Nonoten pa ya: Say ngaran na Dios ya nisulat ed apatiran Hebreon letra a tatawagen ya Tetragrammaton et nabasa ya ngalngali 7,000 beses ed orihinal ya Hebreon Kasulatan. Mas dakel ya beses iyan abitlad Biblia nen say arum ya ngaran. Mapatpatnag ya labay nen Jehova ya naamtaan tan usaren tayoy ngaran to. *

Balet, ompan ibaga na arum ya lapud masanto tan makapanyarin-amin so Dios, aliwan marespeto so pangusar ed ngaran to. Siempre alimaong ya usaren so ngaran na Dios ed anggapoy kana. Anggan diad kaaro tayo et agtayo itan gagawaen. Balet labay nen Jehova ya idayew tan ipakabat na saray mangaaro ed sikato so ngaran to. (Salmo 69:30, 31; 96:2, 8) Tandaan ya imbangat nen Jesus iray papatumbok to ya ipikasi: “Ama mi a walad tawen, napasanto komon so ngaran mo.” Makapibiang tayod pamasanto ed ngaran na Dios diad pangipakabat ed satan. No gawaen tayo itan, mas onapit tayod sikato.—Mateo 6:9.

Ipapanengneng na Biblia ya iimanoen tan papablien na Dios ‘iramay mannononot [odino, mamapabli] ed ngaran to.’ (Malaquias 3:16) Oniay impormisa nen Jehova a gawaen tod sikara: “Sikato so ipasen ko ed tagey, nisengeg ed kinabat to so ngaran ko. Sikato ontawag ed ngaran ko et sikato so ebatan ko. Miayam ak naani ed sikato no peles na gonigon.” (Salmo 91:14, 15) Importante ya amtaen tan usaren so ngaran nen Jehova no labay tayoy nawalaan na maapit a relasyon ed sikato.