“SAY Dios et Espiritu,” sikatoy agnanengneng na too. (Juan 4:24) Balet diad Biblia, wala ray totoon nibaga tayon anengneng day Dios. (Hebreos 11:27) Panon? Posible kasin nanengneng moy “Dios ya agnanengneng”?—Colosas 1:15.

Ikompara tayo pay sarili tayo ed sakey ya toon bulag manlapud inkianak to. Agto la kasin balot natalosan so nagagawad kaliberliber to lapud sikatoy bulag? Andi met. Makakaawat na impormasyon so sakey a bulag diad nanduruman paraan tan ontutulong itan ed sikato pian natalosan iray totoo, saray bengatla, tan saray nagagawad kaliberliber to. “Say pakanengneng et ag-akadepende ed mata,” so inkuan na sakey a bulag. “Akadepende itan ed nonot.”

Mipadpara, anggaman agnanengneng so Dios panamegley na mismon mata yo, sarag yon usaren “iray mata na puso yo” pian sikatoy nanengneng yo. (Efeso 1:18) Nia ray taloran paraan pian nagawaan itan.

Kaslakan, say sakey a bulag et maksil so pakadngel tan pakalikna to, tan uusaren to itan pian natalosan iray bengatlan agto nanengneng. Mipadpara, sarag mo met ya usaren iratan pian nausisa iray walad kaliberliber mo tan natalosan moy nipaakar ed agnanengneng a Dios ya amalsa ed saratan. “Saray agnanengneng a kualidad to et sankanengneng manlapud impamalsa ed mundo a manpatuloy, lapud natebek iratan ed panamegley na saray pinalsa.”—Roma 1:20.

Singa bilang, isipen pay panaayaman tayo. Nikadkaduma so inkadesinyo na dalin pian agti labat manbilay noagta na-enjoy tayo met so bilay. Naliliketan tayo no nalikna tayoy palayupoy na dagem tan balibalin petang na agew, natawayay makbol iran prutas, odino narengel so makaparelaks ya uni na saray siwit. Agta ipapatnag na saratan ya say Manamalsa tayo et manonot, maasikaso, tan maiter?

No nanenengneng moy uniberso, antoy naaralan mo nipaakar ed Dios? Ipapatnag na katawenan so pakapanyari na Dios. Ibabaga na agano ni ran impanaral ed science ya say uniberso et aglabat basta onaawang noagta ompepeles met so iyaawang na satan! No ontangay kad tawen diad labi, isipen pa: Iner so panlalapuan na enerhiyan mamapaawang ed uniberso tan mamapapeles na iyaawang na satan? Ibabaga na Biblia ed sikatayo ya say Manamalsa et walaan na ‘mabisbiskeg a pakapanyari.’ (Isaias 40:26) Ipapanengneng ed sikatayo na saray pinalsa na Dios ya sikato et “Makapanyarin amin”—say Sakey ya abalbaleg so pakayari to.—Job 37:23.

Oniay imbaga na sakey ya ina ya walaan na duaran anak ya bulag: “Say pansalitam et sakey ed saray sankaimportantian ya paraan pian makaaral ira. Ibagam ya amin ed sikara so nanenengneng tan narerengel mo, [tan] nepeg ya akaparaan kan naynay ya mangipaliwawa. Sika so mata ra.” Ontan met, anggan “anggapo so toon akanengneng ed Dios anggan kapigan,” say Anak na Dios, si Jesus, “a walad abay na Ama so angipaliwawa nipaakar ed sikato.” (Juan 1:18) Lapud si Jesus so sankaunaan ya pinalsa na Dios tan say bogbogtong ya Anak, sikato so “mata” tayo pian nanengneng tayoy katawenan. Sikato so sankaabigan a lapuan na impormasyon nipaakar ed Dios ya agnanengneng.

Abaybayag lan kaiba nen Jesus so Ama to. Imanoen so pigarad saray bengatlan impaliwawa to nipaakar ed Dios:

• Say Dios et ag-ontutundan mankikimey. “Say Amak et mankikimey ni anggad natan.”—Juan 5:17.

• Amta na Dios iray pankaukolan tayo. “Amta na Dios ya Ama yo iray bengatlan nakaukolan yo sakbay kayo nin onkerew ed sikato.”—Mateo 6:8.

•  Mabulos so Dios ya mangitatarya parad sikatayo. Say “Ama yon walad tawen . . . papasinagen to so agew to ed saray mauges tan maong a totoo tan papepelagen to so uran ed saray matunong tan agmatunong.”—Mateo 5:45.

• Papablien na Dios so balang sakey ed sikatayo. “Agta say duaran anuyaw et manbili labat na sakey a sinsilyo? Ingen ta anggapo anggan sakey ed saratan so napelag ed dalin ya ag-amta na Ama yo. Balet anggan saray buek na ulo yo et abilang ya amin. Agkayo sirin natatakot: Mas mabli kayo ni nen say dakel ya anuyaw.”—Mateo 10:29-31.

Saray bulag et mabetbet ya dumay pakatalos da no ikomparad saramay makanengneng. Parad sakey a bulag, say anino et aliwan ambilunget a pasen ya agnasisinagay agew, noagta ambetel a pasen ya naproprotektaan manlapud petang na agew. No panon ya agnanengneng na toon bulag so anino odino sinag na agew, agtayo met natalosan si Jehova diad sarili tayo labat. Kanian angitarya si Jehova na too ya sigpot a mangipatnag ed saray kualidad tan personalidad To.

Satan ya too et si Jesus. (Filipos 2:7) Aglabat impaliwawa nen Jesus so nipaakar ed Ama to noagta impanengneng to met ed sikatayo iray kualidad na Dios. Inkuan na disipulo nen Jesus a si Felipe: “Katawan, ipanengneng mo ed sikami so Ama.” Inmebat si Jesus: “Samay akanengneng ed siak et anengneng to met lay Ama.” (Juan 14:8, 9) Antoy “nanenengneng” mo nipaakar ed Ama base ed saray kiwas nen Jesus?

Si Jesus et maaro, mapaabeba, tan mainomay ya asinggeran. (Mateo 11:28-30) Onaapit iray totoo ed sikato lapud maabig ya personalidad to. Mililikna si Jesus ed saray nasasakitan, tan mililiket ed sikara no maliket ira. (Lucas 10:17, 21; Juan 11:32-35) Legan mon babasaen odino dedengelen iray salaysay ed Biblia nipaakar ed si Jesus, usar mo ray pakaliknam tan gawam ya mabilabilay ed nonot mo iray eksena. No dalepdepen moy paraan na impideneng nen Jesus ed saray totoo, mas malinew mon nanengneng so makapadinayew a personalidad na Dios tan onapit kad Sikato.

Oniay imbaga na sakey ya autor no panon ya natatalosan na sakey a bulag so kaliberliber to: “Naawat to so impormasyon ya sandaraiset, diad nanduruman paraan (pakalikna, pakaangob, pakadngel, tan arum ni), insan to paniibaen iratan pian nakompleto toy impormasyon.” Ontan met, legan mon oobserbaan iray pinalsa na Dios, babasaen iray imbaga nen Jesus nipaakar ed Ama to, tan aanalisaen no panon ya impatnag nen Jesus iray kualidad na Dios, makabuo ka na marakdakep ya “litrato” nen Jehova. Sikatoy magmaliw ya mas tudtua ed sika.

Naeksperiensya itan nen Job, a nambilay nensaman. Diad unaan et sikatoy nansalita ya ‘andian na pakatalos.’ (Job 42:3) Balet kayari ton maalwar ya inobserbaan so makapadinayew iran pinalsa na Dios, sikatoy apakiwas ya ibagan: “Nadngel ko so nipaakar ed sika, . . . balet natan say matak nanengneng to ka.”—Job 42:5.

Sarag mo met ya naeksperiensya itan. ‘No anapen moy Jehova, sikatoy naromog mo.’ (1 Awaran 28:9) Maliket iray Tasi nen Jehova ya ontulong ed sikan naromog so Dios ya agnanengneng.