TINMALIMUKOR si Maria, agnadeskribe so graben ermen to. Singa narerengel to ni sampot ya akis na anak ton inatey kayari pigaran oras na impanirap. Binmilunget so tawen, anta kaagwan ni labat. Insan yinmegyeg a maksil. (Mateo 27:45, 51) Parad si Maria, singa labay ya ipaamta nen Jehova ed interon mundo ya anggapo lay arum ya mas asakitan nen say Sikato lapud impatey nen Jesu-Kristo.

Legan ya kalkalnan onliliwawa ed Golgotha, odino Lapislapis na Ulo, wadmay Maria ya agaylay ermen to lapud agawad anak to. (Juan 19:17, 25) Seguro et dakdakel so nanononotan to. Ompan sakey ed saratan et samay agawa manga 33 taon lay apalabas. Nen inawit dan dua nen Jose diad templo na Jerusalem so inad-aro dan kapangiyanak, pinuyanan na Dios so sakey a maedad lan laki a si Simeon ya manpropesiya. Impasakbay to iray maabig a bengatla ya nagawad si Jesus, balet inyarum to ya onsabi panaon, naeksperiensya nen Maria so graben ermen a singa andukey ya espadan ontalos ed sikato. (Lucas 2:25-35) Natan to labat atalosan, diad sayan makapaermen ya oras, so labay ya ibaga na saraman a salita.

Ibabaga na arum ya say ipatey na anak so sankagrabian tan sankasakitan a nalikna na anggan siopa. Say patey et mauge-uges a kalaban, tan sasakitan to itayon amin diad nanduruman paraan. (Roma 5:12; 1 Corinto 15:26) Nasarag tayo kasi iya? Legan tayon ikokonsidera so bilay nen Maria manlapud gapo na ministeryo nen Jesus ya anggad impatey to tan kayari na satan, dakel so naaralan tayo nipaakar ed pananisia nen Maria ya akatulong ed sikato pian nasarag toy graben ermen.

Pawilen tayo pay agawad apalabas ya talora tan kapalduan taon: nalilikna nen Maria ya walay nagawan pananguman. Anggan diad melag a baley na Nazaret, pantotongtongan na totoo si Juan a Bautista tan say makapainteres a mensahe to nipaakar ed panagbabawi. Amta nen Maria ya parad panguloan ya anak to et sakey itan ya tanda; panaon la pian onggapoy Jesus ed ministeryo to. (Mateo 3:1, 13) Parad si Maria tan saray anak to, baleg ya pananguman so iyalis nen Jesus. Akin?

Nayarin diad satan et inatey lay asawa nen Maria ya si Jose. Kanian naandian la lamet si Maria. * Aliwa labat lan “anak na karpentero” so tawag ed si Jesus natan, noagta “karpentero.” Seguradon si Jesus lay mangaasikasod negosyo na ama to tan sikato lay manlelegpet ed pamilya, kaiba lay anemiran agagi to ya mas ugaw nen sikato. (Mateo 13:55, 56; Marcos 6:3) Anggano ipapasal toy Santiago—nayarin say komaduad panguloan ya anak—ya mangituloy ed panagkarpentero, siansian aliwan mainomay parad pamilya nen Jesus so iyalis to. Dakel lay pakakabelatan nen Maria; natatakot kasi ed sayan pananguman? Agtayo segurado. Balet nia ay so mas importantin tepet: Antoy gawaen to no si Jesus a tagad Nazaret et magmaliw lan Jesu-Kristo, say abayag lan insipan a Mesias? Walay naaralan tayo ed sakey a salaysay na Biblia nipaakar ed saya.—Juan 2:1-12.

 Linmay Jesus ed si Juan tan nampabautismo, insan nagmaliw ya Nilanaan na Dios, odino Mesias. (Lucas 3:21, 22) Insan nampili na saray disipulo to. Anggano apuraan so kimey to, wala nin siansiay panaon to parad maliket iran okasyon kaibay pamilya tan kakaaro to. Kaiba toy ina to, saray disipulo to, tan saray agagi to ya linmad bansal diad Cana, diad sakey a nipukdol ya baley a manga 13 km so kaarawi tod Nazaret. Legan na panliliket, alikas nen Maria ya walay problema. Nayarin naimano to ya arum ed saray kapamilya na nankasal et mannenengnengan tan manuupitan. Naupotan iray alak! Diad kultura da, baleg a kababaingan na pamilya no naibalewala itan ya importantin kabiangan na panagsangkaili, tan talagan naderal so okasyon. Nakakasian ira nen Maria, kanian kinmerew na tulong ed si Jesus.

“Anggapo lay alak da,” so inkuan tod anak to. Antoy iilaloan ton gawaen na anak to? Agtayo amta, balet amta ton say anak to et makapanyari tan sarag toy manggawa na makapakelaw iran bengatla. Seguro et inisip ton gapoan to la itan natan. Singa to ibabagad anak to ya, “Ipangasim ana’ko, manggawa kay paraan!” Seguro et abigla nen inmebat si Jesus ya: “Antoy pibabalik ed satan?” Samay ebat nen Jesus et aliwan agmarespeto ya singa iisipen na arum. Anggaman ontan, diad saman ya imbaga to et maaro ton kinorehi si Maria. Ipapanonot nen Jesus ed ina to ya anggapoy kanepegan ton bagaan no antoy gawaen tod ministeryo to; say Ama to labat a si Jehova so makanepegan ed satan.

Inawat nen Maria so panangorehi na anak to, ta sikatoy makatalos tan mapaabeba. Sikatoy linmad saramay manseserbi tan imbaga to: “Antokaman ya ibaga to ed sikayo, gawa yo.” Atalosan nen Maria ya anggapo lay kanepegan ton mangibaga no antoy gawaen na anak to; imbes, say anak to so mangibagad sikato tan ed arum no antoy gawaen da. Diad biang nen Jesus, singa si ina to et impanengneng ton nakakasian to met so balon nankasal. Diad unonan pankanawnawa et sikatoy nanggaway milagro, ya pinagmaliw ton alak so danum. Antoy resulta? “Anisia ed sikato iray disipulo to.” Anisia met si Maria ed si Jesus. Impasen toy Jesus aliwa labat lan bilang anak to noagta bilang Katawan tan Manangilaban to.

Dakel so naaralan na atateng natan ed pananisia nen Maria. Tua, anggapo natan so amabaleg ed sakey ya ugaw a singa si Jesus. Balet anggan siopan ugaw ya aliwan perpekto, no magmaliw lan adulto, nayarin wala ray onlesan problema legay ibabaleg to. Ompan tratoen ni ingen na ateng so anak to ya singa ugaw, anggano aliwa lan matukoy. (1 Corinto 13:11) Panon ya natulongan na ateng iray angkabaleg lan anak da? Sakey ya paraan et say masimoon ya pangibalikas dan matalek iran itultuloy ya iyaplika na saray matoor ya anak da iray bangat na Biblia pian bendisyonan ira nen Jehova. No mapaabeban ibalikas na ateng so talek da, maong so epekto na satan ed saray anak da. Seguradon pinabpabli nen Jesus so suporta nen Maria diad tinmutumbok iran taon.

Daiset labat so nabasa tayod saray Ebanghelyo nipaakar ed si Maria legan na talora tan kapalduan taon na ministeryo nen Jesus. Balet tandaan ya ompan abalo lay Maria ed saman—sakey a mansusulon ateng, tan ompan wala ni ray ugaw nin anak tod pudir to. Kanian natalosan tayo no bilang agto makatumbok ed si Jesus diad pampupulong tod lugar da. (1 Timoteo 5:8) Balet, intultuloy ton dinalepdep iray espiritual a bengatlan naaralan to nipaakar ed Mesias tan sikatoy onaatendi ed saray pantitipon diad  sinagoga ed lugar da, ya singa apasalan lan gagawaen na pamilya da.—Lucas 2:19, 51; 4:16.

Agta posiblin sikatoy kaiba met ed saray ondedengel nen nansalita si Jesus ed sinagoga diad Nazaret? Seguradon malikeliket si Maria ya narengel so impangiyanunsio na anak to ya say nilasus taon lan propesiya nipaakar ed Mesias et nasusumpal la natan ed sikato! Balet nayarin makapaermen ed si Maria no nanenengneng to ray kapara ton tagad Nazaret ya agda awatey anak to. Sinali da ni ingen ya pateyen!—Lucas 4:17-30.

Makapaermen met ed si Maria so reaksion na arum ya anak ton lalaki ed si Jesus. Naaralan tayod Juan 7:5 ya duma so pananisia na saray apatiran agagin lalaki nen Jesus ed ina ra. Oniay nabasa tayo: “Agmanisia ed sikato iray agagi to.” No nipaakar balet ed duara o mas dakel ni ya agagin bii nen Jesus, anggapoy ibabaga na Biblia. * Antokaman so agawa, alikna nen Maria so nikaduman ermen na panayam ed abung ya nandumaay relihyoson pananisia. Kaukolan ton balansien so pansiansia ton matoor ed katuaan tan say pansasagpot ton pakiwasen iray membro na pamilya to, ya agto ra pipiliten odino misasangsangan ed sikara.

Aminsan, nandesisyon iray kakanayon nen Jesus—nayarin kaiba iray agagi ton lalaki—ya sikatoy “alaen” da. Ibabaga ran: “Aderal lay ulo to.” (Marcos 3:21, 31) Siempre aliwan ontan so iisipen nen Maria, balet siansia nin akila ed saray anak ton lalaki, ompan iilaloan ton walay naamtaan da ya ontulong ed sikaran nawalaay pananisia. Ontan kasi agawa? Anggano amayamay lay makapakelaw a ginawa nen Jesus tan angibangat na mararakep iran katuaan, agnin siansia anisia so arum ya anak nen Maria. Naiingongotan la kasi ed paniisip to no antoy gawaen to pian nasabi puso ra?

Kasin nanduruma so relihyon diad pamilya yo? Dakel so naaralan mo ed pananisia nen Maria. Agto inisip ya agla manguman iray agmananisian kakanayon to. Imbes, impanengneng tod sikara ya lapud pananisia to et sikatoy maliket tan walaan na deen na nonot. Balet, siansian sinuportaan toy matoor ya anak to. Nailiw to kasi si Jesus? Wala ra kasi panaon ya inisip ton sikatoy kaiba da ni komon ed abung? No bilang ta ontan, kinontrol toy liknaan to. Impasen ton pribilehyo ya suportaan tan pabiskegen si Jesus. Natulongan mo met kasi iray anak mo pian niyuna rad bilay da so Dios?

Kasin abendisyonan si Maria lapud pananisia tod si Jesus? Naynay ya bebendisyonan nen Jehova so pananisia tayo, kanian seguradon ontan so ginawa tod si Maria. (Hebreos 11:6) Isipen pa labat no antoy alikna to legan ton dedengelen so anak to ya mansasalita, odino narerengelan to ray istorya na saramay mismon akarengel ed sermon nen Jesus.

Diad saray ilustrasyon na anak to, anonotan kasi nen Maria so impanugaw nen Jesus diad Nazaret? Sanen binitla toy sakey a biin manpapanis ed abung to pian anapen so abalang ya sinsilyo, manggigiling na arina parad tinapay, odino maneselsel na lamparaan tan itapew to itan ed panangipatoonan, naimadyin kasi nen Maria so melag nin anak to diad abay to legan ton gagawaen so ontan iran inagew-agew a kimey? (Lucas 11:33; 15:8, 9; 17:35) Nen imbaga nen Jesus ya mainomay a sakbaten so pako to tan anlemew so awit to, anonotan kasi nen Maria imay aminsan ya ngarem nensaman legan ton babantayan si Jose ya babangatan toy ugaw nin Jesus ya manggawa tan mankurti na pako ya agnasakitan so ayep ya mansakbat ed satan? (Mateo 11:30) Seguradon panliketan a maong nen Maria so pribilehyon  inter nen Jehova ed sikato—say intulong tod pamabaleg tan pangipasal ed anak ya magmaliw a Mesias. Seguradon malikeliket legan ton dedengelen si Jesus, say sankamaongan a managbangat, ya manguusar na saray ordinaryo iran bengatla tan eksena pian nibangat iray importantin leksion!

Balet, nansiansian mapaabeba si Maria. Sikatoy agbalot impaatagey nen Jesus, tan agto met dinayew. Aminsan, diad ministeryo nen Jesus, walay biin kinmelyaw manlapud limog na totoo tan imbaga ton maliket so ina to ya angiyanak ed sikato. Balet inmebat si Jesus: “Mas maliket iramay onderengel tan manusumpal ed salita na Dios!” (Lucas 11:27, 28) Tan nen wala ray angibagad si Jesus ya nitan lay ina tan agagi ton lalaki, imbaga ton saramay manisia so tuan ina tan agagi to. Agbinmarong si Maria ta seguradon atalosan toy labay ya ibaga nen Jesus—mas importante so espiritual a pamilya nen say pamilya ed laman.—Marcos 3:32-35.

Talagan anggapoy makapangideskribe ed ermen ya alikna nen Maria nen anengneng toy ansakisakit ya impatey na anak to ed panamairapan a kiew. Oniay insulat nen apostol Juan ya akanengneng ed inkagawa: Legan na impanirap nen Jesus, si Maria et akaalagey ya “asingger ed panamairapan a kiew nen Jesus.” Anggapoy makaamper ed satan ya matoor tan maaron ina ya onasingger ed anak to diad sampot a pankanawnawa. Anengneng nen Jesus si Maria, tan anggano nanairapan lan onengas tan mair-irap ton ibalikas so kada salita, siansia nin nansalita . Imbilin toy ina to ed inad-aro ton apostol a si Juan. Lapud agni mananisia iray agagi nen Jesus ed laman, ag-inmatalek nen Jesus si Maria ed sikara noagta diad sakey a matoor a patumbok to. Impanengneng dia nen Jesus ya importante ed sakey a toon mabiskeg so pananisia to ya asikasoen iray walad pudir to, lalo la ray espiritual a pankaukolan da.—Juan 19:25-27.

Nen asabi lay oras na ipatey nen Jesus, alikna nen Maria so ermen ya abayag lan nipasakbay, say andukey ya espada ya ontalos ed sikato. No agtayo naimadyin so graben ermen to, mas lalon agtayo naimadyin so liket ya alikna to kayari taloy agew! Naimatonan to so sankabalgan ed amin ya milagro—abilay si Jesus! Tan naaruman so liket to ta nampanengneng si Jesus ed agi tod ina ya si Santiago nen bukbukor to. (1 Corinto 15:7) Lapud satan, apakiwas si Santiago pati saray arum nin agagi tod ina. Naaralan tayo ya anisia ra lanlamang ya si Jesus so Kristo. Ag-abayag et kaiba da lay ina da ed Kristianon pantitipon ya “nantultuloy a nampikasi.” (Gawa 1:14) Duara ed sikara, si Santiago tan si Judas, et kaiban angisulat ed saray libro na Biblia.

Say sampot ya impamitlad si Maria et nen sikatoy walad pantitipon a manpipikasi kaiba iray anak ton lalaki. Talagan dugaruga so impanampot na rekord nipaakar ed sikato, tan marakdakep so alimbawan intilak to! Lapud pananisia nen Maria, asarag toy graben ermen, tan naawat ton siansia so sakey a maglorian tumang. No aligen tayoy pananisia to, nasarag tayo met so antokaman a pakasakitan ya manlalapud sayan mundo a napnoy problema, tan naawat tayo met iray bendisyon ya mas ni nen say iisipen tayo.