ONAPIT ED DIOS
“Sikato so Dios na Saray Mabilay”
Kasin mas makapanyari so patey nen say Dios? Siempre andi! Panon a magmaliw ya mas makapanyari so patey—odino arum nin “kabusol”—nen say “Makapanyarin-amin a Dios”? (1 Corinto 15:26; Exodo 6:3) Walay pakayari na Dios ya ekalen so patey panamegley na kioli odino pamilay to lamet ed inaatey, tan insipan ton gawaen to itan ed balon mundo to. * Segurado kasin sumpalen to itan a sipan? Saray mismon balikas na anak na Dios a si Jesus so mangiter ed kapusoan tayo na ilalo.—Basaen so Mateo 22:31, 32.
Nen katongtong nen Jesus iray Saduceo ya agmanisia ed kioli, inkuan to: “No nipaakar ed kioli na saray inaatey, agyo ta abasa imay imbaga na Dios ed sikayo, ‘Siak so Dios nen Abraham tan say Dios nen Isaac tan say Dios nen Jacob’? Sikato so Dios na saray mabilay, aliwan saray inaatey.” Say tutukoyen nen Jesus ed saya et samay impitongtong na Dios ed si Moises diad arap na mandarlang a kiew manga 3,500 taon lay apalabas. (Exodo 3:1-6) Unong ed si Jesus, samay imbaga nen Jehova ed si Moises a “siak so Dios nen Abraham tan say Dios nen Isaac tan say Dios nen Jacob” et mangipapatnag ya say sipan a kioli et seguradon nagawa. Panon?
Pantongtongan tayo nin unona no kapigan itan imbagad si Moises. Nen akitongtong si Jehova ed si Moises, saray patriarkan di Abraham, Isaac, tan Jacob et abayag lan inatey—si Abraham et 329 taon lan inatey, si Isaac et 224, tan si Jacob et 197. Balet say kuan nen Jehova et “Siak so”—aliwan “Siak nensaman so”—Dios da. Tinukoy nen Jehova irayan patriarka a singa ira mabilay. Akin?
Oniay imbaga nen Jesus: “Sikato [Jehova] so Dios na saray mabilay, aliwan saray inaatey.” Isipen pa no antoy kabaliksan na saratan a salita. Si Jehova et magmaliw a Dios na saray inaatey, no agnabilay lamet ira di Abraham, Isaac, tan Jacob. Ompatnag ed satan a say patey et mas makapanyari nen say si Jehova ta agto sarag ya iliktar iray matoor a lingkor to manlapud satan.
Anto sirin so ilaloan tayon nagawa ed sikara di Abraham, Isaac, Jacob, tan amin ya inaatey lan matoor a lingkor nen Jehova? Onia so inyebat nen Jesus: “Mabilay iran amin ed sikato.” (Lucas 20:38) Talagan segsegurado so pamaoli nen Jehova ed saray inaatey lan matoor a lingkor to kanian tinukoy to ra a singa ra mabilay. (Roma 4:16, 17) Pansiansiaen ira nen Jehova ed perpekton memorya to anggad nasabi panaon na pamilay to lamet ed sikara.
Mas makapanyari si Jehova nen say patey
Kasin naliliketan kan nakaiba lamet so inad-arom a naandi lad bilay? Tandaan mo sirin a mas makapanyari si Jehova nen say patey. Anggapoy makaamper ed sikato diad panumpal tod sipan ton bilayen lamet iray inaatey. Akin ta no mas aralen moy nipaakar ed sipan ya kioli tan say Dios ya manggawad satan? No gawaen mo itan, mas onapit ka ed si Jehova a “Dios na saray mabilay.”
Suhestion a Basaen ed Biblia Legay Pebrero
^ par. 1 Pian makala na kaaruman ya impormasyon nipaakar ed sipan na Dios ya kioli na saray inaatey ed matunong a balon mundo, nengnengen so kapitulo 7 na libron Anto so Peteg ya Ibabangat na Biblia? ya im-publish na Saray Tasi nen Jehova.
