Onapit ed Dios
‘Yinmurong so Masiken na Saray Ag-agew’
“ANGGAPO so toon akanengneng ed Dios anggan kapigan,” so kuan na Biblia. (Juan 1:18) Say itsura na Dios et talagan magloria kanian agnayarin nanengneng na totoo ta ompatey ira. (Exodo 33:20) Balet, wala ray pankanawnawa ya inikdan nen Jehova iray pigaran lalaki na pasingawey ed tawen. Sakey ed sikara si propetan Daniel. Say anengneng to et nandinayewan to, tan nepeg ya ontan tayo met. Imanoen no panon ya deneskribe nen Daniel so pasingawey. *—Basaen so Daniel 7:9, 10.
Say “Masiken na saray Ag-agew.” (Daniel 7:9, 13, 22) Si Daniel labat so angusar ed titulo ya “Masiken na saray Ag-agew.” Panon katatken si Jehova? Lapud sikato so “Ari ya andi-angga,” anggapoy gapo tan sampot to. (1 Timoteo 1:17; Judas 25) Ipapaseguro na saya ya anggapoy limitasyon na karunongan to, tan ibabaga na Biblia ya mikonektaan so karunongan ed edad. (Job 12:12) Tua, agnatukor na kanonotan na too so andi-angga ya kiwawala na Dios. Balet iilaloan tayo kasi ya natalosan tayo so amin ya agnaparaan a karunongan na Dios?—Roma 11:33, 34.
Imanoen ya say Masiken na saray Ag-agew et “yinmurong.” Akin? Diad arum iran teksto et inusar so salitan “pangukom.” (Daniel 7:10, 22, 26) Kanian, diad pasingawey et yinmurong si Jehova bilang Ukom. Siopay ukomen to? Saray nasyon ed dalin ya deneskribe nen Daniel ed pasingawey to bilang ayayep. * (Daniel 7:1-8) Anton klase na Ukom si Jehova?
“Say kawes to et amputi a singa niebe [odino snow], et say buek na ulo to, singa malinis a bago na karnero.” Isisimbolo na amputi so inkatunong tan kalinisan. Kaslakan lan amputi so kolor na bago na karnero. Kanian, say buek ya singa bago na karnero et amputi. Naiimadyin moy anengneng nen Daniel? Kasin singam nanenengneng so Ukom ya amputi so buek to tan akakawes na amputi a singa niebe? Ipapaseguro na sarayan deskripsion ya say pangukom nen Jehova et matunong tan marunong. Sikato so klase na Ukom ya napanmatalkan tayo tan nepeg a respetoen.
Sikato so klase na Ukom ya napanmatalkan tayo tan nepeg a respetoen
“Libolibo so saray nanlingkor ed sikato, tan samplonlibo ed maminsamplon libo so inmalagey ed arap to.” Siopa irayan lingkor ed tawen? Tatawagen na Biblia iray anghel ya “ministros” odino lingkor na Dios. (Salmo 104:4) Saray anghel na Dios a nilasus milyon et okupadon “manusumpal na saray ganggan to” tan “manguunor ed linawa to.” (Salmos 103:20, 21, Maung a Balita) Agta sakey ni ’tan a paneknek ya anggapoy limitasyon na karunongan na Dios? Likud ed si Jehova, wala ta ni arum ya makapangiyuksoy ed nilasus milyon ya anghel ed tawen tan ag-ontutundan mankikimey diad abayag lan panaon?
Napakiwas itayo na pasingawey nen Daniel pian manmatalek ed si Jehova, say Masiken na saray Ag-agew. Say panangukom to et matunong, tan say karunongan to et napanmatalkan. Kasin labay mo so mas napaapit ed sankarunongan a Dios?
Suhestion a basaen ed Biblia legay Oktubre:
^ par. 3 Agtalaga anengneng nen Daniel so Dios. Imbes, wala ray inkarga na Dios ed isip to. Tan sanen deneskribe nen Daniel so anengneng to, impara to itan ed itsura tan walna na too. Makatulong iratan pian natalosan tayo so Dios tan ag-ipasen a literal iratan.
^ par. 5 Parad samay pasingawey nen Daniel ya ayayep, nengnengen so kapitulo 9, Tomo 2, na brosyur ya Imanoen so Propesiya nen Daniel! ya im-publish na Saray Tasi nen Jehova.
