• TAON NA INKIANAK: 1974

• BANSA: CHILE

• APALABAS: MAINUM NA ALAK

ISTORYAY BILAY KO:

Nianak ak diad marakep a syudad na Angol, diad Chile. Agkon balot anengneng so tatay ko. Nen taloy taon ko, inmalis kami di nanay ko tan samay yugtan ko diad Santiago, kabisera na Chile. Say nanayaman mi et melmelag ya kuarto ed iskwater. Say kasilyas mi et public CR tan say asolan mi et diad fire hydrant.

Kalabas na duay taon, inikdan kami na gobiernoy melag ya abung. Pero, saray kakaabay mi et adik, buanges, kriminal, tan prostitute.

Walay lakin akabat nen nanay ko, tan nagmaliw ya asawa to. Buanges ya maong so stepfather ko. Bubugbogen to kami nen nanay ko. Kanian no anggapoy makakanengneng, iyakis ko. No walay tatay ko, di wala komoy mangiyagel ed siak.

Anggano tumalikarkar kalamor si nanay ko ya mantrabaho, mairap nin siansiay bilay mi. No anggapo lay naakan mi, papasaragen mi gatas tan asukar. Pian makaliket kami nen agik, siim-siim kamid bintana na kaabay mi pian makapibantay kami TV. Balet sakey ya agew et narel to kami, kanian manlapud saman agkami la akabantay!

No matino imay stepfather mi​—mataltalag ya maong balet—​isaliwan to kami met nin agik na panangan mi. Sakey ya agew, insaliwan to kami melag ya TV. Sakey iman ed saray pigpigaran agew ya nanonotan kon maliket ak.

Nen 12 años ko, naaralan koy manbasa. Kalabas balet na sakey taon, tinmunda ak ya nanaral tan nantrabaho ak la. Kayari trabaho, mimila ak ed saray katrabahok pian manhapi-hapi. Manbuabuanges tan mandra-drugs kami. Ag-abayag et naadik ak lan maong.

Nen 20 ak la, akabat koy Cati, tan nen kien et nankasal kami. Nen unaan et ayos ya amin, pero kalkalnan pinawil ko ray bisyok. Inmuges-uges so ugalik, tan asabi punton amoriak ya duara labat so pansumpalan ko, no aliwan kulongan et diad sementeryo. Amoriak met ya amay bilay ko nen ugaw ak et onman met so ipapataway kod panguloan ko ya si Victor.  Maer-ermen ak, kabusol koy sarilik, tan singa anggapoy kana na bilay ko.

Manga 2001 ed saman sanen walay duaran bibiin Tasi ya nampulong ed abung mi tan inyaralan day Biblia si Cati. Iyiistorya tod siak iray nanaaralan to. Nainteresan ak kanian nampaiyaral ak met na Biblia. Nen 2003, nampabautismo si Cati bilang Tasi nen Jehova.

NO PANON YA INUMAN NA BIBLIA SO BILAY KO:

Aminsan, abasak so Rut 2:12, ya say kuanto et bebendisyonan nen Jehova iramay manisia tan manpasalimbeng ed sikato. Naisip kon no manguman ak, napaliket koy Dios tan bendisyonan to ak. Aminpigak ya abasa a kokondenaen na Biblia so panagbuanges. Baleg met so epektod siak na samay 2 Corinto 7:1. Unong ed satan et nepeg ya “linisan tayoy inkasikatayo ed amin a karutakan.” Kanian ginawak so amin pian itunda ray bisyok. Diad gapo et lalon mapaspasnok ak, pero agto ak tinundaan ya tinulongan nen asawak.

Asabisabin inmekal ak ed trabahok lapud tutuksoen da ak ya mansigarilyo tan oninum lamet. Tua ya nankontento kamid daiset nen anggapoy trabahok, balet mas dakel so panaon kon manaral na Biblia. Kanian pinmeles so inyaligwas kod espiritual. Agbalot nanreklamo si Cati ta daiset lay niyaawat kon kuarta tan simsimple bilay mi. Pisalsalamatan kon talagay suporta to.

Kalkalna ak met ya akiulop ed saray Tasi. Impalikna dad siak ya anggano abebay aral ko, papablien nen Jehova so impapuson pilalek kon manlingkor ed sikato. Say anengneng min aroan tan pankakasakey na saray agagid kongregasyon et baleg so epekto tod pamilya mi. Anggapo lay arum ya pakanengnengan mid satan. Nen Disyembre 2004, nampabautismo ak met la.

MARAKEP IRAN RESULTA:

Apaneknekan kon tua imay imbaga nen Jehova ed Isaias 48:17 ya: “Siak si Jehova a Dios mo, ya angibangat ed sika na nipaakar ed nabang mo.” Ag-makapanisiay nanay ko tan samay agik ed impanguman ko kanian natan et manaaral met la ray Biblia. Makakaliket met iray kakaabay mi ta anguma-uman ak tan malikeliket so pamilyak.

Malikeliket ak ta say asawak et inar-aro toy Dios tan papablien to ak bilang napanmatalkan ya kaibad bilay tan kaaro. Anggan agkon balot akabat so tatay ko, naaralan kod Biblia no panon kon pabalegen so taloran ilalak ko. Rerespetoen da ak. Sankaimportantian ed amin, walay takot dad si Jehova tan inar-aro da.

Misalsalamat ak ya maong ta anggano apaulyanan ak nen ugaw ak, inikdan ak nen Jehova na pankanawnawan magmaliw ya maliket.

• TAON NA INKIANAK: 1974

• BANSA: BULGARIA

• APALABAS: DRUG PUSHER

ISTORYAY BILAY KO:

Nianak ak ed Sofia, Bulgaria. Agmet tanto mairap so bilay mi. Tinaynan kami nen tatay ko nen anem taon ko ni labat. Agko naisip ya nagawa iman, tan asakisakitan ak. Pakaliknak et inabandona ak tan anggapoy mangaaro ed siak. Kanian legan na ibabaleg ko, nagmaliw ak ya rebelyoso. Mapaspasnok tan palaban ak ya bii.

Katorse años ko ni labat et sinalik lay linmayas. Tatakewan koy kuarta si nanay ko pati si laki tan baik. Lapud palaban ak, naynay ak ya sangkot ed gulo diad eskuelaan kanian pigay taon labat et aka-limaran eskuelaan ak. Taloy taon labat la komon et man-graduate ak la pero agko la intuloy. Imoral ya maong so bilay ko. Naadik ak ya maong ed sigarilyo tan marijuana. Naynay ak ya akainum, ayaman koy disco, tan asangkot ak ed panaglakoy druga. Parad siak et singa anggapoy kuenta na bilay ta manpapairap tan ompapatey lanlamang so totoo. Kanian anggano antoy gawaen ko basta maliket ak, ayos la.

Nen 1998, 24 años ak ed saman, naaresto ak ed airport diad São Paulo, Brazil lapud mangipupuslit ak na ilegal ya druga. Asentensiaan ak na apat taon ya pakapriso.

NO PANON YA INUMAN NA BIBLIA SO BILAY KO:

Nen taon 2000, wala ray Tasi nen Jehova ya ompapasyar ed prisoan mi maminsan ed sakey simba. Maomaong ed siak imay sakey ed sikara, si Marines. Akombinse to ak ya manaral na Biblia. Lapud diad saman ko labat nakatongtong iray Tasi nen Jehova, tinepetan ko ray kaibak ya priso no antoy nibaga ra. Amin da lawari et kontrad saray Tasi. Say kuan ni ingen na sakey ya priso, ayos labat ya mimembro ak ed anggan anton relihyon basta aliwan diad saray Tasi. Mas nannonot ak laingen no akin ya dakel so mamubusol ed sayan relihyon. Naisip ko ya anganko sikara so tuan relihyon ta ibabaga na Biblia ya saramay tuan papatumbok nen Jesus et busoley totoo.​—2 Timoteo 3:12.

Diad saman et niyasain ak ed administration building na prisoan. Sakey ya agew, akalmo ak na kahon ya nankargay daan iran Panag-bantayan tan Awake! * diad bodega. Inawit kod seldak iraman ya magasin tan binasak. Diad idarakel na nababasak, diman ko nalilikna ya singa ak akalmoy bobon na malinis ya danum diad pegley na desierto. Lapud anggapo met so tanton gagawaen ko, dakel so panaon kon manaral na Biblia.

Sakey ya agew, impatawag da ak ed opisina. Say abaloan ko ibulos da ak la kanian binalkot kon tampol iray gamit ko, nampatanir ak ed saray kaparak ya priso, tan batik ak ed opisina.  Kasabik balet diman, naamtaan kon walay balon inkaso dad siak nipaakar ed palsipikado iran dokumento. Kanian duay taon ak nin napriso.

Nakalan ak na ilalo. Balet kalabas na pigaran agew, amoriak ya walay kaabigan to met ya agak ni akapaway. Tua ya dakel lay naaralan kod Biblia pero diad pusok et labay ko nin pawilen so mauges ya panagbilay ko kapaway kod prisoan. Kaukolan ko ni panaon pian makapanguman ak ya talaga.

No maminsan, naisip kon agak makanepegan ya manlingkor ed Dios. Balet ninonot kon maong may ibabaga na 1 Corinto 6:9-11. Base ed saratan ya bersikulo, saray arum ya Kristiano nensaman et datin matatakew, buanges, tan managkatkat antis iran nagmaliw ya lingkor nen Jehova. Pero diad tulong nen Jehova et anguman ira. Apabiskeg ya maong so liknaan ko.

Mainomay kon inekal so arum ya bisyok. Singa bilang, agak nairapan ya mangitundad pandrudrugak. Nairapan ak balet ya mangitundad panagsigarilyo. Sakey taon kon nilabanan ya anggad nakal kon siansia. Akatulong so impan-research kod saray makapuy ya epekto na sigarilyo. Balet, say manunan rason kanian nakal ko itan et say agmanundan impanpikasik ed si Jehova.

Diad lalon iyaapit kod si Jehova, kalkalnan nakal imay eem-eman kon sakit na linawa nen tinaynan kami na tatay ko. Tinmanek ed pusok imay walad Salmo 27:10. Say kuanto: “Bangno paulyan ak na amak tan inak, si Jehova ed satan ampopoen to ak.” Nalmok a siansia so sankamaongan a Tatay ya agbalot manaynan ed siak! Natan et wala lay direksion na bilay ko. Nen Abril 2004, anem bulan labat kayari inkibulos kod prisoan, nampabautismo ak ya Tasi nen Jehova.

MARAKEP IRAN RESULTA:

Maliket ak la natan. Lapud anggapo lay bisyok, mas balibali kondisyoy laman tan emosyon ko nen say nen kaugawan ko. Balibali ulopan mi nen masiken ko, tan inmelet so pikakaarok ed Amak ya walad tawen, si Jehova. Akalmo ak na dakel ya tatay, nanay, tan agagi diad organisasyon to. (Marcos 10:29, 30) Agaylay pisalsalamat ko ta positiboy impantrato dad siak anggano abebbebay pakanengneng kod sarilik.

No maminsan, nakokonsiensia ak nin siansia lapud saray ginawgawak nensaman. Pero say nononoten ko la et samay sipan na Dios ya diad balon mundo, ‘agla nanonotan’ iray maermen ya apalabas. (Isaias 65:17) Lapud bilay ko nensaman, amtak so liknaan na saray totoon kaparak na situasyon. Kanian nanausar koy apalabas ko diad maabig a paraan. Singa bilang, diad panagpulong et mainomay koy makapitongtong ed saray adik, buanges, odino kriminal​—labalabay ko ran tulongan. Manisia ak ya no asarag koy anguman pian paliketey Jehova, sarag met na anggan siopa!