Abraham​—Mapaabeban Too

Diad kapkaptangay agew, si Abraham et akayurong ed loob na tolda to. Legan ton ombabantag ed arawi, walay anengneng ton taloran lalaki ya dayo ed lugar da. * Tampol ya binmatik si Abraham pian abeten ira. Kinombinse to ran manpainawa nin magano, diad ontan et nasangkaili to ra. Inkuan ton iyawitan to ra labat na tinapay, balet ta pinasya toy angiparaan na dakel a naakan​—kakkapanggawan tinapay, mantikilya, gatas, tan sankaabigan a klase karne. Imparungo iyan mismo nen Abraham ed saray bisita to. Diad sayan ginawa to, agto labat impanengneng a sikatoy talagan maong a manangkaili. Impanengneng to met a sikatoy mapabpaabeba.​—Genesis 18:1-8.

ANTO SO INKAMAPAABEBA? Say inkamapaabeba et kabaliktaran na panagpasirayew, panaglastog, tan inkaarogante. Amta na toon mapaabeba ya diad nanduruman paraan et mas marunong so arum nen say sikato. (Filipos 2:3) Sikatoy ondedengel ed opinyon na arum, tan maliket ton gagawaey anggan anton klase kimey pian napanserbian so arum a too.

PANON YA IMPANENGNENG NEN ABRAHAM SO INKAMAPAABEBA? Maliket ton sinerbian so arum. Singa nibaga lad gapo, sanen anengneng nen Abraham iramay taloran lalaki, tampol ton inasikasoy pankaukolan da. Nanapuran angiparaan si Sara na naakan da. Balet, agta tumalikarkar met a mismo si Abraham? Sikato so angabet ed saramay bisita, sikato so angimbitad sikaran mangan, sikato so binmatik diman ed kawalaay pulok tan amili maong a klasen kilaw a baka, tan sikato so angiparungo tan nanserbi ed saray bisita. Imbes ya ipagawa toy amin a kimey ed saray aripen to, nankimey a mismo iyan mapaabeban laki. Agto inisip ya onabebay dignidad to no serbian toy arum.

Dinmengel si Abraham ed opinyon na saray walad sakop to. Pigpigara labat so nabasad Biblia ya impantongtong di Abraham tan Sara.  Balet diad saraya, walay duaran nabasa tayo ya dinmengel si Abraham ed opinyon nen Sara tan inmabuloy ya satan so nagawa. (Genesis 16:2; 21:8-14) Diad samay sakey ya inkagawa, nen unaan et talagan ag-agustoan nen Abraham so ideya nen asawa to. Balet sanen binilin nen Jehova si Abraham tan imbaga Ton maabig so suhestion nen Sara, sikatoy mapaabeban inmabuloy tan ginawa toy kerew na asawa to.

ANTORAY NAARALAN TAYO? No talagan mapaabeba tayo, maliket tayon serbian so arum. Akaparaan tayon gawaen so antokaman pian napaliket ira.

Nipanengneng tayo met ya mapaabeba itayo no ondengel tayod opinyon na arum. Imbes ya agtayo awaten so ideya na arum ta duma itan ed iisipen tayo, maabig no denglen tayoy komento ra. (Uliran 15:22) Maong so resulta na ontan ya ugali, lalo lad saramay walaan na posisyon. “Apruebaan kon maabig a talaga no say supervisor et ipalikna tod saray katrabahoan to ya sarag da labat ya ibaga no antoy labay dan ibaga,” so kuan na abayag lan supervisor ya si John. Onia ni imbaga to: “Kaukolan ya mapaabeba ka pian naawat mon say sakey ya toon mas abebay posisyon to et nayarin mas maong so naisip to nen say sika. On, anggano supervisor ka ni, agto labay ya ibagan sika labat so walaan na marakep ya ideya.”

No aligen tayoy Abraham diad idengel tayod opinyon na arum tan panggawa tayoy anggan anton klase kimey pian napanserbian so arum a too, bendisyonan itayo na Dios. Tandaan, “kabusol na Dios iray mapaatagey, balet iiter toy agnaparaan a kaabigan ed saray mapaabeba.”​—1 Pedro 5:5.

[Paimano ed leksab]