Uumanen na Biblia so Bilay

Antoy amakiwas ed sakey a kalangweran ya ompawil ed binalegan ton relihyon a tinaynanan to? Basaen tayoy istorya to.

“Wala La Natay Tuan Gagalak ed Bilay.”​—LISA ANDRÉ

TAON NA INKIANAK: 1986

BANSA: LUXEMBOURG

APALABAS: REBELDEN ANAK

ISTORYAY BILAY KO: Binmaleg ak ed Bertrange, sakey a malinis, mareen, tan maaligwas a baley ya asingger ed Luxembourg. Bolirek ak ed sikamin limaran sanaagi. Tasi nen Jehova iray atateng ko, tan ipupurek dan naynay ed sikami ra di kuyak tan atsik iray prinsipyo na Biblia.

Sanen man-tinedyer ak la, nanduaruwa ak ed ibabangat na saray Tasi nen Jehova. Diad gapo et imbaliwalak iraya, balet ta kinmapuy lan kinmapuy so pananisiak. Ginawan amin na atateng ko so anggaay nayarian da pian igiya ak ed dugan dalan, balet ta agko ra dinengel. Agda amta ya mimitmila ak ed saramay kalangweran ya anggapoy respeto rad autoridad. Labay koy kabibilay da ya anggapoy mibabali. Mabetbet kamin man-party, akirelasyon ed nanduruman lalaki, tan nan-abuso ed droga tan alak. Labalabay koy milad saramay singa mani-enjoy ya maong.

Balet diad tua, agak talaga maliket. Anggapoy direksion na bilay ko no kaibak ira; anggapoy pibabali rad saray nagagawa. Naaaburido ak balet ed igragrabe na ag-inkahustisyad mundo. Diad ilalabas na agew, lalo ak ya nadedepress.

NO PANON YA INUMAN NA BIBLIA SO BILAY KO: Sanen 17 años ko, wala may sakey ya agew ya talagan adepress ak. Apansin iya nen nanay ko, kanian imbaga ran manaral ak lamet na Biblia. Pinaseseg da ak ya aralen iray bangat na satan insan ak mandesisyon no labay kon tumboken iratan odino andi. Satan ya impantongtong mi so amangon ed siak. Nampaiyaral ak na Biblia ed si atsik Caroline tan ed asawa ton si Akif. Si Akif so agbinmaleg bilang Tasi nen Jehova balet abautismoan nen adulto la. Lapud aliwan sipor ya Tasi, mas nibagak ed sikato iray liknaan ko, saya so talagan kaukolan ko.

Amtak ya aliwan manepeg ed sakey a Kristiano so ginawak, balet aman so pinilik. Nen  nanaral ak balet na Biblia, diman ko amoria ya asakitan koy liknaan nen Jehova ed saray ginawak. (Salmo 78:40, 41; Uliran 27:11) Amoriak ya anggan saray arum et naapektoan met.

Sanen aaralen kon maong so Biblia, naamtaan ko ya walaray malinew tan makakombinsin rason pian panisiaan a saya et Salita na Dios. Singa bilang, naaralan koy dakel a propesiya ed Biblia ya tinmua​—a talagan makapadinayew ed inkasusto. Sarayan naamtaan ko so angekal ed saramay panduaruwaan ko nensaman.

Kalabas na manga sakey taon manlapud samay impanaral ko na Biblia, siak tan saray atateng ko so binmisitad si kuyak ya manvo-volunteer ed branch office na saray Tasi nen Jehova diad Germany. Nen anengneng kon sikatoy malikeliket diman, atenyeg so pusok. Satan ya liket so abayag ko lan aanapen! Pandinayewan ko met iray arum ya Tasin manvo-volunteer diman. Nidumaduma rad saramay akaulop ko ya aliwan matua tan mahilig ed panliliket. Kayarin tuloy na saman, nampikasi ak ed si Jehova, insipan kon sikatoy panlingkoran kod interon bilay ko. Diad edad ya 19, indedikak so bilay kod si Jehova tan nampabautismo ak.

MARAKEP IRAN RESULTA: Wala la natay tuan gagalak ed bilay. Maliket ak ed pambabangat koy Biblia ed arum, natutulongan ko ran nakabat si Jehova tan saray sipan tod arapen. Maliket met so pamilyak​—agla ra manaaburido ed siak.

Amtak ya alingo ak, balet agko la sankanonot a naynay. Imbes, say panamerdona nen Jehova tan say maaron interes tod siak so angisentroan ko na imanok. Talagan tudtua ed siak iray salitan walad Uliran 10:22 ya: “Say bendisyon nen Jehova makapayaman; tan agmangarum na ermen.”

[Blurb ed pahina 12]

“Mabetbet kamin man-party, akirelasyon ed nanduruman lalaki, tan nan-abuso ed droga tan alak”

[Blurb ed pahina 13]

“Amtak ya alingo ak, balet agko la sankanonot a naynay”