Ibangat Yo Iray Anak Yo

Naaralan nen Jesus so Magmaliw a Matulok

KASIN no maminsan et ngalngali agmo labay so ontulok?​— * On, normal labat a naliknam itan. Amin tayo et nanairapan ya ontulok no maminsan. Antam ya anggan si Jesus et kaukolan ton aralen so magmaliw a matulok?​—

Siopa kasi so nepeg a tuloken na amin ya ugugaw?​— On, si tatay tan nanay tayo. Oniay ibabaga na Biblia: “Magmaliw kayon matulok ed atateng yo unong ed linawa na Katawan.” (Efeso 6:1) Antam no siopay Ama nen Jesus?​— Duga, si Jehova a Dios, tan sikato met so Ama tayo. (Mateo 6:9, 10) Balet no say ebat mo et si Jose so ama nen Jesus tan si Maria so ina to, duga met itan. Panon balet a sikaray nagmaliw ya ateng to ey?​—

Imbaga nen anghel Gabriel ed si Maria a sikatoy manlukon anggano agni akiakdol ed laki. Ginawa nen Jehova a posible so panlukon nen Maria panamegley na sakey a milagro. Imbaga nen Gabriel ed si Maria: “Tarongan ka na pakayari na Sankatageyan. Lapud satan met, say nianak et natawag a masanto, Anak na Dios.”​—Lucas 1:30-35.

Inyalis na Dios so bilay na Anak to manlapud tawen tan inyan to ed eges nen Maria. Insan binmaleg itan ed eges nen ina to a singa saray arum met ya ugugaw. Kayari na siameran bulan, nianak si Jesus. Legan na satan, inkasal nen Jose si Maria kanian abaloan na arum a say peteg ya ama nen Jesus et si Jose. Balet diad tua, si Jose et pinagka-ama to diad dalin. Kanian nibagan duaray ama nen Jesus!

Sanen 12 taon ni labat nen Jesus, walay ginawa ton pakanengnengay baleg a panangaro to ed Ama ton walad tawen, si Jehova. Diad saman, nambiahe so pamilya nen Jesus paonla’d Jerusalem pian manselebray Paskua, unong a niyugali da la. Balet, sanen pasempet la ra’d Nazaret, agnaimano nen Jose tan Maria ya agda manaya kaibay Jesus. Akin kasi et alingwanan day Jesus?​—

Diad saman et wala ni arum ya ananak nen Jose tan Maria. (Mateo 13:55, 56) Nayarin wala met iray kakanayon da a kaiba ran manbiabiahe, a singa di Santiago tan Juan a kaibay ama ran si Zebedeo tan say ina ran si Salome, a nayarin agi nen Maria. Kanian, posiblin ninonot nen Maria ya akiulop si Jesus ed arum a kakanayon da.​—Mateo 27:56; Marcos 15:40; Juan 19:25.

Sanen naimano nen Jose tan Maria a nababalang si Jesus, amawil iran tampol ed Jerusalem. Mapagpaga iran nananap ed anak da. Diad komatlon agew et aromog day Jesus ed templo. Imbaga nen Maria ed sikato: “Akin ya oniay ginawam ed sikami? Aburido kami lan maong nen amam ed panaanap mi ed sika.” Balet oniay ebat nen Jesus: “Akin et aanapen yo ak? Agyo ta amta a nepeg a wala ak ed abung nen Amak?”​—Lucas 2:45-50.

Parad sika, makapuy kasi ‘may impangebat  nen Jesus ed si ina to?​— Andi, ta amta na saray ateng nen Jesus a labalabay toy mandayew ed abung na Dios. (Salmo 122:1) Kanian, agta duga labat ya ilaloan nen Jesus a say unonan pasen a pananapan da’d sikato et diad templo na Dios?​— Saman ya imbaga nen Jesus et tinandaan nen Maria.

Anto so ugalin impanengneng nen Jesus ed atateng ton si Jose tan Maria?​— Ibabaga na Biblia: “[Si Jesus et] akila ed sikara a sinmempet ed Nazaret, tan nantultuloy a nampasakop ed sikara.” (Lucas 2:51, 52) Anto so naaralan tayo’d alimbawa nen Jesus?​— On, kaukolan tayo met so magmaliw a matulok ed saray ateng tayo.

Ingen, aliwan naynay a mainomay ed si Jesus so ontulok​— anggan diad Ama ton walad tawen.

Diad samay labi antis na impatey nen Jesus, kinerew to ed si Jehova a no nayari komon et umanen Toy nonot To nipaakar ed samay ipapagawa To. (Lucas 22:42) Balet siansia nin tinulok nen Jesus so Dios anggan mairap itan. Inkuan na Biblia a “naaralan toy katutulok makasengeg ed saray asagmak to.” (Hebreos 5:8) Parad sika, naaralan tayo met kasi magmaliw a matulok?​—

[Paimano ed leksab]

TEPETEPET:

▪ Panon a nagmaliw ya ina nen Jesus si Maria, tan akin a nibaga tayon duaray ama nen Jesus?

▪ Akin et agnaimano na atateng nen Jesus a sikatoy atilak?

▪ Iner so iilaloan nen Jesus a pananapan ed sikato na atateng to?

▪ Antoy naaralan mo ed alimbawa nen Jesus?

[Litrato ed pahina 31]

Parad sika, akin et nepeg a diad templo so unonan pananapan di Jose tan Maria ed kinen Jesus?