Kasin si Jesus so Dios?

PARAD dakel a totoo, say Trinidad so “manunan doktrina na Kristianon relihyon.” Unong ed sayan bangat, say Ama, Anak, tan say espiritu santo et taloran persona diad saksakey a Dios. Oniay imbaga nen Kardinal John O’Connor nipaakar ed Trinidad: “Amta tayon balbaleg a misteryo iya, ya anggad natan et agtayo ni natatalosan.” Akin et mair-irap a talosan so Trinidad?

Inter na The Illustrated Bible Dictionary so sakey a rason. Oniay inaksobi na sayan publikasyon nipaakar ed Trinidad: “Aliwa iyan doktrina na Biblia, ta anggapoy teksto ditan a makapangipaliwawa ed saya.” Lapud say Trinidad et ‘aliwan doktrina na Biblia,’ saray mananisia ed Trinidad et desperadon manaanap na saray teksto ed Biblia​—a pipikeweten da ni ingen iratan​—pian labat nasuportaan iyan bangat.

Tekston Mangibabangat ed Trinidad?

Say sakey a bersikulo ed Biblia a mabetbet ya uusaren ed lingon paraan et say Juan 1:1. Diad Say Santa Biblia, oniay nabasa tayo ed satan a bersikulo: “Dia ed gapo wala la so Verbo, tan say Verbo wala ed Dios [Griego, ton the·onʹ], tan say Verbo sikato so Dios [the·osʹ].” Karga na sayan bersikulo so duaran klase na Griegon noun a the·osʹ (dios). Samay unaan (the·onʹ) et walay kaiba ton Griegon definite article a ton (say), tan diad sayan kaso, samay the·onʹ et manutukoy ed Makapanyarin-amin a Dios. Balet, diad samay mikadua, salanti, diad samay the·osʹ et anggapo lay ton. Alingwanan labat kasin nikarga itan?

Say Ebanghelyo nen Juan et nisulat ed Koine, odino lenguahen Griego a kaslakan ya uusaren na totoo. Sayan lenguahe et walaay espisipiko iran totontonen nipaakar ed panangusar na definite article (ton, ho). Binidbir na sakey ya iskolar na Biblia a si A. T. Robertson a sano samay dedeskribien tan deskripsion et parehon walaan na definite article, “pareho irayan walay espisipikon  tutukoyen, ipapasen a nampara, saksakey, tan napansalatan.” Inusar nen Robertson ya alimbawa so Mateo 13:38 ya oniay nabasa: “Say uma [Griego, ho a·grosʹ] sikatoy mundo [Griego, ho koʹsmos].” Base’d gramatika, natalosan tayo’d saya a samay mundo et sikato lanlamang imay uma.

Panon to balet no samay dedeskribien et walay kaiba ton definite article, balet ta samay deskripsion et andian, a singa diad kaso na Juan 1:1? Oniay impaliwawa na iskolar a si James Allen Hewett, diad panutukoy to ed satan a bersikulo bilang alimbawa: “Diad satan ya inkatibukel, samay dedeskribien tan deskripsion et aliwan nampara, aliwan saksakey, tan talagan nandumaan.”

Bilang panangiyilustra, inusar nen Hewett so 1 Juan 1:5 a nankuan, “Say Dios so silew.” Diad Griego, samay “Dios” et ho the·osʹ tan sirin et walay kaiba ton definite article. Balet samay phos a nipatalos a “silew” et anggapoy definite article to. Oniay indanet nen Hewett: “[Diad saya et] sarag tayon . . . ibaga a say Dios et niyaliling ed silew; balet agtayo sarag ya ibagan say silew et Dios.” Walaray mipadparan alimbawa a naromog ed Juan 4:24, “Say Dios sikatoy sakey ya espiritu,” tan diad 1 Juan 4:16, “Say Dios sikato so aro.” Diad sarayan duaran bersikulo, saramay dedeskribien et walaay definite article (say), balet saramay deskripsion da, a singa say “espiritu” tan “aro” et andian. Kanian ag-iratan napansalatan. Diad saraya et agtayo nayarin ibaga a “Say sakey ya espiritu, sikatoy Dios” odino “Say aro sikato so Dios.”

Siopa Imay “Verbo”?

Bibidbiren na dakel a Griegon iskolar tan managpatalos na Biblia a say ipapabitar na Juan 1:1 et aliwan say nipaakar ed no siopa imay “Verbo,” noagta no antoy kualidad to. Oniay inkuan na managpatalos na Biblia a si William Barclay: “Anggapoy inyan [nen apostol Juan] a definite article [ton] antis na theos, kanian deskripsion labat itan . . . Ag-ibabaga nen Juan a say Verbo et sikato lanlamang so Dios. Diad simplin panangibaga, agto ibabagan si Jesus so Dios.” Onia met so inkuan na iskolar a si Jason David BeDuhn: “Diad Griego, no inekal moy [salitan ton odino ho] antis na theos diad sakey a sentence, a singa diad samay bandad sampot na Juan 1:1, isipen na saray makabasa a say labay mon ibaga et ‘sakey a dios.’ . . . Lapud anggapo imay definite article, nagmaliw a mandumaan a maong so theos tan samay ho theos, no panon a mandumaan met a maong so ‘sakey a dios’ tan ‘say Dios’” diad Pangasinan. Inkuan to ni: “Diad Juan 1:1, samay Verbo et aliwan sikatoy alenleneg tan saksakey a Dios, noagta sakey a dios, odino sakey ya espiritun singa Dios.” Odino, unong ed impangibaga nen Joseph Henry Thayer, sakey ya iskolar a kaiba’d impanggawa na American Standard Version: “Say Logos [odino, Verbo] et aliwan sikato so Dios, noagta singa labat Dios.”

Kasin kaukolan a magmaliw a “balbaleg a misteryo” no siopa so Dios? Mabitar a parad si Jesus et aliwan misteryo itan. Diad samay pikakasi to’d kinen Ama to et malinlinew ton impanengneng a sikato tan si Ama to et nandumaan: “Saya sikato so andi-anggaan a bilay, a naamtaan da ka a saksakey a tuan Dios, tan saman so imbakim, salanti Jesu-Kristo.” (Juan 17:3) No papanisiaan tayoy Jesus tan natatalosan tayoy malinlinew a bangat na Biblia, sikatoy respetoen tayo bilang Anak na Dios. Dayewen tayo met si Jehova bilang say “saksakey a tuan Dios.”

[Blurb ed pahina 19]

Akin et mair-irap a talosan so doktrinan Trinidad?

[Blurb ed pahina 19]

Malinlinew ya impanengneng nen Jesus a sikato tan si Ama to et nandumaan

[Picture Credit Line ed pahina 19]

Simbaan ed Tagnon, Pransya