NEN siameray taon ko, agak la binmaleg. Wala kami nid Côte d’Ivoire ed saman. Natan et 43 años ko la, balet sakey metro (3 ft) labat so kaatagey ko. Nen naimano na saray atateng ko ya agak la ombabaleg, imbaga dad siak ya mantrabaho ak lan mantrabaho pian agko sankanonot so itsurak. Nanlako ak na prutas diad arap na abung mi tan seseguradoen kon malinis tan maayos so lakok. Kanian dakel so mangasaliw.

Siempre, anggano makulikuli ak, anggapoy angumanay itsurak. Melag ak nin siansia, tan nanairapan ak ed anggan saray simplin bengatla. Singa bilang, irap koy manbayar ed garita ta melmelag ak. Amin lawarin bengatla et ginawa parad saray normal so kaatagey da. Kaskasian koy sarilik, balet anguman itan nen 14 años ko.

Aminsan, walay duaran bibii ya Tasi nen Jehova ya angaliw na prutas ed siak, tan inopresian da ak na panagaral na Biblia. Ag-abayag, amoriak ya mas importante ya akabat koy Jehova tan say gagala to nen say itsurak. Balibali so epekto na satan ed siak. Say paboritok ya teksto et Salmo 73:28 (NW). Amay unonan parte na satan et: “Say iyasingger ed Dios et pankaabigan ko.”

Balet biglan inmalis so pamilya mi diad Burkina Faso, tan anguma-uman so bilay ko. Diad lugar mid Côte d’Ivoire, apasal la ray totoo ya nanenengneng da ak ya manlalakoy prutas. Balet diad inalisan mi, anggapoy kabat ko, tan ag-ira apasal ed itsurak. Sankanengneng ak na saray totoo. Kanian agak pinmaway ed abung mi na pigaran simba. Insan ko anonotan so balibalin epekto ed siak na inyasingger kod si Jehova nen nanaral ak na Biblia. Sinmulat ak ed branch office na Saray Tasi nen Jehova, tan dugaruga so imbaki dan ombisita ed siak—si Nani, sakey a misionero ya aka-scooter.

Mairap so dalan ya paonlad sikami ta kabueran, tan no mamauran et mapitek. Lanang ya natutumba si Nani no onlan mangiyaral ed siak, balet agsinmuko. Aminsan et imbaga to ya samaren to ak pian makapiaral ak. Balet naisip kon seguradon sankanengneng ak na totoo. Sakey ni, no onlason ak ed scooter nen Nani, ambelat la kanian mas mairap ya kontrolen. Balet, pinmayag ak, ta sankanonot ko may komaduan parte na paboritok  ya teksto: “Say Soberanon Katawan a Jehova so pansasalimbengan ko.”

No maminsan et natumba kami nen Nani ed pitek, balet ayos labat ta labalabay koy miaral. Diad paway, makakabalaw so kanenengneng na totoo ed siak, balet diad loob na Kingdom Hall, maar-aro ray agagi! Kalabas na siameran bulan, nampabautismo ak.

Say komatlon parte na paboritok ya teksto et “pian ipaamtak so amin a gawa to.” Amtak ya baleg a subok ed siak so pampulong. Agko nalingwanan may inmunan impanpulong kod kaabungan. Sankanengneng ak na ugugaw tan anggan saray matatken la, tuttumboken da ak, insan da alig-aligey panangakar ko. Siempre, asakitan ak ed saman, balet lanang kon papanonotay sarilik ya kaukolan da met so Paraiso ya singa siak, kanian agak tinmunda.

Pian mas mainomay koy manpulong, angusar ak na traysikel ya lima so pampedal. No patatdang so dalan, itulak ak na partner ko, insan met la onlugan ed traysikel no palusor la. Nen primero, nairapan ak ed ministeryo, balet lapud naliliknak so liket, nampayunir ak nen 1998.

Dakel so iyaaralan koy Biblia, tan apatira ed sikara so nampabautismo la. Sakey ni, malikeliket ak ta say agik ya bii et inawat to met so katuaan! No nababalitaan koy iyaaligwas na arum, napapaseseg ak. Aminsan, nen nansakit ak na malaria, akaawat ak na sulat ya nanlapud Côte d’Ivoire. Walay agapoan kon inyaralan ya estudyante ed unibersidad diad Burkina Faso tan inendorsok lad sakey a brother. Balet nanayam la manayad Côte d’Ivoire iman ya estudyante. Agaylay liket ko nen naamtaan kon unbaptized publisher la!

Panon kon nasusuportaay sarilik? Walay sakey ya organisasyon ya ontutulong ed saray disabled ya angibangat ed siak ya mandait. Naimano na sakey a maestrak so panagkimey ko tan imbaga to: “Ibangat mi ka met ya manggaway sabon.” Kanian imbangat da ak. Manggagawa ak na sabon diad abung mi. Agustoan itan na totoo tan irerekomenda dad arum. Siak ya mismo so mangidi-deliver, ya uusaren ko so scooter ko ya taloray dalig to.

Makapaermen balet ta nen 2004 et linmoor so sakit na beneg ko lapud walay deperensya na spinal column ko, kanian akatunda ak ed pampapayunir ko. Balet gagawaen ko nin siansiay anggaay nayarian ko diad ministeryo.

Naiimano na arum ya naynay ak ya akaimis. Talagan dakel so rason kon manliket lapud say inyasingger kod Dios et nanresultad pankaabigan ko.—Unong ed salaysay nen Sarah Maiga.