1. Antoy nitulong na abilidad tayon imadyinen iray bengatlan agtayo ni anengneng? (Nengnengen so litratod gapo na artikulo.)

INIKDAN itayo na Dios na abilidad ya imadyinen iray bengatlan agtayo ni anengneng. Lapud satan et makakapanplano itayo parad arapen tan malikeliket tayon tatalaranan iray balibalin nagawa. Sarag nen Jehova ya amtaen no anto ray nagawad arapen, tan ibabaga tod sikatayo so arum ed saratan panamegley na Kasulatan. Kanian anggano agtayo ni iratan anengneng, sarag tayo lan imadyinen. Ontulong itan pian nawalaan tayoy pananisia.—2 Cor. 4:18.

2, 3. (a) Antoy nepeg ya basiyan na saray iimadyinen tayo? (b) Anto ran tepet so ebatan ed sayan artikulo?

² No maminsan, ompan say basiyan na saray iimadyinen tayo et aliwan realistiko. Singa bilang, nayarin imadyinen na melag ya ugaw ya sikatoy akalugan ed kompapey. Siempre imposible itan. Balet say ina nen Samuel ya si Hana et realistiko ed inimadyin to. Ninonot to no anto ray nagawa sano iyakar to lay anak to ed tabernakulo pian manlingkor ditan. Atan so talagan labay ton gawaen. Kanian akatulong so impan-imadyin to pian natoor toy sipan tod si Jehova. (1 Sam. 1:22) Saray sipan na Dios et aliwan imposible, kanian no iimadyinen tayo iratan, iimadyinen tayo ray  bengatlan seguradon nagawa.—2 Ped. 1:19-21.

³ Seguradon inimadyin met na dakel ya matoor ya lingkor na Dios nensaman iray insipan tod sikara. Panon ya akatulong ed sikara so impan-imadyin dad saray bendisyon ed arapen? Tan panon tayo met ya nagunggonaan no imadyinen tayoy bilay tayo sano tooren la na Dios so amin ya sipan to?

4. Antoy basiyan nen Abel ed ninonot ton nagawad arapen?

⁴ Kasin say inmunan matoor ya toon si Abel et “anengneng” to ray sipan nen Jehova? Amta to imay imbaga nen Jehova ed uleg nen nankasalanan si Adan tan Eva: “Mangiyan ak na gulaan ed sika tan say bii, tan gulaan ed saray ilalak mo tan ilalak to; sikato sugaten to so ulom, et sika sugaten mo so mukor to.” (Gen. 3:14, 15) Ag-amta nen Abel no panon itan ya eksakton nagawa. Balet seguradon ninonot to itan ya maong. Nayarin inisip nen Abel, ‘Siopa kasi so sugaten na uleg ya ontulong pian magmaliw lamet ya perpekto iray totoo?’ Antokaman so inimadyin nen Abel ya nagawad arapen, walay pananisia to ed sipan na Dios, kanian inawat nen Jehova so bagat to.—Basaen so Genesis 4:3-5; Hebreos 11:4.

5. Panon ya akatulong ed si Enoc so impan-imadyin to ed nagawad arapen?

⁵ Sakey nin angipanengneng na pananisia et si Enoc. Nen panaon to, saray totoo et mauge-uges tan makapabigla so ibabaga ra sumpad Dios. Balet makpel ya impulong nen Enoc ya si Jehova et onsabi “kaiba iray samplon libolibo a masanton angheles to, pian mangidapo na panangukom ed amin, tan mansentensia ed amin ya agmaridios nipaakar ed amin a mauges a ginawa ra, tan nipaakar ed amin a makapabigla iran bengatla a sinalita na saray agmaridios a managkasalanan sumpad sikato.” (Jud. 14, 15) Antoy akatulong ed si Enoc pian nagawaan itan? Nayarin inimadyin toy panaon sano anggapo lan balot so mauges ed mundo.—Basaen so Hebreos 11:5, 6.

6. Antoy posiblin sankanonot nin siansia nen Noe kayari na Delap?

⁶ Akaliktar si Noe ed Delap lapud pananisia to. (Heb. 11:7) Kayari Delap, pananisia met so amakiwas ed sikaton mangibagat na ayayep ed si Jehova. (Gen. 8:20) Singa si Abel, seguradon manisia si Noe ya onsabi so panaon ya nibulos lay totoo ed kasalanan tan ipapatey. Anggano nagmaliw lamet ya mauges so mundo kayari na Delap lapud impanrebelde nen Nimrod ed si Jehova, nansiansian mabiskeg so pananisia nen Noe. (Gen. 10:8-12) Seguradon ombibiskeg so liknaan to no nononoten to ya diad arapen et ekalen la na Dios so maruksan uley na too, say atawir ya kasalanan, tan say patey. “Sankanengneng” tayo met la itan ya panaon—tan asingsingger la!—Roma 6:23.

7. Antoy “anengneng” di Abraham, Isaac, tan Jacob ya nagawad arapen?

⁷ Naimadyin di Abraham, Isaac, tan Jacob so balibalin arapen lapud insipan na Dios ya panamegley na ilalak da et nabendisyonan so amin ya nasyon ed interon mundo. (Gen. 22:18; 26:4; 28:14) Ondakel so ilalak da tan manayam irad inter na Dios ya Insipan a Dalin. (Gen. 15:5-7) Lapud pananisia na sarayan lalaki, aliling to et ‘anengneng’ da la ray ilalak da ya manaayam ed satan ya dalin. Diad tua, nanlapu la nen nankasalanan si Adan tan Eva, tinulongan nen Jehova iray matoor ya lingkor to pian natalosan da ya onsabi panaon et magmaliw lamet ya perpekto iray totoo.

8. Antoy akatulong ed si Abraham pian nipanengneng toy nikadkaduman pananisia?

 ⁸ Akatulong so impan-imadyin nen Abraham ed saray sipan na Dios pian nipanengneng toy nikadkaduman pananisia. Ibabaga na Kasulatan ya anggano agnaawat di Abraham tan arum ya matoor a lingkor na Dios so “kasumpalan na saray sipan” diad panaon da, “abayag da lan anengneng iratan tan maliket dan inilaloan.” (Basaen so Hebreos 11:8-13.) Amta nen Abraham ya tinoor nen Jehova so amin ya sipan to nensaman, kanian segurado met ya tooren nen Jehova so amin ya sipan to diad arapen!

9. Panon ya akatulong ed si Abraham so pananisia tod saray sipan na Dios?

⁹ Say pananisia nen Abraham ed saray sipan nen Jehova so amabiskeg ed determinasyon to ya gawaey linawa na Dios. Singa bilang, tinaynan toy abung to diad syudad na Ur tan agbalot nampirmi ed anggan anton syudad diad Canaan. Amta to ya aliwan malet so pundasyon na sarayan syudad lapud saray manuuley ditan et agmanlilingkor ed si Jehova. (Jos. 24:2) Diad interon bilay nen Abraham et “aalagaren to so syudad a walaan na saray tuan pundasyon, a say mangipaalagey tan manggawa ed satan et say Dios.” (Heb. 11:10) Inimadyin nen Abraham ya sikatoy permanente lan manaayam ed pasen ya uleyan nen Jehova. Si Abel, Enoc, Noe, Abraham, tan arum ni et anisia ed kioli tan inilaloan da so bilay diad dalin ya uleyan na Panarian na Dios, say “syudad a walaan na saray tuan pundasyon.” Binmiskeg so pananisia ra ed si Jehova diad impandalepdep dad saratan ya bendisyon.—Basaen so Hebreos 11:15, 16.

10. Antoy epekto ed si Sara na samay sipan nen Jehova ed si Abraham ya nawalaan iray anak?

¹⁰ Nonoten met so asawa nen Abraham ya si Sara. Mabiskeg met so pananisia tod saray sipan nen Jehova. Anggano 90 años to la tan anggapoy anak to, positibo nin siansia ya onsabi panaon et nawalaay anak. Singa to la anengneng iray ananak to ya panliliketan day bendisyon ya insipan nen Jehova ed sikara. (Heb. 11:11, 12) Akin ya ontan lay kabiskeg na pananisia nen Sara? Imbaga nen Jehova ed si Abraham: ‘Papalaren ko si Sara, tan ikdan ta kay sakey a laki ya anak a manlapud sikato; on, sikatoy papalaren ko, tan sikatoy magmaliw ya ina na saray nasyones; saray arari na katooan so nianak ed sikato.’ (Gen. 17:16) Nen inyanak nen Sara si Isaac, lalon akombinse ya tooren nen Jehova so arum nin sipan To. Napabiskeg tayo met so pananisia tayo no imadyinen tayo ray balibalin nagawad arapen ya insipan na Dios!

11, 12. Antoy akatulong ed si Moises pian mas naaro toy Jehova?

¹¹ Impanengneng met nen Moises so pananisia tod saray sipan nen Jehova. Sikatoy binmaleg ya prinsipe diad Ehipto. Balet mas inar-aro toy Jehova nen say antokaman kanian agto pinilalek so nawalaay pakayari tan kayamanan. Posible ya sikatoy imbangat na saray peteg ya atateng to nipaakar ed si Jehova tan ed gagala To ya ibulos iray Israelita ed panangaripen na Ehipto tan iter tod sikara so Insipan a Dalin. (Gen. 13:14, 15; Exo. 2:5-10) No mabetbet ya nononoten nen Moises iray bendisyon ya awaten na totoo na Dios, anto kasi ontubod puso to—panangarod pakayari odino panangarod si Jehova?

¹² Oniay ibabaga na Biblia ya sankanonot nen Moises: “Lapud pananisia, agnilabay nen Moises so patawag ya anak na marikit nen Faraon sanen sikatoy binmaleg la, a mas pinili toy napairap a kaiba na totoo na Dios nen say temporaryon panliket ed kasalanan, lapud say napabanday bilang Sakey a Nilanaan et impasen ton kaykayamanan a  babaleg ni nen say kaykayamanan na Ehipto; ta akateen so ilalo to ed pakaawat ed tumang.”—Heb. 11:24-26.

13. Panon ya akatulong ed si Moises so impannonot ton maong ed sipan na Dios?

¹³ Seguradon ninonot a maong nen Moises so sipan nen Jehova ed saray Israelita, kanian binmiskeg so pananisia tan panangaro tod Dios. Singa saray arum ya matoor ya lingkor na Dios, seguradon inimadyin to so panaon sano ibulos la nen Jehova iray totoo manlapud ipapatey. (Job 14:14, 15; Heb. 11:17-19) On, talagan naar-aro nen Moises si Jehova ta amta ton inar-aro na Dios iray Israelita tan amin ya totoo. Say pananisia tan panangaro so rason no akin ya matoor ya nanlingkor si Moises ed si Jehova diad interon bilay to. (Deu. 6:4, 5) Anggano pinagyaw na Faraon si Moises ya ipapatey to, agtinmakot ta mabiskeg so pananisia tan panangaro tod Dios tan ninmengneng ed premyo ya awaten tod arapen.—Exo. 10:28, 29.

14. Anto ray iimadyinen na totoo ya talagan imposiblin nagawa?

¹⁴ Dakel ya totoo so maniimadyin na saray nagawad arapen ya aliwan realistiko. Singa bilang, wala ray totoon mairap so bilay da ya iimadyinen dan onsabi panaon ya onyaman ira tan naandi lan amin so problema da. Balet ibabaga na Biblia ya say bilay ed mundo nen Satanas et ‘napnoy gonigon tan ermen.’ (Sal. 90:10, NW) Wala met so arum ya iimadyinen dan nasolusyonan na gobiernoy too iray problema ed mundo. Balet ibabaga na Biblia ya say Panarian na Dios labat so makagawad satan. (Dan. 2:44) Tan iisipen na arum ya agderalen na Dios iyan sistema. Balet ibabaga na Biblia ya talagan deralen na Dios iyan mauges ya mundo. (Sof. 1:18; 1 Juan 2:15-17) Talagan imposiblin nagawa iray iimadyinen na totoon mangibabaliwala ed saray gagala nen Jehova ed arapen.

15. (a) Akin ya maabig no imadyinen na saray Kristiano so ilalo ra? (b) Antoy sakey ed saray labalabay mon gawaen diad Paraiso?

¹⁵ Balet sikatayo ran Kristiano et duma. Ombibiskeg so pananisia tayo no iimadyinen tayoy ilalo tayo, balanglan satan et diad tawen odino diad dalin. Naiimadyin mo kasi sarilim ya panliliketan mo la ray insipan nen Jehova? Seguradon malikeliket ka no iisipen mo ray gawaen mo legan ya susumpalen na Dios iray sipan to. Nayarin “sankanengneng” mo lay sarilim ya manbibilay diad balon mundo. Imadyin mo pa ya kaibam iray kakaarom ya mankikimey pian gawaen ya paraiso iyan dalin. Saray mangidadaulo ed satan ya kimey et balibalin katrabaho ta iyaansakit da ka. Saray kakaabay mo et inaro day Jehova, ya singa ka. Anggapoy sakit mo, maksil so laman mo, tan anggapoy panaaburidoan mo. Tan malikeliket ka ta nanausar moy talentom tan abilidad mo pian nigalang moy Jehova tan natulongan so arum. Alimbawa, tutulongan mo ray pinaoli pian nakabat day Jehova. (Juan 17:3; Gawa 24:15) Aliwa iratan ya kugip. Saratan ya imahinasyon et base ed saray ibabaga na Biblia ya nagawad arapen.—Isa. 11:9; 25:8; 33:24; 35:5-7; 65:22.

16, 17. Panon ya makatulong ed sikatayo no pantongtongan tayo ray labay tayon gawaen diad arapen?

¹⁶ No ibaga tayod saray agagi iray labay tayon gawaen diad balon mundo, mas malinew so naimadyin tayon nagawa ed arapen. Siempre, agtayo amta so eksakton gawaen na balang sakey ed sikatayo. Balet no pantongtongan tayo ray labay tayon gawaen, napaseseg tayoy sakey tan sakey, tan nibabalikas  tayoy pananisia tayod saray sipan nen Jehova. Nen binisita nen apostol Pablo iray agagi ed Roma, seguradon naapresya da so ‘impanpapasesegan da.’ Kaukolan tayo met itan natan ed sarayan mairap a panaon.—Roma 1:11, 12.

¹⁷ No imadyinen tayo ray nagawad arapen, makatulong itan pian aliwan say problema so lanang tayon sankanonot. Nayarin atan so pampapagaan nen apostol Pedro nen imbaga tod si Jesus: “Nia! Tinaynan mi lay amin a bengatla tan tinmumbok kami ed sika. Anto sirin so awaten mi?” Labay nen Jesus ya imadyinen nen Pedro tan arum nin disipulo iray balibalin nagawad arapen, kanian oniay ebat to: “Tua kuan ko ed sikayo, diad pamasimbalo ed amin a bengatla, sano akayurong la so Anak na too ed maglorian trono to, sikayoran tinmumbok ed siak so onyurong met diad labinduan trono, pian mangukom ed labinduan tribu na Israel. Tan balang sakey ya anaynan na kaabungan to odino agagi ton lalaki odino agagi ton bibii odino ama to odino ina to odino ananak to odino daldalin to nisengeg ed ngaran ko et mangawat na mas dakel ni tan manawir na bilay ya andi-anggaan.” (Mat. 19:27-29) Diad satan ya imbaga nen Jesus, naimadyin nen Pedro tan arum nin disipulo so sarili dan manuuley kaibay Jesus diad tawen tan mangiiter na dakel a bendisyon ed totoo.

18. Antoy epektod sikatayo no imadyinen tayoy kasumpalan na saray sipan na Dios?

¹⁸ On, ombibiskeg so pananisia na saray lingkor nen Jehova no iimadyinen day pakasumpal na saray sipan to. Inimadyin nen Abel so sipan nen Jehova ya nagawad arapen tan impanengneng toy pananisia ed satan ya sipan, kanian apaliket toy Jehova. Nikadkaduma so pananisia ya impanengneng nen Abraham lapud inimadyin to so panaon sano tooren la nen Jehova imay sipan to nipaakar ed “ilalak.” (Gen. 3:15) “Ninmengneng” si Moises ed ‘pakaawat toy tumang’ kanian mas binmiskeg so pananisia tan panangaro tod si Jehova. (Heb. 11:26) Ontan met natan. No usaren tayoy abilidad tayon man-imadyin pian isipen so kasumpalan na saray sipan nen Jehova, ombiskeg so pananisia tan panangaro tayod sikato. Aralen tayod ontumbok ya artikulo so sananey nin paraan ya nausar tayoy imahinasyon tayo.