“EUREKA!” Say labay ton ibaga ‘tan ya salita et “Walay nalmok!” Nen koma 19 siglo, dakel so manmimina na balitok ed California, U.S.A., tan atan so iyeeyag da no walay akotkot da. Balet si Charles Taze Russell tan arum nin Estudyante na Biblia et walay mas mablin nalmo da—say katuaan ed Biblia. Tan eksayted iran inabang itan ed arum.

Nen summer na 1914, minilyon so nantitipon diad baleg iran syudad pian manbantay na “Photo-Drama of Creation,” waloran oras ya pelikulan ginawa na International Bible Students Association (I.B.S.A.). Balibali iray motion picture to, malinlinew iray de-kolor ya slide to, ya binansagan na marakdakep ya narration tan musika. Impanengneng na satan so manlapud impamalsa anggad sampot na Sanlibon Taon ya Uley nen Jesu-Kristo.—Apo. 20:4. *

Panon to balet iramay walad ararawin lugar tan baley? Pian nasabi so amin ya manaanap na katuaan, in-release na I.B.S.A. nen Agosto 1914 so “Eureka Drama”—mas antikey itan ya bersion na “Photo-Drama,” ta inekal iray parte ya video. Walay taloran napampilian ed pigaran lenguahe: Karga na “Eureka X” so amin ya aka-rekord ya narration tan musika. Karga na “Eureka Y” so amin ya rekording tan balibalin de-kolor iran glass slide. Tan karga na “Eureka Family Drama” iray pinilin narration tan kansion, tan sarag itan ya dengelen ed abung. Available iray mamuran ponograpo tan arum nin kagawaan ya usaren parad saratan.

Lapud agla kaukolan so film projector o baleg ya screen, sarag iyan awiten na saray Estudyante na Biblia ed ararawin lugar pian ipabantay ya libre, kanian akasabi so mensahe Panarian ed balo iran teritorya. Say sound-only ya “Eureka X” et nayarin i-play agew man o labi. Say slide projector na “Eureka Y” et onandar anggano anggapoy koryenti, ya say usaren labat et carbide lamp. “Sarag min ipabantay itan anggan iner,” so kuan na report diad Finnish ya Watch Tower. Talagan ontan so agawa!

Imbes ya manrenta ni angkabaleg ya teatro, kaslakan ya makakaromog iray madiskarten Estudyante na Biblia na libren lugar, singa saray kuarto ed eskuelaan, korte, istasyon na tren, tan diad sala na baleg iran abung. Dakel so angipalabas ed satan diad  paway, ya say “screen” da et baleg ya amputin tela ya akasabit ed dingding na kamalir. Oniay insulat nen Anthony Hambuch: “Mangiyaalasir iray dumaralos na gawad kiew iran yurongan ed sular da pian makayurong tan man-enjoy iray manbantay.” Sayan grupo na “Eureka” et angusar na karumatan napangiluganan day kagawaan, bagahe, ugipan, tan panlutoan da.

No maminsan et daiset so manbantay ed “Eureka” tan no maminsan et nilasus. Diad United States, 400 so inmatendid sakey ya eskuelaan diad baley ya 150 labat so manaayam. Diad arum ya lugar et wala ray nanakar na waloran kilometro pian manbantay na “Eureka Drama.” Diad Sweden, saray kakaabay nen Charlotte Ahlberg ya nantitipon ed melag ya abung to et “talagan atenyeg so puso ra” nen nadngel da ray rekording. Nen impalabas itan ed sakey ya arawrawin minaan ed Australia, manga 1,500 so inmatendi. Inreport na Watch Tower ya diad saray high school tan kolehyo et “manbilib iray propesor tan estudyante ed saray litrato tan ed marakdakep iran rekording na ponograpo tayo.” Kabkabat so “Eureka Drama” anggan diad saray lugar ya wala ray sinean.

Say “Eureka Drama” et mausa-usar ed “Class Extension Work,” ya ditan et walay ibaki na saray grupo na Estudyante na Biblia ya manpaliwawa tan mangigapoy balon grupo na panagaral. Agnasegurado so eksakton karakel na akabantay na “Eureka Drama.” Say segurado et nausar ya maong iratan. Balet nen 1915, diad 86 ya grupo na “Eureka” et 14 labat so regular ya manri-report. Anggano agkompleto so report, diad sampot na taon et akuentan masulok a sakey milyon so akabantay ed “Drama.” Manga 30,000 so nan-request na literatura.

Anggano agla tanton kabat so “Eureka Drama” natan, posiblin minilyon so akabantay ed satan diad Australia anggad Argentina, diad South Africa anggad British Isles, diad India, tan diad Caribbean. Dakel ed sikara so akalmod katuaan ya mas mabli nen say balitok—tan singa da met inyeyag so “Eureka!”