1. Antoy makapaermen ya kipapasen na totoo?

AGLABAY nen Jehova ya manirap so too, onkapuy, insan ontatken. Say talagan gagala to et manbilay iran maliket tan maksil so laman da diad Paraiso. Balet natan, “amin a pinalsa et saniiban oneey-ey tan nasasakitan.” (Roma 8:22) Anto kasi nalilikna na Dios diad pakakanengneng tod makaderal ya epekto na kasalanan? Makapaermen ta dakel ya maedad la so napapaulyanan no kapigan mas kaukolan day panangasikaso.—Sal. 39:5; 2 Tim. 3:3.

2. Akin ya baleg so respeto na saray Kristiano ed saray maedad?

² Pabpablien na saray lingkor nen Jehova iray maedad la ed kongregasyon. Nagugunggonaan tayod karunongan da tan napapaseseg tayod pananisia ra. Nayarin kapamilya tayo so sakey odino pigarad sarayan maedad la. Balet anggano agtayo ra pikanayonan, interesado tayo nin siansia ed pankaabigan da. (Gal. 6:10; 1 Ped. 1:22) Maabig sirin no aralen tayo so panmoria nen Jehova ed saray maedad. Aralen tayo met so responsabilidad na saray membro na pamilya tan kongregasyon ed saray inad-aro tayon maedad la.

3, 4. (a) Antoy kinerew na samay angisulat ed Salmo 71 ed si Jehova? (b) Antoy sarag ya ipikasi na saray maedad la ed kongregasyon?

³ ‘Agmo ak ipupulisay no panaon lay inkamasiken ko; agmo  ak ikakaindan no say biskeg ko et onkulang la,’ so pinuyanan ya pikakasi na samay angisulat ed Salmo 71:9. Posible ya sayan salmo et katuloyan na Salmo 70, ya unong ed superskripsyon et “Salmo nen David.” Kanian posiblin si David so angibalikas ed samay nabasad Salmo 71:9. Sikatoy nanlingkor ed Dios manlapud inkaugaw anggad intatken to, tan inusar nen Jehova ya manggawa na saray makapakelaw a bengatla. (1 Sam. 17:33-37, 50; 1 Ara. 2:1-3, 10) Anggaman ontan, alikna nen David ya kaukolan to nin siansiay tulong nen Jehova.—Basaen so Salmo 71:17, 18.

⁴ Dakel natan so singa si David. Anggano matatken tan nanairapan la ra, tuloytuloy ni ran manlilingkor ed Dios ed anggaay nayarian da. (Ecl. 12:1-7) Agla sarag na dakel ed sikara iramay datin gagawaen da, anggan diad ministeryo. Balet sarag da met ya ipikasi ya naliketan nin siansia si Jehova ed sikara tan asikasoen to ra. Makaseguro iran ebatan na Dios iray pikakasi ra. Ta diad tua, say ontan ya pikakasi et miparad saramay balikas nen David ya pinuyanan nen Jehova.

5. Antoy panmoria nen Jehova ed saray matoor ya maedad la?

⁵ Malinlinew ed Kasulatan ya papablien a maong nen Jehova iray matoor ya maedad la tan iilaloan ton igalang ira na arum a lingkor to. (Sal. 22:24-26; Uli. 16:31; 20:29) ‘Onalagey kad arapan na ubanan ya ulo, tan pagalangan moy masiken, tan nepeg mon takotan so Dios mo. Siak si Jehova,’ so kuan na Levitico 19:32. Nen nisulat iratan ya salita, say pangigalang ed saray maedad ed kongregasyon et seryoson responsabilidad, tan ontan nin siansia anggad natan. Balet panon ya naasikasoy pankaukolan da? Siopay makanresponsabilidad ed satan?

6. Anton alimbawa so impanengneng nen Jesus ed pangasikasod ateng?

⁶ Ibabagad sikatayo na Salitay Dios: ‘Igalang moy amam tan inam.’ (Exo. 20:12; Efe. 6:2) Indanet nen Jesus so kaimportantian na satan a ganggan nen kinondena to ray Fariseo tan eskriba ya agmalabay ya mangitaryad pankaukolan na atateng da. (Mar. 7:5, 10-13) Impanengneng a mismo nen Jesus so maabig ya alimbawa. Singa bilang, nen manpapanabos lad panamairapan a kiew, impia tod inad-aro ton disipulo ya si Juan so pangasikasod ina to, ya diad saman et balo la.—Juan 19:26, 27.

7. (a) Anton prinsipyo so insulat nen apostol Pablo ed pangitaryad pankaukolan na atateng? (b) Antoy konteksto na satan ya imbaga nen Pablo?

⁷ Diad impuyan a sulat nen apostol Pablo, imbaga ton nepeg ya taryaan na saray Kristiano so pamilya da. (Basaen so 1 Timoteo 5:4, 8, 16.) Ikonsidera pay konteksto na sulat nen Pablo ed si Timoteo. Imbaga nen Pablo no siopa ray makanepegan tan agmakanepegan ya mangawat na materyal a tulong manlapud kongregasyon. Impalinew to ya saray Kristianon anak, apo, tan arum nin kanayon na maedad lan balo so nepeg ya manunan mangitarya na pankaukolan da. Diad ontan et agnapabelatan so kongregasyon. Ontan met natan, say sakey ya paraan ya nipanengneng tayoy “maridios a debosyon” et diad pangitarya tayoy materyal parad saray kanayon tayon mankaukolan.

8. Akin et makabat ya ag-angiter so Biblia na espisipikon solusyon no panon ya asikasoen iray maedad lan atateng?

⁸ Obligasyon na saray adulton Kristianon ananak ya seguroen ya niiter so materyal a pankaukolan na atateng da. Say tinukoy nen Pablo et saray ‘mananisian  kanayon,’ balet saray atateng ya aliwan Tasi et agmet nepeg ya paulyanan. Nandurumay paraan na panangasikaso na ananak ed atateng da. Aliwan pareparehoy situasyon da. Nanduruma met so pankaukolan, ugali, tan kondisyon na laman da. Nayarin saramay mas panguloan et dakel so anak da; say arum balet et sakey labat. Say arum et makakaawat na suportay gobierno, say arum balet et andi. Nanduruma met so panlabayan na atateng. Kanian aliwan maabig tan aliwan maaro no balawen tayoy paraan na saramay mangaasikasod maedad lan kakanayon da. Amta tayon sarag nen Jehova ya bendisyonan so antokaman a desisyon ya base ed Kasulatan pian maong so resulta to, ya singa ginawa to nen panaon nen Moises.—Num. 11:23.

9-11. (a) Antoy mairap ya situasyon na arum a pamilya? (Nengnengen so litratod gapo na artikulo.) (b) Akin et agnepeg ya bastabastan mandesisyon iray ananak ya taynan so sigpot panaon ya serbisyo? Mangiter na alimbawa.

⁹ No arawi panaayaman na saray anak ed atateng da, aliwan mainomay so pangasikasod pankaukolan da. No biglan kinmapuy so laman na ateng, nayarin atumba, apiley, o arum nin rason, nayarin kaukolan ya bisitaen a tampol na ananak to. Lapud satan, ompan kaukolan da lay temporaryo o permanentin mangasikasod sikara. *

¹⁰ Lalon mairap so mandesisyon ed saramay walad sigpot panaon a panaglingkor ya arawid atateng da lapud teokratikon asainmin da. Saramay manlilingkor bilang Bethelite, misionero, tan ombiabiahen manangasikaso et papablien day asainmin da, bendisyon itan nen Jehova. Balet no nansakit so atateng da, ompan say unonan isipen da et, ‘Onsempet ta la pian naasikaso ta ray atateng ta.’ Anggaman ontan, maabig no nonoten nin maong tan ipikasi no kasin atan so talagan kaukolan o labay na atateng. Agnepeg ya bastabastan mandesisyon ya taynan so pribilehyo, ta ompan agmet la kaukolan. Posible kasin temporaryo met labat itan ya situasyon, ya nayarin maliket ya ontulong iray kakongregasyon na atateng?—Uli. 21:5.

¹¹ Laen tayon alimbawa so agawad sanagi ya say asainmin da et arawid kawalaay atateng da. Say sakey et misionero ed South America, tan samay sakey et walad headquarters diad Brooklyn, New York. Maedad la ray atateng da kanian kaukolan day tulong. Binmisita iyan sanagi kaibay kaasawaan da ed saray atateng da diad Asia pian nanengneng no antoy sankaabigan ya nitulong da tan no panon dan gawaen itan. Ninonot ingen na samay sanasawan misionero ya taynan lay pribilehyo da. Balet tinawagan ira na coordinator na ulop na mamatatken ed kongregasyon na atateng da. Nantongtongan na saray elder so situasyon tan labay dan mansiansia irayan misionero ed asainmin da. Apresyaen day panlilingkor na sayan sanasawa tan labay dan gawaen so anggaay nayarian da pian ontulong ed pangasikasod atateng da. Pisalsalamatan na interon pamilya itan ya panangaro!

12. Antoy nepeg ya seguroen na Kristianon pamilya ed saray desisyon da nipaakar ed pangasikasod atateng da?

¹² Antokaman so gawaen na Kristianon pamilya pian naasikasoy maedad lan atateng da, kaukolan dan seguroen ya agnabalaw so ngaran na Dios. Agtayo labay ya magmaliw ya singa saramay lider na relihyon nen panaon nen Jesus. (Mat. 15:3-6) Labay tayon saray desisyon tayo et mamagalang ed Dios tan ed kongregasyon.—2 Cor. 6:3.

13, 14. Base ed Kasulatan, akin ya nibaga tayon nepeg ya interesado iray kongregasyon ed pangasikasod saray maedad la?

¹³ Aliwan amin ya kongregasyon et sarag day ontulong ed saray walad sigpot panaon diad ontan ya paraan. Balet, walay agawa nen inmunan siglo ya mangipapanengneng ya nepeg ya interesado iray kongregasyon ed pangasikasod pankaukolan na saray maedad lan agagi. Ibabaga na Biblia ya diad kongregasyon ed Jerusalem et ‘anggapoy anggan sakey a mankaukolan.’ Agto labay ya ibagan mayaman iran amin. Wala met iray mairap so bilay da, balet ‘bubunogan so kada sakey’ depende ed pankaukolan to. (Gawa 4:34, 35) Aminsan et impaamtad saray apostol ya wala ray ‘napapaulyanan ya bibiin balo diad inagew-agew a panagbunog’ na naakan. Kanian anuro ira na kualipikadon lalaki ya manggaway uksoyan pian naseguro ya niiter tan naasikaso so pankaukolan na saray balo. (Gawa 6:1-5) Nen Pentecostes 33 C.E., dakel ya nagmaliw ya Kristiano so nansiansia nin agano ed Jerusalem pian ombiskeg so espiritualidad da. Anggano temporaryo labat imay uksoyan ya pangibunog na naakan, nanengneng ed desisyon na saray apostol ya makatulong so kongregasyon ed saray agagin mankakkaukolan.

¹⁴ Singa nibaga nen niman, inikdan nen Pablo si Timoteo na saray instruksion no siopa ran Kristianon balo so makaawat na materyal a tulong manlapud kongregasyon. (1 Tim. 5:3-16) Ontan met, diad pinuyanan ya sulat nen Santiago, imbaga to ya obligasyon na saray Kristiano so itulong ed saray ulila, balo, tan arum nin maniirap. (Sant. 1:27; 2:15-17) Imbaga met nen apostol Juan: “Siopaman a walaan na magenap a pambilay tan nanenengneng to a mankakkaukolan so agi to ingen ta agto labay a kasian, panon a nibaga ya aaroen toy Dios?” (1 Juan 3:17) No kada Kristiano et walay obligasyon ton tulongan iray mankaukolan, agta ontan met ed kongregasyon?

15. Anto ray makaapektod pangasikaso ed saray maedad lan agagi?

¹⁵ Diad arum a bansa, mangiiter so gobierno na pension, tulong, tan caregiver ed saray maedad la. (Roma 13:6) Balet anggapo iratan diad arum a bansa. Kanian say tulong ya kaukolan ya iter na kakanayon tan kongregasyon parad maedad lan agagi et depende ed situasyon. No arawi panaayaman na ananak ed atateng da,  nayarin naapektoan so tulong ya niiter da. Maabig sirin no walay komunikasyon dad saray elder ya kakongregasyon na atateng da pian seguradon natatalosan na amin so kipapasen na pamilya. Singa bilang, nayarin tulongan na saray elder iray maedad la ya makaala na tulong o benepisyo manlapud gobierno. Nayarin ipaamta rad saray ananak iray situasyon ya naoobserbaan da—singa saray agni abayaran ed abung tan no say ateng et aliway panagtumar toy tambal. No walay ontan ya maabig a komunikasyon, agla onloor so situasyon tan ompan wala ray nanonotan ya praktikal ya solusyon. On, no walay asingger ya ontulong tan manbilin ya onakton singa “pinagka-mata” na ananak, ag-ira masyadon napagaan.

16. Panon ya tutulongan na arum ya agagi iray maedad lad kongregasyon?

¹⁶ Wala ray agagi ya namboluntaryon usaren so panaon tan biskeg da lapud panangaro dad saray maedad la. Ipapanengneng day nikadkaduman panangiyansakit ed saray maedad la diad kongregasyon. Mantutulongan irad saray kimey, ya anganko et mansusublayan so pigaran agagi. Anggano ag-ira makapanlingkor ya sigpot panaon ed ministeryo, maliket dan tutulongan iray ananak pian makapansiansia rad pribilehyo da. Agaylan panangaro so ipapanengneng na saratan ya agagi! Siempre, agto labay ya ibagan no wala ray agagin maliket ya ontulong et agla gawaen na ananak so anggaay nayarian da parad atateng da.

17, 18. Panon ya makaapekto so ugali diad pangasikasod saray maedad la?

¹⁷ Amin ya kaibad pangaasikasod saray maedad la et nepeg ya maliket ed panggawad satan. No sakey kad sikara, gawam so anggaay nayarian mon mansiansian positibo. Wala ray lapud ontatatken la ra et naeermenan ira odino nadi-depress ni ra ingen. Kanian talagan kaukolan moy manggaway paraan pian mansiansian positibo so pitotongtong mod sikara, diad ontan et napagalangan tan napaseseg mo ra. Nepeg labat ya komendaan iramay maabig so rekord dad impanlingkor ed si Jehova. Aglingwanan nen Jehova so amin ya ginawa ra parad sikato, tan nepeg ya ontan tayo met.—Basaen so Malaquias 3:16; Hebreos 6:10.

¹⁸ Ontan met, mas onlemew so inagew-agew ya pangasikasod saray maedad la no sikara tan saray mangaasikasod sikara et manpaelek met no maminsan. (Ecl. 3:1, 4) Papaliisan na maslak ya maedad la so ganggan a ganggan. Amta ran say ugali ra et walay epekto tod saramay mangaasikaso tan ombibisitad sikara. Kaslakan et ibabaga na saray ombibisita ya, “Binmisita ak pian napaseseg ko ra, balet siak so apaseseg.”—Uli. 15:13; 17:22.

19. Antoy nepeg ya panmoria tayon amin ed arapen?

¹⁹ Labalabay tayo lan onsabi imay agew ya anggapo lay manirap tan naandi lay epekto na kasalanan. Legan tayon aalagaren itan, nepeg ya akapokus so ilalo tayod nagawad andi-anggaan. Amta tayo ya say pananisia ed saray sipan na Dios et singa angkla diad panaon na irap tan gonigon. Lapud satan a pananisia, “ag-itayo ontutunda, noagta anggano onkakapuy so inkatoo tayo ed paway, seguradon napapasimbalo ya inagew-agew so inkatoo tayo ed loob.” (2 Cor. 4:16-18; Heb. 6:18, 19) Balet likud ed malet ya pananisia ed saray sipan na Dios, anto ni makatulong ed sikatayo pian nasarag tayoy responsabilidad ya mangasikasod saray maedad la? Aralen tayo ray praktikal a suhestion diad ontumbok ya artikulo.