MALINEW so ibabaga na Biblia: Say asawan laki et aroen to so “asawa to a singa ed pangaaro to ed laman ton dili.” Tan say asawan bii et “nepeg a walaan na aralem a respeto ed asawa to.” Pareho dan gawaen so papel da bilang ‘saksakey a laman.’ (Efe. 5:33; Gen. 2:23, 24) Diad ilalabas na panaon, lalon oneelet so ulopan na sanasawa, pati say aroan da. Singa ra kiew ya sanabay a tinmubo, ya say lamot da et nansisingeran tan nansasangalan la.

Panon to balet no ompatey so sakey ed sikara? Aliling to et napultot lay bedber na ulopan da. Sano say sakey et nabalo, nanlalaok so nalikna to—maermen, makakailiw, tan ompan manetel na arum o nakokonsiensia ni ingen. Diad 58 taon ya impaniba nen Daniella tan say asawa to, dakel lay kabat ton inateyay kapareha. * Balet nen inatey so asawa to, oniay imbaga to: “Nensaman agko natatalosan so liknaan na inateyay asawa. Natalosan mo labat manaya no asalim la.”

Wala ray researcher ya mangibabagan anggapo lay makapiparad stress ya resulta na ipatey na inad-aron asawa. Talagan ontan so nalilikna na saray abalo. Dakel lan taon so linmabas manlapu lad impatey na asawa nen Millie. Naniba ira na 25 taon, kanian nen naandid bilay so asawa to, imbaga nen Millie, “Singa ak aparalisado.” Tan anggad natan et ontan nin siansiay nalilikna to.

 Nensaman, isipen nen Susan ya singa alablabas met la no say sakey a biyuda et panermenan to ni impatey na asawa to anggano linmabas lay dakel a taon. Insan nen kien, inatey so asawa to ya 38 taon ton akaiba. Masulok lan 20 taon so linmabas, balet ibabaga nen Susan ya, “Inagew-agew kon sankanonot.” Mabetbet ya onterter so lua to lapud agaylan pakakailiw to.

Nabasa tayod Biblia ya talagan ansakisakit so naandiay asawa, tan ag-itan bastabasta onabig. Nen inatey si Sara, say asawa ton si Abraham et ‘nanermen tan nannangis.’ (Gen. 23:1, 2) Manisia si Abraham ed kiolid bilay, balet siansia nin nanermen a maong nen inatey so inad-aro to. (Heb. 11:17-19) Ontan met ed si Jacob. Anggan inatey lay inad-aro ton asawa ya si Raquel, agto nilingwanan. Siansian maar-aron iistoryaen tod saray ilalak to so nipaakar ed si Raquel.—Gen. 44:27; 48:7.

Antoy naaralan tayod sarayan alimbawa ed Biblia? Siansia nin nalilikna na saray abalo so ermen anggan pigapigaran taon lay linmabas. Agtayo iisipen ya makapuy ira no aakisan tan paneermenan da nin siansia so impatey na inad-aro ra. Talosan tayo ra, ta ompan kaukolan day tuloytuloy a pililikna tan suporta tayo.

Agto labay ya ibagan no say sakey et abalo, basta labat lan ompawil ed bilay to bilang single. Diad dakel ya taon ya impaniba na sanasawa, amta na asawan laki no panon ton ligliwaey asawa to no maermen odino nadidismaya. Kanian no naandi lad bilay, naandi met lay lapuan na panangaro tan ligliwa na misis to. Ontan met, amta na asawan bii no panon ton asikasoen tan ipaliknay panangaro ed asawa to. Anggapo lay miparad maasikason aplos, maaron panagsalita, tan panagpaga tod pankaukolan na asawa to. Kanian no ompatey, wala lay kulang ed bilay na mister to. Kampegan no say sakey et nabalo, mapagpaga lad arapen to. Anton prinsipyod Biblia so ontulong ed sikara pian onligen tan ondeey nonot da?

“Agkayon balot mapagpaga nipaakar ed ontumbok ya agew, ta say ontumbok ya agew et nawalaan na saray kapagaan ton dili. Magenap la parad kada agew so kaugsan ton dili.” (Mat. 6:34) Sayan imbaga nen Jesus et ontutukoy ed materyal ya pankaukolan ed bilay, balet akatulong met iya ed dakel ya abalo pian naanosan day paneermen da. Oniay insulat na biyudon si Charles pigaran bulan kayari impatey na asawa to: “Nanailiw ko nin siansiay Monique, tan wala ray panaon ya grabe pakakailiw ko. Balet iisipen kon normal labat iya tan diad ilabas na panaon et kalkalna met lanlamang ya nabawasan so ermen ko.”

On, kaukolan ya anosan nen Charles so “ilabas na panaon.” Panon ton agawaan itan? Inkuan ton, “Diad tulong nen Jehova, naaanosan koy kada agew ya onlalabas.” Nilabanan nen Charles so ermen to. Amta ton ag-itan tampol ya naandi, balet agnampatalod satan. No naandi lad bilay so kapareham, gawam so anggaay nayarian mon labanan so ermen—aliwan pinsanan—noagta diad kada agew ya onlalabas. Agmo amta no antoy nagawad kada agew ya nayarin mamabiskeg ed sika.

 Say ipapatey et agkaibad orihinal ya gagala nen Jehova, noagta “kimey na Diablo.” (1 Juan 3:8; Roma 6:23) Uusaren nen Satanas so ipapatey tan takot ed satan pian aripenen iray totoo tan isipen dan anggapo lay ilalo. (Heb. 2:14, 15) Labalabay nen Satanas no say sakey et isipen ton aglan balot magmaliw ya maliket, anggano diad balon mundo. Kanian say talagan sengegan na sakit ya nalilikna na naandiay asawa et si Satanas tan say impankasalanan nen Adan. (Roma 5:12) Sigpot ya ekalen nen Jehova so amin a deral ya inter nen Satanas, pati say manunan armas to, say ipapatey. Kaibad saray nibulos ed takot ed patey et saramay inateyay kapareha.

No paolien la ray inaatey diad dalin, seguradon baleg so pangumanay relasyon tayod sakey tan sakey. Isipen pa iray atateng, bai tan laki, tan arum nin kakanayon ya napaoli tan magmaliw ya perpekto kaibay ananak tan apo ra. Naandi lay epekto na itatatken. Posible kasin saray mas ugaw ya henerasyon et duma lay pangipasen dad saray bai tan laki da no balon mundo la? Tan no bilang walay ontan iran pananguman, agta manisia tayon parad pankaabigan tayo itan?

Nayarin dakel so naisip tayon tepet nipaakar ed saray napaoli. Singa bilang, panon to ramay abalo ya angasawan pidua, insan abalo lamet? Nantepet iray Saduceo nipaakar ed sakey ya biin inatey so asawa to, insan akiasawan pidua balet inatey la lamet, ya anggad akapitoran asawa. (Luc. 20:27-33) No onoli ran amin, antoy relasyon dad sakey tan sakey? Agtayo amta, tan agmakatulong  no manisip tayoy nanduruman ebat odino pampagaan tayoy bengatlan agmet ni agawa. Kaukolan ya manmatalek tayod Dios. Saya so segurado—antokaman ya gawaen nen Jehova diad arapen et maong. Nepeg tayon ilaloan itan, aliwan takotan.

Sakey ed saray malinew ya bangat na Salita na Dios et say ibilay lamet na saray inad-aro tayon inatey. Diad Biblia, wala ray nabasa tayon salaysay nipaakar ed saray apaoli nensaman. Gagarantiyaan na saratan ya diad arapen “amin a walad pakanodnonotan iran lubok et narengel day boses [nen Jesus] tan ompaway ira.” (Juan 5:28, 29) Amin a totoon mabilay ed satan a panaon et seguradon maliket sano abeten da iramay nibulos manlapud panangaripen na patey. Tan seguradon manleppua met so liket na saramay mismon napaoli!

Diad kioli na saray inatey, talagan agnasabaan so liket diad dalin. Nakaiba lamet na binilyon ya napaoli iray kapamilya tan kakaaro da. (Mar. 5:39-42; Apo. 20:13) Saray inateyan na inad-aro et naligliwa no dalepdepen da iyan milagro ya nagawa ed arapen.

Wala ni kasi rason tayon manermen no nagawa la itan? Say kuan na Biblia et anggapo la. Unong ed Isaias 25:8, ‘akmonen nen Jehova so patey ed ando lan ando.’ On, ekalen la nen Jehova so patey pati amin ya epekto na satan, ta oniay nabasa nid propesiya nen Isaias: “Say Katawan a Jehova punasen to naani so saray lua ya unagus ed saray amin a lupa.” No maermen ka natan lapud impatey na kapareham, seguradon malikeliket ka no onoli lad bilay so inad-arom.

Anggapoy toon sigpot ton natalosan so amin ya gawaen na Dios ed balon mundo. Imbaga nen Jehova: “Unong ya atagtagey so saray tawen nen say dalin, ontan ira so saray dalan ko atagtagey ira nen saray dalan yo, tan saray kanonotan ko nen saray kanonotan yo.” (Isa. 55:9) Say sipan nen Jesus nipaakar ed kioli et mangiiter ed sikatayo na pankanawnawan manmatalek ed si Jehova, a singa si Abraham. Say nepeg a gawaen na kada Kristiano natan et unoren so pagagawa na Dios  pian ‘makanepegan itayon makagamor ed satan a mundo’ tan napinengnengan tayo iray napaoli.—Luc. 20:35.

Imbes ya pampagaan moy arapen, manilalo ka. No diad pakanengneng na totoo, singa anggapo lay maabig ya nagawa ed arapen. Balet inikdan itayo nen Jehova na ilalo. Agtayo amta no anto ray espisipikon gawaen nen Jehova pian niiter toy pankaukolan tan labay tayo, balet agtayo nepeg ya panduaruwaan ya talagan gawaen to itan. Insulat nen apostol Pablo: “Say ilalo a nanenengneng et aliwan ilalo, ta sano nanenengneng la na too so sakey a bengatla, ilaloan to ni kasi itan? Balet no manilalo itayo ed agtayo nanenengneng, itultuloy tayon alagaren itan tekep na panagsungdo.” (Roma 8:24, 25) Natulongan kan mansungdo no manilalo kad saray sipan na Dios. No itultuloy moy pansungdom, seguradon wadman ka ed balon mundo ya ditan et iter nen Jehova iray “pirawat na pusom.” Peneken to so “pilalek na ami bengatlan mabilay.”—Sal. 37:4; 145:16; Luc. 21:19.

Nen asingger lay ipatey nen Jesus, apagaan a maong iray apostol to. Pinabiskeg ira nen Jesus panamegley na sarayan salita: “Agyo aabuloyan a nagonigon so kapusoan yo. Ipatnag yo so pananisia ed Dios, ipatnag yo met so pananisia ed siak.” Inkuan to nid sikara: “Agta kayo taynanan a manbukbukor.” (Juan 14:1-4, 18, 27) Akatulong irayan salita pian nawalaan na ilalo tan makapansungdo iray alanaan a papatumbok to diad pigapigaran siglo. Kanian agnepeg ya naandiay ilalo iramay labalabay da lan nanengneng so kioli na inad-aro da. Ag-ira paulyan nen Jehova tan na Anak to. Segurado itan!