1. Akin et aliketan si Pablo ed saray agagid Corinto?

SAY taon ed saman et 55 C.E. Si apostol Pablo et walad daongan na syudad na Troas, balet sankanonot to nin siansia iray agagid Corinto. Napapagaan ta naamtaan ton mankokolkol ira. Lapud singa to ra inad-aron ananak, sinulatan to ra pian ipetek ira. (1 Cor. 1:11; 4:15) Imbaki to met ed sikara so kakimeyan ton si Tito tan nantongtongan dan dua ya manbana irad Troas pian ibalita nen Tito so agawa. Nanalagar si Pablo ed Troas, labalabay to lan naamtaan no komusta la ray agagid Corinto. Adismaya balet ta agsinmabi si Tito. Antoy ginawa nen Pablo? Linmad Macedonia, tan agaylay liket to ta nannengneng irad ’man nen Tito. Inistorya nen Tito ya tinulok na saray agagid Corinto imay wadman ed sulat nen Pablo tan sikatoy pirpirawat da lan nanengneng. Sanen nadngel itan nen Pablo, “lalon aliketan.”—2 Cor. 2:12, 13; 7:5-9.

2. (a) Antoy insulat nen Pablo ed saray agagid Corinto nipaakar ed pananisia tan liket? (b) Anto ran tepet so ebatan tayo?

² Ag-abayag, sinulatan lamet nen Pablo iray agagid Corinto. Inkuan to: “Aliwan lapud kakatawan kami na pananisia yo, noagta kakimeyan yo kami pian manliket kayo, ta sikayoy akatalindeg a malet lapud pananisia yo.” (2 Cor. 1:24) Antoy labay ya ibaga nen Pablo? Tan antoy naaralan na saray elder natan ed satan ya imbaga to?

3. (a) Antoy labay ya ibaga nen Pablo sanen insulat ton: “Sikayoy akatalindeg a malet lapud pananisia yo”? (b) Panon ya aaligen na saray elder natan so alimbawa nen Pablo?

³ Tinukoy nen Pablo so duaran importantin aspekto na panagdayew tayo—say pananisia tan liket. Nipaakar ed pananisia, oniay insulat to: “Aliwan lapud  kakatawan kami na pananisia yo, . . . ta sikayoy akatalindeg a malet lapud pananisia yo.” Binidbir nen Pablo ya manmamatoor iray agagid Corinto, aliwan lapud sikato odino arum nin too, noagta lapud mismon pananisia rad Dios. Kanian amta ton agto kaukolan ya kontroley pananisia ra, tan agto labay ya gawaen itan. Sikatoy matalek ya talagan inaro day Dios, tan labay dan gawaen so duga. (2 Cor. 2:3) Diad panaon tayo, aaligen na saray elder so alimbawa nen Pablo—matalek ira ya saray agagi et walay pananisia rad Dios tan dugay motibo rad panlilingkor da. (2 Tes. 3:4) Ag-ira manggagawa na istrikto iran ganggan ed kongregasyon. Imbes, tutumboken day Makasulatan iran prinsipyo tan saray instruksion ya manlalapud organisasyon nen Jehova. Amta na saray elder ya aliwan sikara so kakatawan na pananisia na agagi ra.—1 Ped. 5:2, 3.

4. (a) Antoy labay ya ibaga nen Pablo sanen insulat ton: “Kakimeyan yo kami pian manliket kayo”? (b) Panon ya aaligen natan na saray elder so alimbawa nen Pablo?

⁴ Inkuan met nen Pablo: “Kakimeyan yo kami pian manliket kayo.” Say tutukoyen to dia et say sarili to tan saray kaiba to. Akin et ontan so nibaga tayo? On ta diad satan lanlamang ya sulat, impanonot nen Pablo ed saray agagid Corinto so duaran kaiba to. Insulat to: “Si Kristo Jesus . . . impulong mi ed sikayo, kaibak si Silvano tan si Timoteo.” (2 Cor. 1:19) Tan kada usaren nen Pablo imay terminon “kakimeyan” o “kaibak a komikimey” ed saray sulat to, say tutukoyen to et saray kakaaro to, singa si Apolos, Aquila, Prisca, Timoteo, Tito, tan arum ni. (Roma 16:3, 21; 1 Cor. 3:6-9; 2 Cor. 8:23) Kanian sanen inkuan nen Pablo ya: “Kakimeyan yo kami pian manliket kayo,” ipapaseguro tod saray agagid Corinto ya gawaen toy anggaay nayarian to pati saray kaiba to pian maliket so interon kongregasyon. Diad panaon tayo, ontan met so gagawaen na saray elder. Labay dan gawaen so anggaay nayarian da pian saray agagi et ‘maliket a manlingkor ed si Jehova.’—Sal. 100:2; Fil. 1:25.

5. Antoy intepet ed pigaran agagin lalaki tan bibii, tan antoy nonoten tayo legan tayon pantotongtongan iray ebat da?

⁵ Diad agano ni, oniay intepet ed pigaran agagin lalaki tan bibii diad nanduruman bansa: “Antoy nanonotan yon imbaga tan ginawa na sakey ya elder ya angarum ed liket yo?” Legan tayon pantotongtongan iray ebat da, nonot yo no antoy iyebat yod satan ya tepet. Tan nonot yo met no antoy nagawaan na balang sakey pian napansiansiay liket ed kongregasyon yo. *

6, 7. (a) Antoy sakey a paraan ya naalig na saray elder si Jesus, Pablo, tan arum nin lingkor na Dios? (b) Akin et maliket iray agagi no tandaan tayoy ngaran da?

⁶ Imbaga na dakel ed saramay tinepetan ya agagi ya aliketan iran maong lapud personal ya interes ya impanengneng ed sikara na saray elder. Say sakey a paraan ya nagagawaan iya na saray elder et diad pangaalig dad si David, Elihu, tan si Jesus. (Basaen so 2 Samuel 9:6; Job 33:1; Lucas 19:5.) Impanengneng na sarayan lingkor nen Jehova so impapuson interes da diad impangusar dad ngaran na katongtong da. Amta met nen Pablo ya importantin tandaan tan usaren so kangaranan na saray agagi. Diad sakey a sulat to, binitla tod sampot so masulok ya 25 a kangaranan na agagin lalaki tan bibii, kaibay Persis, sakey  ya agin bii. “Ikomustaan yo ak ed si Persis ya inad-aro tayo,” so kuan nen Pablo.—Roma 16:3-15.

⁷ Wala ray elder ya nanairapan ya mananday ngaran. Balet no gawaen day anggaay nayarian dan tandaay ngaran na agagi, singa da ibabagad sikaran, ‘Importante kayod siak.’ (Exo. 33:17) Seguradon napaliket na saray elder iray agagi no tandaan day ngaran da tan usaren da itan sano tawagen da ran mankomento diad Panagaral na Panag-bantayan o arum nin pantitipon.—Ikompara so Juan 10:3.

8. Antoy sakey ya paraan ya inalig nen Pablo si Jehova tan si Jesus?

⁸ Impanengneng met nen Pablo so interes tod agagi diad impangiter toy impapuson komendasyon. Sakey ni ’yan paraan pian napaliket tayo ray agagi. Diad samay sulat nen Pablo ed saray taga Corinto, inkuan to: “Ipapasirayew ta kayon maong.” (2 Cor. 7:4) Diad satan ya imbaga to, seguradon alikna na saray agagid Corinto ya papablien to ra. Kinomendaan to met so arum nin kongregasyon. (Roma 1:8; Fil. 1:3-5; 1 Tes. 1:8) Diad tua, kayari ton binitlay ngaran nen Persis ed sulat tod saray taga Roma, oniay inyarum to: “Sikatoy nansagpot a maong parad Katawan.” (Roma 16:12) Seguradon apaseseg a maong si Persis ed satan ya komendasyon! On, inalig nen Pablo si Jehova tan si Jesus diad impangiter toy komendasyon ed arum.—Basaen so Marcos 1:9-11; Juan 1:47; Apo. 2:2, 13, 19.

9. Akin ya say pangiter na komendasyon ed sakey tan sakey et makatulong pian naarumay liket ed kongregasyon?

⁹ Amta met na saray elder natan ya importante so pangibalikas na apresasyon ed saray agagi. (Uli. 3:27; 15:23) Sano komendaan na elder so sakey ya agi, singa to ibabagan: ‘Naimanok so ginawam. Pabpablien ko itan.’ Talagan kakkaukolan ya narengel na saray agagi so panamaseseg na saray elder. Oniay imbaga na sakey ya sister ya masulok lan 50 años: “Diad trabahok, matalag tay mangaapresyad gagawaen ko. Anggapoy pibabali totoo tan makompetensia ira. Kanian sano komendaan na elder so agawaan kod kongregasyon, oniinaway liknaan ko tan napapabiskeg ak! Naliliknak ya inad-aro ak nen Aman Jehova.” Ontan met so alikna na sakey ya brother ya mansusulon ateng tan mamapabaleg na duaran ananak to. Sikatoy kinomendaan na sakey ya elder lapud pansasagpot to. Antoy epekto na satan ed sikato? Inkuan to: “Apaseseg ak ya mas gawaen koy anggaay nayarian ko!” On, no impapuson komendaan na saray elder iray agagi, lalo iran onligsa tan naliketan ed panlilingkor da. Kanian mas determinado iran mansiansian manakar ed dalan na bilay “tan ag-ira onkapuy.”—Isa. 40:31.

10, 11. (a) Panon ya naalig na saray elder so alimbawa nen Nehemias? (b) Antoy nepeg ya gawaen na sakey ya elder pian ‘makapanginabang na espiritual a langkap’ sano man-shepherding?

¹⁰ Anto ni nagawaan na saray elder pian nipanengneng so personal ya interes ed saray agagi pian naarumay liket da? Sikara lay unonan onaasingger ed saramay mankaukolan na panamaseseg. (Basaen so Gawa 20:28.) No gawaen itan na saray elder, aaligen da iray espiritual a pastol nensaman. Singa bilang, sanen naimano nen Nehemias ya kinmapuy so liknaan na saray kabaleyan ton Judio, sikatoy “inmalagey” ya tampol tan pinaseseg to ra.  (Neh. 4:14) Ontan met so gagawaen na saray elder natan. No onkakapuy so liknaan na saray agagi, gagawaen day anggaay nayarian dan pasesegen ira. Ombibisita irad abung na saray agagi no iyabuloy na situasyon pian ‘manginabang na espiritual a langkap.’ (Roma 1:11) Panon iyan nagawaan na saray elder?

¹¹ Antis ya man-shepherding so sakey ya elder, nepeg ton nonoten ya maong so pankaukolan na agin bisitaen to. Tepetan toy sarili to: ‘Anto ray dadalanen ton subok? Antoy makapaseseg ya nibagak ed sikato? Anto kasin teksto o istoryad Biblia so onaplikad situasyon to? No manparaan a maong so sakey ya elder, talagan napaseseg to imay agin bisitaen to, tan aliwan istoryaan labat so nagawa. Sakey ni, aabuloyan ton ibalikas na saray agagi so nalilikna ra, tan ondengel a maong. (Sant. 1:19) Inkuan na sakey a sister: “Onlelemew so liknaan ko sano maan-anos ya ondengel so sakey ya elder.”—Luc. 8:18.

12. Siopa ray mankaukolan na panamaseseg ed kongregasyon, tan akin?

¹² Siopay nepeg ya i-shepherding na saray elder? Binilin nen Pablo iray kapara ton Kristianon mamatatken ya ‘imanoen da so interon pulok.’ On, say interon kongregasyon so mankaukolan na panamaseseg, anggan saray abayag lan manangipalapag tan payunir. Akin et kaukolan day tulong na saray espiritual a pastol? Anggano mabiskeg ed espiritual irayan agagi, no maminsan et nabebelatan met irad saray dadalanen dan problema ed sayan mauges a mundo. Kaukolan da met sirin so tulong, a singa nanengneng tayod aminsan ya agawad bilay nen Arin David.

13. (a) Kapigan ginetman pateyen nen Isbi-benob si David? (b) Akin ya atulongan nen Abisai si David?

¹³ Ag-abayag kayarin nilanaan si David bilang ari, sikatoy akilaban ed si Goliat, a nanlapud tribu na Refaim ya poli na saray  alan. Makmakpel ya pinatey nen David si Goliat. (1 Sam. 17:4, 48-51; 1 Awa. 20:5, 8) Kalabas na pigaran taon, akilaban lamet si David ed sakey ya alan. Say ngaran to et Isbi-benob, a kabiangan met na tribu na Refaim. (2 Sam. 21:16) Balet diad sayan pankanawnawa, apatey lawari nen Isbi-benob si David. Akin? Aliwan lapud tinmakot si David noagta say kuan na Biblia et sikatoy ‘naksawan.’ Sanen naimano nen Isbi-benob ya makakkapuy lay David, “ginetma to a pateyen.” Balet, antis ton nagawaan itan, ‘si David et tinulongan nen Abisai ya anak nen Sarvia, tan pinatey to so Filisteo.’ (2 Sam. 21:15-17) Dawdawit ya inatey si David! Seguradon misalsalamat ta wadtay Abisai ya mangiimano ed sikato tan tampol ya tinmulong sanen nipeligroy bilay to! Antoy naaralan tayo ed sayan salaysay?

14. (a) Panon tayon nasusungdoan iray angkakabaleg a problema? (b) Panon ya natulongan na saray elder iray agagi pian napapawil day biskeg tan liket da? Mangiter na alimbawa.

¹⁴ Saray Tasi nen Jehova diad interon mundo et mantutultuloy ya manlilingkor ed Dios anggano dakel so subok ya iiter nen Satanas tan na sayan mundo. Say arum ed sikatayo et singa milalaban ed angkakabaleg iran problema. Balet lapud sigpot itayon manmamatalek ed si Jehova, makpel tayon nasusungdoan iratan, no panon a makpel ya pinatey nen David si Goliat. Balet no maminsan, nakekesawan tayo met lapud pipupuligesgesan tayod mundo nen Satanas. Diad onia ran pankanawnawa, mas mainomay ya onkapuy so liknaan tayo. Balet nayarin walay elder ya makaimanod nalilikna tayo tan tulongan to itayon napapawil so liket tan biskeg tayo. Dakel lay akaeksperiensya na onia. Singa bilang, oniay inkuan na sakey a payunir ya masulok lan 60 años: “Walay panaon nensaman ya makakkapuy ak, tan naknaksawan ak ya nampulong. Naimano itan na sakey ya elder tan inasinggeran to ak. Makapaseseg imay nantongtongan min salaysay ed Biblia. Ginawak iramay suhestion to, tan akatulong iratan ed siak.” Inyarum to: “Agaylay panangaro to man ya elder, naimano ton makakkapuy ak tan tinulongan to ak!” On, talagan makapabiskeg na liknaan iray maaron elder ya mangiimanod sikatayo tan akaparaan ya ontulong, singa si Abisai nensaman.

15, 16. (a) Akin et inar-aro na saray agagi nensaman si Pablo? (b) Akin ya papablien tayo ray maaron elder ed kongregasyon tayo?

¹⁵ Dakel so kimey na saray elder. No maminsan, wala ray labin ag-ira makaugip lapud pampapaga, pangipipikasi, tan itutulong dad saray agagi. (2 Cor. 11:27, 28) Balet maliket iray elder ya gawaen so responsabilidad da, ya singa si Pablo. Oniay insulat tod saray taga Corinto: “Malikeliket ak a mangusar ed inkasiak tan sigpot a pausar parad sikayo.” (2 Cor. 12:15) On, lapud inar-aro nen Pablo iray agagi to, sigpot ton inusar so biskeg to pian pasesegen ira. (Basaen so 2 Corinto 2:4; Fil. 2:17; 1 Tes. 2:8) Kampega lan inar-aro na saray agagi si Pablo!—Gawa 20:31-38.

¹⁶ Diad panaon tayo, papablien tayo met iray maaron elder, tan diad pikakasi tayo et misalsalamat itayo ta inter ira nen Jehova. Nanaarumay liket tayo lapud ipapanengneng dan personal ya interes. Napapaseseg itayo sano bibisitaen da itayod abung. Tan misalsalamat itayo ta wadtan iran lanang ya akaparaan ya ontulong sano onkakapuy itayo lapud desdes na sayan mundo. On, sarayan maaron elder et peteg ya ‘kakimeyan pian manliket itayo.’