‘Labay ya Ipaamta na Anak so Ama’

‘Anggapo so makaamta no siopa so Ama noag say Anak tan samay labay a pangipaamtaan na Anak.’​—LUC. 10:22.

ANTOY EBAT MO?

Akin a si Jesus labat so alenleneg a makapangipaamtad Ama to?

Panon ya impaamta nen Jesus so Ama to ed arum?

Panon tayon naalig si Jesus diad pangipaamtad Ama?

1, 2. Anton tepet so pakakawetwetan na dakel, tan akin?

‘SIOPA so Dios?’ Dakel so naiirapan a mangebat ed satan a tepet. Singa bilang, maslak ed saray mangibabagan Kristiano ra et manisiad Trinidad, balet onabobon iran sayan doktrina et agnatalosan. Imbaga na sakey ya author tan pari ya sayan doktrina et agnipaliwawa lapud wala ray bengatlan agnatalosan na totoo. Manisia met so arum ed ebolusyon. Ibabaga ran anggapoy Dios, tan nibanbana labat so inlesa na mararakep iran pinalsa. Anggaman ag-intila nen Charles Darwin ya wala so Dios, inkuan to balet ya: “Anggapoy kapasidad na toon sigpot a natalosay nipaakar ed Dios.”

² Antokaman so pananisia na saray totoo, walan walay tepet da nipaakar ed Dios. Balet, dakel lay tinmundan manaanap ed Dios lapud ag-ira kontento ed saray ebat ya naaamtaan da. Talagan ‘binulag nen Satanas so kanonotan na saray agmananisia.’ (2 Cor. 4:4) Agpankelawan sirin a karaklan a totoo et nawewetwet tan agda amtay katuaan nipaakar ed Ama, say Amalsa ed uniberso!​—Isa. 45:18.

3. (a) Siopa so angipaamtad sikatayo na nipaakar ed Ama? (b) Antoran tepet so naebatan ed sayan artikulo?

³ Akin et importantin naaralan na totoo so katuaan nipaakar ed Dios? Lapud saraman labat so ‘ontawag ed ngaran nen Jehova so nilaban.’ (Roma 10:13) Say itawag ed ngaran na Dios et mankabaliksay pangamta ed sikato bilang Persona. Imbangat nen Jesus iyan katuaan ed saray babangatan to, tan impaamta tod sikara so Ama. (Basaen so Lucas 10:22.) Naebatan ed sayan artikulo irayan tepet: Akin a si Jesus labat so makapangipaamta ed Ama? Panon to itan ya ginawa? Panon tayon naalig si Jesus diad pangipaamtad arum na nipaakar ed Ama?

 JESU-KRISTO​—ALENLENEG A KUALIPIKADO

4, 5. Akin et si Jesus labat so makapangipaamta ed Ama?

⁴ Akin a si Jesus so alenleneg a kualipikadon mangipaamtad Ama to? Lapud antis nin niwala so arum a pinalsa, say espiritun persona a nagmaliw ya Jesus et wala lad tawen bilang “bogbogtong ya Anak na Dios.” (Juan 1:14; 3:18) Si Jesus labat so kaiba nen Ama to antis ya apalsa so arum nin bengatla, kanian sikatoy nibangat a maong na Ama to. Diad loob na binilyon a taon ya impanulop da, naamtaan nen Jesus so nipaakar ed Ama to tan naaralan to ray kualidad To. Legan ya oneelet so relasyon da, mas onaaralem so panangaro rad balang sakey. (Juan 5:20; 14:31) Nonot yo pa labat no panon karakel so naaralan nen Jesus nipaakar ed personalidad na Ama to!​—Basaen so Colosas 1:15-17.

⁵ Pinili na Ama so Anak bilang pinagkasangiyan to, “Say Salita na Dios.” (Apo. 19:13) Si Jesus labat so makapangipaamta ed arum na nipaakar ed Ama. Saya so rason no akin ya tinawag nen Juan si Jesus a “say Salita,” ya “walad abay na Ama.” (Juan 1:1, 18) Ipapatnag na sarayan imbaga nen Juan a sankanonot to imay kustombre ed panangan diad panaon to. Panabayen da so duaran bisita pian mainomay iran makapantongtong. Ontan met, say Anak et “walad abay” na Ama pian makapantongtong iran maong.

6, 7. Panon ya inmelet so relasyon nen Jehova tan Jesus?

⁶ Diad ilalabas na panaon, mas oneelet so relasyon na Ama tan Anak. Say Anak “so inagew-agew a panggayagaan [na Dios].” (Basaen so Uliran 8:22, 23, 30, 31.) Nantultuloy ya oneelet so relasyon na Ama tan Anak. Saniba iran mankikimey tan naaralan nen Jesus ya aligen iray kualidad nen Ama to. Diad impamalsa ed arum nin intelihentin pinalsa, anengneng na Anak so impantrato nen Jehova ed balang sakey ed sikara, a mas lalon amaaralem na respeto tod Ama.

⁷ Anggan sanen kinuestion nen Satanas so kanepegan na Dios a manuley, naaralan na Anak no panon ya impanengneng nen Jehova so aro, hustisya, kakabatan, tan pakayari diad impanresolbe To ed mairap iran situasyon. Tinmulong iyad si Jesus pian natalonaan iray subok ya sagmaken tod dalin.​—Juan 5:19.

8. Panon itayon natulongan na salaysay na Ebanghelyo pian naamtaan iray kualidad na Ama?

⁸ Lapud maapit a relasyon nen Jesus ed si Jehova, sikato labat so makapangipaliwawad arum na nipaakar ed Ama to. Say sankaabigan a paraan pian nakabat tayo so Ama et say panaral ed saray imbangat tan ginawa na bogbogtong ya Anak to. Singa bilang, kasin sigpot tayon natalosan so kabaliksan na salitan “aro” no basaen tayo labat itan diad diksiyunaryo? Siempre andi. Balet no aralen tayo ray salaysay na Ebanghelyo nipaakar ed ministeryo nen Jesus tan say panangiyansakit tod totoo, natalosan tayo no antoy kabaliksan na balikas ya “say Dios et aro.” (1 Juan 4:8, 16) Aliwa labat lan say kualidad ya aro so impaamta nen Jesus ed saray disipulo to. Impaamta to met ed sikara so arum ni ran kualidad na Dios sanen wadiad dalin.

NO PANON YA IMPAAMTA NEN JESUS SO AMA

9. (a) Antoy duaran paraan ya impaamta nen Jesus so Ama to? (b) Anton ilustrasyon so inusar nen Jesus pian ipaamtay Ama to?

⁹ Panon ya impaamta nen Jesus so Ama to ed saray disipulo to tan ed saray nagmaliw a papatumbok to? Ginawa to itan diad duaran paraan: panamegley na bangat tan kondukta to. Say unonan aralen  tayo et nipaakar ed saray bangat to. Ipapatnag na saray imbangat nen Jesus ed papatumbok to so aralem a pakatalos tod saray kanonotan, liknaan, tan paraan na Ama to. Alimbawa, inyaliling nen Jesus so Ama tod sakey ya toon walaan na saray karnero. Abalang so sakey ed saratan. Lapud inaro toy kada sakey ed sikara, intilak toy pulok pian anapen imay abalang. Imbaga nen Jesus a sanen nalmo na laki imay abalang a karnero, “lalon panliketan to itan nen say siamaplo tan siam ya ag-abalang.” Antoy kabaliksan na sayan ilustrasyon? Oniay imbaga nen Jesus: “Ontan met, aliwan makapaliket ed Amak a walad tawen no nabalang so sakey ed sarayan angkekelag.” (Mat. 18:12-14) Antoy naaralan mod sayan ilustrasyon nipaakar ed si Jehova? No maminsan nayarin naliknam ya anggapoy kanam tan agka im-imanoen. Balet tandaan, say Ama tayon walad tawen et interesado tan mangiyaansakit ed sika. Ipapasen to kan “sakey ed sarayan angkekelag.”

10. Panon ya impaamta nen Jesus so Ama panamegley na kondukta to?

¹⁰ Say komaduan paraan ya impaamta nen Jesus so Ama to et diad panamegley na kondukta to. Kanian sanen imbaga nen apostol Felipe ed si Jesus ya “Ipanengneng mo ed sikami so Ama,” ayarian nen Jesus ya imbagan: “Samay akanengneng ed siak et anengneng to met lay Ama.” (Juan 14:8, 9) Konsideraen tayoy pigaran alimbawa ya impatnag nen Jesus iray kualidad na Ama to. Sanen akikasi so sakey ya akating ed sikaton paabigen to, diniwit nen Jesus so lakin “napno na kating” tan imbaga ton: “Labay ko. Nalinisan ka.” Kaabig to, amta na akating ya si Jehova so angiter ed si Jesus na pakayarin mamaabig. (Luc. 5:12, 13) Ontan met, sanen inatey si Lazaro, seguradon alikna na saray disipulo nen Jesus so panangabagey na Ama sanen “naermenan si Jesus diad puso to tan agonigon,” tan “akalua.” Anggaman amta nen Jesus a paolien toy Lazaro, siansia nin alikna toy ermen na kapamilyaan tan kakaaro nen Lazaro. (Juan 11:32-35, 40-43) Nayarin wala met so paborito yon salaysay ed Biblia ya no iner et impatnag nen Jesus so inkamapangasi na Ama to.

11. (a) Sanen nilinisan nen Jesus so templo, antoy impaamta to nipaakar ed Ama to? (b) Akin a makaligliwa ed sikatayo iyan salaysay?

¹¹ Antoy naaralan tayod samay salaysay nipaakar ed impanlinis nen Jesus diad templo? Imadyin yo pa iyan agawa: Nanggaway Jesus na saray panagsiplat a lubir, tan pinapaway to ray managlako na baka tan karnero. Inkakalbo to ray sinsilyo na saray managsalat na kuarta tan imbabalintuag to ray lamisaan da. (Juan 2:13-17) Lapud satan ya inkiwas to, anonotan na saray disipulo to imay propesiya nen Arin David ya “Say inkaseseg ko parad abung mo et mandarlang ed loob ko.” (Sal. 69:9, NW) Saman a reaksion  nen Jesus et mangipapanengneng a labay ton idepensay tuan panagdayew. Kasin nanenengneng moy personalidad na Ama sano babasaen mo itan a salaysay? Aglabat ipapanonot na satan a say Dios et walaan na pakayarin mangekal ed kaugsan, noagta talagan labalabay ton ekalen itan. Nonot yo pa labat so nalilikna nen Jehova legan ton naiimatonan so kaugsan ed interon dalin! Say panmoria nen Jehova tan Jesus ed kaugsan et manligliwa ed sikatayo sano makakasagmak tayoy ag-inkahustisya.

12, 13. Antoy naaralan tayod si Jehova diad impantrato nen Jesus ed saray disipulo to?

¹² Imanoen tayoy sananey nin alimbawa​—say impantrato nen Jesus ed saray disipulo to. Pansasangsangan da no siopay sankamanunaan ed sikara. (Mar. 9:33-35; 10:43; Luc. 9:46) Lapud abayag ya akaulop nen Jesus so Ama to, amta toy panmoria nen Jehova nipaakar ed inkamapaatagey. (2 Sam. 22:28; Sal. 138:6) Anengneng met nen Jesus ya impatnag itan nen Satanas a Diablo. Anggapo lay arum a nononoten na Diablo noag say pagmaliw ton prominente tan pakawalaay atagey a posisyon. Kanian naermenan si Jesus sanen naimano ton saray imbangat ton disipulo to et nantultuloy ya angipanengneng na mapaatagey ya ugali. Anggan saray pinili nen Jesus ya apostol et angipatnag ed satan! Impanengneng day inkamapaatagey anggan sanen unor lan agew nen Jesus ed dalin. (Luc. 22:24-27) Balet intultuloy iran sinimbawa nen Jesus tekep na kaabigan. Sikatoy matalek ya onsabi panaon et naalig met lanlamang na saray disipulo to so inkamapaabeba to.​—Fil. 2:5-8.

¹³ Kasin naimano yoy personalidad nen Jehova diad maanos ya impanimbawa nen Jesus ed saray disipulo to? Kasin naamtaan yoy nipaakar ed Ama manlapud imbaga tan inkiwas nen Jesus? Ag-ikaindan na Ama iray totoo to anggan mabetbet iran mankakasalanan. Say pakaamtad saray kualidad na Dios so mamakiwas ed sikatayon magbabawi tan onkerew na perdona ed si Jehova diad pikakasi sano makagawa tayoy kasalanan.

MABULOS YA IMPAAMTA NA ANAK SO AMA TO

14. Panon ya impanengneng nen Jesus a sikatoy mabulos ya mangipaamtad Ama to?

¹⁴ Pansiasiansiaen na dakel a mananguley ya ignorante tan walad kontrol da iray totoo diad pangiyaamot na saray impormasyon. Aliwan ontan si Jesus. Labay ton tulongay arum a nakabat so Ama, kanian mabulos ton innabang iray impormasyon a nakaukolan dan naamtaan nipaakar ed Ama. (Basaen so Mateo 11:27.) Inikdan met nen Jesus iray disipulo to na “pakatalos pian nakabat [da] so tuan Dios,” si Jehova. (1 Juan 5:20) Antoy labay ya ibaga na saya? Tinulongan nen Jesus iray papatumbok ton talosan iray bangat to nipaakar ed Ama. Agto inyamot so Ama panamegley na saray agnatalosan a bangat, a singa say Trinidad.

15. Akin ya ag-impaamta nen Jesus so amin ya impormasyon nipaakar ed Ama to?

¹⁵ Kasin imbangat nen Jesus so amin ya amta to nipaakar ed Ama? Andi. Impatnag nen Jesus so kakabatan diad ag-impangibaga na dakel iran bengatla. (Basaen so Juan 16:12.) Akin? Lapud diad saman et ‘agni natalosan’ na saray disipulo to iratan ya amin. Balet, impaliwawa nen Jesus ya dakel ni so naamtaan da sano onsabi so “mananulong,” say masanton espiritu ya mangiwanwan ed sikara diad “amin a katuaan.” (Juan 16:7, 13) No panon a say makabat ya ateng et agto ibabaga so amin ya impormasyon ed anak to lapud ta ugaw ni, inalagar met nen Jesus ya ontatken ed espiritual iray disipulo to sakbay ton impaamta  so arum a detalye nipaakar ed Ama. Maaron inkonsidera nen Jesus so limitasyon da.

ALIGEN SI JESUS DIAD PANGIPAAMTAD SI JEHOVA ED ARUM

16, 17. Akin et sarag tayo lan ipaamta so Ama ed arum?

¹⁶ No akabat mon maong so sakey a too tan naamtaan moy balibalin ugali to, agta labay mon ibaga itan ed arum? Sanen wadiad dalin si Jesus, imbangat toy nipaakar ed Ama to. (Juan 17:25, 26) Sarag tayo met kasin ipaamta si Jehova ed arum?

¹⁷ Unong ed naaralan tayo la, si Jesus labat so sigpot a makapikabat ed Ama. Balet ta labay ton ibangat iratan ed papatumbok to, inikdan to ni ra ingen na pakatalos pian naamtaan so aralem iran bengatla nipaakar ed personalidad na Dios. Diad tulong nen Jesus et mas dakel so akabatan tayo nipaakar ed Ama no ikomparad arum a totoo. Misalsalamat tayo ta mabulos si Jesus ya ipaamta ed sikatayo so Ama panamegley na saray bangat tan kondukta to! Talagan pribilehyo tayon “ipasirayew” so Ama. (Jer. 9:24; 1 Cor. 1:31) Legan tayon panseseetay iyapit ed si Jehova, sikatoy onaapit met ed sikatayo. (Sant. 4:8) Lapud satan, sarag tayo lan ipaamtay Jehova ed arum. Panon tayon gawaen itan?

18, 19. Anton duaran paraan a nipaamta tayoy Ama ed arum? Ipaliwawa.

¹⁸ Kaukolan tayon aligen si Jesus diad pangipaamtad arum na nipaakar ed Ama panamegley na salita tan kondukta tayo. Tandaan a dakel ed saray nakakatongtong tayod teritorya tayo et agda amta no siopay Dios. Nayarin lingoy panmoria dad Dios lapud palso iran bangat. Sarag tayon ibangat ed sikara so ngaran na Dios, say gagala to parad totoo, tan say personalidad to ya ipapaamta na Biblia. Nayari met a sano kaiba tayo ray agagi, pantongtongan tayo ray arum a salaysay ed Biblia a mangipapaamtad personalidad na Dios ya dati et agtayo tanto natatalosan. Diad ontan et napaseseg tayo met ira.

¹⁹ Nepeg tayon aligen si Jesus diad pangipaamtad Ama panamegley na kondukta tayo. No nanengneng na totoo ed sikatayo so aro a singa impatnag nen Kristo, napakiwas met iran onapit ed Ama tan ed si Jesus. (Efe. 5:1, 2) Pinaseseg itayo nen apostol Pablo ya sikatoy ‘aligen tayo, a singa impangalig to ed si Kristo.’ (1 Cor. 11:1) Agta balibalin pribilehyo ya ipaamtay Jehova panamegley na maabig a kondukta tayo! On, itultuloy tayo komon ya ipaamtay Ama ed arum a singa si Jesus.

[Tepetepet Parad Panagaral]