Makabat a Simbawa ed Pagmaliw ya Andiay Asawa tan Panangasawa

“Ibabagak iya . . . pian pakiwasen ta kayo ed bengatlan manepeg tan ed naynay a pakapanlingkor yo ed Katawan ya anggapoy makasbel.”​—1 COR. 7:35.

1, 2. Akin a nepeg tayon aralen so simbaway Biblia ed pagmaliw ya andiay asawa tan pangasawa?

MAS nalilikna tayoy liket, pakasakitan, odino paga diad pidedeneng tayod agkaparan sekso nen say diad arum niran aspektoy bilay. Pian matalonan napidenengan iratan ya emosyon, kaukolan tayoy paigiya ed Dios. Balet wala niray rason no akin a nepeg tayon gawaen itan. Nayarin kontentod pagmaliw ya andiay asawa so sakey a Kristiano balet liknaen ton sikatoy dedesdesen na kapamilya odino kakaaro ton mangasawa. Nayarin pirawat na sakey so nawalaay asawa balet ta anggapo ni aromog ton matukoy a kapareha. Kaukolan na arum so panangigiya diad pamparaan da parad saray responsabilidad na asawan laki odino bii. Tan nepeg a salimbengan na saray Kristianon andian tan walaan na asawa so inkasikara manlapud seksual ya imoralidad.

² Nilikud ed dilin panliketan tayo, aapektaen met na sarayan pamaakaran so pikakaaro tayod si Jehova. Diad kapitulo 7 na unonan sulat nen Pablo ed saray taga Corinto, sikatoy angiter na simbawad pagmaliw ya andiay asawa tan pangasawa. Labay ton pakiwasen iray managbasa “ed bengatlan manepeg tan ed naynay a pakapanlingkor [da] ed Katawan ya anggapoy makasbel.” (1 Cor. 7:35) Legan yon ikokonsidera iray simbawa tod sarayan importantin bengatla, usisa yoy kipapasen yo​—andian odino walaan na asawa​—no panon kayon sigpot a makapanlingkor ed si Jehova.

Seryoson Desisyon a Gawaen na Balang Sakey

3, 4. (a) Antoy nayarin nagawa no mapagpaga iray kanayon odino kaaro na sakey ya andian ni asawa? (b) Panon a makatulong so simbawa nen Pablo pian nawalaan tayoy balansin panmoria ed panangasawa?

³ Singa ed saray Judio nen inmunan siglo, ipapasen na dakel a kultura natan ya mas maabig so nawalaay asawa. No linmampas lad espisipikon edad so sakey tan anggapo ni asawa to, nayarin sikatoy simbawaen na saray mapagan kakaaro tan kakanayon to. Nayarin ibaga dan kaukolan ton seetay pananap na naasawa to, odino mangisuheri ira no siopay kursonada ra parad sikato. Ompan manggawa nira ingey paraan pian napankabat da ra. Balet sarayan kiwas et manreresulta no maminsan ed pakabaingan, pakaderal na pankakaaro, tan pakasakitan na liknaan.

⁴ Agbalot pinilit nen Pablo so siopaman ya mangasawa o mansiansian andiay asawa. (1 Cor. 7:7) Sikatoy kontenton nanlingkor ed si Jehova ya andiay asawa, balet nirespeto toy kanepegan na saramay labay day mangasawa. Kanepegan met na balang Kristiano natan so mandesisyon no kasin mangasawa odino mansiansia ran andiay asawa. Ag-ira nepeg ya diktaan na arum no antoy pilien dan desisyon.

Italona Bilang Andiay Asawa

5, 6. Akin ya impaseseg nen Pablo so pansiansian andiay asawa?

⁵ Say sakey ya alay-abig a punto ed sulat nen Pablo et say positibon panmoria tod  pansiansian andiay asawa. (Basaen so 1 Corinto 7:8.) Anggaman anggapoy asawa nen Pablo, agto inisip ya sikatoy mas maong nen saramay walaay asawa, aliwan singa saray papari na Kakristianoan ya ag-angasawa. Imbes, impabitar toy sakey a bentahan panliliketan na dakerakel a ministro na maong a balita diad pansiasiansia ran andiay asawa. Anto itan ya bentaha?

⁶ Say sakey a Kristianon andiay asawa et kaslakan lan bulos a mangawat na saray asainmin ed panaglingkor ed si Jehova ya nayarin mairap parad saray walaay asawa. Akaawat si Pablo na espisyal a pribilehyo bilang sakey ya “apostol ed saray nasyon.” (Roma 11:13) Nabasad Gawa kapitulo 13 anggad 20 iray eksperiensya to tan saray kapara ton misionero diad impanpulong dad saray balon teritorya tan impangiletneg day dakel a kongregasyon. Diad ministeryo to, sinungdoan to ray kairapan ya agla nasali na dakel ed sikatayo. (2 Cor. 11:23-27, 32, 33) Balet singa anggapo iraman ya kairapan lapud liket ya alikna to diad impanulong ed dakel a magmaliw ya babangatan. (1 Tes. 1:2-7, 9; 2:19) Nagawaan to kasin amin iratan no sikatoy angasawa odino nampamilya? Maseguron andi.

7. Mangiter na alimbawa na saray agagin andiay asawa ya anganamot ed kipapasen da pian nasuportaay interes na Panarian.

⁷ Aanamoten na dakel ya andiay asawan Kristiano so kaplesan a kipapasen da pian padaakey kimey da parad Panarian. Inmalis si Sara tan Limbania, andiay asawan payunir ed Bolivia, diad sakey a baryon pigay taon lan ag-apulongan. Kasin aproblema ra lapud anggapoy kuryente diman? Inkuan da: “Anggapoy radyo o TV kanian anggapoy makasbel ed saray totoon manbasa, say manunan pamapalabasan day oras.” Impanengneng na pigarad saray manaayam diman iray babasaen dan publikasyon na saray Tasi nen Jehova ya abayag lan ag-iyiimprinta. Lapud interesado lawarin amin so laen dan abung, nairapan iran manumpal ed teritorya. Inkuan na sakey ya akulaw: “Asingger la angankoy anggaan ta asabi kami lan siansia na saray Tasi nen Jehova.” Ag-abayag, pigarad saray taga diman so onaatendi lad saray aral.

8, 9. (a) Antoy sankanonot nen Pablo sanen impaseseg toy pansiansian andiay asawa? (b) Antoray bentaha na panlingkor ya andiay asawa?

⁸ Tua, dakel met so maabig ya resultay pampupulong na saray de-asawan Kristiano ed saray mair-irap ya teritorya. Balet walaray asainmin  a lukas ed saray andiay asawan payunir ya mairap parad saramay walaan na asawa odino ananak. Sankanonot nen Pablo so baleg nin kimey diad saray kongregasyon pian nipulong so maong a balita. Labay ton naliketan so amin ed panaglingkor, a singa sikato. Kanian imbaga to ya maabig so manlingkor ed si Jehova ya andiay asawa.

⁹ Oniay insulat na andiay asawan payunir ed United States: “Iisipen na arum ya agka magmaliw a maliket no anggapoy asawam. Balet apaneknekan kon say magnayon a liket et akadependid pikakaaro na sakey ed si Jehova. Anggaman sakripisyo ya tua so pansiansian andiay asawa, alay abig itan ya regalo no usaren mod maabig a paraan.” Nipaakar ed igamor na liket, insulat to: “Say pansiansian andiay asawa et sakey ya pankanawnawa pian nagamoray liket, aliwan makasbel. Amtak ya anggapoy lalabien nen Jehova, wala man o anggapoy asawa na sakey.” Sikatoy maliket a manlilingkor natan ed bansan baleg so pankaukolan parad saray manangipulong na Panarian. No anggapoy asawam, kasin napadaak moy pibibiang mod pangibangat na katuaan ed arum? Nayarin napaneknekan mo met a say pagmaliw ya andiay asawa et alay-abig a regalon nanlapud si Jehova.

Saray Andiay Asawa a Labay Day Mangasawa

10, 11. Panon a tutulongan nen Jehova iramay labay day miasawa balet ta anggapo ni aromog dan matukoy a kapareha?

¹⁰ Kayari impansiansian andiay asawa ed medyo andukey a panaon, denesidi na dakel a matoor ya lingkor nen Jehova so mananap na kaiba ed bilay. Lapud amta ran kaukolan day panangiwanwan, kinerew dad si Jehova a tulongan to ran makaromog na matukoy a kapareha.​—Basaen so 1 Corinto 7:36.

¹¹ No labay moy makapiasawa o makaasawa na kaparam ya impapuson manlilingkor ed si Jehova, itultuloy mon ipikasi itan ed Sikato. (Fil. 4:6, 7) Anggan panon kabayag so panalagar mo, agka nadidismaya. Amta nen Jehova so nakaukolan mo, tan no manmatalek kad sikato, tulongan to kan nasarag so kipapasen mo.​—Heb. 13:6.

12. Akin et kaukolan a nonoten a maong na sakey a Kristiano no kasin awaten toy opresin kasal?

¹² Nayarin say sakey a Kristianon manpipirawat a nawalaay asawa et opresian na kasal na sakey ya alanganin so espiritualidad to odino agmananisia. No nagawa itan ed sika, tandaan a say resultay lingon pampilim na piasawaan mo et mas ansakit nen say ermen a naliliknam nen anggapo ni asawam. Tan no sanasawa kayo la, diad irap man o inawa, asinger ka lad asawam legay bilay. (1 Cor. 7:27) Aliwa komon a lapud liknaen mon saya labat lay pankanawnawam ya makapiasawa et bengatbengat ka lan mandesisyon na pagbabawian mo lanlamang.​—Basaen so 1 Corinto 7:39.

Manparaan Parad Panangasawa

13-15. Antoray posiblin problemad panamaley a kaukolan ya pantongtongan na saninaro antis iran mankasal?

¹³ Anggaman impaseseg nen Pablo so panlingkor ed si Jehova bilang andiay asawa, agto minelmelag iramay labay day mangasawa. Imbes, diad saray pinuyanan a sulat to et sikatoy angiter na simbawan makatulong ed saray saninaro a natalosan no antoray nailaloan da tan no panon dan napaelet so relasyon da.

¹⁴ Kaukolan na arum a saninaro ya umanen so iilaloan dad arapen. Legan na paniinaroan da, nayarin isipen dan say aroan da et nikadkaduma tan ekstraordinaryo, ya seguradon malikeliket so panamaley da. Ontan so liknaan da sano onloob irad panamaley, singa anggapoy makaderal ed liket da. Say ontan ya kanonotan et aliwan realistiko. Tua a sengegan na liket iray romantikon ulopan ed bilay na sanasawa, balet ta aliwa labat a saratan so nakaukolan da pian natalonaan iray kairapan ya katekep na panamaley.​—Basaen so 1 Corinto 7:28. *

 ¹⁵ Dakel ya balon kasal so abigla, adismaya ni ingen nen ag-ira makapanpakna ed saray importantin isyu. Nayarin mandumaan so labay da nipaakar ed panaggastos tan panrelaks, no iner so panayaman da, tan no panon kabetbet so ibisitad saray katulangan da. Tan walaan iran duay kakapuyan a nayarin pansengegay pakasyodot. Legan na paniinaroan, nayarin agda nonoten so kaimportantian na saratan a pamaakaran, balet ta posiblin panlapuay baleg a problema iratan no sanasawa la ra. Mas maabig sirin no pantongtongan iratan na saninaro antis iran mankasal.

16. Akin et kaukolan a manpakna so sanasawa diad pangarap ed saray problemad panamaley?

¹⁶ Pian magmaliw iran matalona tan maliket, kaukolan a sankaiba dan arapen iray problema. Nepeg a manpakna ira no panon dan disiplinaen iray anak da tan no panon dan asikasoen iray maedad lan atateng da. Agda nepeg ya abuloyan ya apektaen na saray problemad pamilya so relasyon dan dua. No iyaplika da ray prinsipyod Biblia, naresolbe day dakel a problema, nasungdoan da ray mairap ya resolbien, tan makapansiansia ran maliket.​—1 Cor. 7:10, 11.

17. Antoran “bengatlan nipaakar ed mundo” so nepeg a pampagaan na saray sanasawa?

¹⁷ Tinukoy nen Pablo so sakey nin nailaloan ed panamaley diad 1 Corinto 7:32-34. (Basaen.) Saray walaan na asawa et “mapaga ed saray bengatlan nipaakar ed mundo,” singa say naakan, kawes, panayaman, tan arum niran pankaukolan. Akin? No balolaki ni sakey, nayarin akasentroy bilay to ed ministeryo. Balet no wala lay asawa to, kaukolan ton usaren so arum ya panaon tan biskeg to parad asawa to pian napaliket to. Ontan met so nepeg a gawaen na asawan bii. Natatalosan nen Jehova iyan pankaukolan na sanasawa. Amta to ya pian magmaliw a maliket so panamaley, kaukolan dan iter ed balang sakey so arum ya panaon tan biskeg da a datin uusaren dad panaglingkor ed Sikato nen anggapo ni asawa ra.

18. Antoran pananguman so gawaen na sanasawa ed panaon ya uusaren dad panagligliwaan?

 ¹⁸ Balet wala ni nalalanor. No kaukolan ya bawasan na sanasawa so panaon tan biskeg ya uusaren dad panaglingkor ed Dios pian nawalaan iray panaon ed balang sakey, agta nepeg ya bawasan da met so uusaren dad panagligliwaan? Anto kasi nalikna na asawan bii no dakel nin siansiay panaon na asawa to diad isport kaiba ray kakaaro to? Odino anto kasi nalikna na asawan laki no dakel nin siansiay panaon na asawa to kaiba iray kakaaro to? Posiblin onermen tan liknaen ton sikatoy agla inaro na asawa to. Napaliisan itan no panggunaetan na sanasawa ya paeleten so bedber na impankasakey da.​—Efe. 5:31.

Kakaukolanen nen Jehova so Kalinisan ed Moral

19, 20. (a) Akin ya agnibagan agla natukson manggawa na imoral iramay walaan na asawa? (b) Antoy kapeligroan no abuloyan na sanasawa a makapanarawian irad andukey a panaon?

¹⁹ Determinado iray lingkor nen Jehova a mansiansian malinis ed moral. Denesidi na arum so mangasawa pian ag-ira makagaway imoral. Balet, say pangasawa o piasawa et aliwan automatikon proteksion ed seksual a karutakan. Nensaman, nasalimbengan iray totoo ed mabiskeg a syudad no mansiansia rad loob na bakor na satan. Balet no ompaway so sakey tan walaray rebelde o tulisan, nayarin sikatoy takewan odino pateyen da. Ontan met ed saray walaay asawa, nasalimbengan labat ira manlapud imoralidad no unoren da ray totontonen tan limitasyon ya inggeter nen Jehova, say Manangigapo na panangasawa.

²⁰ Sinalambit nen Pablo iraman ya limitasyon diad 1 Corinto 7:2-5. Nepeg ya nawalaan labat na seksual a relasyon so asawan bii ed asawa to; ontan met na asawan laki. Kaukolan ya iter na balang sakey so “kanepegan” na asawa to, odino seksual a relasyon a nepeg ya naawat na sakey ed asawa to. Balet walaray sanasawan agsaniba ed andukey a panaon​—nandumaay pambakasyonan da odino nanarawian ira lapud trabaho, kanian agda niiiter so “kanepegan” na balang sakey. Isipen pay makapasinagem a resulta no lapud ‘agnakontrol na sakey so inkasikato’ et nadaeg nen Satanas tan makapikalugoran. Bendisyonan nen Jehova iray ulo na pamilya a manlelegpet ed pamilya da ya agda ipepeligroy panamaley da.​—Sal. 37:25.

Saray Gunggona na Pangunor ed Simbaway Biblia

21. (a) Akin et mairap so mandesisyon nipaakar ed pansiansian andiay asawa tan pangasawa? (b) Akin et makanakana so simbawan walad 1 Corinto kapitulo 7?

²¹ Say pandesisyon nipaakar ed pansiansian andiay asawa odino pangasawa et sakey ed saray sankairapan a gawaen. Lapud imperpekto tayon amin, walan walay onlesan problema. Kanian anggan saramay aaroen tan bebendisyonan nen Jehova et agda sigpot a napaliisay pakadismaya, balanglan walay asawa ra odino anggapo. No iyaplikam balet so makabat a simbawan walad 1 Corinto kapitulo 7, napaliisan moy dakel a problema. Diad imaton nen Jehova et ‘maabig so nagawaan mo,’ wala man so asawam odino anggapo. (Basaen so 1 Corinto 7:37, 38.) Say pakaawat ed panangabobon na Dios so sankaabigan a nagamoran mo, aliwan natan labat noagta anggad balon mundo. Diman, anggapo lay onlesan problema ed relasyon na bii tan laki ya kasmak natan.

[Paimano ed leksab]

Kasin Naebatan Yo?

• Akin et agtayo nepeg a desdesen so sakey ya mangasawa?

• Panon mon nausar ed sankaabigan a paraan so panaon mo bilang andiay asawan lingkor nen Jehova?

• Panon a naparaanan na saninaro iray probleman nailaloan ed panamaley?

• Akin ya aliwan automatikon proteksion ed seksual ya imoralidad so pangasawa o piasawa?

[Tepetepet Parad Panagaral]

[Saray litrato ed pahina 14]

Maliket iray Kristianon andiay asawa ya isesentro day bilay dad pamalaknab na ministeryo ra

[Litrato ed pahina 16]

Antoran pananguman so nepeg a gawaen na arum no wala lay asawa da?