Kasin Aligen Moy Finehas Sano Nasusubok Ka?

TALAGAN baleg a pribilehyo so panlingkor ya elder ed kongregasyon. Balet, ibabaga na Salitay Dios ya saray elder et makaeksperiensya na subsubok. No maminsan, kaukolan day mamemben na kaso na saray akagaway kasalanan tan ‘mangukom a nipaakar ed Jehova.’ (2 Awa. 19:6) Odino nayarin makaawat iray asainmin ya isipen dan agda sarag, a singa si Moises, ya mauyamon nantepet nipaakar ed sakey ya asainmin to: “Siopa ak ta kasi ya onla ed kinen Faraon?”​—Exo. 3:11.

Say Kasulatan, a nisulat diad panangiwanwan na masanton espiritun anuro met ed saray elder, so mangiiter na alimbawa na saray manangasikaso a matalonan angarap ed subsubok. Si Finehas et anak nen Eleazar tan apo nen Aaron, kanian sikatoy onsublay a magmaliw ya atagey a saserdote. Walay taloran inkagawad bilay to a makatulong ed saray elder natan pian makapanpakpel, makatalos, tan makapanmatalek irad si Jehova sano nasusubok.

“Inmalagey” a Tampol

Kalangweran ni labat si Finehas sanen nankampo iray Israelita diad Patar na Moab. Inkuan na Biblia: “Say katooan ginapoan da so nanggawa na lawalawan ed saray anak nen Moab. . . . Tan saray katooan angan tan tinmuek ira ed saray kinon-dirios da.” (Num. 25:1, 2) Kanian, dinusa nen Jehova iray nankasalanan na makapatey a salot. Kasin naiisip mo no antoy alikna nen Finehas ed kasalanan da tan ed salot?

Oniay intuloy na salaysay: “Nia, say sakey ed saray anak na Israel sinmabi tan inawit to ed saray agagi to so sakey a Midianita a bii ed imaton nen Moises, tan sankanengneng na amin a duypo na saray anak na Israel, nen peles da a mannangis diman ed pinto na abel ya abung-abung na duypo.” (Num. 25:6) Antoy gawaen na saserdote a si Finehas? Sikatoy kalangweran ni tan samay nankasalanan et sakey ed saray mangidadaulo na panagdayew ed Israel.​—Num. 25:14.

Balet si Jehova so tinakotan nen Finehas, aliwan say too. Sanen anengneng to imay laki ya angawit na Midianita, angalan tampol na gayang tan tinumbok to ra diad tolda, insan to ra dinuyok. Antoy reaksion nen Jehova ed pakpel tan inkadesidido nen Finehas? Tampol ya intunda nen Jehova so salot tan bilang tumang et insipan To ed si Finehas a mansiansian “maando” ed poli to so inkasaserdote.​—Num. 25:7-13.

Siempre, agkaukolan a magmaliw a bayolenti iray elder natan. Balet singa si Finehas, kaukolan a desidido tan makpel ira. Alimbawa, si Guilherme et pigay bulan to ni labat a manlilingkor bilang elder sanen tinuron mangegna ed sakey ya hudisyal a kaso. Say nankasalanan et elder ya tinmulong ed si Guilherme nen ugaw ni. Oniay inkuan to:  “Aliwliway liknaan kod saman. Agak makaugip. Say iisipen kon lanang et no panon kon desisyonan iyan situasyon ya agnikompromisoy estandarte nen Jehova. Pigay agew ak a nampikasi tan nan-research ed saray publikasyon tayo.” Amabiskeg iya ed sikato pian makpel a mangarap ed mairap a situasyon tan ontulong ed agi a nankasalanan.​—1 Tim. 4:11, 12.

No saray elder et makpel tan desididon onkiwas sano nakaukolan, nibagan sikaray ehemplo na pananisia tan katooran. Siempre, saray arum a Kristiano et kaukolan met a makpel ya mangireport ed saray naamtaan dan seryoso a kasalanan. Ontan met, kaukolay katooran pian nitunday pililimog ed kaaro odino kanayon ya adispelosip.​—1 Cor. 5:11-13.

Napaliisay Problema no Walay Pakatalos

Makpel si Finehas, sikatoy aliwan singa ugaw a bengatbengat ya onkiwas. Imanoen no panon ton impanengneng so pakatalos, a sikatoy maalwar tan makatebek sanen wala lamet so abalitaan to. Nampaalagey na altar diad asingger na Ilog Jordan iray tribu nen Ruben, Gad, tan kapaldua na tribu nen Manases. Say abaloan na arum ya Israelita et parad palson panagdayew iman, kanian namparaan iran milaban.​—Jos. 22:11, 12.

Antoy reaksion nen Finehas? Sikato tan saray mangidadaulo ed Israel et makabat ya akitongtong ed saramay nanggawa na altar. Impaliwawa na saraman ya tribu so situasyon tan alinewan ya say altar et parad “panaglingkor ed Jehova.” Kanian, apaliisay problema.​—Jos. 22:13-34.

No walay narengel na sakey a Kristiano ya akusasyon odino aliwan marakep a balita nipaakar ed sakey ya agi, maabig sirin no aligen toy Finehas. Say pakatalos so mamuger ed sikatayo pian agtampol manpasnok odino mangibagay makapuy nipaakar ed agagi.​—Uli. 19:11.

Panon ya ontulong so pakatalos pian naalig na saray elder si Finehas? Imbaga nen Jaime, a masulok a samploy taon lan elder: “Sanen indalem ed siak na sakey a manangipalapag so agto impitalosan ed sananey ya agi, impikasik a tampol ed si Jehova ya anggapo komoy pilaan ko, noagta manimbawa ak base labat ed Biblia. Aminsan et walay patutulongan ed siak ya agin bii nipaakar ed aliwan impantrato na agin laki a walaay pribilehyo diad sananey a kongregasyon. Lapud kaarok may agin laki, sarag ko komon ya idepensa. Balet agko iman ginawa noagta, impanonot kod agin bii so pigaran prinsipyo ed Biblia. Tan sikatoy inmabuloy ya mitongtong ed agin laki. (Mat. 5:23, 24) Agtampol naayos so problema. Kanian pinaseseg kon imanoen to ni ray arum ya prinsipyo ed Biblia. Impikasi to lamet so situasyon tan nanggunaetan toy mamerdona.”

 Antoy resulta? Inkuan nen Jaime: “Kayari pigay bulan, imbaga na agin bii ya nagbabawian la na agin laki so imbaga to. Inyuksoy na agin laki so pikimeyan ed sikato diad ministeryo tan agaylay pisasalamat na agin laki ed sikato. Asolbar so problema. No akibabali ak ed problema ra tan walay pinaboran ko, naayos kasi so agda impantalosan?” Isisimbawa na Biblia: “Agka ompaway a magangganat a mikolkol.” (Uli. 25:8) Makabat a papasesegen na saray elder iray Kristianon walay agpantatalosan ya iyaplika iray prinsipyo ed Biblia pian niwala tan napansiansia so kareenan.

Kinmerew na Simbawa ed si Jehova

Si Finehas et apribilehyoan a manlingkor bilang saserdote na pinilin totoo na Dios. Singa naimano tayo la, talagan nikadkadumay pakpel tan pakatalos to anggano medyo ugaw ni. Balet, atalonaan to iray subsubok lapud impanmatalek tod si Jehova.

Sanen ni-rape tan pinatey na saray taga Gabaa a tribu na Benjamin so kalugoran na sakey a Levita, namparaan a milaban ed sikara so arum a tribu. (Uko. 20:1-11) Antis iran akilaban, impikasi ran tulongan ira komon nen Jehova. Balet amidua ran atalo tan dakel so inaatey. (Uko. 20:14-25) Kasin inisip da ya agdinengel na Dios so pikakasi ra? Kasin interesado si Jehova ya nanengneng no anton talagay reaksion dad kaugsan?

Lapud agnaandi so talek nen Finehas ya atagey a saserdote lad saman, oniay impikasi to: “Ompaway ak lamet ed bakal sumpa ed saray anak nen Benjamin ya agik, odino ontunda ak?” Inebatan nen Jehova so pikakasi to. Tinalo da ray anak nen Benjamin, tan pinoolan da so Gabaa.​—Uko. 20:27-48.

Antoy naaralan tayod saya? Walaray problemad kongregasyon ya agtampol nasolbar anggaman mansasagpot tan ipipikasi itan na saray elder. No nagawa iya, maabig no tandaan na saray elder so imbaga nen Jesus: “Mantultuloy kayon onkerew, tan naikdan kayo; mantultuloy kayon mananap, tan makaromog kayo; mantultuloy kayon ontoktok, tan nalukasan kayo.” (Luc. 11:9) Anggano singa atrasado so ebat ed pikakasi na saray manangasikaso, seguradon ebatan itan nen Jehova ed dugan panaon.

Singa bilang, kakkaukolan na sakey a kongregasyon ed Ireland so Kingdom Hall balet ag-itan inaprobaan na planning officer ed lugar da. Agto inabobonan so amin ya plano diad pasen a labay ya pampaalageyan na agagi. Say alenleneg a nayarin mangaproba ed plano et say chief planning officer na interon bansa. Makatulong kasi so pikakasi a singa agawad si Finehas?

Oniay imbaga na sakey ed saray elder: “Kayari na masimsimoon ya impanpikasi mi, linma kamid main office da. Imbaga rad siak ya manga pigay simba ni palabasen antis min nakatongtong so chief officer. Balet naabuloyan kami ya mitongtong ed sikato ed loob na limaran minuto. Sanen anengneng to iray inuman a plano, inaprobaan ton tampol so pampaalagey, tan manlapu lad saman et tutulongan kami la na samay planning officer ed lugar mi. Naaralan mid satan ya eksperiensya a talagan mabiskeg so pikakasi.” On, ebatan nen Jehova iray masimoon a pikakasi na saray elder a manmamatalek ed sikato.

Ambelat so responsabilidad nen Finehas ed Israel nensaman, balet lapud pakpel, pakatalos, tan panagmatalek ed Dios, asarag to iray subok. Benendisyonan nen Jehova so maseseg a panangasikaso nen Finehas ed kongregasyon To. Kayari na manga 1,000 taon, pinuyanan si Esdras ya isulat: “Si Finehas ya anak a laki nen Eleazar sikato nensaman so makauley ed sikara dia ed panaon a linmabas, tan si Jehova wala nensaman ed sikato.” (1 Awa. 9:20) Ontan met komon so nagawa ed amin a mangidadaulo ed totoo na Dios natan tan na amin a Kristianon matoor a manlilingkor ed sikato.