Say Igamor na Panangabobon na Dios et Manresulta’d Bilay ya Andi-anggaan

“Sika, O Jehova, bendisyonan mo so amin a matunong; say panangabobon mo et manalimbeng ed sikara a singa baleg a samper.”​—SAL. 5:12, NW.

1, 2. Antoy kinerew nen Elias ed samay balo a bii a taga Zarepta, tan antoy impaseguro na propeta?

NARASAN la imay bii tan say anak to, ontan met ed propeta na Dios. Sanen sayan balo a taga Zarepta et manodokdok na kiew ya itungo to, kinmerew si propetan Elias na danum tan tinapay. Mabulos ton iyalaan na danum, balet ta say naakan ya walad sikato et ‘sankaakop labat a tapong diad kamaw tan daiset a larak diad salongkit.’ Inisip ton anggapoy magenap a naakan a niiter to tan imbaga to itan ed propeta.​—1 Ara. 17:8-12.

² ‘Igawaan mo ak nin unona na melag a bibingka,’ so kuan nin siansia nen Elias, ‘tan iyakar mo ed siak, tan insan manggawa ka na parad sika tan parad anak mo. Ta onia so kuan nen Jehova, a Dios na Israel, Say kamaw na tapong agnabawasan, anggan say salongkit na larak ag-onkulang.’​—1 Ara. 17:13, 14.

3. Anton desisyon so kaukolan tayon gawaen?

³ Say desisyon a kaukolan a gawaen na sayan balo et mas importante ni nen say no kasin inabang to so dagdaiset kalamor a naakan da. Kasin manmatalek ya ag-ira paulyan nen Jehova, odino mas iyuna toy materyal a pankaukolan da nen say igamor na panangabobon tan pikakaaro na Dios? Ontan met a desisyon so kaukolan tayon gawaen natan. Kasin mas importante’d sikatayo so igamor na panangabobon nen Jehova nen say pakawalaan na mainawan bilay? Dakel so rason pian manmatalek tan manlingkor tayo’d Dios. Tan walaray nagawaan tayo pian nagamoray panangabobon to.

‘Sika so Makanepegan a Mangawat na Dayew’

4. Akin a si Jehova so makanepegan a mangawat na dayew?

⁴ Walay kanepegan nen Jehova ya ilaloan a  sikatoy lingkoran na totoo diad paraan a labay to. Pinekderan iya na saray anghel sanen nankakasakey dan inkuan ya: “Sika so makanepegan, Jehova a Dios mi, a mangawat na gloria tan galang tan pakayari, lapud sika so amalsa ed amin a bengatla, tan lapud linawam et niwala tan apalsa iratan.” (Apo. 4:11) Si Jehova so makanepegan a dayewen lapud sikato so Amalsa ed amin a bengatla.

5. Akin a say panangaro na Dios et mamakiwas ed sikatayon manlingkor ed sikato?

⁵ Say sakey nin mamakiwas ed sikatayon lingkoran si Jehova et say agnaparaan a panangaro to’d sikatayo. “Say Dios pinalsa to so too ed indengan ton dili,” so kuan na Biblia, “dia ed indengan na Dios sikato so pinalsa to; say laki tan say bii pinalsa to ra.” (Gen. 1:27) Say too et bulos a mandesisyon. Sikatoy inikdan na Dios na abilidad a mandesidi no kasin lingkoran toy Dios odino andi. Lapud si Jehova so angiter na bilay tayo, sikato so Ama tayo. (Luc. 3:38) Maong ya ama si Jehova ta inter toy amin a nakaukolan tayo pian panliketan tayoy manbilay. “Papasinagen to so agew to,” tan “papepelagen to so uran,” pian say planetan Dalin et mamawalay dakel ya naakan tan marakdakep ed pakanengneng tayo.​—Mat. 5:45.

6, 7. (a) Lapud impanrebelde nen Adan, antoy nansumpalan na amin ya ilalak to? (b) Antoy gunggonan iter na dondon parad saramay aabobonan na Dios?

⁶ Ontan met, insalba itayo nen Jehova ed graben resulta na kasalanan. Sanen si Adan et nankasalanan, aliling toy sakey ya ama a tinakewan toy pamilya to pian makapansugal. Diad impanrebelde to’d si Jehova, tinakew to’d ananak to so ilalo ran nawalaan na maliket ya andi-anggaan a bilay. Lapud inkamakasarili to, amin ya anak to et naaripen na kasalanan. Kanian amin tayo et mansasakit, maniirap, tan diad kaunoran et ompatey. Nensaman, pian nibulos so sakey ya aripen, kaukolan so bayar. Si Jehova so angiter na bayar pian nibulos itayo’d saray graben epekto na kasalanan. (Basaen so Roma 5:21.) Inter nen Jesu-Kristo so “kamarerwa to a panondon ed amayamay” bilang panangunor ed linawa na Ama to. (Mat. 20:28) Asingger lan sigpot a nagunggonaan ed satan a dondon so amin ya aabobonan na Dios.

⁷ Anggapo lay makapipara’d ginawa na Amalsa ed sikatayo, si Jehova, pian magmaliw a maliket tan makabaliksan so bilay tayo. No walad sikatayo so panangabobon to, natasian tayo no panon ton ekalen so amin ya kairapan. Tan itultuloy ya ipanengneng nen Jehova ed balang sakey ed sikatayo a “tumangan to iramay masimoon a manaanap ed sikato.”​—Heb. 11:6.

‘Saray Totoom Iyapay Day Inkasikara a Mabulbulos’

8. Antoy naaralan tayo’d naeksperiensya nen Isaias nipaakar ed panaglingkor ed Dios?

⁸ Say igamor na panangabobon na Dios et laktipen toy dugan panangusar ed abilidad tayon mandesisyon. Agpapaskaren nen Jehova so anggan siopa a manlingkor ed sikato. Diad panaon nen Isaias, oniay intepet To: “Siopa so ibakik, tan siopa so onla a nipaakar ed sikatayo?” Binidbir nen Jehova ya walay kanepegan nen Isaias ya mandesisyon. Isipen pay liket nen Isaias sanen inmebat ya: “Wadia ak; ibaki mo ak.”​—Isa. 6:8.

9, 10. (a) Antoy nepeg ya awawey tayo ed panaglingkor ed Dios? (b) Akin et manepeg a panlingkoran tayoy Jehova ya interon kamarerwa?

⁹ Sikatayon mismo so mandesisyon no kasin lingkoran tayoy Dios odino andi. Labay nen Jehova ya mabulos itayon manlingkor ed sikato. (Basaen so Josue 24:15.) Agnaliliketan so Dios ed siopaman a napipilitan labat ed panaglingkor to; tan agto awaten so panagdayew na saramay say motibo ra et pian paliketen labat so arum a too. (Col. 3:22) No say panaglingkor tayo et aliwan diad “simoon a puso” lapud papaimpluensyaan tayo ed pilalek na sayan mundo, ag-itayo abobonan na Dios. (Sal. 119:2) Amta nen Jehova ya say panlingkor tayo ya interon kamarerwa et parad pankaabigan tayo. Imbaga nen Moises ed saray Israelita ya ‘say pangaro ed Jehova a Dios, say panumpal ed boses to, tan say ipeket ed sikato’ et mankabaliksan na bilay.​—Deu. 30:19, 20.

 ¹⁰ Oniay inkanta nen Arin David ed si Jehova: ‘Saray totoom iyapay da so inkasikara a mabulbulos dia ed agew na pakayarim.’ (Sal. 110:3) Say iyuuna na dakel a totoo natan et say panliliket tan pakawalaan na mainawan bilay. Balet, say iyuuna na saray mangaaro’d si Jehova et say sagradon panaglingkor. Say maseseg a panagpulong day maong a balita et mamapaneknek no antoy prayuridad da’d bilay. Baleg so talek dan sarag ya iter nen Jehova so inagew-agew a nakaukolan da.​—Mat. 6:33, 34.

Saray Bagat ya Aabobonan na Dios

11. Antoy iilaloan na saray Israelita ya nagamoran da diad pangiyaapay day bagat ed si Jehova?

¹¹ Diad Ganggan a sipanan, angiyapay iray totoo na Dios na maong iran klase na bagat pian nagamoran day panangabobon to. “No mangiyapay kayo na bagat ya iyaapay ed pipulangan ed kinen Jehova,” so kuan na Levitico 19:5, “idakmomo yo naani pian naako [odino, naabobonan] kayo.” Diad satan met lanlamang ya libroy Biblia et nabasa tayo: “Bangno mangibagat kayo na sakey a bagat na pisasalamat ed kinen Jehova, sikato so nepeg yo ya ibagat pian [naabobonan] kayo.” (Lev. 22:29) Sano mangiyapay iray Israelita na maong iran klase na bagat diad altar nen Jehova, say asewek na satan et aliling toy “ambalingit a samyong” ed tuan Dios. (Lev. 1:9, 13) ‘Naliliketan’ si Jehova ed saratan ya balikas na panangaro na saray totoo to. (Gen. 8:21, Maung a Balita) Diad satan ya kabiangan na Ganggan nensaman et walay naaralan tayon prinsipyo ya onaplika’d sikatayo natan. Saramay mangiyaapay na maong a klase na bagat so makagamor na panangabobon nen Jehova. Antoran “bagat” so aawaten to natan? Konsideraen tayo so duaran aspekto na bilay tayo: say kagagawa tan say panagsalita tayo.

12. Antoran kagagawa so sengegan ya ag-awaten nen Jehova so ‘pangiyapay tayoy laman tayo bilang bagat’?

¹² Oniay insulat nen apostol Pablo ed saray taga Roma: “Iyapay yo iray laman yo bilang sakey a bagat a mabilay, masanto, makapaliket ed Dios, a sakey a sagradon panaglingkor tekep na pakayari yon mankatunongan.” (Roma 12:1) Pian nagamoran na sakey so panangabobon na Dios, kaukolan ton pansiansiaen a masanto so laman to. No dutakan toy laman to diad pansigarilyo, pan-gagal, pandroga, odino alabas a panag-inum na alak, anggapoy kana met lanlamang na bagat to. (2 Cor. 7:1) Ontan met, say “manggagawa na pilalawanan et mankakasalanan ed laman ton dili.” No say sakey sirin et imoral so kagagawa to, ag-awaten nen Jehova so bagat to. (1 Cor. 6:18) Pian napaliket so Dios, kaukolan tayoy ‘magmaliw a masanto diad amin a kagagawa tayo.’​—1 Ped. 1:14-16.

13. Akin et manepeg so pangirayew ed si Jehova panamegley na panagsalita tayo?

¹³ Naliliketan met si Jehova ed sananey nin bagat​—say panagsalita tayo. Saray mangaaro’d si Jehova et mangirarayew ed sikato diad amin a panaon, diad pitotongtong da’d arum a too  tan diad kapamilyaan da. (Basaen so Salmo 34:1-3.) Pibasa yo pay Salmos 148-150, tan imano yo no kaunongan kabetbet ya ipapaseseg na sarayan salmo so pangirayew ed si Jehova. On, ‘saray maptek et manepeg a mangirayew.’ (Sal. 33:1) Indanet na Ehemplo tayon si Jesu-Kristo so kaimportantian na pangirayew ed Dios panamegley na pangipulong ed maong a balita.​—Luc. 4:18, 43, 44.

14, 15. Anton klase na bagat so impaseseg nen Oseas ya iyapay na saray Israelita, tan antoy reaksion nen Jehova?

¹⁴ Say maseseg a panagpulong et ebidensya ya inaro tayoy Jehova tan labay tayon nagamoray panangabobon to. Bilang alimbawa, imanoen no panon a sinimbawa nen propetan Oseas iray Israelita ya lapud impandayew da’d palson dirios et naandi’d sikaray panangabobon na Dios. (Os. 13:1-3) Imbaga nen Oseas ya oniay ipikasi ra: “Ekalen mo [Jehova] ya amin so inkauges [odino kasalanan], tan awaten mo so maong; dia ed ontan iyapay mi naani a singa saray baka a kalakian so bagat na saray bibil mi.”​—Os. 14:1, 2.

¹⁵ Nensaman, say baka so sankablian ya ayep a niyapay na sakey ya Israelita ed si Jehova. Say tutukoyen sirin na ‘saray baka a kalakian a bagat na bibil’ et say sankaabigan tan impapuson panangibalikas na panangirayew ed tuan Dios. Antoy reaksion nen Jehova ed saramay angiyapay na ontan iran bagat? Imbaga ton: “Aroen ko ra . . . a mabulbulos.” (Os. 14:4) Saramay mangiyaapay na ontan iran bagat na panangirayew et papagamoran nen Jehova na panamerdona, panangabobon, tan pikakaaro to.

16, 17. Antoy reaksion nen Jehova sano say sakey a too et ipulong toy maong a balita lapud pananisia to’d Dios?

¹⁶ Say pangirayew ed si Jehova panamegley na bibil et importantin kabiangan na tuan panagdayew anggan nensaman ni. Ontan la kaimportante ed sakey a salmista so pangigloria ed tuan Dios kanian oniay impikasi to: “Kerewen ko ed sika, ya akoen mo so mabulbulos ed linawak ya iyapay na sangik, O Jehova.” (Sal. 119:108) Natan balet ey? Oniay impropesiya nen Isaias nipaakar ed no antoy gawaen na dakel a totoo diad panaon tayo: ‘Iyabawag da naani so saray kagalangan nen Jehova. Ontatdang iray apay da diad altar na Dios ko.’ (Isa. 60:6, 7) Nagagawa la itan natan ta minilyon so mangiyaapay ed Dios na “bagat a panangidayew, salanti, say bunga na saray bibil . . . a mangipapakabat ed ngaran to.”​—Heb. 13:15.

¹⁷ Sika ey? Kasin mangiyaapay ka met na saray bagat a makapaliket ed Dios? No andi ni, mabulos ka kasin manggawa na saray pananguman pian nirayew moy Jehova panamegley na bibil mo? Sano pakiwasen kay pananisiam ed Dios ya ipulong so maong a balita, say bagat mo et ‘mas makapaliket ed si Jehova nen say sakey a baka.’ (Basaen so Salmo 69:30, 31.) Seguradon say “ambalingit a samyong” na “bagat a panangidayew” mo et makasabi’d si Jehova tan ipagamor to’d sikay panangabobon to. (Eze. 20:41) Diad satan mo nalikna so agnaparaan a liket.

‘Bendisyonan nen Jehova so Amin a Matunong’

18, 19. (a) Antoy iisipen na dakel a totoo natan nipaakar ed panaglingkor ed Dios? (b) Antoy resulta no anggapo lay panangabobon na Dios ed sikatayo?

¹⁸ Singa ed panaon nen Malaquias, onia met so iisipen na dakel a totoo natan: “Andi-kakanaan so manlingkor ed Dios. Antoy kana na panumpal [ed] saray salita to?” (Mal. 3:14, MB) Lapud pampipilalek da’d materyal iran bengatla, isipen dan agda met lanlamang nagawaan  so linawa na Dios tan aliwa lan praktikal iray ganggan to. Parad sikara, say panagpulong na maong a balita et panagdarak labat na panaon tan makapairita ni ingen.

¹⁹ Say ontan iran panagnonot et ginmapo diad hardin na Eden. Sinagyat nen Satanas si Eva ya agpablien so panangabobon nen Jehova tan say bilay ya inter To’d sikato. Natan met et gagawaen nen Satanas so amin a paraan pian panisiaen iray totoo ya anggapoy kana na panggaway linawa na Dios. Balet, diad samay agawa’d si Eva tan ed asawa to, amoria da ya nen anggapo la’d sikara so panangabobon na Dios et anggapo met lay ilalo ran manbilay. Asingger met lan ontan so namoria na saramay mangaalig ed mauges ya alimbawa ra.​—Gen. 3:1-7, 17-19.

20, 21. (a) Antoy ginawa na samay balo a taga Zarepta, tan antoy resulta? (b) Panon tan akin a nepeg tayon aligen imay balo a taga Zarepta?

²⁰ Say maermen a nansumpalan di Adan tan Eva et midumaan ed agawa’d samay balo a taga Zarepta ya abitla diad gapo na sayan artikulo. Nen arengel toy panamaseguro nen Elias, nanluto tan pinarungoan to nin unona so propeta anggano dagdaiset kalamor so naakan da. Tinoor nen Jehova so insipan to. Oniay ibabaga na salaysay: ‘Samay bii, si Elias, tan say sankaabungan na bii et angan ed dakerakel ya agew. Say kamaw na tapong ag-abawasan, anggan say salongkit na larak agkinmulang, unong ed salita nen Jehova, ya imbaga to panamegley nen Elias.’​—1 Ara. 17:15, 16.

²¹ Diad binilyon a totoo natan, daiset labat so mabulos a manggawa ed sayan ginawa na balo a taga Zarepta. Sikatoy sigpot a nanmatalek ed tulong na Dios, tan lapud satan et agpinaulyan na Dios. Papaneknekan na sayan agawa tan arum nin salaysay ed Biblia a talagan napanmatalekan si Jehova. (Basaen so Josue 21:43-45; 23:14.) Say bilay na saray Tasi nen Jehova natan et kaaruman nin paneknek ya agbalot paulyan nen Jehova iramay aabobonan to.​—Sal. 34:6, 7, 17-19. *

22. Akin et nepeg a panggunaetan tayo la natan a gamoran so panangabobon na Dios?

²² Manasingger la so agew na panangukom na Dios “ed amin a manaayam diad tapew na dalin.” (Luc. 21:34, 35) Ag-itan napaliisan. Anggapoy kana na antokaman a kayamanan o materyal a bengatla no ikompara’d panamaseguro na tinuro na Dios ya Ukom: “Gali dia, sikayoran benendisyonan nen Amak, tawir yoy panarian ya imparaan ed sikayo.” (Mat. 25:34) On, ‘bendisyonan nen Jehova so amin a matunong; say panangabobon to et manalimbeng ed sikara a singa baleg a samper.’ (Sal. 5:12, NW) Agta nepeg sirin a panggunaetan tayon gamoray panangabobon na Dios?

[Paimano ed leksab]

Nanonotan Mo Ni?

• Akin a makanepegan si Jehova a mangawat na interon kamarerwan panagdayew tayo?

• Antoran bagat so aawaten nen Jehova natan?

• Antoy tutukoyen na balikas ya ‘saray baka a kalakian a bagat na bibil,’ tan akin a nepeg tayon iyapay itan ed si Jehova?

• Akin et nepeg tayon panggunaetan a gamoran so panangabobon na Dios?

[Tepetepet Parad Panagaral]

[Litrato ed pahina 13]

Anton importantin desisyon so nepeg a gawaen na sayan mairap a balo?

[Litrato ed pahina 15]

Antoy nagamoran tayo diad pangiyapay tayoy bagat na panangirayew ed si Jehova?

[Litrato ed pahina 17]

Agkan balot nadismaya no sigpot kan manmatalek ed si Jehova