Bubusolen Mo Kasi Kaugsan?

“Binusol mo [Jesus] so kaugsan.”​—HEB. 1:9.

1. Antoy imbangat nen Jesus nipaakar ed aro?

PIAN nidanet so kaimportantian na panangaro, inkuan nen Jesus ed saray disipulo to: “Iter ko ed sikayo so sakey a balon ganggan, a manaaroan kayo; no panon so impangarok ed sikayo, ontan met so panaaroan yo. Diad saya et naamtaan na amin a sikayo iray disipulok, no manaaroan kayo.” (Juan 13:34, 35) Ingganggan nen Jesus iray papatumbok to a mangipanengneng na masakripisyon aro ed balang sakey. Satan ya aro so pakabidbiran da. Sinimbawa to met ira: “Itultuloy yon aroen iray kabusol yo tan ipikasi iramay mamapasegsegang ed sikayo.”​—Mat. 5:44.

2. Anto so nepeg a bayuboan a busolen na saray papatumbok nen Kristo?

² Balet, nilikud ni’d impangibangat nen Jesus ed saray disipulo to a mangaro, imbangat to met ira a mamusol. Oniay nikuan nipaakar ed si Jesus: “Inarom so inkatunong, tan binusol mo so kaugsan [kabaglan].” (Heb. 1:9; Sal. 45:7) Ipapanengneng na saya ya agti’ labat nepeg a bayuboan so panangaro ed inkatunong noagta kaukolan ti’ met a busolen so kasalanan odino kaugsan. Mabitabitar so inkuan nen apostol Juan: “Amin a manggagaway kasalanan et manggagawa met na kaugsan, kanian say kasalanan et kaugsan.”​—1 Juan 3:4.

3. No nipaakar ed panamusol ed kaugsan, antoran aspekto na bilay so pantongtongan tayo?

 ³ Kanian bilang Kristiano, nepeg tayon tepetay sarili tayo, ‘Bubusolen ko kasi kaugsan?’ Aralen tayo no panon a nipanengneng so panamusol ed mauges diad apatiran aspekto na bilay: (1) say panmoria tayo ed alablabas a kakainum, (2) panmoria tayo ed mahiko, (3) reaksion tayo ed imoralidad, tan (4) panmoria tayo ed saray mangaaro ed kaugsan.

Kontroley Kakainum

4. Akin et makpel si Jesus ya animbawa nipaakar ed alabas a kakainum?

⁴ Si Jesus et tunggal paminsan ya inminum na alak. Minoria ton regalo itan na Dios. (Sal. 104:14, 15) Balet, agton balot inminum na alablabas. (Uli. 23:29-33) Kanian maksil so linawa ton manimbawa nipaakar ed sayan kagagawa. (Basaen so Lucas 21:34.) Say alabas a kakainum et manresulta ed arum niran seryoson kasalanan. Kanian, insulat nen apostol Pablo: “Agkayo manbuabuanges, ta mansumpal itan ed inkaalablabas, noagta napano kayo komon a naynay na masanton espiritu.” (Efe. 5:18) Binilin to met iray akukulaw ed kongregasyon ya ag-ira komon “mainum na alak.”​—Tito 2:3.

5. Antoy nayarin itepet na saray malabay ya oninum na de-alkohol ya iinumen?

⁵ No oninum ka na de-alkohol iran iinumen, maabig no tepetan moy sarilim: ‘Mipara kasi ed si Jesus so panmoriak nipaakar ed alablabas a kakainum? No kaukolan kon simbawaen so arum nipaakar ed saya, anggapo kasi nituklaw da’d siak? Oniinum ak kasi pian ibalang so pakakaaburidoan ko odino pian narelaks? Kaunongay naiinum ko kada simba? Antoy reaksion ko no walay mangipaimano ya dakel lay nainum ko? Manrason ak kasi odino mansinti ak ni ingen?’ No mainum itayo na alak, naapektoay panagkatunongan tayo tan say abilidad tayon manggaway duga iran desisyon. Saray papatumbok nen Kristo et panggugunaetan dan salimbengay panagnonot da.​—Uli. 3:21, 22.

Paliisay Panagmahiko

6, 7. (a) Panon ya akidenengan nen Jesus si Satanas tan saray demonyo? (b) Akin et kasmak natan so panagmahiko?

⁶ Sanen wadiad dalin si Jesus, makpel ton sinumpa si Satanas tan saray demonyo. Impulisay toy direktan impangataki nen Satanas ed katooran to. (Luc. 4:1-13) Ontan met, atebek tan niresistian toy masilib a panangimpluensya’d kanonotan tan kakikiwas to. (Mat. 16:21-23) Tinulongan nen Jesus iray makanepegan ya makalukpos ed maruksan panamairap na saray demonyo.​—Mar. 5:2, 8, 12-15; 9:20, 25-27.

⁷ Sanen nagmaliw ya Ari si Jesus nen 1914, inekal to’d katawenan so marutak ya impluensya nen Satanas tan saray demonyo. Kanian natan et mas nagkalalon gagawaen nen Satanas so anggaay nayarian ton ‘mamalikdo ed interon mundo.’ (Apo. 12:9, 10) Agtayo la pankelawan sirin no akin a kasmak tan ondarakel so nasasagyat ed mahiko. Antoy gawaen tayo pian naprotektaan?

8. No nipaakar ed pampili na panagligliwaan, panon tayon usisaey inkasikatayo?

⁸ Malinlinew ya impasakbay na Biblia so  kapeligroan na espiritismo. (Basaen so Deuteronomio 18:10-12.) Natan, iimpluensyaan nen Satanas tan saray demonyo so kanonotan na totoo panamegley na saray pelikula, libro, tan electronic games a mangipapaseseg na panagmahiko. Kanian sano mamipili na panagligliwaan, nepeg tayon tepetay sarili tayo: ‘Diad apalabas iran bulan, alagyat ak kasin pilien iray pelikula, programa’d TV, electronic games, libro, odino komiks ya alaokan na espiritismo? Natatalosan ko kasi kaimportantian na pangipulisay ed impluensya na mahiko, odino ibabaliwalak iray kapeligroan na satan? Asalik la kasin inkonsideray nalilikna nen Jehova ed pipilien kon panagligliwaan? No naimpluensyaan ak nen Satanas ed saraya, pakiwasen ak kasi na panangarok ed si Jehova tan ed maptek iran prinsipyo to pian tampol a gawaey duga tan ipulisay iratan?’​—Gawa 19:19, 20.

Talinengey Pasakbay nen Jesus Nipaakar ed Moralidad

9. Panon ya naaaro na sakey a too so kaugsan?

⁹ Tinumbok nen Jesus so estandarte nen Jehova nipaakar ed moralidad. Inkuanto: “Agyo ta abasa a samay amalsa ed sikara diad gapo et ginawa to ran laki tan bii tan inkuan to, ‘Nisengeg ed saya et taynan na laki so ama tan ina to tan iyamong toy asawa to, tan sikaran dua et magmaliw a sakey a laman’? Kanian aliwa la ran duara, noagta sakey a laman. Sirin, say impankasakey na Dios, agnepeg a pansianen na too.” (Mat. 19:4-6) Amta nen Jesus a say nenengnengen tayo et mangapekta’d puso tayo. Diad samay Sermon to ed Palandey, oniay imbaga to: “Nadngelan yo a nikuan, ‘Agka mikakalugoran.’ Balet ibagak ed sikayo a siopaman a naynay ya onlilinggis ed sakey a bii tekep na pampilpilalek ed sikato et akikalugoran la ed sikato dia ed puso to.” (Mat. 5:27, 28) Diad tua, saramay mangibabaliwala ed pasakbay nen Jesus et mangaaro’d kaugsan.

10. Mangisalaysay na eksperiensya a mangipapanengneng ya sarag na sakey a tundaay pornograpiya.

¹⁰ Iyiingganyo nen Satanas so seksual ya imoralidad panamegley na pornograpiya. Kasmak itan ed sayan sistema na bengabengatla. Saramay manbabantay na pornograpiya et mairap dan ekalan ed isip da so imoral ya eksena. Ompan naadik nira ingen ed satan. Imanoen pay agawa ed sakey ya Kristiano. Inkuan to: “Maamot kon binantayay pornograpiya. Inimadyin kon walay sarilik a mundon arawi ed si Jehova. Amtak ya aliway gagawaen ko, balet inisip ko ya aawaten nin siansia na Dios so panlilingkor ko.” Antoy akapanguman ed panmoria na sayan agi? Inkuan to: “Nandesisyon ak ya ibaga’d saray elder so problemak, anggano agaylay irap a gawaen.” Ag-abayag et tinundaan na sayan agi so mabanday ya kagagawa. Inamin to: “Sanen alinisan ak ed sayan kasalanan, aliknak ya talagan malinis lay konsiensiak.” On, saramay mamubusol ed kaugsan et nepeg dan aralen a busolen so pornograpiya.

11, 12. Panon tayon nipanengneng a bubusolen tayo so kaugsan sano mamipili na musika?

¹¹ Say musika tan liriko et mabiskeg a mangimpluensya ed emosyon odino puso tayo. Say musikan mismo et regalo na Dios tan abayag lan kabiangan na dugan panagdayew. (Exo. 15:20, 21; Efe. 5:19) Balet ipapaseseg na marelmeng a mundo nen Satanas so musikan mangirarayew ed imoralidad. (1 Juan 5:19)  Panon mon amta no say musikan dedengelen mo et marutak odino andi?

¹² Tepetan mo nin unonay sarilim: ‘Kasin saray kansion a dedengelen ko et mangilalagyat na panagpatey, pikakalugoran, pilalawanan, tan panag-ayew? No ibasak ed arum so liriko na pigara ed saray kansion, kasin nalikna ran bubusolen koy kaugsan, odino nanengneng ed liriko ya arutakan lay pusok?’ Agtayo nibagan bubusolen tayoy kaugsan no labalabay tayon kansionen itan. Inkuan nen Jesus: “Amin a bengatlan ompapaway ed sangi et manlalapud puso, tan saratan so manudutak ed sakey a too. Alimbawa, say puso so panlalapuan na saray mauges a panagkatunongan, panagpatey, pikakalugoran, pilalawanan, panagtakew, palson panagtasi, panag-ayew.”​—Mat. 15:18, 19; Ikompara so Santiago 3:10, 11.

Aligey Panmoria nen Jesus ed Saray Mangaaro’d Kaugsan

13. Antoy panmoria nen Jesus ed saramay nampaawet la’d kasalanan da?

¹³ Imbaga nen Jesus a sikatoy linma dia pian pagbabawien iray makasalanan odino mauges. (Luc. 5:30-32) Balet, antoy panmoria to ed saramay nampaawet la’d kasalanan da? Sikatoy mapuersan amasakbay ed mauges ya impluensya na saratan. (Mat. 23:15, 23-26) Malinew to met ya inkuan: “Aliwan balang sakey a mangibabaga ed siak na, ‘Katawan, Katawan,’ et makaloob ed panarian na tawen, noagta samay manggagawa ed linawa nen Amak a walad tawen. Diad satan ya agew [sano ipaakseb la na Dios so panangukom to] et dakel so mangikuan ed siak na, ‘Katawan, Katawan, agta nampropesiya kami diad ngaran mo, tan amapaway kami na saray demonyo diad ngaran mo, tan nanggawa kami na dakel a makapanyari iran gawa diad ngaran mo?’” Balet, ipulisay to iramay agmagbabawin manggagaway kaugsan, ya ikuan to: “Arawi kayo ed siak.” (Mat. 7:21-23) Akin et ontan so pangukom to ed sikara? Lapud ag-igagalang na saratan a totoo so Dios tan ipepeligro ray arum lapud kaugsan da.

14. Akin et eekalen ed kongregasyon iray agmagbabawin managkasalanan?

¹⁴ Ingganggan na Salitay Dios a nepeg ya ekalen ed kongregasyon iray agmagbabawin managkasalanan. (Basaen so 1 Corinto 5:9-13.) Kaukolan iya lapud taloran rason: (1) pian agnabalaw so ngaran nen Jehova, (2) pian nasalimbengan so kongregasyon ed karutakan, tan (3) pian anggad posible et natulongan iray nankasalanan a magbabawi.

15. No labay tayoy mansiansian matoor ed si Jehova, antoran seryoson tepet so dalepdepen tayo?

¹⁵ Kasin mipara’d si Jesus so panmoria tayo ed saramay nigalet la’d kaugsan? Kaukolan tayon dalepdepen irayan tepet: ‘Kasin miuulop ak ed sakey ya adispelosip odino sinmian ed kongregasyon? Panon to no kapamilyak itan balet ta agko kaamong?’ Talagan nasubok ed saya so panangaro tayo ed inkatunong tan katooran tayo ed Dios. *

16, 17. Anton mairap a situasyon so adalan na sakey a Kristianon ina, tan antoy akatulong ed sikato pian natumbok toy uksoyan a panagdispelosip ed saray agmagbabawin managkasalanan?

¹⁶ Imanoen pay eksperiensya na sakey ya  sister a say anak ton balolaki et datin nanlingkor ed si Jehova. Balet sinmabi panaon ya pinili na anak to so manggaway mauges tan agnagbabawi. Kanian, sikatoy adispelosip ed kongregasyon. Inaro na sister tayo si Jehova, balet inaro to met so anak to tan naiirapan a maong ya mangiyaplika ed ganggan na Kasulatan a paliisan so pilimog ed anak to.

¹⁷ Antoy nisimbawam ed sayan sister? Impamoria ed sikato na sakey ya elder a natatalosan nen Jehova so sakit a nalilikna to. Impaimano na elder so sakit ya alikna nen Jehova sanen nanrebelde iray ananak ton anghel. Tan impaliwawa na elder ya anggano amta nen Jehova ya ansakisakit itan ya agawa, kakaukolanen to a dispelosipen iray agmagbabawin managkasalanan. Dinengel na sister so simbawa tan matoor ton sinuportaan so uksoyan a panagdispelosip. * Satan a katooran et mamaliket ed puso nen Jehova.​—Uli. 27:11.

18, 19. (a) Say agpilimog ed managgaway kaugsan so mamaneknek a bubusolen tayo so anto? (b) Antoy nayarin resulta no matoor tayo’d Dios tan ed uksoyan to?

¹⁸ No ontan so situasyon mo, ipangasin agmo lilingwanan a mililikna’d sika si Jehova. No pultoten moy pililimog mo’d sakey ya adispelosip odino sinmian, papaneknekan mon kabusol moy ugali tan ginawa to. Balet, ipapanengneng mo met ya inarom imay nankasalanan kanian gagawaen moy parad pankaabigan to. Lapud katooran mo’d si Jehova, mas baleg so posibilidad a say adispelosip et magbabawi tan ompawil ed sikato.

¹⁹ Oniay insulat na sakey ya adispelosip tan akapawil la ed saginonor: “Maliket ak ta lapud panangaro nen Jehova ed totoo to, seseguroen ton mansiansia a malinis so organisasyon to. Say ipapasen ya agmakatunongan na saray taga paway so diad tua et nakaukolan tan maaron uksoyan.” Diad padesir mo, nibaga kasi iya na agi no saray kakongregasyon to, pati say pamilya to, et siansia nin akilimog ed sikato anggan sanen adispelosip? No susuportaan tayo so Makasulatan ya uksoyan ed panagdispelosip, papaneknekan tayon inaro tayo so inkatunong tan bibidbiren tayo so kanepegan nen Jehova a mangiletneg na estandarte ed no antoy duga.

“Gula Yo so Mauges”

20, 21. Akin et importantin aralen a busolen so kaugsan?

²⁰ “Mantultuloy kayon manlikas tan manbantay,” so impasakbay nen apostol Pedro. Akin? Lapud “say Diablo a kabusol yo et siber-siber a singa managlem a leon, a manaanap na buagen to.” (1 Ped. 5:8) Kasin sika imay buagen to? Mandepende itan a maong ed no panon mon aaralen a busolen so kaugsan.

²¹ Aliwan mainomay so pamusol ed kaugsan. Nianak tayon makasalanan, tan manbibilay tayo ed mundon mangipapaseseg ed pilpilalek na laman. (1 Juan 2:15-17) Anggaman ontan, nasarag tayon busoley kaugsan diad pangalig ed si Jesu-Kristo tan pamayubo’d aralem a panangaro ed si Jehova a Dios. Komon ta determinado itayo a ‘gulaey mauges,’ tan sigpot a manmatalek ya ‘iyapiger nen Jehova iray sasantos to; iliktar to ra ed lima na bagel.’​—Sal. 97:10.

[Saray paimano ed leksab]

Antoy Ebat Mo?

• Antoy makatulong ed sikatayo pian nausisay panmoria tayo’d de-alkohol iran iinumen?

• Antoy gawaen tayo pian naprotektaan sumpad panagmahiko?

• Akin et mapeligro so pornograpiya?

• Panon tayon nipanengneng a bubusolen tayoy kaugsan sano walay inadaro tayon adispelosip?

[Tepetepet Parad Panagaral]

[Litrato ed pahina 29]

No oninum ka na de-alkohol iran iinumen, antoy nepeg mon ikonsidera?

[Litrato ed pahina 30]

Paliisay panagligliwaan ya iimpluensyaan nen Satanas

[Litrato ed pahina 31]

Antoy naaaro na manbabantay na pornograpiya?