Magmaliw a Maseseg Parad Dugan Panagdayew

“Dakel so aanien, balet daiset so mankikimey.”​—MAT. 9:37.

1. Panon mon ideskribe so situasyon ya apuraan?

WALAY dokumentom a kapilitan lan ilakad ed sayan agew. Antoy gawaen mo? Markaan mo itan na “URGENT!” Walay laen mon importante, balet atrasado ka la. Antoy gawaen mo? Ibagam ed drayber ya, “Sarag yon pelesan mama ta MANGGAGANAT ak!” On, no walay isasambot mo tan kulang lay panaon, tensyonado ka la. Ompeles so parok na pusom tan mangganat ka la. Ontan so naliknam no walay apuraan a gawaen.

2. Diad amin a kimey na saray Kristiano natan, anto so apuradon maong?

² Parad saray tuan Kristiano natan, anggapo lay mas apuraan a kimey nen say pangipulong ed maong a balita na Panarian tan panggaway babangatan ed amin a nasyones. (Mat. 24:14; 28:19, 20) Imbaga nen Jesus a sayan kimey et kaukolan a gawaen nin “unona” antis ya onsabi anggaan. (Mar. 13:10) Tan manepeg labat ya iyuna itan. Inkuan nen Jesus: “Dakel so aanien, balet daiset so mankikimey.” Kaukolan ya natipon so aanien antis ya nasumpal so panaon na panag-ani. Agnayarin ipaleen itan.​—Mat. 9:37.

3. Lapud apuraan so panagpulong, antoy ginawa na dakel?

³ Lapud importantin tuloy ed sikatayo so panagpulong, nepeg labat ya iter tayoy panaon, biskeg, tan atension tayo anggad posible. Nakomendaan iray dakel ya agagi ta ontan so gagawaen da. Pinasimpli na arum so kabibilay da pian makapanpayunir, manmisionero, odino manlingkor ed Bethel. Okupado iran maong. Nayarin dakel so insakripisyo tan nanaabet dan subok. Balet, talagan bebendisyonan ira nen Jehova tan mililiket tayo’d sikara. (Basaen so Lucas 18:28-30.) Anggaman agsarag na arum so manpayunir, gagawaen day anggaay nayarian dan mibiang ed manangisalbay bilay a kimey, ya kaiba’d satan so panutulong da’d ananak da pian niliktar.​—Deu. 6:6, 7.

4. Akin et nayarin nakesawan la ray arum?

⁴ Kanian no imbagan apuraan, wala siri’ deadline odino panganggaan. Manbibilay tayo la ed panaon na anggaan, tan dakel so ebidensya ed Biblia tan ed awaran a mamaneknek ed satan. (Mat. 24:3, 33; 2 Tim. 3:1-5) Anggaman ontan, siansia nin anggapoy makaamta ed eksakton panaon no kapigan onsabi so anggaan. Sanen indetalye nen Jesus so “tanda” a pakapatnagay “kasampotan na sistema na mundo,” oniay espisipikon imbaga to: “Nipaakar ed satan ya agew tan oras et anggapoy siopaman a makaamta, anggan saray anghel ed tawen nisay Anak, noag say Ama lambengat.” (Mat. 24:36) Kanian, ompan diad ilabas na taotaon et nakesawan la ray arum tan agla ra manapura, lalo la no abayag la ran manlilingkor. (Uli. 13:12) Ontan met kasi naliliknam no maminsan? Panon tayon napaaligwas odino napansiansia so inkaganatan ed kimey a pagagawa ed sikatayo natan nen Jehova a Dios tan nen Jesu-Kristo?

Imanoen so Ehemplo Tayo, si Jesus

5. Panon a napatnagan ya ag-impalpaleen nen Jesus so ministeryo?

⁵ Diad amin na saray lingkor na Dios ya angipanengneng na inkaganatan, seguradon si Jesu-Kristo so manunan ehemplo. Say sakey  a rason et dakel so kaukolan ton gawaen diad loob labat na talora tan kapalduan taon. No nipaakar ed dugan panagdayew, mas dakel so agawaan nen Jesus nen say anggan siopan too. Impaamta toy ngaran tan gagala na Ama to, impulong toy maong a balita na Panarian, inwalwal toy pansimpisimpitan tan palson bangabangat na saray lider na relihyon, tan inyalangon toy soberanya nen Jehova anggad patey. Iner man so nila to, ginawa toy amin a nayarian to a manbangat, ontulong, tan manpaabig. (Mat. 9:35) Anggapo ni akagaway ontan karakel diad antikey labat a panaon. On, pinasyay impansagpot nen Jesus.​—Juan 18:37.

6. Antoy akasentroan na imano nen Jesus?

⁶ Akin et pinasyan nankimey si Jesus legan na ministeryo to? Diad propesiya nen Daniel, naamtaan nen Jesus no kaunongan karukey so panaon ya inggeter nen Jehova pian nasumpal so kimey to. (Dan. 9:27, NW) Naimano ditan ya say ministeryo to diad dalin et mangangga kayari “kapaldua na sakey simba,” odino talora tan kapaldua a taon. Ag-abayag kayari na matalonan inloob to diad Jerusalem nen primabera na 33 C.E., inkuanto: “Sinmabi lay oras pian nigloria so Anak na too.” (Juan 12:23) Anggaman amta nen Jesus a manasingger lay ipatey to, aliwan satan so akasentroay imano to tan aliwa met a satan so manunan rason na pansasagpot to. Imbes, inanamot toy kada pankanawnawan gawaey linawa na Ama to tan ipanengneng so panangaro ed saray totoo. Satan a panangaro so amakiwas ed sikaton mananap tan mangipasal ed saray disipulo, insan to ra imbakin manpulong. Diad ontan et nituloy day kimey ya inggapo to tan nasumpal day mas babaleg iran kimey nen say agawaan to.​—Basaen so Juan 14:12.

7, 8. Sanen nilinisan nen Jesus so templo, antoy anonotan na saray disipulo, tan akin et ontan so ginawa nen Jesus?

⁷ Say sakey ya inkagawa a mapatpatnag so ontanlan inkaseseg nen Jesus et diad gapo na ministeryo to, nen Paskua na 30 C.E. Sikatoy linma’d Jerusalem kaiba iray disipulo to tan asabian da’d templo “iramay manlalako na saray baka tan saray karnero tan saray malapati tan saramay managsalat na kuarta ya akayurong.” Antoy reaksion nen Jesus, tan antoy epekto na satan ed saray disipulo to?​—Basaen so Juan 2:13-17.

⁸ Diad samay ginawa tan imbaga nen Jesus et anonotan na saray disipulo so propesiyan walad salmo nen David: “Say panagtalima [odino inkaseseg parad] abung mo kinan to ak.” (Sal. 69:9) Akin? Lapud si Jesus labat so makmakpel ya akagawa na ontan. Say akankayarian ed mabanbanday tan maagum iran negosyo et saray walaan na autoridad ed templo, salanti saray saserdote, eskriba, tan arum ni. No iwalwal tan patundaen toy mauges a gagawaen da, nakalaban to ra. Duga sirin may ninonot na saray disipulo, ‘say panagtalima  ed abung na Dios’ odino inkaseseg parad dugan panagdayew et sankapatnagan ed sikato. Balet, anto so inkaseseg? Duma kasi itan ed inkaganatan?

Inkaganatan tan Inkaseseg

9. Panon mon ideskribe so inkaseseg?

⁹ Impatalos na sakey a diksionaryo so inkaseseg ya “inkamagunaet tan pampilpilalek a sumpaley sakey a bengatla,” tan kaulibay na saya iray salitan pankaliktan, debosyon, inkasimoon, tan inkaligsa. Say ministeryo nen Jesus et nayarin ideskribe ed sarayan amin a salita. Onia so impangibaga na Maung a Balita: “Say panangarok ed Templom et singa apoy a mamopool ed siak.” Diad arum a lenguahe, say salitan “inkaseseg” et literal a mankabaliksay “ampetang ya puso” a singano mandarlang so puso. Kampegan anonotan na saray disipulo so salmo nen David sanen anengneng day ginawa nen Jesus diad templo. Anto balet so “amarlang” ed puso nen Jesus, tan amakiwas ed sikaton gawaen so ontan?

10. Diad Biblia, antoy kabaliksan na “inkaseseg”?

¹⁰ Diad salmo nen David, say salitan “inkaseseg” et inala ed Hebreon salita a kaslakan lan ipapatalos ya “maimon” odino “imon” ed arum a parte na Biblia. Ipapatalos iya no maminsan na New World Translation bilang “mankakaukolan na sigpot a debosyon.” (Exo. 20:5; 34:14; Jos. 24:19) Oniay inkuan na sakey a diksionaryo na Biblia nipaakar ed sayan termino: “Kaslakan lan nauusar iya ed relasyon na sanasawa . . . Singa say pangimon na asawan laki o bii lapud ilalaban day kanepegan da, ontan met ed Dios ya ilalaban toy kanepegan To ed saramay kayarian To.” Kanian diad Biblia, say inkaseseg et mas ni nen say pampilpilalek tan inkaligsa na totoo, a naiimatonan tayo ed saray manbabantay na paboriton isport. Say inkaseseg nen David et positibon imon, agto inabuloyan so karibal odino panamalaw, tan ontan lay pampilalek ton salimbengan so maong a ngaran nen Jehova odino ipetek so lingo.

11. Antoy amakiwas ed si Jesus pian mansagpot ya maong?

¹¹ Ag-alingo iray disipulo sanen insiglaot da so imbaga nen David ed samay anengneng dan ginawa nen Jesus diad templo. Nansagpot ya maong si Jesus aliwan lapud kulang lay panaon to, noag lapud sikatoy maseseg, odino maimon, parad ngaran na Ama to tan parad dugan panagdayew. Sanen anengneng ton abalaw tan naayew so ngaran na Dios, makatunongan labat a sikatoy maseseg, odino maimon, tan kinmiwas pian ipetek so situasyon. Sanen anengneng nen Jesus iray mapaabeban totoo a nalalames tan naaanamot na saray lider na relihyon, say inkaseseg to so amakiwas ed sikaton tulongan so totoo tan makpel ton inwalwal so panaglames na saray lider na relihyon.​—Mat. 9:36; 23:2, 4, 27, 28, 33.

Magmaliw a Maseseg Parad Dugan Panagdayew

12, 13. Antoy ginawa na saray lider na relihyon na Kakristianoan natan ed (a) ngaran na Dios? (b) Panarian na Dios?

¹² Mipadpara’d panaon nen Jesus so gagawaen na saray lider na relihyon natan, ompan mas grabe ni ingen. Singa bilang, amta tayo ya imbangat nen Jesus iray papatumbok to ya unonan ipikasi so nipaakar ed ngaran na Dios: “Napasanto komon so ngaran mo.” (Mat. 6:9) Kasin saray lider na relihyon, lalo la ray klero na Kakristianoan, et ibabangat da iray totoo pian nakabat so ngaran na Dios, tan pian napasantos odino napagalangan itan a ngaran? Andi, noag ingen et pinauges day Dios lapud palson bangabangat da, a singa say Trinidad, ag-ompatey a kamarerwa, tan impierno. Sirin et pinagmaliw dan misteryoso so Dios, agnatalosan, maruksa, tan sadista ni ingen. Pinauges da met so Dios lapud mabanday a kagagawa tan pansimpisimpitan da. (Basaen so Roma 2:21-24.) Likud ed satan, ginawa day ami’ nayarian da pian iyamot so  ngaran na Dios, inekal da ni ingen itan ed saray patalos dan Biblia. Sirin et aamperen da ray totoo a makapikaaro tan onapit ed Dios.​—Sant. 4:7, 8.

¹³ Imbangat met nen Jesus iray papatumbok to ya ipikasi so Panarian na Dios: “Onsabi komon so panarian mo. Nagawa komon so linawam, a singa ed tawen, ontan met diad dalin.” (Mat. 6:10) Anggano uulit-uliten na saray lider na relihyon na Kakristianoan iyan pikakasi, papasesegen da balet iray totoo ya suportaan so politika tan arum ni ran organisasyon na too. Niarum ni, melmelagen da iramay manggugunaet a mangipulong tan mantasi ed sayan Panarian. Bilang resulta, dakel ed saray mankuan a Kristiano et agda anggan nasasalambit so Panarian na Dios, nisay panisiaan itan.

14. Panon ya nileglemew na saray klero na Kakristianoan so Salitay Dios?

¹⁴ Oniay malinew ya imbalikas nen Jesus diad pikakasi to ed Dios: “Say salitam et katuaan.” (Juan 17:17) Tan sanen wadia ni ed dalin si Jesus, imbaga ton sikatoy manuro na “matoor tan makabat ya aripen” pian mangitarya na espiritual a tagano parad totoo to. (Mat. 24:45) Anggano ibabaga na saray klero na Kakristianoan ya sikara so “aripen,” talaga kasin matoor dan susumpalen so kimey ya inmatalek na Katawan? Andi. Noag ingen et pinapaway da ya tongtong basilyo odino is-istorya labat so kargay Biblia. Imbes ya espiritual a tagano so ipakan da ed pulok da pian naligliwa tan onkabat ira, say ibabangat da et say pilosopiyan labalabay a narengel na totoo. Niarum ni, nileglemew day moral ya estandarte na Dios tan mas pinili ray tatawagen dan balon moralidad.​—2 Tim. 4:3, 4.

15. Antoy liknaan mo’d amin ya ginawa na saray klero ed ngaran na Dios?

¹⁵ Lapud sarayan amin ya ginawa ra, ya unong kuno ed ngaran na Dios a walad Biblia, dakel ya masimoon a totoo so adismaya odino talagan naandian lay pananisia ed Dios tan ed Biblia. Akalotan ira nen Satanas tan say mauges a sistema to. No lanang mon nanenengneng tan narerengel so ontan iran bengatla, antoy naliknam? Bilang lingkor nen Jehova, no naiimatonan mon nababalaw tan naaayew so ngaran na Dios, agmo kasi gawaen so nasarag mo pian ipetek itan? Sano naloloko tan naaanamot iray masimoon tan matuan impanpuson totoo, agmo kasi ligliwaen irayan nalalames? Sanen anengneng nen Jesus iray totoo ya “singa ra kinatatan tan pinaulyanan a karnero ya andian na managpastol,” agto ira labat inabagey. “Imbangat to ira na dakel a bengatla.” (Mat. 9:36; Mar. 6:34) Anggapo  siri’ rason pian agtayo magmaliw a maseseg parad dugan panagdayew, a singa si Jesus.

16, 17. (a) Akin et mamapasya tayo ed ministeryo? (b) Antoy pantongtongan tayo ed onsublay ya artikulo?

¹⁶ No maseseg tayo ed ministeryo, magmaliw ya makabkabaliksan iray salita nen apostol Pablo diad 1 Timoteo 2:3, 4. (Basaen.) Mansasagpot tayo ed ministeryo aliwa labat lan lapud amta tayon manbibilay tayo la ed kaunoran iran agew, noagta lapud amta ti’ met ya linawa na Dios itan. Labay ton nakabat na totoo so katuaan pian naaral da met so mandayew tan manlingkor ed sikato tan nabendisyonan. Mamapasya tayo ed ministeryo, aliwa labat lan lapud kulang lay panaon, noagta manuna ed amin et labay tayon pagalangan so ngaran na Dios tan tulongan iray totoon mangamta ed linawa to. On, maseseg tayo parad dugan panagdayew.​—1 Tim. 4:16.

¹⁷ Bilang totoo nen Jehova, abendisyonan tayo na pikakabat ed katuaan nipaakar ed gagala na Dios parad katooan tan diad dalin. Nayarian tayon tulongan so totoo pian magmaliw ya maliket tan nawalaay peteg ya ilalo ed arapen. Nipanengneng tayo’d sikara no panon iran nasalimbengan sano deralen lay sistema na mundo nen Satanas. (2 Tes. 1:7-9) Imbes a nadismaya lapud singano naaatrasadoy agew nen Jehova, nepeg a misalamat tayo ta wala ni panaon pian magmaliw a maseseg parad dugan panagdayew. (Miq. 7:7; Hab. 2:3) Panon tayon napaaligwas so inkaseseg tayo? Satan so pantongtongan tayo ed onsublay ya artikulo.

Kasin Nipaliwawam?

• Akin et pinasyan nankimey si Jesus legan na ministeryo to?

• Diad Biblia, antoy kabaliksan na “inkaseseg”?

• Antoy naiimatonan tayo natan a mamakiwas ed sikatayon magmaliw a maseseg parad dugan panagdayew?

[Tepetepet Parad Panagaral]

[Litrato ed pahina 8]

Akasentroy imano nen Jesus ed panggaway linawa na Ama to tan pangaro ed totoo

[Litrato ed pahina 10]

Anggapoy rason pian agtayo magmaliw a maseseg parad dugan panagdayew