Mansiasiansia Ak ya Okupado ed Organisasyon nen Jehova

Unong ed Salaysay nen Vernon Zubko

BINMALEG ak ed asingger ed Stenen, sakey a baryo ed probinsya na Saskatchewan, Canada. Nansagpot a maong so atateng ko a si Fred tan Adella, pian niiter so espiritual tan materyal a pankaukolan min sanaagi​—say panguloan mi a si Aurellia, siak, tan ontan met ed saray yugtan mi a si Alvin, Allegra, tan Daryl. Misalsalamat kami’d atateng mi ta imbangat da’d sikami so katuaan.

Say Amak, ya alanaan a Kristiano, et makpel a managpulong. Makulin mananap na pambilay, balet ta sineguro da met a lanang dan inanabang ed arum so katuaan. Kabkabat na amin a Tasi ra. Agko nalingwanan so seseg tan pakpel da. Mabetbet ya ibabaga ra’d siak a, “Napaliisan moy dakel a problema no mansiansia kan okupado ed organisasyon nen Jehova.”

Mabetbet kamin manpupulong ed karsada diad Stenen tan ed asingger iran baryo. Parad siak et aliwa itan a mainomay no maminsan. Walaray siga-siga diad kada baley, tan kakkantiawan da kami ran mas ugaw nen say sikara. Aminsan, sanen waloy taon ko ni labat, akaalagey ak ed karsada, a sankabembenan koy Watchtower tan Awake! Bangnen kien et pinaliberan ak na saray siga-sigan kalangweran. Bigla dan inekal so sombrerok insan da inyan ed poste ed abay ko. Maong labat ta walay agin mamabantay ed siak kanian anengneng toy nagagawa. Inmasingger tan intepet to, “Akin Vern, wala amoy problema?” Batik iramay siga. Tua, medyo makapasyodot iyan eksperiensya, balet ta naaralan ko’d saya a sano manpupulong ed karsada, agka labat basta akaalagey a singa poste, kaukolan et alis-alis ka met. Say onia ran panangipasal legay ibabaleg ko et angiter met ed siak na pakpel diad pankabkaabungan.

Abautismoan kami nen Alvin nen Mayo 1951, tan 13 años ko labat ed saman. Atantandaan ko imay imbaga nen Brother Jack Nathan diad paliwawa ed bautismo. Pinaseseg to kami ya agbalot papalabasen so sakey bulan ya agmakapampulong nipaakar ed si Jehova. * Parad pamilya mi, say panagpayunir so sankaabigan a karera. Kanian nen 1958, sanen asumpal ak lan naneskuela et linma ak ed Winnipeg, Manitoba, tan diman ak nampayunir. Anggaman labalabay met nen Amak a nakaiba ak ed negosyo na pamilya mi bilang managpinoy tabla, mas impaseseg da ed siak tan nen Inak so pampayunir tan sinuportaan day inyakar ko’d Winnipeg.

Balon Teritorya tan Balon Partner

Nen 1959, inimbitaan na sangan opisina so siopaman a makaonla’d Quebec, ta nakaukolan diman so dakel a managpulong. Kanian nampayunir ak ed syudad na Quebec a Montreal. Nikadkaduma iyan eksperiensya ta  kaukolan koy manaral na Pranses tan man-adjust ed sananey a kultura. Imbaga’d siak na manangasikasoy sirkito ya, “Agmon balot ibabagan, ‘Ta oniay gagawaen mi diman ed sikami.’” Apaneknekan kon duga iman a bilin to.​—1 Cor. 9:22, 23.

Anggapoy partner kon payunir sanen linma ak ed Quebec. Balet ta walay akabat kon sister sanen wadman ak ni’d Winnipeg. Say ngaran to et Shirley Turcotte, tan sikato so nagmaliw a permanentin partner ko sanen nankasal kami nen Pebrero 1961. Inad-aro met na pamilya to si Jehova. Agko ni tanton amoria’d saman a si Shirley manaya et panlapuay biskeg tan panamaseseg a kakkaukolan ko diad ilabas na tao-taon.

Say Impanpulong Mi’d Gaspé

Duay taon kayari kasal mi, niasain kami bilang espisyal payunir diad Rimouski, Quebec. Kinerew na sangan opisina a kobrian mi so interon Gaspé Peninsula, a bandad bukig a baybay na Canada. Say asainmin mi et say pangitanem na dakel a bukel na katuaan ed anggaay nayarian mi. (Ecl. 11:6) Pinano mi so luluganan mi na masulok a 1,000 a magasin tan ngalngali 400 a libro, ontan met ed naakan tan kawes, insan mi la inggapo so sakey bulan a panagpulong ditan. Sistematiko min kinobrian so amin ya angkekelag a baryo diad Gaspé. Pinasakbayan na istasyon na radyo diman iray totoo ya onsabi ray Tasi nen Jehova tan agda aawaten iray publikasyon tayo. Balet ta aliway impakatalos na saray residente. Say abaloan da et iyaanunsio na saman ya istasyon iray publikasyon tayo kanian inawat da iratan.

Diad saraman a panaon et aganggano ni labat ya inyabuloy so panagpulong diad arum a lugar ed Quebec, tan mabetbet a sisitaen na pulis so kimey mi. Agawa iya aminsan diad sakey a syudad a no iner et makapangipapalima kami na literatura ed amin lawarin abung. Imbaga na sakey a pulis a mila kami’d sikato diad presinto, kanian akila kami. Naamtaan kon sikatoy ingganggan manaya na abogado na satan a syudad a patundaen kamin manpulong. Diad saman ya agew et anggapo imay hepe na pulis diman ed presinto, kanian impanengneng ko’d samay abogado so kompleton papeles tan sulat na sangan opisina ed Toronto a mangipapaliwawa ed kanepegan tayon manpulong. Kayarin binasa na abogado imay sulat et oniay tampol ya imbaga to: “Anta yo, agko labay komon so problema. ‘Amay pari so angibagan patundaen ta kayo.” Lapud labay min namoria na totoo diad teritorya a legal so kimey mi, intuloy min tampol so panagpulong diman ed mismon lugar a pinatunda kami na pulis.

Kaimbuasan, pinmawil kami’d presinto pian katongtongen so hepe na pulis. Mamapasnok sanen naamtaan ton pinatunda da kamin manpulong. Tinawagan to imay abogado tan pinampasnokan to. Tan antokaman kunoy problema mi, tawagan mi labat ta sikaton mismo so akauley. Anggano agkami taga diman tan agkami tanton makapansalitay Pranses, maomaong tan maparawes iray totoo’d sikami. Balet ta naisip min, ‘Awaten da kasi so katuaan?’ Naamtaan mi so ebat kalabas na tao-taon sanen pinmawil kami’d Gaspé pian manpaalagey na Kingdom Hall. Akabatan min dakel ed saramay apulongan mi nensaman et agagi tayo la natan. On, si Jehova so amabaleg.​—1 Cor. 3:6, 7.

Akaawat Kami na Tawir

Nianak so anak min si Lisa nen 1970. Mas linmiket kami lapud sayan tawir a nanlapud si Jehova. Kaibak si Shirley tan Lisa ed dakel a proyekton panagpaalagey na Kingdom Hall. Sanen asumpal lan naneskuelay Lisa, imbaga to’d sikami ya: “Mommy, Daddy, siak so rason no akin et agkayo akapantultuloy ed sigpot-panaon a serbisyo, kanian labay koy manpayunir pian makabawi ak.” Kalabas na masulok a 20 taon, payunir nin siansiay Lisa, tan natan et kaiba toy masiken ton si Sylvain ed panagpayunir. Apribilehyoan iran mibiang ed pigaran internasyonal ya proyekto ed panagpaalagey.  Pansiasiansiaen min simpli so bilay mi bilang pamilya tan lawas kamin akaparaan a pausar parad kimey nen Jehova. Agkon balot nalingwanan imay imbaga nen Lisa sanen ginmapon manpayunir. Diad tua, pinaseseg to ak ya ompawil ed sigpot-panaon a ministeryo, kanian nen 2001 et nampayunir ak lamet ya anggad natan. Lapud panagpayunir et naaralan koy nawalaan na simpli balet ta makapnek tan maliket a bilay tan manmatalek ed si Jehova ed amin a gawaen ko.

Kaukolan so Aro tan Katooran ed Saray Proyekton Panagpaalagey

Imbangat to ak nen Jehova a sano pausar itayo’d sikato tan awaten so antokaman ya asainmin ya iter to, dakel so naawat tayon bendisyon. Papablien kon maong so pribilehyon makapanlingkor ed Regional Building Committee tan pikimey kaiba ray agagin lalaki tan bibii diad saray proyekton panagpaalagey diad Quebec tan ed arum nin lugar.

Tua, walaray boluntaryo ya agtanton maabilidad ed panagpaliwawa, balet diad panagpaalagey na Kingdom Hall et makapadinayew ira. Impasya tan marundunong so panagkimey na sarayan inad-aron agagi. Kanian say resulta et marakdakep a bilding ya usaren ed panagdayew ed si Jehova.

Walay nantepet ed siak ya, “Antoray sankaimportantian a kualidad na boluntaryo ed panagpaalagey na Kingdom Hall?” Unong ed eksperiensyak, unona ed amin et nepeg ya inaro toy Jehova tan say Anak to, tan ontan met ed saray agagi. (1 Cor. 16:14) Komadua, kaukolan met a sikatoy matoor. Walan wala ray pankanawnawa ya agnagawa iray bengatla unong ed iilaloan tayo. Anggaman ontan, no say sakey a too et matoor, siansia nin suportaan to ray teokratikon uksoyan tan manboluntaryo ed onsabi ni ran proyekto.

Misalsalamat Ak ed Jehova

Inatey si Amak nen 1985, balet ta samay bilin da’d siak a mansiansian okupado ed organisasyon nen Jehova et akatatak ni’d isip ko. Seguradon okupado met ira, a singa ed arum nin say asainmin da et diad kabiangan na organisasyon nen Jehova a walad tawen. (Apo. 14:13) Si Inak et 97 da la natan. Na-istrok ira kanian nanairapan iran mansalita. Balet ta siansia nin kabisado da iray teksto ed Biblia. Diad saray sulat da ed sikami et mangilalaktip iray teksto tan papasesegen da kamin itultuloy so matoor a panlilingkor mi’d si Jehova. Agaylay pisalsalamat min sanaagi ta awalaan kami na maaron atateng!

Misalsalamat ak met ed si Jehova ta inikdan to ak na matoor ya asawa tan partner, si Shirley. Tinulok to so simbawa nen nanay to’d sikato ya, “Dakel so kimey nen Vern parad Panarian kanian agmo isisiblet ed arum.” Sanen nankasal kami 49 taon lay apalabas, nampaknaan min saniba kamin ontatken a manlilingkor ed si Jehova. Tan no naliktaran min dua so anggaan na sayan sistema, saniba kami met ya onugaw tan itultuloy min lingkoran so Dios ed andi-anggaan. On, ‘dakel so kimey mi ed Katawan.’ (1 Cor. 15:58) Talagan agkami pinaulyan nen Jehova tan inter to so amin ya pankaukolan mi.

[Paimano ed leksab]

[Litrato ed pahina 31]

“Pansiasiansiaen min simpli so bilay mi bilang pamilya tan lawas kamin akaparaan a pausar parad kimey nen Jehova”