Ipatnag so Maong ya Ugali Bilang Ministro na Dios
Ipatnag so Maong ya Ugali Bilang Ministro na Dios
“Aligen yo sirin so Dios.”—EFE. 5:1.
1, 2. (a) Akin ya importante so pangipatnag na maong ya ugali? (b) Anto so pantongtongan tayo ed sayan artikulo?
NO NIPAAKAR ed inkamagalang, oniay inkuan na managsulat a si Sue Fox: “Kaukolan a naynay tayon ipatnag so maong ya ugali. Importante iya inerman so kawalaan tayo.” No marespeto itayo, nabawasan tan napaliisan ni ingen iray agpantatalosan. Balet, no aliwliway panagtrato tayo ed arum, manresulta iya ed pankokolkol, sakit na linawa, tan ermen.
2 Say Kristianon kongregasyon et tutugyopen na totoon walaan na maong ya ugali. Anggaman ontan, siansia nin kaukolan tayoy manalwar pian agtayo naalig so makapuy a kagagawa na karaklan ed mundo natan. Pantongtongan tayo ed sayan artikulo no panon a say pangiyaplika ed saray prinsipyo na Biblia nipaakar ed maong ya ugali so manalimbeng ed sikatayo tan manangguyor ed saray totoo diad tuan panagdayew. Pian natalosan tayo no anto so nalalanor ed panangipanengneng na maong ya ugali, aralen tayo pa so alimbawa nen Jehova a Dios tan say Anak to.
Si Jehova tan say Anak To—Ehemplo na Maong ya Ugali
3. No nipaakar ed maong ya ugali, anton alimbawa so impanengneng nen Jehova a Dios?
3 Si Jehova a Dios so angipanengneng na sankaabigan ya alimbawa no nipaakar ed maong ya ugali. Anggaman sikato so Soberano na uniberso, say pidedeneng to ed saray totoo et atekepan na kaabigan tan respeto. Singa bilang, sanen sikatoy akitongtong ed si Abraham tan si Moises, ginawa to itan aliwan diad paraan a mangigaganggan noagta, sikatoy angusar na Hebreon salita parad mapagalang a pikekerew. (Gen. 13:14; Exo. 4:6) Sano nalilingo iray lingkor to, sikatoy ‘maabagey, magrasya, matantan a manpasnok, tan daakan ed maaron abig na linawa tan katuaan.’ (Sal. 86:15) Sikatoy miduman tuloy ed arum a totoo a tamtampol ya onsanok sano agnaunor so labay da.
4. Panon tayon naalig si Jehova sano mitotongtong itayo ed arum?
4 Sankaimano met so inkamapagalang na Dios diad paraan na itatalineng to ed totoo. Sanen mantetepet si Abraham nipaakar ed saray taga Sodoma, maan-anos ya inebatan nen Jehova so kada tepet to. (Gen. 18:23-32) Agto impasen a panagdarak na panaon so idengel to ed saray kapagaan nen Abraham. Dedengelen nen Jehova so pikakasi na saray lingkor to tan saray ey-ey na magbabawin nankasalanan. (Basaen so Salmo 51:11, 17.) Agta nepeg tayon aligen si Jehova diad italineng met ed arum sano mitotongtong ira’d sikatayo?
5. Panon a say pangalig ed maong ya ugali nen Jesus et mamaaligwas ed relasyon tayo ed arum?
5 Sakey ed saray dakel a naaralan nen Jesu-Kristo ed si Ama to et say maong ya impanugali. Anggaman no maminsan et nababanalan si Jesus tan ngalngali anggapo lay panaon ton manpainawa lapud ministeryo to, siansia nin maan-anos tan maomaong so impideneng to ed totoo. Sikatoy lawas akaparaan tan mabulos ya ontulong ed saray akating, bulag a mipapayabol, tan arum nin mankaukolan na tulong. Agto ra imbaliwala, anggaman inmasingger ira ed sikato diad aliwan kombenientin panaon. Mabetbet ya itutunda toy kimey to pian tulongan so sakey a nagogonigon. Impanengneng nen Jesus so nikabkabiig a konsiderasyon ed saramay walaan na pananisia ed sikato. (Mar. 5:30-34; Luc. 18:35-41) Bilang Kristiano, aaligen tayoy ehemplo nen Jesus no maong so pidedeneng tayo ed totoo tan tutulongan tayo ira. Maseguron naimano itan na saray kakanayon tayo, kakaabay, tan arum ni. Niarum ni, nidayew si Jehova tan nalikna tayoy liket no ontan so kondukta tayo.
6. Anton ehemplo ed panamagalang tan inkamakaaro so impanengneng nen Jesus?
6 Pinagalangan met nen Jesus iray totoo diad impanawag to ed sikara ed kangaranan da. Kasin ontan met so panamagalang ya impanengneng na saray Judion relihyoson lider ed saray totoo? Andi. Impasen tan trinato dan “naayew” iramay totoon agda amta so Ganggan. (Juan 7:49) Aliwan ontan so impantrato na Anak na Dios ed saray totoo. Tinawag nen Jesus ed ngaran ira di Marta, Maria, Zaqueo, tan arum nira. (Luc. 10:41, 42; 19:5) Tua, mandedepende ed kultura tan kipapasen so dugan pananawag ed arum a too, ingen ta lawas a panggugunaetan na saray lingkor nen Jehova so mikaaro ed arum. * Agda aabuloyan a nabawasan so respeto ra ed sakey a too, kapananisiaan da man odino andi, lapu labat ed pandurumaan na kipapasen ed bilay.—Basaen so Santiago 2:1-4.
7. Panon a makatulong iray prinsipyo na Biblia diad pangipanengneng tayoy panamagalang ed amin a too inerman so kawalaan tayo?
7 Say maaron pidedeneng nen Jehova tan Anak to et mamapagalang ed totoo na amin a nasyones tan saya so manasagyat ed saray mauyamo diad katuaan. Siempre, saray ipapasen a maong ya ugali et nanduruma, depende ed lugar. Kanian anggapoy tutumboken tayon espisipiko iran totontonen nipaakar ed maong ya impanugali. Imbes, paigigiya itayo ed prinsipyo na Biblia pian lawas tayon napagalangan so amin a totoo inerman so kawalaan tayo. Aralen tayo sirin no panon a say marespeton panagtrato tayo ed totoo et manresulta ed pagmaliw tayon mabunga ed ministeryo.
Ibano tan Pitongtongan Iray Totoo
8, 9. (a) Anton kagagawa so nayarin ipasen ya agmarakep ya ugali? (b) Akin et nepeg tayon iyaplika imay salita nen Jesus ya akarekord ed Mateo 5:47 no nipaakar ed panagtrato tayo ed totoo?
8 Lapud okupado lan tuloy so bilay ed dakel a lugar natan, ngalngali anggapo lay pankanawnawa na saray totoo a mangibano odino mangibagay “komusta?” Agto labay ya ibaga a kaukolan tayon pitongtongan so amin a naabet tayo ed dalan. Anggaman ontan, dakel iray pankanawnawa a matukoy tan sankaabigan so pangibano. Kasin niyugali yo lay mangibano? Odino mabetbet ya agyo ibabano tan anggan imisan labat so arum a too? Ompan agmet gagagalaen na sakey so agmangibano, balet ta diad tua et nayarin nipapasal to la manaya so agmarakep ya ugali.
9 Papanonotan itayo nen Jesus sanen inkuanto: “No saray agagi yo labat so ibabano yo, wala ta so nikadkaduman gagawaen yo? Agta ontan met so gagawaen na saray totoo na nasyones?” (Mat. 5:47, NW) Nipaakar ed saya, oniay insulat na autor a si Donald Weiss: “Onimbel so liknaan na saray totoo no ag-ira nibano na arum. Anggapoy naibaraan tayo a mamakepa ed satan a panimbel da. Simpli labat sirin so solusyon: Ibano tan pitongtongan tayo iray totoo.” On, no aliwan ambetel so panagtrato tayo ed arum tan lawas itayon makaaro, magmaliw a maabig so resulta.
10. Panon a makatulong so maong ya ugali pian magmaliw a mabunga so ministeryo tayo? (Nengnengen so kahon a “Sikayo Lay Unonan Onimis.”)
10 Onia so eksperiensya na sanasawan Kristiano a si Tom tan Carol a manaayam ed sakey a baleg a syudad ed North America. Ginawa ran kabiangan na ministeryo ra so maligsan pitotongtong ed saray kakaabay da. Panon dan ginawa iya? Legan a sankanonot nen Tom imay akasulat ed Santiago 3:18, oniay inkuan to: “Panggugunaetan mi mitongtong tan mikaaro ed totoo. Aasinggeran mi iramay walad paway na abung da tan saramay mankikimey ed lugar mi. Iimisan tan ibabano mi ra. Pantotongtongan mi iray bengatlan makapainteres ed sikara, a singa say nipaakar ed anak da, aso ra, abung da odino trabaho ra. Ag-abayag et impasen da kami met lan kaaro.” Inyarum ni nen Carol: “Sano nakatongtong mi ra lamet, ipaamta mi ed sikara so ngaran mi tan tepeten mi met so ngaran da. Ibaga mi la’d satan no anton kimey so gagawaen mi balet ta magano labat so pitongtong mi. Diad saginonor et napulongan mi la ra.” Linmemew so liknaan na saray kakaabay di Tom tan Carol ed sikara. Dakel so angawat na saray publikasyon tayo tan walaray malabay a nagkalalo nin makaaral ed katuaan.
Ipatnag so Maong ya Ugali Anggaman Walaray Isusumpa
11, 12. Akin et agtayo la pankelawan no walaray naabet tayon isusumpa diad pampupulong tayo, tan panon so manepeg ya ikiwas tayo?
11 No maminsan, walaray naabet tayon isusumpa diad pampupulong tayo. Agtayo la iya pankelawan ta pinasakbayan nen Kristo Jesus iray disipulo to: “No pinasegsegang da ak, pasegsegangen da kayo met.” (Juan 15:20) Aliwan maabig so pansumpalan no ombawi tayo ed panagbalaw tan panamabaing na saray onsusumpa. Anto sirin so nepeg ya ikiwas tayo? Oniay insulat nen apostol Pedro: “Awat yo ed puso yo a say Kristo a Katawan et masanto, a naynay kayon akaparaan ya onebat ed amin a mantetepet ed sikayo nipaakar ed ilalo yo, balet gawa yo itan tekep na inkaulimek tan aralem a respeto.” (1 Ped. 3:15, NW) No maabig so ipanengneng tayon ugali, salanti, no onkiwas itayo tekep na inkaulimek tan aralem a respeto, nayarin manguman so awawey na saramay mangiinsulto ed sikatayo.—Tito 2:7, 8.
12 Kasin niparaan tayoy manepeg ya ikiwas tayo no nipaarap tayo’d isusumpa, diad paraan ya aabobonan na Dios? On. Oniay impaseseg nen Pablo: “Say salita yo komon natekepan lawas na liga, alaokan na asin, pian nakabatan yo no panon so nepeg yo ya iyebat ed balang sakey.” (Col. 4:6) No niyugali tayo lan respetoen iray kapamilyaan, kaeskuela, katrabaho, agagi ed kongregasyon, tan saray totoo ed komunidad a panaayaman tayo, mas akaparaan itayon onkiwas diad Makristianon paraan no walaray mamalaw tan manginsulto ed sikatayo.—Basaen so Roma 12:17-21.
13. Mangiter na alimbawa a mamapaneknek a nayarin manguman so awawey na saray onsusumpa lapud maabig ya ugali tayo.
13 Maabig so resulta no ipatnag tayo nin siansiay maong ya ugali anggaman nipapaarap itayo ed mairap iran situasyon. Alimbawa, walay Tasi ed Japan ya ininsulto na sakey ya akan-abung tan samay bisita to. Anggaman ontan, siansia nin magalang ya inmalis imay agi. Intuloy toy nampulong ed saman a teritorya, tan naimano ton sikatoy oobserbaan manaya na samay bisita. Sanen inmasingger imay agi, oniay inkuan to’may laki: “Pasensia ka la’d samay agawa. Anggano pinabpabaingan mi ka, naimanok ya akaimis ka nin siansia. Panon ta ka kasin naalig?” Maer-ermen iyan laki lapud sikatoy nakal ed trabaho tan kapatepatey na nanay to. Sikatoy inopresian na agi na panagaral na Biblia, tan inawat to itan. Agnambayag et mamidua la ed sakey simba so panaaral da.
Say Sankaabigan a Paraan Pian Nawalaay Mapagalang ya Ugali
14, 15. Panon ya impasal na saray lingkor nen Jehova nensaman iray anak da?
14 Sineguro na saray matakot ed Dios ya atateng nensaman a diad abung ni labat et naaralan la na saray ananak da so inkamagalang. Imanoen pa so marespeton impantongtong di Abraham tan say anak ton si Isaac ya akarekord ed Genesis 22:7. Ontan met, nibagan maabig so impangipasal ed si Jose na saray atateng to. Sanen walad prisoan, sikatoy marespeto anggan ed saray kapara ton priso. (Gen. 40:8, 14) Napatnagan met ed samay impitongtong to’d si Faraon ya amta to no panon so dugan pananawag ed saray walaan na atagey a posisyon.—Gen. 41:16, 33, 34.
15 Nia so sakey ed saray Samploran Ganggan a niiter ed saray Israelita: “Galangen mo so amam tan inam pian andukey so saray agew mo ed tapew na dalin ya iter nen Jehova a Dios mo ed sika.” (Exo. 20:12) Say sakey a paraan a nigalang na saray anak iray atateng da et no maong so ugali ra ed abung. Makapadinayew imay impanengneng a respeto na marikit nen Jefte ed sikato sanen sinumpal toy samba nen ama to anggaman mairap itan a gawaen.—Uko. 11:35-40.
16-18. (a) Antoy kaukolan a gawaen pian nibangat so maong ya ugali ed saray ananak? (b) Antoray maabig a resulta no nibangat so maong ya ugali ed saray ananak?
16 Talagan importante so pangipasal ed saray anak tayo pian maong so ugali ra anggad ibaleg da. Kaukolan dan naaralan so dugan pangasikaso ed saray bisita, pangebat ed telepono, tan say matukoy ya awawey sano mamangan a kaibay arum. Nepeg dan natalosan no akin a kaukolan dan ilukasan na puerta so arum, tulongan iray maedad tan mansasakit, tan ibaan iramay walaan na ambelat ya aawiten. Nepeg a nipurek ed sikara so kaimportantian na pangibagay “ipangasi yo pa,” “salamat,” “anggapoy wala,” “tulongan ta kayo,” tan “pasensia kayo la.”
17 Agyo iisipen a masyadon mairap so pangipasal ed saray anak pian magmaliw a maong so ugali ra. Say sankaabigan a paraan et diad pangipanengneng yoy maabig ya ehemplo. Oniay insalaysay na 25 años a si Kurt no panon ton naaralan, pati saray taloran agagi to, so inkamarespeto: “Naobserbaan mi so mauyamon pitotongtong di Nanay tan Tatay ed balang sakey tan say maanos tan makonsideran panagtrato ra ed arum. No wala kami’d Kingdom Hall, ipila to ak nen Tatay a mitongtong ed saray maedad lan agagi antis tan kayari na aral. Narerengel koy panangibano to tan naimatonan koy panagrespeto to ed sikara.” Onia ni inyarum nen Kurt: “Asabi panaon et naalig koy ugali nen Tatay. Kanian niyugalik la so inkamarespeto ed totoo. Saya et aliwan lapud kaukolan kon gawaen, noagta lapud labay kon gawaen.”
18 Antoy resulta no ibangat na atateng so maong ya ugali ed saray anak da? Saray anak da et nawalaan na kakaaro tan mareen so pidedeneng da ed totoo. Mainomay dan napiulopan iray amo tan katrabaho ra. Kaaruman ni, nalikna na saray atateng so liket no makalakal, marespeto, tan maong so ugali na saray anak da.—Basaen so Uliran 23:24, 25.
Niduma Itayo no Maong so Ugali Tayo
19, 20. Akin et nepeg tayon aligen so Dios tan say Anak to no nipaakar ed maabig a kondukta?
19 Oniay insulat nen Pablo: “Aligen yo sirin so Dios, singa anak to kayon inad-aro.” (Efe. 5:1) Say pangalig ed si Jehova a Dios tan ed Anak to et lalanoren toy pangiyaplika ed saray prinsipyo ed Biblia, a singa saray apantongtongan tayo ed sayan artikulo. No iyaplika tayo iratan, napaliisan tayo so kunwarin panangipanengneng na respeto pian labat nagamoray pabor na sakey a walad posisyon, odino pian makaala na materyal iran gunggona.—Jud. 16.
20 Diad sayan kaunoran iran agew na mauges ya uley nen Satanas, gagawaen toy anggaay nayarian to pian deralen so estandartin inletneg nen Jehova nipaakar ed maabig a kondukta. Balet ta ag-ontalona so Diablo ed pilalek ton deralen so maabig a kondukta na saray tuan Kristiano. Komon ta determinado so balang sakey ed sikatayo ya aligen so ehemplo na Dios tan say Anak to. Diad ontan et lawas a miduma so panagsalita tan kiwas tayo ed saramay makapuy so ugali ra. Nidayew tayo so ngaran na Dios tayon Jehova, tan natangguyor tayo met iray mauyamon totoo diad tuan panagdayew.
[Paimano ed Leksab]
^ par. 6 Diad arum a kultura, ipapasen ya aliwan marespeto so panawag ed saray mas maedad diad ngaran da, likud labat no iyabuloy da. Maabig no igalang na saray Kristiano so ontan iran kustombre.
Kasin Nanonotan Yo?
• Antoy naaralan tayo ed si Jehova tan ed Anak to nipaakar ed maong ya ugali?
• Akin et maabig so makaaron pangibano tayo ed saray totoo?
• Panon a makatulong so maabig ya ugali pian magmaliw a mabunga so ministeryo tayo?
• Antoy betang na saray atateng ed panangibangat na maabig a kondukta ed saray anak da?
[Tepetepet Parad Panagaral]
[Kahon ed pahina 27]
Sikayo Lay Unonan Onimis
Dakel a totoo so nababaingan a mitongtong ed agda kabat. Balet, lapud inaro na saray Tasi nen Jehova so Dios tan saray kakaabay da, panggugunaetan dan aaralen no panon dan napitongtongan iray totoo pian nipasabi so katuaan a walad Biblia. Antoy makatulong ed sikayo pian lalon nagawaan iya?
Makatulong iyan prinsipyo ed Biblia: “Itultuloy yon ipatnag so panangiyansakit ed arum, tan aliwan say pankaabigan yo labat so nonoten yo.” (Fil. 2:4, NW) Niyaplika tayo iyan prinsipyo ed onian paraan: No agyo ni kabat so sakey a too, ipasen to kayon estranghero. Anto sirin so gawaen yo pian napitongtongan yo? Makatulong so makaaron iyimis tan pangibano ed sikato. Balet ta wala ni kaukolan yon gawaen.
Nayarin samay too a labay yon pitongtongan et walay sananey a nononoten to. No ipilit yon pantongtongan so sakey a tema balet ta agyo ni inkonsidera iray nononoten to, ompan agto la laingen ondengel. Kanian, no natebek yo met so posiblin nononoten na samay too, usar yo itan pian nigapo so tongtongan. Ontan so ginawa nen Jesus sanen apitongtongan to so sakey a bii diad abay na bobon ed Samaria. (Juan 4:7-26) Amta nen Jesus a say gagala na bii et onasol na danum, kanian nipaakar ed satan so angigapoan toy tongtongan, a nanresulta’d mabungan impanginabang toy katuaan.
[Saray litrato ed pahina 26]
Say inkamakaaro et nayarin manresulta ed panginabang tayoy katuaan
[Litrato ed pahina 28]
Lawas a sankaabigan so pangipatnag na maong ya ugali