Kasin “Nilamut tan Niletneg Kayo Diad Pundasyon”?

AKANENGNENG kayo ta la na baleg a kiew ya anggaman papaspasen na makmaksil a dagem et siansia nin agnatumba? Akin kasi? Lapud aralem so inkilamut na satan diad dalin. Mipara itayo ed satan a kiew. Mipupuligesgesan itayo met ed saray singa bagyon subsubok ed bilay, balet ta sarag tayon sungdoan iratan no mansiansia itayon ‘nilamut tan niletneg diad pundasyon.’ (Efe. 3:14-17, NW) Anto itan a pundasyon?

Ibabaga na Salita na Dios a si “Kristo Jesus so pinagkapundasyon a bato ed suyok.” (Efe. 2:20, NW; 1 Cor. 3:11) Bilang Kristiano, papasesegen itayo a mantultuloy a ‘manakar a kaiba to, linmamut tan nipaalagey ed sikato, tan niletneg ed pananisia.’ No ontan so gawaen tayo, nasungdoan tayo so amin a panangataki ed pananisia tayo, kaiba lay ‘makaayat iran salita’ a nibase ed “andi-kakanaan a panamalingo” na totoo.​—Col. 2:4-8.

Say “Kaawang tan Karukey tan Kaatagey tan Kaaralem”

Panon itayon ‘nilamut tan niletneg ed pananisia’? Say sakey ya importantin paraan pian napaaralem tayoy lamut tayo, a singa panangibaga, et diad makulin panagaral na pinuyanan a Salita na Dios. Labay nen Jehova a ‘talosan tayon maong, a singa saray amin a masanto, so kaawang tan karukey tan kaatagey tan kaaralem’ na katuaan. (Efe. 3:18) Kanian, nepeg ya amin a Kristiano et agmankontento ed pakawalaay ataptapew a pakatalos, a singa no magenap la so pakaamta ed saray “mainomay a bengatla” ed Salita na Dios. (Heb. 5:12, NW; 6:1) Imbes, nepeg a pilaleken na balang sakey ed sikatayo a paaralemen so pakatalos tayo ed saray katuaan ed Biblia.​—Uli. 2:1-5.

Siempre, agkabaliksan na satan a say kaukolan tayo labat et dakel a kakabatan pian “nilamut tan niletneg” ed katuaan. Anggan si Satanas pa met et amta toy karga na Biblia. Kanian, wala ni sirin so mas nakaukolan. Kaukolan tayon ‘kabaten so aro nen Kristo a napalumbasan to so pikakabat.’ (Efe. 3:19) Sano manaral itayo lapud inaro tayoy Jehova tan say katuaan, onaralem so pakatalos tayo ed saray katuaan diad Biblia, tan sirin et ombiskeg so pananisia tayo.​—Col. 2:2.

 Suboken So Pakatalos Yo

Salien pan suboken natan so pakatalos yo ed pigaran importantin katuaan a walad Biblia. Say panggawa ed satan et mamaseseg ed sikayo a mas pampelengay panaral na Biblia. Singa bilang, ipangasi yo pan basaen iray bersikulon walad bandad gapo na samay sulat nen apostol Pablo ed saray taga Efeso. (Nengnengen so kahon a  “Parad Saray Taga Efeso.”) Kayari yon basaen iratan, tepetan yoy inkasikayo, ‘Kasin natatalosan ko so kabaliksan na saramay salitan aka-italiko?’ Sansakeyen tayo pan aralen iratan.

Pinili La ed Gapo “Antis a Niletneg so Mundo”

Insulat nen Pablo ed saray kapananisiaan to: “Sikatayo so pinili la [na Dios] ed gapo pian natagibi itayo bilang ananak to diad panamegley nen Jesu-Kristo.” On, ginagala nen Jehova a tagibien so arum a totoo pian magmaliw a kabiangan na perpekton pamilya to ed tawen. Sarayan tinagibin ananak na Dios so manuley bilang ari tan saserdote kaiba nen Kristo. (Roma 8:19-23; Apo. 5:9, 10) Sanen inangatan nen Satanas so inkasoberano nen Jehova, impasagilig to a saray totoon pinalsa na Dios et depektibo. Kanian, matukoy sirin a totoo met lanlamang so pinili nen Jehova a nawalaay betang ed pangekal na amin a kaugsan diad uniberso, kaiba lay Satanas a Diablo, say lapuan na karelmengan! Balet, agpinili nen Jehova diad gapo ni labat no siopa iray indibidual a tagibien to bilang ananak to. Imbes, ginagala na Dios a walay sakey a grupo odino ulop na totoo a miuley ed si Kristo diad tawen.​—Apo. 14:3, 4.

Anton “mundo” so tutukoyen nen Pablo sanen sinulat to iray kapara ton Kristiano a  sikara, bilang grupo, et pinili “antis a niletneg so mundo”? Agto tutukoyey panaon antis a pinalsa na Dios so dalin odino say katooan. Sumlang itan ed inkahustisya. Panon a nibagan walay eebatan di Adan tan Eva ed inkiwas da no denesidi la na Dios a mankasalanan ira antis to ni ran palsaen? No ontan sirin, kapigan denesidi na Dios no panoy pangipetek to ed situasyon a resulta na impinonong di Adan tan Eva ed impanrebelde nen Satanas sumpad inkasoberano To? Ginawa itan nen Jehova kayari impanrebelde na atateng tayo tan antis dan ilalaken so agperpekto ingen ta narondon a totoo.

“Unong ed Inkadaakan na Agnaparaan a Kaabigan na Dios”

Akin ya imbaga nen Pablo a saramay uksoyan a nabasa ed unona iran bersikulo na Efeso et “unong ed inkadaakan na agnaparaan a kaabigan na Dios”? Imbaga to itan pian idanet ya aliwan obligado si Jehova a manondon ed makasalanan a katooan.

Diad tua, anggapoy toon makanepegan na karondon. Balet, lapud baleg a panangaro nen Jehova ed katooan, sikatoy nanggawa na paraan pian niliktar itayo. Sikatayoy makasalanan tan agperpekto, kanian talagan say karondon tayo, unong a kuan nen Pablo, et lapud agnaparaan a kaabigan na Dios.

Say Sagradon Sekreto na Gagala na Dios

Diad gapo et agni impaamta na Dios no panon ton solusyonan so probleman pinalesa nen Satanas. Satan et “misteryo” odino sagradon sekreto. (Efe. 3:4, 5) Diad saginonor, sanen niletneg so Kristianon kongregasyon, impaamta nen Jehova iray detalye no panon ton sumpalen so gagala to ed katooan tan ed dalin. Impaliwawa nen Pablo a “sano nasumpal iray aturon panaon,” mangiletneg so Dios na “sakey ya administrasyon,” salanti, sistema a mangiyuksoy ed bengabengatla, a manresulta ed pankakasakey na amin ya intelihentin pinalsa.

Say inmunan kabiangan na satan et ginmapo nen Pentecostes 33 C.E. sanen ginapoan nen Jehova a tiponen iramay nakaiba nen Kristo a manuley ed tawen. (Gawa 1:13-15; 2:1-4) Say komadua et say panipon ed saramay manayam ed paraison dalin ya uleyan na Mesianikon Panarian nen Kristo. (Apo. 7:14-17; 21:1-5) Agtutukoyen na salitan “administrasyon” so Mesianikon Panarian lapud niletneg labat itan nen 1914. Imbes, ontutukoy itan ed panangipakurang na Dios ed bengabengatla pian nasumpal so gagala to ya ipawil so pankakasakey ed interon uniberso.

Magmaliw a ‘Matatken ed Panag-isip’

Seguradon makatulong so maabig a niyugalin panagaral pian sigpot yon natalosan so “kaawang tan karukey tan kaatagey tan kaaralem” na katuaan. Balet, segurado met a lapud okupadon maong so panagbilay, mainomay nen Satanas ya abalaen odino deralen ni ingen so niyugali tayon panagaral. Agyo aabuloyan si Satanas a gawaen to itan ed sikayo. Usar yoy “pakatalos” ya inter na Dios ed sikayo pian magmaliw a ‘matatken ed panag-isip.’ (1 Juan 5:20; 1 Cor. 14:20) Seguroen a natatalosan yo no akin a papanisiaan yo iray sisisiaen yo tan lawas sarag yon ‘ipaliwawa so ilalo yo.’​—1 Ped. 3:15.

Isip yo pan wadman kayo ed Efeso sanen imbasa diad sankaunaan a pankanawnawa imay sulat nen Pablo. Agta napakiwas kayo na sulat to pian pilaleken yoy onaligwas ed “pikakabat ed Anak na Dios”? (Efe. 4:13, 14) Siempre! Kanian, abuloyan yon pakiwasen kayo met natan na pinuyanan iran salita nen Pablo. Say aralem a panangaro ed si Jehova tan say suston pikakabat ed Salita to so ontulong ed sikayon mansiansian ‘nilamut tan niletneg diad pundasyon’ ed Kristo. Diad ontan et sarag yon sungdoan so antokaman a singa bagyon subok ya ipaarap nen Satanas ed sikayo antis ya onsabi so sigpot a kaderal na sayan mauge-uges a mundo.​—Sal. 1:1-3; Jer. 17:7, 8.

[Kahon/Litrato ed pahina 27]

 “Parad Saray Taga Efeso”

“Narayew komon so Dios tan Ama na Katawan tayon Jesu-Kristo, ta inter to ed sikatayoran nikasakey ed si Kristo so amin a klase na espiritual a bendisyon diad mangatatawen iran pasen, no panon a pinili to itayo a mikasakey ed sikato antis a niletneg so mundo, ta pian magmaliw itayon masanto tan anggapoy pakabalawan diad imaton to lapud aro. Ta sikatayo so pinili to la ed gapo pian natagibi itayo bilang ananak to diad panamegley nen Jesu-Kristo, unong ed panliketan to tan linawa to, pian kirayewan na maglorian agnaparaan a kaabigan to, a mabulos ton impagamor ed sikatayo diad panamegley na inad-aro ton Anak. Diad impanondon to ed sikatayo ed panamegley na dala to et nibulos itayo, salanti, naperdona iray impakalingo tayo, unong ed inkadaakan na agnaparaan a kaabigan na Dios. Saya so pinadaak to ed sikatayo tekep na amin a kakabatan tan maong a pakatebek, ya impaamta to ed sikatayo so sagradon sekreto na linawa to. Saya so panliketan to a mitunosan ed gagala to a mangiletneg na sakey ya administrasyon sano nasumpal iray aturon panaon, salanti, pian tiponen lamet so amin a bengatla diad Kristo, saray bengatla ed katawenan tan saray bengatla ed dalin.”​—Efe. 1:3-10, NW.