Akin a Nepeg Mon Pansiansiaen so Integridad Mo?

“Ukomen mo ak pa, O Jehova, ed . . . nikanepegan ed kaabigan [“integridad,” NW] a wala ed siak.”​—SAL. 7:8.

1, 2. Anto so pigaran kaslakan a situasyon a pakakasubokay integridad na sakey a Kristiano?

 ILITRATO pa’d nonot mo iyan taloran eksena: Sakey a kalangweran so kakantiawan na saray kaklase to. Sikatoy labay dan pasulagen pian makapan-ayew odino milaban ni ingen. Ombales kasi, odino pokpokan toy inkasikato insan la onalis? Sakey ya asawan laki so bukbukor to ed abung tan manri-research ed Internet. Kabebekta et walay linmetaw a mangisasagyat ed sakey a mabanday a Web site. Natukso kasi a lukasan itan a Web site, odino seguroen ton paliisan itan? Sakey ya agin bii so mimiistoryaan ed arum. Bangnen kien, say tongtongan et ompupugta la’d tsismis nipaakar ed sakey ya agin bii ed kongregasyon. Mibiang kasi ed satan, odino panggunaetan ton umanen so tongtongan?

² Anggaman nanduruma iratan a situasyon, walay sakey a pampaparaan da. Lalanoren na saratan so pipupuligesgesan pian napansiansiay integridad bilang Kristiano. Kasin sankanonot mo met so dilin integridad mo legan mon aarapen iray kapagaan, pankaukolan, tan kalat mo’d bilay? Diad inagew-agew et sankanonot na totoo so nipaakar ed itsura ra, bunigas da, say irap na pananap na pambilay, say maliket tan maermen iran bekta na pikakaaro ra, tan ompan anggan say piiinaroan da ni ingen. Nayarin dakel a panaon tan imano so uusaren tayo ed saratan. Anto balet so talagan importante ed si Jehova legan ton susukayan so kapusoan tayo? (Sal. 139:23, 24) Say integridad tayo.

3. Anton pribilehyo so inter nen Jehova ed sikatayo, tan anto so aralen tayo ed sayan artikulo?

³ Si Jehova, say Manangiter na ‘amin a maong tan ayadyarin palangkap,’ et angiter na nanduruman regalo ed balang sakey ed sikatayo. (Sant. 1:17) Misalsalamat tayo’d sikato ta pinalaboan to itayo na saray regalo a singa say laman tayo, isip, bunigas, tan nanduruman abilidad. (1 Cor. 4:7) Anggaman ontan, no nipaakar ed integridad, inikdan to itayo na pribilehyon mandesisyon parad inkasikatayon dili no kasin bayuboan tayo itan. Ag-itayo papaskaren nen Jehova a mangipatnag na integridad. (Deu. 30:19) Kaukolan tayo sirin ya usisaen no anto so integridad. Aralen tayo met so taloran rason no akin ya importantin tuloy iyan kalidad.

Anto so Integridad?

4. Antoy kabaliksan na integridad, tan anto so naaralan tayo ed samay ganggan nen Jehova nipaakar ed ayayep a manepeg ya ibagat?

⁴ Say integridad et mankabaliksan na agnagiing a katooran ed sakey a persona odino ed sakey a prinsipyo. Pian nipasabi itan ya ideya, say Pangasinan a Biblia a PBS et angusar na saray salitan singa say katooran, inkaskey, kaabigan, inkatunong, inkamatua, tan inkagnap. Samay Hebreon salita ed Biblia a nayarin ipatalos bilang “integridad” et laktipen toy inkagnap ed moral tan inkalimpio. Saramay Hebreon salita a misiglaotan ed “integridad” et inala’d salitan mankabaliksan na limpio, intero, odino andiay kabalawan. Sakey ed saratan a salita so inusar pian tukoyen iray ayep a manepeg ya ibagat ed si Jehova. Nagamoran labat na sakey so panangabobon nen Jehova no say ibagat ton ayep et limpio, odino andiay kabalawan. (Basaen so Levitico 22:19, 20.) Kinondena nen Jehova iramay ginagala ran sumlangen so ganggan to diad impangibagat da na piley, mabeblay, odino bulag ya ayayep.​—Mal. 1:6-8.

5, 6. (a) Antoran alimbawa so mangipapanengneng a diad kaslakan et papablien tayo iray bengatlan limpio, odino kompleto? (b) Kaukolan kasi so pagmaliw ya ayadyari pian napansiansiay integridad? Ipaliwawa.

⁵ Say panlabay tan panamabli’d sakey a bengatlan limpio, intero, odino kompleto, et aliwa lan balo ed sikatayo. Singa bilang, ilitratom pa’d nonot mo so sakey a managkolektay libro ya aromog to so mabalo-balor a libron abayag to lan aanapen. Balet, nalmoan ton aliwa manaya itan a kompleto, kulang itan na piga-pigaran importantin pahina. Lapud  impakadismaya, ompan agto met lanlamang itan laen. Odino, isip mo pay sakey a biin manasaliw na iknol ed tindaan. Anto kasi pilien to? Siempre saramay limpio tan andiay betag. Mipadpara, say aanapen na Dios et saray totoon walaan na ayadyari, odino kompleto a puso.​—2 Awa. 16:9.

⁶ Balet, ompan isipen mo no kasin kaukolan so pagmaliw ya ayadyari pian napansiansia so integridad. Lapud kasalanan tan ag-inkayadyari, nayarin isipen tayon singa itayo sakey a libron aliwan kompleto odino iknol a de-betag. Kasin no maminsan et ontan so naliliknam? Napaseguroan kan agkekerewen nen Jehova a magmaliw itayon perpekto ed absoluton pantalos. Agton balot iilaloan a manggawa itayo na bengatlan agtayo sarag. * (Sal. 103:14; Sant. 3:2) Anggaman ontan, iilaloan to a pansiansiaen tayoy integridad tayo. Wala ta’y pandumaan na inkayadyari tan integridad? On, wala. Nia so sakey ya ilustrasyon: Inaro na sakey a balolaki so marikit ya ikasal to la. Siempre agto iilaloan a sayan asawaen to et magmaliw a perpekto. Ingen, manepeg labat ya ilaloan ton say panangaro na nobya to et interon-puso, salanti, sikato labat so pangipanengnengan toy romantikon aro. Diad miparan paraan, si Jehova et ‘sakey a maimon a Dios.’ (Exo. 20:5) Agto iilaloan a magmaliw itayon ayadyari, ingen ta iilaloan toy interon-puson panangaro, salanti, sikato labat so pangiteran tayoy debosyon tan dayew.

7, 8. (a) Anton ehemplo so impanengneng nen Jesus no nipaakar ed integridad? (b) Anto so kabaliksan na integridad unong ed Kasulatan?

⁷ Nayarin nanonotan tayo ni imay ebat nen Jesus sanen sikatoy tinepetan no anto so sankamanunaan ed amin a ganggan. (Basaen so Marcos 12:28-30.) Aglabat angiter na ebat si Jesus, noagta, sikatoy nambilay unong ed samay inyebat to. Inter to so sankaabigan ya alimbawa na pangaro’d si Jehova ed interon nonot, puso, kamarerwa, tan biskeg. Impanengneng ton say integridad et nipatnag, aliwan diad salita labat, noagta diad saray gawa a manlalapud malinis a motibo. Pian napansiansia tayoy integridad tayo, kaukolan tayon tumboken so bakat nen Jesus.​—1 Ped. 2:21.

⁸ Nia sirin so kabaliksan na integridad unong ed Kasulatan: say interon-puson debosyon ed saksakey a mangatatawen a Persona, si Jehova a Dios, tan ed linawa tan gagala ya imbalikas to. Say pamasiansia’d integridad et mankabaliksan a say pamaliket ed si Jehova a Dios so manunaan diad inagew-agew a bilay tayo. Nepeg a saray prayuridad tayo’d bilay et saramay bengatlan ipapasen to a sankaimportantian. Ikonsidera tayo so taloran rason no akin ya importantin tuloy so pamasiansia’d integridad.

1. Say Integridad Tayo tan say Isyu na Inkasoberano

9. Panon a misiglaotan so dilin integridad tayo ed isyu na sankatalbaan a soberanya?

⁹ Say soberanya nen Jehova et ag-akadepende ed integridad tayo. Maptek, magnayon, tan sankatalbaan so soberanya to. Lawas ya ontan so soberanya to, antokaman ni ibaga odino gawaen na siopaman a pinalsa to. Anggaman ontan, say soberanya na Dios et parungtalan a kinuestion diad tawen tan diad dalin. Kaukolan sirin a niyalangon so soberanya to, salanti, napekderan ed amin ya intelihentin palsa to a sikato so makanepegan, maptek, tan maaron Manuley. Bilang Tasi nen Jehova, labalabay tayon itongtong so nipaakar ed sankatalbaan a soberanya na Dios ed siopaman ya ondengel. Balet, diad sikatayon mismo ey, panon tayon nipanengneng a si Jehova so pipilien tayon Soberano? Diad pamasiansia tayo ed integridad tayo.

10. Antoy inyakusa nen Satanas nipaakar ed integridad na totoo, tan antoy labay mon ikiwas ed satan?

¹⁰ Konsideraen pa no panon a nalalanor so integridad mo. Diad katuaan to, inyakusa nen Satanas ya anggapo ita’y toon ontalindeg ed dapag na soberanya na Dios, ya anggapo kunoy manlingkor ed si Jehova tekep na dalisay a panangaro. Oniay inkuan na Diablo ed si Jehova legan a mandengdengel so minilmilyon ya angheles: “Baog [ed] baog, on, amin a say too wala ed sikato iter to nipaakar ed bilay to.” (Job 2:4) Imanoen ya aliwa labat a si Job so hinusgaan nen Satanas na ontan, noagta amin a katooan. Matukoy sirin so impanawag na Biblia ed si Satanas bilang “say manangidalem na saray agagi tayo.” (Apo. 12:10) Kakantiawan toy Aman Jehova  diad akusasyon to ya agmansiansian matoor iray Kristiano, pati sikan mismo! Ibabaga nen Satanas a no bilay mo lay nalalanor et traidoren moy Jehova. Antoy naliliknam ed sarayan akusasyon ya itutupak to’d sika? Agmo kasi anamoten so amin a pankanawnawa pian paneknekan a matila si Satanas? Ontan a mismo so gagawaen mo no pansiasiansiaen moy integridad mo.

11, 12. (a) Antoran alimbawa so mangiyilustra no panon a say inagew-agew iran desisyon tayo et misiglaotan ed isyu nipaakar ed dilin integridad tayo? (b) Akin a say pamasiansiay integridad tayo et sakey a pribilehyo?

¹¹ Lapud satan ya isyu nipaakar ed integridad mo, im-importante sirin so konduktam tan saray gagawaen mon panagpili ed inagew-agew. Pawilen tayo pa imay taloran eksena nen niman. Panon dan nipatnag a pansiasiansiaen day integridad da? Samay kalangweran a kakantiawan na saray kaklase to et labalabay to la komon so ombales, balet ta anonotan to imay simbawan: “Aleg a sikayo a dili so ombales, inararo, noag ingen ikdan na pasen so sanok na Dios; ta nisulat: Siak so akankien na panamales; siak so ontumang naani, kuan na Katawan.” (Roma 12:19) Kanian sikatoy inmalis la. Samay asawan laki a mani-Internet et sarag to komoy onnengneng ed saray bengatlan liingen toy seksual a pilalek, balet ta anonotan to imay prinsipyo ya ipapabitar na samay imbalikas nen Job: “Akisipan ak ed saray matak. Panon sirin so inengneng ko ed sakey a birhen?” (Job 31:1) Mipadpara, ag-inabuloyan na sayan laki so mata to ya onnengneng ed binabastos iran bengatla, ya impasen to iratan a samal a nepeg a paliisan. Samay biin mimiistoryaan ed saray agagin nayarin pakarengelan toy tsismis et dinmeen ta anonotan to imay ganggan a: “Balang sakey ed sikatayo paliketen to komon so kapara ton too ed kaabigan to ed kipaalagey.” (Roma 15:2) Say tsismis a nayarin nipasabi to ed arum et aliwan makapabiskeg. Paaliwaen na satan so impresyon na arum ed samay espiritual ya agi ton bii; sakey ni, agto napaliket so mangatatawen ya Ama to. Kanian pinokpokan toy dila to tan inuman to lay tongtongan.

¹² Diad sarayan situasyon, say desisyon na balang sakey ed saramay Kristianon nalalanor et singa  mangibabaga na onia: ‘Si Jehova so Manuley ko. Panggunaetan kon gawaen no antoy makapaliket ed sikato diad sayan pamaakaran.’ Ontan met kasi ipapatnag na saray desisyon tan panagpilim? No on so ebat mo, talagan manbibilay ka unong ed samay makapatenyeg-puson balikas diad Uliran 27:11: “Ana’ko, onkabat ka, tan paliketen mo so pusok, pian naebatan ko so mamalaw ed siak.” Talagan baleg a pribilehyo so pamaliket ed puso na Dios! Agta manepeg labat sirin a gawaen tayoy anggaay nayarian tayo pian napansiansiay integridad tayo?

2. Say Pangibasiyan na Dios ed Pangukom To

13. Panon ya ipapabitar na saray salita nen Job tan David a say integridad so pangibasiyan nen Jehova diad pangukom to’d sikatayo?

¹³ Atalosan tayo lan diad panamegley na integridad et makatalindeg itayo ed dapag na soberanya nen Jehova. Satan sirin so napangibasiyan na Dios ed panangukom to’d sikatayo. Sayan katuaan et nipurpurek ed si Job. (Basaen so Job 31:6.) Kabat ton sisimbangen na Dios so amin a totoo ed “sakey a [“suston,” NW] simbangan,” diad panguusar To ed perpekton estandarte to ed inkahustisya bilang basiyan pian amtaen no kasin pansiasiansiaen tayoy integridad tayo. Onia so mipadparan imbaga nen David: “Si Jehova ukomen to naani so katooan; ukomen mo ak pa, O Jehova, ed nikanepegan ed inkatunong ko, tan say nikanepegan ed kaabigan [“integridad,” NW] a wala ed siak. . . . ta say matunong a Dios salsalien to so . . . saray puspuso.” (Sal. 7:8, 9) Amta tayon sarag na Dios a surien so sankaaraldalman na inkatoo tayo, salanti, say ‘kapusoan’ tayo. Kaukolan tayon tandaan balet no anto so labay ton nanengneng ditan. Singa imbaga la nen David, ukomen itayo nen Jehova unong ed integridad tayo.

14. Akin ya agtayon balot nepeg ya isipen a lapud ag-inkayadyari tan inkamakasalanan et agtayo napansiansia so integridad tayo?

¹⁴ Isipen pa, uusisaen nen Jehova a Dios so binilyon a kapusoan na totoo natan. (1 Awa. 28:9) Pigara kasi naroromogan ton mamapasiansia ed Kristianon integridad? Peteg a daiset labat! Anggaman ontan, agtayo nepeg ya isipen a lapud ag-inkayadyari et agtayo napansiansia so integridad tayo. Singa si Job tan si David, walaan itayoy maabig a rason pian manmatalek a naromogan itayo nen Jehova a mamapasiansia ed integridad tayo, anggaman ag-itayo perpekto. Tandaan, say inkaperpekto et aliwan garantiya pian napansiansia tayoy integridad tayo. Tadtalora so perpekton too a nambilay diad dalin, tan duara ed sikara so agda apansiansiay integridad da, si Adan tan si Eva. Diad biek a dapag, minilyon ya ag-ayadyarin totoo so apansiansia ray integridad da. Sarag mo met a gawaen itan.

3. Kakaukolanen Pian Nawalaan na Ilalo

15. Panon ya impabitar nen David a say integridad et kakaukolanen pian nawalaan itayo na ilalo ed arapen?

¹⁵ Lapud say integridad so pangibasiyan nen Jehova na panangukom to’d sikatayo, importantin tuloy itan pian nawalaan itayo na ilalo ed arapen. Amta nen David a tua itan. (Basaen so Salmo 41:12.) Pinabpabli to so ilalon pakagamor na panangabobon na Dios diad andi-anggaan. Singa met saray tuan Kristiano natan, inilaloan nen David so pambilay na andi-anggaan, a mantultuloy a nagkalalon onapit ed si Jehova a Dios legan a manlilingkor. Amta nen David a no labay ton nagamoran itan ya ilalo, kaukolan ton pansiansiaen so integridad to. Singa ed si David, tulongan, iwanwan, tan bendisyonan itayo nen Jehova legan a pansiasiansiaen tayoy integridad tayo.

16, 17. (a) Akin et nepeg a lawas kan determinado a pansiansiaen so integridad mo? (b) Antoran tepet so singbaten ed onsublay ya artikulo?

¹⁶ Im-importante so pakawalaan na ilalo pian magmaliw itayon maliket natan. Say ilalo et makapangitarok na gayaga a nakaukolan tayo pian nasarag tayo iray problema’d bilay. Protektaan met na ilalo so panagnonot tayo. Tandaan a diad Biblia et inyaliling so ilalo ed sanib na ulo odino helmet. (1 Tes. 5:8) Singa say helmet a protektaan toy ulo na sundalon migueguerra, protektaan na ilalo so isip  tayo manlapud inkadesperado tan negatibo iran kanonotan ya isusugsog nen Satanas ed sayan mundon asingger lan mangangga. Talagan andiay kabaliksan so bilay no anggapoy ilalon bembembenan tayo. Kaukolan tayo sirin a matuan usisaen so inkasikatayon dili, ya imanoen tayon maong no anto la kasi kipapasen na dilin integridad tayo tan say ilalon akadepende ed satan. Agmo lilingwanan a no pansiasiansiaen moy integridad mo, itatandorom so soberanya nen Jehova tan aalwaran mon agnabalang so mabmablin ilalom ed arapen. Komon ta lawas mon pansiansiaen so integridad mo!

¹⁷ Natan ta naaralan tayo la a talagan importante so integridad, kaukolan tayon konsideraen so kaaruman ni ran tepet. Panon tayon nabayuboan so integridad? Panon tayon napansiansia itan? Tan anto so nagawaan na sakey no walay panaon ya agto itan apansiansia? Ebatan na onsublay ya artikulo irayan tepet.

[Paimano ed leksab]

Panon Mon Ebatan?

• Anto so integridad?

• Panon a misiglaotan so integridad ed isyu na sankatalbaan a soberanya?

• Akin a say integridad so basiyan na ilalo tayo?

[Tepetepet Parad Panagaral]

[Saray litrato ed pahina 5]

Diad inagew-agew et dakerakel so posiblin pakasubokan na integridad tayo