Babantayan Itayo nen Jehova Parad Pankaabigan Tayo

“Saray mata nen Jehova ombatik dia tan diman [odino onliliber] ed amin a dalin, pian ompatnag a mabiskeg ya ontulong ed saray ayadyari puso ra a dapit ed sikato.”​—2 AWA. 16:9.

1. Akin ya uusisaen itayo nen Jehova?

 PERPEKTON Ama si Jehova. Ontan lay pakapikabat to’d sikatayo ya amta to ni anggan saray tendensia na “nonot” tayo. (1 Awa. 28:9) Anggaman ontan, agto itayo uusisaen pian anapan labat na lingo. (Sal. 11:4; 130:3) Imbes, lapud panangaro to et labay ton naprotektaan itayo manlapud amin a bengatlan maneral na relasyon tayo’d sikato, odino mameligro ed ilalo tayon pakagamor na andi-anggaan a bilay.​—Sal. 25:8-10, 12, 13.

2. Siopa iray nagugunggonaan sano ipapatnag nen Jehova so biskeg to?

² Si Jehova et sankamakapanyarian tan nanenengneng to so amin a bengatla. Lapud satan, natulongan to iray matoor a lingkor to kapagno ontawag ira ed sikato, tan sarag to iran suportaan sano nasusubok ira. “Saray mata nen Jehova ombatik dia tan diman [odino onliliber] ed amin a dalin, pian ompatnag a mabiskeg ya ontulong ed saray ayadyari puso ra a dapit ed sikato,” so kuan na 2 Awaran 16:9. Imanoen ya uusaren nen Jehova so biskeg to parad saramay manlilingkor ed sikato tekep na ayadyarin puso, salanti, puson malinis tan walaay masimoon a motibo. Agto ipapatnag so ontan a panangiyansakit ed saramay managpalikdo odino mansimpisimpitan.​—Jos. 7:1, 20, 21, 25; Uli. 1:23-33.

 Manakar a Kaiba so Dios

3, 4. Antoy kabaliksan na panakar a kaiba so Dios, tan antoran alimbawa ed Biblia so mangipapalinew ed kabaliksan na saya?

³ Parad dakel a totoo, singa imposiblin say Manamalsa na maaw-awang ya uniberso et abuloyan to iray totoon manakar a kaiba to diad espiritual a paraan. Balet, talagan ontan so labay nen Jehova a gawaen tayo. Nensaman, si Enoc tan Noe et ‘akiulop-ulop,’ odino nanakar a kaiba so Dios. (Gen. 5:24; 6:9) Si Moises et “nansiansia a singa to nengnengnengen so [Sakey ya] agnanengneng.” (Heb. 11:27) Ontan met si Arin David et mapaabeban nanakar a kaiba so mangatatawen ya Ama to. Onia so imbalikas to: “Lapu ed [si Jehova] et wala ed nikawanan ko, agak natenyeg.”​—Sal. 16:8.

⁴ Siempre, ag-itayo literal a nitabin nen Jehova tan makapanakar a kaiba to. Balet nagawaan tayo itan diad piguratibon pantalos. Panon? Insulat nen salmistan Asaf: “Wala ak a lanang ed sika; sika intabin mo ak ed limak a kawanan. Sika ibasbas mo ak a pati pamilin mo.” (Sal. 73:23, 24) Kanian diad simplin panangibaga, manaakar itayo a kaiba si Aman Jehova sano maap-apit tayon tutumboken so simbawa to, a naaawat tayo panamegley na Salita to tan diad “matoor tan makabat ya aripen.”​—Mat. 24:45; 2 Tim. 3:16.

5. Bilang say maaron Ama, panon a babantayan nen Jehova iray matoor a lingkor to, tan panoy manepeg a panangipasen tayo’d sikato?

⁵ Lapud papablien nen Jehova iramay manaakar a kaiba to, babantayan to ira bilang maaron ama, ya aasikasoen, sasalimbengan, tan ibabangat to ira. Oniay inkuan na Dios: “Bilinen ta ka tan ibangat ta ka ed dalan a nepeg mo a laen. Simbawaen ta ka a sinenengneng so matak ed sika.” (Sal. 32:8) Tepeten mo pay inkasika: ‘Kasin nanenengneng koy inkasiak, ya aliling to et manaakar ya akatabin ed si Jehova, ya ontatalineng ed karunongan to tan amtak a simamaaron iimanoen to ak? Kasin say pakaamtan sikatoy wadtan et mangaapekta ed saray nononoten ko, ibabalikas ko, tan ed saray gagawaen ko? Tan sano alingo ak, ipapasen ko kasi si Jehova bilang agmangiyaansakit tan maruksan Dios, odino kasin sikatoy momoriaen ko bilang maaro, matamoy, tan mapangasin Ama a malabay ya ontulong ed saray magbabawi pian napapawil day maapit a siglaotan ed sikato?’​—Sal. 51:17.

6. Antoy bentaha nen Jehova no ikompara ed saray toon ateng?

⁶ Walaray panaon a si Jehova et ontutulong ed sikatayo antis ni labat a makagawa itayoy lingo. Singa bilang, nayarin naobserbaan to a say puso tayon walay tendensian magmaliw a manamalingo et onggagapo lan manpilalek ed saray bengatlan makapuy. (Jer. 17:9) Diad ontan a situasyon, sarag toy onkiwas a mas masakbay nen say nagawaan na atateng lapud saray “mata to” et walaan na abilidad ya onnengneng ed inkatoo tayo, pian usisaen no antoray walad kanonotan tayo. (Sal. 11:4, NW; 139:4; Jer. 17:10) Imanoen pa no antoy reaksion na Dios ed sakey a situasyon ed bilay nen Baruc, say sekretaryo tan maapit a kaaro nen propeta Jeremias.

Sakey a Maaron Ama ed si Baruc

7, 8. (a) Siopa si Baruc, tan antoray makapuy a pilalek a nayarin onggagapo lan ontubo ed puso to? (b) Panon ya impatnag nen Jehova so panangiyansakit to bilang ama ed si Baruc?

⁷ Si Baruc et sakey ya eksperton taga-kopya na Kasulatan a matoor a nanlingkor a kaiba nen Jeremias ed sakey a mairap a kimey, salanti, say panangiyabawag na panangukom nen Jehova diad Juda. (Jer. 1:18, 19) Walay panaon a si Baruc, a nayarin nanlapud prominentin pamilya, et ginmapon manpilalek ed saray “baleg a bengatla” parad inkasikato. Nayari pa lagin inabuloyan ton ontubo ed puso to iray sinisiblet ya ambisyon odino say pilalek ya onyaman. Antokaman ni ditan so makasengeg, anengneng nen Jehova a sayan mapeligron panagnonot et onlelesa la ed puso nen Baruc. Inimanon tampol iya nen Jehova tan akisalita ed si Baruc panamegley nen Jeremias, ya inkuan To: “Sika inkuan mo, Abagey ak la! Natan ta si Jehova inyarum to so ermen ko ed irap ko; naksawan ak ed pantagleey ko, et agak makaromog na painawa.” Insan inkuan na Dios: “Anapen mo so saray baleg a bengatla a nipaakar ed sika lanlamang? Agmo ra anapen.”​—Jer. 45:1-5.

⁸ Anggaman mapekder so impamilin nen Jehova ed si Baruc, ginawa To itan ya anggapoy pasnok tan diad paraan a napatnagan so peteg a  panangiyansakit To bilang sakey ya ama. Mapatnag, naimano na Dios ya aliwan marelmeng odino mapalikdo so puso nen Baruc, anggaman sikatoy walaan na pilalek a nayarin pankaugsan to. Amta met nen Jehova a magano lay kaderal na Jerusalem tan Juda, tan agto labay a nalingo si Baruc ed satan a mapeligron panaon. Kanian pian naliing ed katuaan so lingkor to, impanonot na Dios ed sikato a “yakar [To] naani mauges ed amin a laman,” ya inyarum To ni, a no onkiwas a makabat si Baruc, niliktar so bilay to. (Jer. 45:5) Singa oniay imbaga na Dios: ‘Magmaliw ka pan realistiko, Baruc. Nonot mo pa no antoy magano lan nagawa ed sayan makasalanan a Juda tan Jerusalem. Mansiansia kan matoor pian manbilay ka! Salimbengan ta ka.’ Seguradon tinmanek ed puso nen Baruc so imbaga nen Jehova, ta inuman toy panmoria to tan aliktaran toy inkaderal na Jerusalem, ya agawa kalabas na 17 a taon.

9. Antoy ebat mo ed saray tepet ed parapo?

⁹ Legan mon momorekdeken so nipaakar ed si Baruc, nonoten pa so onggendan iran tepet tan teksto: Anto so naaralan tayo nipaakar ed si Jehova tan say liknaan to ed saray lingkor to diad samay impideneng to ed si Baruc ? (Basaen so Hebreos 12:9.) Natan ta manbibilay tayo la ed kritikal a panaon, antoy naaralan tayo’d samay simbawa na Dios ed si Baruc tan say inkiwas nen Baruc ed satan a simbawa? (Basaen Lucas 21:34-36.) Bilang panangalig ed si Jeremias, panon met a nipatnag na saray mamatatken so panangiyansakit nen Jehova ed saray lingkor To?​—Basaen so Galacia 6:1.

Inalig na Anak so Panangaroy Ama to

10. Akin et sarasarag nen Kristo a sumpalen so betang to bilang say Ulo na Kristianon kongregasyon?

¹⁰ Sakbay na Kristianon panaon, napatnagan so panangaro nen Jehova ed saray totoo to panamegley na saray propeta tan arum a matoor a lingkor to. Diad sayan panaon tayo balet, nagkalalo lan sankanengneng itan a panangaro diad panamegley nen Jesu-Kristo, say Ulo na Kristianon kongregasyon. (Efe. 1:22, 23) Kanian diad Apocalipsis, adeskribe si Jesus bilang kordero a walaay ‘pitoran mata, a sikara so pitora ya espiritu na Dios, a nibaki ed lapag na dalin.’ (Apo. 5:6) On, talagan ayadyari so pakatebek nen Jesus lapud sikatoy pinagamoran na kompleton pakayari na masanton espiritu na Dios. Nanenengneng to met so walad puso tayo, tan amta toy amin a nagagawa.

11. Anton betang so sumpalen nen Jesus, tan panon a say awawey to ed sikatayo et singa met ed awawey na Ama to?

¹¹ Singa si Jehova, si Jesus et aliwan sakey a pulis a walad tawen a manguusisa ed sikatayo. Noagta babantayan to itayo bilang sakey a maaron ama. Sakey ed saray titulo nen Jesus ya  “Andi-anggaan ya Ama” so mangipanonot ed sikatayo ed betang a sumpalen to, salanti, say pangipagamor na andi-anggaan a bilay ed amin na saramay mangipapatnag na pananisia ed sikato. (Isa. 9:6) Kaaruman ni, bilang Ulo na kongregasyon, sarag nen Kristo a pakiwasen iray mabulos, matatken la’d espiritual ya agagi, nagkalautla ed saray elder pian ligliwaen odino simbawaen iramay mankaukolan.​—1 Tes. 5:14; 2 Tim. 4:1, 2.

12. (a) Anto so ipapatnag na saramay sulat ed pitoran kongregasyon diad Asia Minor nipaakar ed si Jesus? (b) Panon a nisisindag na saray mamatatken so awawey nen Kristo ed kongregasyon na Dios?

¹² Say aralem ya interes nen Kristo ed kongregasyon et napatnagan diad saramay sulat to ed saray mamatatken ed pitoran kongregasyon diad Asia Minor. (Apo. 2:1–3:22) Diad saratan a sulat, napatnagan ya amta nen Jesus so nagagawa’d kada kongregasyon tan pirmi so panangiyansakit to ed saray papatumbok to. Saya et nagkalalon onaplika ed panaon tayo lapud say pasingawey ed Apocalipsis et nasusumpal kaleganan na “agew na Katawan.” * (Apo. 1:10) Kaslakan a nibabalikas so panangaro nen Kristo panamegley na saray mamatatken, a manlilingkor bilang managpastol na kongregasyon. Sarag ton pakiwasen irayan “langkap ed saray totoo” pian manligliwa, mamaseseg, odino manimbawa no nakaukolan. (Efe. 4:8; Gawa 20:28; basaen so Isaias 32:1, 2.) Kasin sarayan sagpot da et ipapasen mon panangipatnag nen Kristo na personal ya interes to’d sika?

Tulong ed Dugan Panaon

13-15. Panon so nayarin pangebat na Dios ed saray pikakasi tayo? Mangiter na saray alimbawa.

¹³ Asalim ta lay nampikasi na impasya parad tulong tan naebatan itan panamegley na makapaseseg ya imbisita na sakey ya eksperiensyadon agi? (Sant. 5:14-16) Nayarin akaawat ka met na tulong panamegley na paliwawa ed Kristianon pantitipon odino panamegley na impormasyon a walad saray publikasyon tayo. Mabetbet a diad onia ran paraan so pangeebat nen Jehova ed saray pikakasi tayo. Singa bilang, kayari aral, sakey ya agin bii ya abiktima na graben ag-inkahustisya ed apalabas iran simba so sinmingger ed samay nampaliwawan elder. Imbes ya ibaga toy problema to, imbalikas toy baleg ya apresasyon ed pigaran makasulatan iran punto ya asaglawi ed paliwawa na elder. Dugaruga iratan ed situasyon to tan talagan sikatoy aligliwa. Agaylay liket to lapud sikatoy presente diad saman ya aral!

¹⁴ No nipaakar ed naaawat tayon tulong panamegley na pikakasi, imanoen pay alimbawa na taloran lalaki a walad prisoan. Akabatan da so katuaan diad prisoan tan nagmaliw iran agbautismadon manangipalapag. Lapud walay agawan impanlalaban, nipaakseb iray kaaruman a panameget ed amin a priso. Nansyodot iray priso tan ginapoan day manprotesta. Denesidi na saray priso a diad kaimbuasan kayari almusal et agda ipawil so anganan dan plato, bilang panangipatnag na panagrebelde ra. Kanian namproblema irayan taloran agagi. No mibali ra’d panagrebelde, nasumlang da so bilin nen Jehova a naromog ed Roma 13:1. Balet sano ag-ira mibiang ed satan, seguradon bawian ira na saray sinmanok a priso.

¹⁵ Lapud agla ra akapantotongtong ed saman, say ginawa ra et nampikasi ira pian nawalaan iray kakabatan. Kaimbuasan to, akabatan da a say desisyon da manaya et parpareho, salanti, ag-ira mangalmusal. Kanian, sanen kolektaen la na saray guardia so plato, anggapo lay nepeg nin ipawil na sarayan agagi. Malikeliket ira ta say ‘Dumerengel  na pikakasi’ so wadtan a naynay ya ontatalineng!​—Sal. 65:2.

Onnengneng ed Arapen Tekep na Kompiyansa

16. Panon ya ipapatnag na panagpulong a kimey so panangiyansakit nen Jehova ed saray mapaabeba tan matulok a totoo?

¹⁶ Say panagpulong a kimey ed sankamundoan et sakey nin ebidensyay panangiyansakit nen Jehova ed saray matuan impanpuso a totoo, inerman so panaayaman da. (Gen. 18:25) Mabetbet, diad panamegley na saray anghel et iwawanwan nen Jehova iray lingkor to pian naromog iray mapaabeba tan matulok a totoo​—anggan saraya et walad lugar ya agni apasabian na maong a balita. (Apo. 14:6, 7) Alimbawa, panamegley na anghel et indirehi na Dios si Felipe, sakey ya ebanghelisador nen inmunan siglo, pian laen tan anapen so Etiopen opisyal tan ipaliwawa ed sikato so Kasulatan. Anto so resulta? Inawat na sayan laki so maong a balita tan nagmaliw a bautismadon patumbok nen Jesus. *​—Juan 10:14; Gawa 8:26-39.

17. Akin et agtayo nepeg a manpagan maong nipaakar ed arapen?

¹⁷ Legan a manasingger so kasampotan na sayan sistema, mantultuloy ni so nipasakbay a “kairapan.” (Mat. 24:8) Singa bilang, ombibili iray sasaliwen lapud ombabaleg a pankaukolan, agmarakep a kipapasey panaon, odino lapud ag-inkaligen na ekonomya. Nayarin mas onirap ni so pananap na trabaho, tan nayarin saray empleyado et napilitan a mantrabaho na mas andukey ya oras. Balet antokaman so nagawa, agnepeg a manpagan maong so amin na saramay mangiyuuna ed panaglingkor da’d si Jehova tan walaan na simpli odino ‘maralus a mata.’ On, lapud amta ran inaro tan asikasoen ira na Dios. (Mat. 6:22-34) Imanoen pa no panon ya intarya nen Jehova so pankaukolan nen Jeremias diad samay magulon panon nen 607 B.C.E., sanen angangga so Jerusalem.

18. Panon a pinaneknekan nen Jehova so panangaro to ed si Jeremias legan a sasakopen so Jerusalem?

¹⁸ Kaleganan na samay pansamposampot na panasakop na Babilonia ed Jerusalem, inkulong si Jeremias ed Saban na Bantay. Pangalaan toy naakan to ey? No sikatoy bulos komon, makapananap na tagano. Balet diad sayan pankanawnawa et sikatoy sigpot ya akadepende ed no antoy iter na saramay wadman ya akapaliber ed sikato, a kaslakan et saramay mamubusol ed sikato! Anggaman ontan, siansian nanmatalek si Jeremias, aliwan diad saray totoo noagta ed Dios ya angisipan a mangasikaso ed sikato. Kasin tinoor nen Jehova itan a sipan? Siempre! Sinegurado na Dios ya inagew-agew a makaawat si Jeremias na “sankabukel a tinapay . . . angga ed say amin a tinapay ed syudad [et] naupot.” (Jer. 37:21) Si Jeremias, ontan met di Baruc, Ebed-melec, tan arum ni ra et akaliktar ed satan a panaoy eras, sakit, tan ipapatey.​—Jer. 38:2; 39:15-18.

19. Legan tayon tatalaranan so arapen, anto so nepeg a determinasyon tayo?

¹⁹ On, talagan ‘saray mata na Katawan a Jehova et walad saray matunong, tan saray layag to et imatleken to so pikakasi ra.’ (1 Ped. 3:12) Agmo ta panliliketan a babantayan ka na mangatatawen ya Ama tayo? Agta naliliknam so inkaligen ta antam a babantayan to ka parad pankaabigan mo? Magmaliw itayo sirin a determinadon mantultuloy a manakar a kaiba so Dios​—antokaman so nagawa’d arapen. Makaseguro itayo a mansiansian akabantay so mata nen Aman Jehova ed amin na saray manmamatoor ed sikato.​—Sal. 32:8; basaen so Isaias 41:13.

[Saray paimano ed leksab]

Kasin Nipaliwawa Yo?

• Panon tayon nipanengneng a manaakar itayon kaiba so Dios?

• Panon ya impatnag nen Jehova so panangaro to ed si Baruc?

• Bilang Ulo na kongregasyon, panon a nisisindag nen Jesus iray kalidad na Ama to?

• Diad antoran paraan a nipatnag tayon manmamatalek itayo ed Dios diad sarayan mapeligro a panaon?

[Tepetepet Parad Panagaral]

[Saray litrato ed pahina 9]

No panon ya impatnag nen Jeremias so panangiyansakit nen Jehova ed si Baruc, ipapatnag met na saray elder natan so panangiyansakit nen Jehova

[Litrato ed pahina 10]

Panon a mangitatarya si Jehova na tulong ed dugan panaon?