Kasin Marlas so Panagsalita Yo ed “Malinis a Lenguahe”?

I-PLAY

Kasin Marlas so Panagsalita Yo ed “Malinis a Lenguahe”?

“Iter ko ed saray totoo a kasalat so sakey a malinis a lenguahe, ta pian amin da et ontawag ed ngaran nen Jehova.”—SOF. 3:9, NW.

1. Anton alay abig a regalo so inter nen Jehova ed sikatayo?

SAY Manamalsa tayo, si Jehova a Dios, so nanlapuan na lenguahe, aliwan say too. (Exo. 4:11, 12) Inikdan to so sankaunaan a too, si Adan, na abilidad ya aglambengat mansalita noagta makapawala met na balo iran termino pian napalaknab toy bukabolaryo to. (Gen. 2:19, 20, 23) Talagan alay abig iyan regalo! Lapud saya et nagmaliw ni ingen a posible so pitongtong ed mangatatawen ya Ama tayo tan pangidayew ed maglorian ngaran to.

2. Akin ya aliwa lan saksakey a lenguahe so uusaren na totoo?

² Diad loob na 17 a siglo manlapud inkapalsa na too, “saksakey a nengneng [na] panagbalikas” odino lenguahe so uusaren. (Gen. 11:1) Ingen, diad panaon nen Nimrod et ginmapoy panagrebelde. Misunian ed saray bilin nen Jehova, sarayan matungangan totoo et nandaragup ed Babel, lapud determinado iran mansiansia ed saksakey a lugar. Sikaray ginmapon angipaalagey na baleg ya ilang odino tori, aliwan pian idayew si Jehova noagta pian “manggawa . . . na sakey a ngaran a kirayewan” da. Lapud saya, winetwet nen Jehova so orihinal a lenguahe ra, a nanresulta ed nanduruman lenguahe. Kanian, nikaykayat ira ed tapew na dalin.—Basaen so Genesis 11:4-8.

3. Anto so agawa sanen winetwet nen Jehova so pansasalita na saramay rebelde ed Babel?

³ Natan et masulok ya 6,800 a lenguahe so sasalitaen ed interon mundo. Balang sakey ed saraya et mankaukolan na duman paraan na panagnonot. Kanian, mapatnag a sanen pinanduruma nen Jehova a Dios so lenguahe na saraman a rebelde, inekal ton amin ed nonot da imay datin salita ra. Sikatoy aglambengat angikarga na balon bokabularyo ed nonot da, noagta sinalatan to met so paraan na panagnonot tan amawala na balo iran gramatika. Agsirin pankelawan a say impanawag ed pasen ya angiletnegan ed satan a tori et Babel, a mankabaliksan na impakawetwet! (Gen. 11:9) Makapainteres ta say Biblia labat so angiter na makapnek a paliwawa ed nanlapuan na nanduruman lenguahe a sasalitaen natan.

Sakey a Balo, Malinis a Lenguahe

4. Anto so impasakbay nen Jehova a nagawa ed panaon tayo?

⁴ Anggaman balibali so impangisalaysay na Biblia nipaakar ed insalet na Dios ed Babel, wala ni so mas makapainteres tan importante ya agawa ed panaon tayo. Panamegley nen propetan Sofonias, oniay impasakbay nen Jehova: “Diad satan iter ko ed saray totoo a kasalat so sakey a malinis a lenguahe, ta pian amin da et ontawag ed ngaran nen Jehova, ta pian benebenek iran manlingkor ed sikato.” (Sof. 3:9, NW) Anto iyan “malinis a lenguahe,” tan panon tayon napagmaliw a marlas so panagsalita ed saya?

5. Anto so malinis a lenguahe, tan antoy resulta sanen insalat iya?

⁵ Say malinis a lenguahe et say katuaan nipaakar ed si Jehova a Dios tan say gagala to a naromog ed Salita to, say Biblia. Kalaktip na sayan “lenguahe” so suston pakatalos nipaakar ed Panarian na Dios tan no panon a napasantos na satan so ngaran nen Jehova, niyalangon so inkasoberano to, tan itarok so andi-anggaan a bendisyon ed saray matoor a totoo. Antoy resulta sanen insalat iyan lenguahe? Unong a kabat tayo la, saray totoo et “ontawag ed ngaran nen Jehova” tan “benebenek iran manlingkor ed sikato.” Misunian ed agawa’d Babel, sanen insalat iyan malinis a lenguahe, nanresulta iya ed inkirayew na ngaran nen Jehova tan pankakasakey na saray lingkor to.

Aaralen so Malinis a Lenguahe

6, 7. (a) Anto so nakaukolan ed panagaral tayo na balon lenguahe, tan panon iyan onaplika ed panagaral na malinis a lenguahe? (b) Anto so konsideraen tayo natan?

⁶ No labay na sakey so manaral na arum a lenguahe, mas ni so kaukolan to nen say basta pangipatlep labat ed saray salita. Lalanoren na saya so panaral ed saray balon paraan na panagnonot. Diad arum a lenguahe et nayarin duma so panagkatunongan tan panagpaelek da. Say panangibalikas ed balo iran salita et mankaukolan na panangumay pangusar ed saray organo na panagsalita, a singa say dila. Tua met iya no onggapo itayon manaral na malinis a lenguahe manlapud katuaan a walad Biblia. Aliwan magenap so basta panaral ed pigaran manunan bangat na Biblia. Nakaukolan so pamasimbalo tan panguman ed panagnonot tayo no kaliktan tayon nakabisadon maong iyan balon lenguahe.—Basaen so Roma 12:2; Efeso 4:23.

⁷ Anto so ontulong ed sikayo pian aglambengat natalosan so balon lenguahe noagta magmaliw met a marlas ed panagsalita ed satan? Singa met ed panagaral na anggan anton lenguahe, walaray manunan paraan a makatulong ed sikatayo pian marlas a makapansalita na katuaan a walad Biblia. Konsideraen tayo so pigara ed saray manunan kundang a gagawaen na saray totoon manaaral na arum a lenguahe. Insan tayo nengnengen no panon irayan makatulong ed sikatayo a naaral so balon piguratibon lenguahe.

No Panon a Salitaen a Marlas so Malinis a Lenguahe

8, 9. Anto so nepeg tayon gawaen no labay tayon aralen so malinis a lenguahe, tan akin ya im-importante iya?

⁸ Ondengel a maong. Siempre diad gapo, say balon lenguahe et agnatalosan ta agmet lanti narerengel itan. (Isa. 33:19) Balet no say sakey et ondengel a maong, kalkalnan ton nibiig iray pigaran salita tan naimano toy inkaalasir na saratan. Mipadparad satan et napapanonotan itayo: “Nepeg ya imatleken tayo ed baleg a seseg so saray bengatlan nadngel tayo, ta ompan lamang no niagus tayo a manlapu ed sikara.” (Heb. 2:1) Aminpigan pinanonotan nen Jesus iray papatumbok to: “Say walaan na saray layag a pandengel, ondengel komon.” (Mat. 11:15; 13:43; Mar. 4:23; Luc. 14:35) On, kaukolan tayon talinengen tan “talosan” a maong iramay narerengel tayo, pian onaligwas so pakatalos tayo ed malinis a lenguahe.—Mat. 15:10; Mar. 7:14.

⁹ Say pandengel et mankaukolan na konsentrasyon, ingen makagunggona itan. (Luc. 8:18) Sano wala itayo ed saray miting, kasin iimanoen tayon maong iray paliwawa, odino main-inomay a nibalang so atension tayo? Talagan importante a pansiansiaen so imano tayo ed saray nipapaliwawa. Ta no andi, nipasal tayo lay ag-ondengel.—Heb. 5:11.

10, 11. (a) Anto ni so kaukolan tayon gawaen nilikud ed italineng a maong? (b) Anto ni nalalanor ed pansalita na malinis a lenguahe?

¹⁰ Aligen iramay marlas a mansalita. Napapaseseg iray manaaral na balon lenguahe ya aglabat ondengel a maong, noagta salien da met ya aligen so panangibalikas tan alasir na panagsalita na saramay marlas a mansalita. Ontulong iya ed sikara pian diad saginonor et mainomay la ran makapitalosan tan napaliisay pakawalaan na duman punto odino panangibalikas. Mipadparad satan, kaukolan met a makaaral itayo ed saramay mikabisado la ed “dunong ed panagbangat” ed sayan balon lenguahe. (2 Tim. 4:2, NW) Onkerew itayo na tulong, tan sano nalingo et awaten iray panangorehi.—Basaen so Hebreos 12:5, 6, 11.

¹¹ Say pansalita na malinis a lenguahe et lalanoren toy pangitunos na kondukta ed saray ganggan tan prinsipyo na Dios, ya aliwa labat lan panisia ed katuaan tan pangibangat ed satan. Makatulong so pangalig ed arum pian nagawaan itan. Kalaktip ed satan so pangalig ed pananisia tan seseg da. Ontan met ed pangalig ed interon impanbilay nen Jesus. (1 Cor. 11:1; Heb. 12:2; 13:7) No itultuloy tayon gawaen itan, niwala so pankakasakey ed limog tayo ran totoo na Dios, tan singa aabuloyan iran mansalita na saksakey a lenguahe.—1 Cor. 4:16, 17.

12. Panon a nalalanor so pangipatlep ed panaral na balon lenguahe?

¹² Ipatlep. Dakel so kaukolan ya ipatlep na saray manaaral na balon lenguahe. Kalaktip ed saya iray balon bokabularyo tan balikas. Parad saray Kristiano, balbaleg so naitulong na pangipatlep pian nakabisado iyan malinis a lenguahe. Maabig no nipatlep tayo iray libro na Biblia unong ed inkaalasir da. Ginawan kalat na arum so pangipatlep ed ibabaga na pigaran teksto odino say pakaromogan na saray espisipikon teksto. Agunggonaan so arum ed impangipatlep na saray Kingdom song, kangaranan na saray tribu ed Israel, tan saray 12 apostol, ontan met ed saray kalidad a manutugyop ed bunga na espiritu. Nensaman, impapuso na saray Israelita so impangipatlep ed saray salmo. Diad sayan panaon tayo, walay sakey ya ugaw a laki a sanen sikatoy mantaon ni labat na anemira et asarag ton impatlep a salita-por-salita so 80 teksto ed Biblia. Panon tayo kasin nagkalalo nin nausar iyan makanakanan dunong?

13. Akin a talagan importante so panangulit?

¹³ Say panangulit et ontulong ed memorya, tan say maparanay a panonot et makanakana ed panagaral tayo bilang Kristiano. Inkuan nen apostol Pedro: “Sipaparaan ak lawas a mangipanonot ed sikayo ed sarayan bengatla, anggan amta yo ra tan maligen kayo ed sayan katuaan a walad sikayo.” (2 Ped. 1:12) Akin a kaukolan tayoy napanonotan? Lapud paaralemen na saya so pakatalos, palaknaben toy panmoria tayo, tan pabiskegen toy determinasyon tayon mantultuloy ya ontulok ed si Jehova. (Sal. 119:129) Say mabetbet a panrepaso ed saray estandarte tan prinsipyo na Dios so ontulong ed sikatayon usisaen so inkasikatayo tan labanan so tendensian magmaliw a “maililingwan a dumerengel.” (Sant. 1:22-25) No agtayo panonotay inkasikatayo ed katuaan, walaray arum a bengatla a mangimpluensya ed puso tayo tan ompan agtayo la marlas a makapansalita na malinis a lenguahe.

14. Anto so ontulong ed sikatayo sano aaralen tayo so malinis a lenguahe?

¹⁴ Manbasan maksil. (Apo. 1:3) Walaray estudyante a sasalien day manaaral na sananey a lenguahe a diad nonot da lambengat, balet ag-iya mamawala na maabig iran resulta. Sano manaaral na malinis a lenguahe, say pambasa diad “makalnan boses” so ontulong pian niyapasakey so imano tayo. (Basaen so Salmo 1:1, 2. *) Ipaslep na saya ed kanonotan tayo iray bengatlan babasaen tayo. Say Hebreon salitan “basaen ed makalnan boses” et miulibayan ed salitan mandalepdep. Niyaliling itan ed pangan na tagano, a kaukolan a nagiling pian minabang tayon maong. Ontan met, kaukolan so pandalepdep pian malinlinew tayon natalosan iray binasa tayo. Kasin mangigagana itayo na magenap a panaon pian dalepdepen a maong iray naaralan tayo? Kayarin binasay Biblia, kaukolan a dalepdepen tayon maong iray abasa tayo.

15. Panon tayon naaralan so “gramatika” na malinis a lenguahe?

¹⁵ Analisaen so gramatika. Makagunggona met so panaral ed gramatika odino inkaalasir na salita, tan saray totontonen ed balon lenguahe ya aaralen tayo. Ontulong iya ed sikatayon talosan no panon a naalasir iray termino, pian dugay pangisalita tayo. Singa met ed sakey a lenguahen walaan na naalasir iran salita, say malinis a lenguahe na katuaan manlapud Biblia et walaan met na “uliran na saray maabig a salita.” (2 Tim. 1:13) Kaukolan tayon aligen itan ya “uliran.”

16. Anton tendensia so kaukolan tayon talonaan, tan panon tayon nagawaan iya?

¹⁶ Mantultuloy ya onaligwas. Ompan sarag la na sakey so makapitongtong ed arum lapud naaralan to iran termino, balet ta tinmunda lan mamaaligwas ed inkasikato. Nayarin onlesa met iyan problema ed saramay mansasalita na malinis a lenguahe. (Basaen so Hebreo 5:11-14.) Anto so ontulong ed sikatayon napaliisan iyan tendensia? Mabulos a palaknaben so “bokabularyo” tayo. ‘Natan ta tinundaan tayo la so saray unonan bangat nen Kristo, tan ontuloy itayo ed inkayadyari, ya ag-itayo mangiyan lamet na pangipaletnegan, salanti, say panagbabawi ed saray gawa ya inatey, tan say pananisia ed Dios, say bangat ed bautismo tan say panangitapew ed saray lima, tan say kioli ed bilay na saray inaatey, tan say kaukom ya andi-anggaan.’—Heb. 6:1, 2.

17. Akin ya importante so regular a panagaral? Iyilustra.

¹⁷ Mangigana na permanentin eskedyul ed panagaral. Saray antikey, balet regular a panagaral et magmaong ni nen say tunggal paminsan ya andukey a panagaral. Balibali so panaral no ag-itayo makakaugip tan agnadidisturbo. Say panaral na balon lenguahe et aliling toy manggagawa itayo na basbas ed takel. No mabetbet tayon dadalanen so basbas, mas mainomay la itan a nadalan. No abayag lan agnadadalan so basbas, natabonan la itan na dikarika. Kanian nakaukolan so inkaseet tan inkamaparanay! (Dan. 6:16, 20) Kanian sipipikasi tan “mansiansian aliing tekep na inkapekder” nagkalalo la’d pansalita na malinis a lenguahe na katuaan na Biblia.—Efe. 6:18, NW.

18. Akin a nepeg tayon salitaen so malinis a lenguahe diad amin a pankanawnawa?

¹⁸ Mansalita! Mansalita! Mansalita! Arum ed saray manaaral na balon lenguahe et nababaingan tan natatakot a mansalita ta ompan nalingo ira. No agda itan talonaan, ag-ira onaligwas. Sirin, talagan kakkaukolan so panagpasal no manaaral itayo na balon lenguahe. Legan a maparanay a sasalitaen na estudyante so balon lenguahe, sikatoy magmaliw ya onsiano ed panangusar ed satan. Mipadpara, kaukolan tayo met a salitaen so malinis a lenguahe diad amin a pankanawnawa. “Say too sisiaen to ed puso to so katunongan; tan say sangi so manggawa na panangipatua [ed publiko ya] onkana ed kilalaban.” (Roma 10:10) Say “panangipatua” tayo ed publiko et aliwa labat a sanen abautismoan tayo, noagta nagawaan met iya sano itotongtong tayo so nipaakar ed si Jehova diad amin a pankanawnawa, kaiba lay panagministeryo. (Mat. 28:19, 20; Heb. 13:15) Makatulong ed sikatayo so Kristianon pantitipon pian nibalikas iray malinew tan antikey a salita diad malinis a lenguahe.—Basaen so Hebreos 10:23-25.

Mankakasakey ya Usaren so Malinis a Lenguahe Pian Idayew si Jehova

19, 20. (a) Anton nikadkaduman bengatla so agawaan na saray Tasi nen Jehova ed panaon tayo? (b) Anto so determinado yon gawaen?

¹⁹ Talagan makapalikliket no wadman itayo ed Jerusalem diad samay Simba na kabuasan, Sivan 6, taon 33 C.E.! Diad saman a kabuasan, sakbay na alas nuebe, saramay nantitipon diad silir ed tagey et ‘ginmapon nansalita na salitan nagsikasikmat’ odino nanduruma. (Gawa 2:4) Diad panaon tayo et agla mamilagron makapansalita na nanduruman lenguahe iray lingkor na Dios. (1 Cor. 13:8) Anggaman ontan, saray Tasi nen Jehova et mangiyaabawag na maong a balita na Panarian ed masulok a 430 a lenguahe.

²⁰ Misalsalamat tayo ta antokaman so lenguahen sasalitaen tayo, nankakasakey itayo a mansasalita na malinis a lenguahe na katuaan a walad Biblia! Nibagan kabaliktaran iya na samay agawa diad Babel. Saray totoo nen Jehova et mangidadayew ed ngaran to, a singa saksakey so lenguahe ra. (1 Cor. 1:10) Magmaliw tayo komon a determinadon manlingkor a “benebenek,” a kaiba iray agagi tayo ed interon mundo. Tan idayew tayo so mangatatawen ya Ama tayo, si Jehova, legan tayon aaralen no panon a salitaen a marlas so saksakey a lenguahe.—Basaen so Salmo 150:1-6.

[Paimano ed Leksab]

^ par. 14 Salmo 1:1, 2 (NW): “Maliket so too ya agnankurang ed simbawa na saray mauges, tan diad dalan na saray managkasalanan et agto inmalagey, tan diad yurongan na saray managbalaw et agto yinmurong. Noag say panliketan to et say ganggan nen Jehova, tan babasaen to ed makalnan boses so ganggan to diad agew tan labi.”

Panon Yon Ebatan?

• Anto so malinis a lenguahe?

• Anto so nakaukolan pian makapansalita itayo na malinis a lenguahe?

• Anto so ontulong ed sikatayo pian marlas a makapansalita na malinis a lenguahe?

[Tepetepet Parad Panagaral]

[Kahon ed pahina 23]

Magmaliw a Marlas so Panagsalita Yo ed Malinis a Lenguahe Panamegley na

◆ idengel a maong.

Luc. 8:18; Heb. 2:1

◆ pangalig ed saray marlas a mansalita.

1 Cor. 11:1; Heb. 13:7

◆ pangipatlep tan panangulit.