Akin et Importante so Panagkabkaabungan Natan?

“Inagew-agew ed templo tan ed saray kaabungan, ag-ira tinmunda a nambabangat tan nampupulong a si Jesus et Kristo.”​—GAWA 5:42.

1, 2. (a) Saray Tasi nen Jehova so kabkabat ed anton metodo na panagpulong? (b) Anto so aralen tayo ed sayan artikulo?

 DIAD amin lawarin nasyon et pamilyar la itan. Duaran too ya akakawes na desente so onla ed sakey ya abung tan panseetan dan inabang so antikey a mensahen manlalapud Biblia nipaakar ed Panarian na Dios. No say katongtong da et interesado, ikdan da na base ed Biblia a literatura tan iyopresi ra so anggapoy bayar a panagaral na Biblia. Insan ira onla ed ontumbok ya abung. No mibibiang ka ed sayan kimey, nayarin naiimanom ya anggano agka ni nansalita et amta la na totoo a sakey ka ed saray Tasi nen Jehova. On, nagmaliw lan pakabidbiran tayo so panagkabkaabungan a ministeryo.

² Nandurumay uusaren tayon metodo odino paraan pian nasumpal so ingganggan nen Jesus a pampulong tan panggaway babangatan. (Mat. 28:19, 20) Manpupulong itayo ed saray tindaan, diad saray gilig na karsada, tan arum ni ran matoon pasen. (Gawa 17:17, NW) Dakel so napupulongan tayo panamegley na telepono tan sulat. Inanabang tayo ray katuaan na Biblia ed totoon napipidenengan tayo ed inagew-agew. Wala ni ingey opisyal a Web site tayo a napangalaan na base ed Biblia ya impormasyon diad masulok a 300 a lenguahe. * Amin irayan metodo et mamapawala na maabig iran resulta. Anggaman ontan, diad kaslakan a pasen, say manunan paraan ya uusaren tayo pian nikayat so maong a balita et say panagkabkaabungan. Anto so basiyan ed sayan metodo na panagpulong? Panon a ginmapon malaklaknab ya inusar na saray totoo na Dios natan iyan metodo? Tan akin et importante iya natan?

Paraan ya Inusar na Saray Apostol

3. Anto so imbilin nen Jesus ed saray apostol nipaakar ed panagpulong, tan anto so ipapabitar na saya ed paraan na pampulong da?

³ Say metodon panagpulong ed kabkaabungan et base ed Biblia. Sanen imbaki nen Jesus a manpulong iray apostol, oniay imbilin to ed sikara: “Ed anggan dinan a syudad ono baley a looban yo, anapen yod’man no siopa so makana.” Panon dan anapen iray makana odino makanepegan? Imbaga nen Jesus ed sikara ya onla ra ed kaabungan na totoo. Inkuan to: “Sano onloob kayo ed abung, sikato so igalang yo. Et no say abung makana, onla’d sikatoy kareenan yo.” Alagaren da ni kasin sikaray imbitaan antis iran onla? Imanoen pay kaaruman nin imbaga nen Jesus: “Siopaman ya agmangawat ed sikayo, tan agto dengelen so saray salita yo, no ompaway kayo ed satan ya abung odino satan a syudad, pagpagen yo ray dabok na saray sali yo.” (Mat. 10:11-14) Impalinew na sarayan instruksion a sanen ‘linma iray apostol ed amin a binaleybaley, ya angipulong ed ebanghelyo’ et sikara lay nambulon a binmisita ed totoo diad kaabungan da.​—Luc. 9:6.

4. Iner ed Biblia espisipikon sinalambit so panagkabkaabungan?

⁴ Espisipikon sinalambit na Biblia a saray apostol so nampulong ed kabkaabungan. Alimbawa, oniay inkuan na Gawa 5:42 nipaakar ed sikara: “Inagew-agew ed templo tan ed saray kaabungan, ag-ira tinmunda a nambabangat tan nampupulong a si Jesus et Kristo.” Manga 20 taon kayari na satan, pinanonotan nen apostol  Pablo iray mamasiken ed kongregasyon na Efeso: “Anggapo so antokaman a pakapinabangan yo a pinaulyan ko ya impaliwawa ed sikayo tan imbangat ko ed sikayo a lapag, tan dia ed saray kaabungan.” Antis a nagmaliw a mananisia iraman a mamasiken, kasin dinalaw nira nen Pablo? Mapatnag ya ontan lapud kabiangan ed saray imbangat to ed sikara et say “pampataoli ed Dios, tan say pananisia ed Katawan tayo a Jesu-Kristo.” (Gawa 20:20, 21) Nipaakar ed Gawa 20:20 et oniay inkomento na Word Pictures in the New Testament nen Robertson: “Sankaimano a sarayan matalonggaring a managpulong et nampulong ed kabkaabungan.”

Armada na Duron Diad Panaon Tayo

5. Panon ya indeskribe na propesiya nen Joel so panagpulong?

⁵ Say impanpulong nen inmunan siglo et pagpauna labat na mas baleg a kimey a nagawa ed panaon tayo. Say panagpulong na saray alanaan et inyaliling nen propeta Joel ed makaderal a salot na saray insekto, kaiba lay duro-duron. (Joel 1:4) Legan ya onlulusob iray duron a singa armada, talonaan da ray makasbel, onloob ira’d kaabungan, tan upoten day amin a nadalan da. (Basaen so Joel 2:2, 7-9.) Agaylan linew ya impaneskribe ed inkaseet tan sigpot a panusumpal na totoo na Dios ed panagpulong diad sayan panaon! Pian nasumpal iyan propesiya, say manunan metodo ya inusar na saray alanaan tan saray kaiba ran ‘arum a karnero’ et say panagkabkaabungan. (Juan 10:16) Panon a ginapoan ya inusar na saray Tasi nen Jehova so metodo na saray apostol ed panagpulong?

6. Nen 1922, anto so impaseseg nipaakar ed panagkabkaabungan, tan antoy reaksion na arum?

⁶ Manlapu la nen 1919, impurek so responsabilidad na balang Kristiano a pibiang ed panagpulong. Singa bilang, say isyu na Watch Tower ya Agosto 15, 1922 diad artikulon apauloan na “Importante so Serbisyo,” et pinanonotan iray alanaan nipaakar ed kakanaan na “aktibon pangibunog ed totoo na inimprintan mensahe tan pitongtong ed sikara diad kaabungan da, ya ipulong ed sikaran asingger la so panarian na tawen.” Intarya iray detalyadon presentasyon diad Bulletin (natan et Ministeryo Tayo ed Panarian). Anggaman ontan, nen inmuna et dagdaiset ni iramay talagan manpupulong  ed kabkaabungan. Arum so masuyat. Nandurumay baraan da, balet say manunan problema et lapud ipapasen na arum a kababaing so pankabkaabungan. Sanen lalon indanet so panlingkor ed lawak, dakel ed saratan so kalkalna lan sinmian ed organisasyon nen Jehova.

7. Nen dekada na 1950, anto so mapatnag a kaukolan?

⁷ Diad tinmumbok iran dekada, dinmakel so akibiang ed panagpulong. Balet, mapatnag a kaukolan so kaaruman a panangipasal ed panagkabkaabungan. Alimbawa, imanoen pay panagpulong ed Estados Unidos diad gapo na dekada na 1950. Diad satan a bansa, 28 porsiento na saray Tasi so basta mangibubunog labat la ed saray handbill odino manalagey ed saray karsada a sankaegnaan iray magasin. Masulok ya 40 porsiento so aliwan regular a makapanpupulong, a napapalabas da iray bulan ya ag-iran balot akapanpulong. Panon a natulongan so amin a dedikadon Kristiano a makapankabkaabungan?

8, 9. Anton programa a panangipasal so inggapo nen 1953, tan antoray resulta?

⁸ Diad internasyonal a kombension ed New York City nen 1953, nagkalautlan inimano so nipaakar ed panagkabkaabungan. Inkuan nen Agin Nathan H. Knorr a manunan kimey na amin a manangasikaso so panulong ed amin a Tasi pian regular a makapibiang ed panagkabkaabungan. Oniay imbaga to: “Nepeg a sarag na balang sakey ya ipulong so maong a balita ed kabkaabungan.” Pian nagawaan iya, ginapoan so interon mundo a programan panangipasal. Saramay agda ni asali mankabkaabungan so impasal ed no panoy pangigapoy tongtongan, pankatunongan manlapud Biblia, tan pangebat ed tepetepet.

⁹ Alay abig so resulta na sayan programa. Diad loob na sakey dekada, inmatagey na 100 porsiento so bilang na saray manangipalapag ed interon mundo, 126 porsiento ed panagpawil, tan 150 porsiento ed panangiyaral na Biblia. Natan et ngalngali pitoran milyon a manangipalapag na Panarian so mangipupulong ed maong a balita ed sankamundoan. Sayan makapadinayew ya inlaknab so sakey a paneknek a bebendisyonan nen Jehova so pansasagpot na totoo to ed panagkabkaabungan.​—Isa. 60:22.

Panagmarka ed Totoo Parad Kililiktar

10, 11. (a) Anto so pasingawey ed si Ezequiel, unong a nabasa ed Ezequiel kapitulo 9? (b) Panon a nasusumpal ed panaon tayo itan a pasingawey?

¹⁰ Diad pasingawey ed si propeta Ezequiel, naamtaan tayo ya importante so panagkabkaabungan a ministeryo. Anengneng nen Ezequiel ed satan a pasingawey so anemiran lalakin akaegna na ayura ontan met ed say komapiton laki ya akakawes na lienzo a walay tinteroan ed awak to. Ingganggan ed komapiton laki ya “onlabas . . . ed pegley na syudad” tan “inan [to] na tanda [odino marka] so moling na saray lalaki a mansibek tan manakis lapu ed amin a kadimlaan a nagagawa ed kapegleyan to.” Kayari na satan a kimey a panagmarka, saray anemiran lalaki ya akaegna na ayura so ingganggan a mamatey ed amin ya anggapoy marka.​—Basaen so Ezequiel 9:1-6.

¹¹ Natatalosan tayo a bilang kasumpalan na sayan propesiya, isisimbolo na laki ya “akakawes na lienzo” iray nakdaan a nilanaan na espiritu. Panamegley na panagpulong tan panaggaway babangatan, saray alanaan et simbolikon manmamarka ed saramay magmamaliw a kabiangan na ‘arum a karnero’ nen Kristo. (Juan 10:16) Anto itay marka? Say marka, a singa akaparungtal ed ag-asakbongan a kamolingan da, so paneknek a saratan a karnero et dedikado, bautismadon babangatan nen Jesu-Kristo tan insulong day mipara ed si Kristo a balon personalidad. (Efe. 4:20-24) Saratan a kinmarneron totoo so nikasakey tan mangaasisti ed saray alanaan ed importantin kimey da a panagmarka ed arum nin totoo.​—Apo. 22:17.

12. Panon a say pasingawey ed si Ezequiel nipaakar panmarka ed kamolingan so mangipapabitar ed kakanaan na kaplesan a panaanap tayo’d saray kinmarneron totoo?

 ¹² Ipaparungtal na pasingawey ed si Ezequiel so sakey a rason no akin ya ontan lay inkaganat na kaplesan a panaanap tayo ed saray totoon “mansibek tan manakis.” Nalalanor so bilay. Agmanbayag et saray armada nen Jehova ed tawen, ya irerepresenta na anemiran lalakin akaayura, so maneral ed saramay anggapoy simbolikon marka. Nipaakar ed satan a magano lan panangukom, insulat nen apostol Pablo a say Katawan a si Jesus, kaiba so ‘makapanyarin angheles to,’ so ‘ombales ed saray agmikabat ed Dios, tan dia ed saray ag-ontulok ed ebanghelyo na Katawan tayon Jesus.’ (2 Tes. 1:7, 8) Imanoen a saray totoo so ukomen base ed reaksion da ed maong a balita. Kanian nepeg ya ag-ontunda anggad anggaan so panangiyabawag ed mensahe na Dios. (Apo. 14:6, 7) Seryoson tuloy iyan responsabilidad na amin a dedikadon lingkor nen Jehova.​—Basaen so Ezequiel 3:17-19.

13. (a) Anto so impasen nen apostol Pablo a responsabilidad to, tan akin? (b) Anto so ipapasen mon responsabilidad ed saray totoo ed teritorya yo?

¹³ Impasen nen apostol Pablo a responsabilidad ton inabang so maong a balita ed arum. Insulat to: ‘Akautang ak ed saray Griego tan Barbaro, makabat tan agmakabat. Kanian, unong na wala ed siak, atadia ak a mangipakabat na ebanghelyo met ed sikayo a wala ed Roma.’ (Roma 1:14, 15) Lapud pisasalamat nen Pablo ed impangasi ed sikato, sikatoy naobligan ontulong ed arum pian nagunggonaan ira met, a singa sikato, ed agnaparaan a kaabigan na Dios. (1 Tim. 1:12-16) Singano akautang si Pablo ed balang toon nakakatongtong to, utang a nabayaran to labat no inabang to so maong a balita ed sikara. Kasin ipapasen mo met a singa ka akautang ed saray totoo ed teritorya yo?​—Basaen so Gawa 20:26, 27.

14. Anto so manunan rason na pampupulong tayo ed publiko tan diad kaabungan?

¹⁴ Anggaman importante so kililiktar na totoo, wala ni mas importantin rason na panagpulong ed kabkaabungan. Diad propesiya ed Malaquias 1:11 et inyabawag nen Jehova: “Manlapu ed leletakan na banwa angga ed seselekan say ngaran ko sikato naani so baleg ed saray Gentil; et . . . say insenso naani nipasob ed ngaran ko, tan say malinis a bagat: ta say ngaran ko sikato naani so baleg ed saray Gentil.” Bilang panusumpal ed satan a propesiya, idadayew na saray dedikadon lingkor nen Jehova so ngaran to diad interon dalin legan a mapaabeba ran gagawaen so ministeryo ra. (Sal. 109:30; Mat. 24:14) Say pangiyapay na “bagat a panangidayew” ed si Jehova so manunan rason no akin a manpupulong itayo ed publiko tan diad kaabungan.​—Heb. 13:15.

Saray Im-importantin Nagawa ed Arapen

15. (a) Panon a pinapeles na saray Israelita so kimey da a panliber ed Jerico nen komapiton agew? (b) Anto so ipapatnag na saya nipaakar ed panagpulong?

¹⁵ Anto ni nagawa ed panagpulong a kimey diad arapen? Samay agawan impangubkob ed Jerico, a nabasa ed libro a Josue, so pakalaan na ilustrasyon. Antis a tuloy a deralen na Dios so Jerico, binilin to ray Israelita a liberen dan maminsan ed sanagew so syudad, tan anem agew da itan a gawaen. Balet, diad komapiton agew et kaukolan dan pelesan so kimey da a panliber. Inkuan nen Jehova ed si Josue: “Liberen yo so syudad a maminpiton danay tan saray saserdote paknolen da so saray tambuyog. Et sikato naani, a sano paknolen da so saklor na karnero, . . . amin a baley oneyag na baleg ya eyag; et say kuta na syudad onggeba a marandantal.” (Jos. 6:2-5) Mipadparad satan, posible a wala met so nagawan  pamalaknab ed panagpulong a kimey tayo. Sano naderal la so kaplesan a sistema na bengabengatla, naimatonan tayo so sankalaknaban a pantasi ed ngaran na Dios tan ed Panarian ya agnin balot agawa ed kapiganman.

16, 17. (a) Anto so nadampot antis a mangangga so “baleg ya irap”? (b) Anto so singbaten tayo ed onsublay ya artikulo?

¹⁶ Nayarin nasabi panaon sano say mensahen iyaabawag tayo et singa “baleg ya eyag [ed guerra].” Diad Apocalipsis 16:21, indeskribe iray mapuersan mensahe na panangukom bilang “sakey a baleg ya uran a kinmigtel a balang bato, singa belat na sakey a talento.” * Tan intuloy na satan ya inkuan: “Say bakbak sikato so sankabalgan.” Agtayo ni amta no anto so betang na kimey a panagkabkaabungan diad pangiyabawag ed saraman a kapantokan a mensahen panangukom. Balet, naseseguro tayo ya antis a mangangga so “baleg ya irap,” nipakabat so ngaran nen Jehova ed paraan ya agnin balot agawa ed kapiganman.​—Apo. 7:14; Eze. 38:23.

¹⁷ Legan tayon aalagden iray im-importantin nagawa ed arapen, komon ta itultuloy tayon seetan ya iyabawag so maong a balita na Panarian. Legan tayon gagawaen itan ya asainmin, antoray naaabet tayon subok ed panagkabkaabungan, tan panon tayon natalonaan iratan? Singbaten iratan ed onsublay ya artikulo.

[Saray paimano ed leksab]

Anto so Ebat Mo?

• Anto so Makasulatan a basiyan na panagkabkaabungan?

• Panon ya impurek so panagkabkaabungan a ministeryo diad sayan panaon?

• Akin a responsabilidad na saray dedikadon lingkor nen Jehova so manpulong?

• Antoray im-importantin nagawa ed arapen?

[Tepetepet Parad Panagaral]

[Saray litrato ed pahina 4]

Singa si apostol Pablo, kasin ipapasen mon responsabilidad so pampulong ed arum?

[Litrato ed pahina 5]

Si Agin Knorr nen 1953