Itultuloy Yoy Manggawa na Maong

“Manggawa kayo na maong.”​—LUC. 6:35.

1, 2. Akin et kaslakan lan mairap so panggawa na maong ed arum?

 SAY panggawa na maong ed arum et nayarin mairap. Ompan agda babalesen so ipapanengneng tayon panangaro. Nayarin ag-ira interesado odino ag-ira mangapresya, anggano pansasagpotan tayon tulongan ira diad maseet a panginanabang “ed marakdakep a maong a balita na maliket a Dios” tan say Anak to. (1 Tim. 1:11, NW) Papaneknekan na arum a sikaray “kakabusol na panamairapan a kiew na Kristo.” (Fil. 3:18, NW) Bilang Kristiano, panon tayo ran tratoen?

² Imbaga nen Jesu-Kristo ed saray babangatan to: “Aroen yo so saray kabusol yo, tan manggawa kayo na maong ed sikara.” (Luc. 6:35) Pantongtongan tayo pa itan a simbawa. Nagunggonaan itayo met ed arum ni ran punto ya imbaga nen Jesus nipaakar ed panggawa na maong ed arum.

“Aroen Yo Ray Kabusol Yo”

3. (a) Diad dili yon salita, sumaryoen so imbaga nen Jesus ya akasulat ed Mateo 5:43-45. (b) Anton panmoria so linmesa ed saray lider na Judion relihyon nen inmunan siglo nipaakar ed saray Judio tan aliwan Judio?

³ Diad bantog a Sermon ed Palandey, imbaga nen Jesus ed saray dumerengel to ya aroen da iray kakabusol da tan ipikasi ra iray mamapasegsegang ed sikara. (Basaen so Mateo 5:43-45.) Saray presente ed saman a Sermon et saray Judio a pamilyar ed sayan ganggan na Dios: “Agka mangala na pamales mo, nisay mantarok ka na anto a pangigagaem ed saray anak na katooan mo; noag say nepeg mo ya aroen so kaparam a too unong ed sikan dili.” (Lev. 19:18) Papanisiaan na saray lider na Judion relihyon nen inmunan siglo a “saray anak na katooan” tan ‘kaparan too’ et ontutukoy labat ed saray Judio. Kakaukolanen na Ganggan a saray Israelita so mansiansian biig ed arum a nasyon, balet  linmesa so panmorian amin ya aliwan Judio et kabusol tan nepeg a busolen.

4. Panoy nepeg ya ikiwas na saray babangatan nen Jesus ed saray kabusol da?

⁴ Bilang kasunian, oniay imbaga nen Jesus: “Aroen yo ray kabusol yo, tan pikasi yo ray mamasegsegang ed sikayo.” (Mat. 5:44) Nepeg ya aroen na saray babangatan to so amin a mamubusol ed sikara. Unong ed nansulat na Ebanghelyo a si Lucas, imbaga nen Jesus: “Kuan ko ed sikayo a mandengdengel, Aroen yo so saray kabusol yo, manggawa kayoy maong ed saray mamusol ed sikayo. Bendisyonan yo so saray mangayew ed sikayo, pikasi yo so saray mandamsak [odino manginsulto] ed sikayo.” (Luc. 6:27, 28) Singa saramay angunor ed imbangat nen Jesus nen inmunan siglo, ‘manggagawa itayo na maong ed saray mamubusol’ ed sikatayo panamegley na maong a kondukta, anggano aliway ipapanengneng da ed sikatayo. ‘Bebendisyonan tayo iray mangaayew’ ed sikatayo diad marespeton pitongtong ed sikara. Tan ‘ipipikasi tayo iray mamapasegsegang’ a mangakabil odino mangiinsulto ed sikatayo ed arum nin paraan. Saratan a pikakasi so maaron kerew a komon et manguman iray managpasegsegang, tan onkiwas ira pian nagamoran day pabor nen Jehova.

5, 6. Akin ya aroen tayo iray kabusol tayo?

⁵ Akin ya aroen tayo iray kabusol tayo? “Pian nayarian yoy magmaliw ya anak . . . nen Ama yon wala ed tawen,” so inkuan nen Jesus. (Mat. 5:45) No gawaen tayo itan a simbawa, magmaliw itayon “anak” na Dios lapud aaligen tayo si Jehova a “sikato pabutayen to so banwa to ed saray mauges tan maong, tan papelagen toy uran ed saray matunong tan aliwan matunong.” Unong ed salaysay nen Lucas, say Dios “mapangako [odino maong] ed saray malamang tan mauges.”​—Luc. 6:35.

⁶ Legan ya idadanet nen Jesus a talagan importante parad saray babangatan to ya itultuloy ‘dan aroen iray kabusol da,’ oniay imbaga to: “No aroen yo ray mangaro ed sikayo, anto so tumang a naalagar yo? Anggan saray publikanos agda kasi gawaen so ontan lanlamang? Et no galangen yo so saray agagi yo lambengat, anto so gawaen yo ni a nagkalalo nen saray arum? Anggan saray Gentiles agda ta kasi gawaen so ontan lanlamang?” (Mat. 5:46, 47) No say aroen tayo labat et saray mangaaro ed sikatayo, ag-itayo makanepegan ed “tumang,” odino pabor na Dios. Ta anggan saray sumisingil na buis, a kaslakan lan mumudmuraen, so mangaaro met ed saray totoon mangaaro ed sikara.​—Luc. 5:30; 7:34.

7. Akin ya aliwan nikadkaduma so gagawaen tayo no say ibano tayo labat et “saray agagi” tayo?

⁷ Sano mangibabano iray Judio, kaslakan lan walay akatekep a salitan “kareenan.” (Uko. 19:20; Juan 20:19) Nikekerew ed saya a say toon imbano et maksil komon so laman to, maabig, tan maaligwas. Aliwan nikadkaduma so gagawaen tayo no say ibabano tayo labat et saray ipapasen tayon “agagi.” Unong ya inkuan nen Jesus, ontan met so gagawaen na “saray Gentiles.”

8. Anto so impaseseg nen Jesus a gawaen na saray dumerengel to sanen imbaga ton: ‘Ayadyari kayo komon’?

⁸ Lapud atawir a kasalanan, nalilingo tan aliwan ayadyari iray babangatan nen Kristo. (Roma 5:12) Anggaman ontan, sinampotan nen Jesus iyan kabiangan na paliwawa to, a kuan to:  “Nayadyari kayo komon a singa say mangatatawen ya Ama yo sikato so ayadyari.” (Mat. 5:48) Papasesegen to sirin iray dumerengel to ya aligen day “mangatatawen ya Ama” ra, si Jehova, a gawaen dan sigpot odino ayadyari so aro ra panamegley na pangaro ed kakabusol da. Ontan met so iilaloan ed sikatayo.

Akin a Magmaliw a Maperdona?

9. Anto so kabaliksan na saray salitan: “Perdonam iray utang mi”?

⁹ No mapangasi tayon perdonaen so sakey a nankasalanan ed sikatayo, itutultuloy tayon gagawaen so maong. Diad katuaan to, kabiangan ed modelon pikakasi nen Jesus iray salitan: “Perdonam iray utang mi a singa say impamerdona mi met ed saray akautang ed sikami.” (Mat. 6:12) Siempre, agto labay ya ibagan lingwanan iray pinansyal ya utang. Ipapanengneng na Ebanghelyo nen Lucas a say “utang” ya imbaga nen Jesus et ontutukoy ed kasalanan, ta oniay inkuan na satan: “Perdona mo kami pa’d saray kasalanan mi, ta perdonaen mi ray amin a nankakasalanan ed sikami.”​—Luc. 11:4, Maung a Balita.

10. No nipaakar ed panamerdona, panon tayon naalig so Dios?

¹⁰ Nepeg tayon aligen so Dios ya akaparaan a mamerdona ed saray nagbabawin nankasalanan. Oniay insulat nen apostol Pablo: “Manaanosan kayo ed sakey tan sakey, mapangasi, manpeperdonaan so sakey tan sakey, a singa met say Dios pinerdona to kayo ed Kristo.” (Efe. 4:32) Inkanta nen salmista David: “Si Jehova mapangasi tan magrasya, mabanayat a manpasnok tan daakan ed panangasi. . . . Sikato agto ginawa ed sikatayo so unong na kanepegan na saray kasalanan tayo, nisay intumang to ed sikatayo so kanepegan na saray kasulitan tayo. . . . Unong na kaarawi’ letakan a manlapu ed seselekan, ontan so kaarawi angibantakan to ed saray impakasumsumpa tayo ya inekal to ed sikatayo. Unong a say sake’ya ama abageyen to so saray anak to, ontan met nen Jehova abageyen to so saray ontakot ed sikato. Ta sikato kabat to so inkagawa tayo; sikato nanodnonotan to a sapok itayo.”​—Sal. 103:8-14.

11. Siopa so perdonaen na Dios?

¹¹ Nagamoran labat na totoo so panamerdonay Dios kayari ran perdonaen iray akapankasalanan ed sikara. (Mar. 11:25) Pian nidanet iyan punto, inyarum nen Jesus: “No perdonaen yo ‘ray totoo ed kaugsan da, say Ama yon mangatatawen perdonaen to kayo met. Balet no agyo perdonaen so saray totoo ed saray kaugsan da, agto kayo met perdonaen nen Ama yo ed saray kaugsan yo.” (Mat. 6:14, 15) On, say perdonaen labat na Dios et saray agnapipilitan a mamerdona ed arum. Say sakey a paraan pian nitultuloy tayoy manggawa na maong et say pangunor ed simbawa nen Pablo: “Unong ed impamerdona na Katawan ed sikayo, ontan met so gawaen yo.”​—Col. 3:13.

“Tundaan Yoy Mangukom”

12. Anto so insimbawa nen Jesus nipaakar ed panangukom ed arum?

¹² Say sananey nin paraan na panggaway maong et sinalambit ed Sermon ed Palandey sanen imbaga nen Jesus ed saray ondedengel ed sikato: “Tundaan yoy mangukom pian agkayo naukom.” (Mateo 7:1, NW) Insan sikatoy angusar na mapuersan ilustrasyon pian nidanet iyan punto. (Basaen so Mateo 7:2-5.) Konsideraen tayo no anto so labay ya ibaga nen Jesus sanen inkuan to: “Tundaan yoy mangukom.”

13. Panon a “mantultuloy a mangibulos” iray dumerengel nen Jesus?

¹³ Mipadpara ed si Mateo, oniay insulat nen Lucas ya imbaga nen Jesus: “Tundaan yoy mangukom, pian agkayon balot naukom; tan tundaan yoy manhusga, pian agkayon balot nahusgaan. Mantultuloy a mangibulos, pian nibulos kayo.” (Luc. 6:37, NW) Saray inmunan siglon Fariseo et andiay panangasin angukom ed arum base ed agmakasulatan iran tradisyon. Siopaman ed saray dumerengel nen Jesus ya ontan so gagawaen da et kaukolan ya ‘ontunda lan mangukom.’ Maabig no ‘mantultuloy iran mangibulos,’ salanti, perdonaen day kakulangan na arum. Ontan met, angiter na simbawa si apostol Pablo nipaakar ed panamerdona.​—Basaen so Efeso 4:32.

14. No mamerdona iray babangatan nen Jesus, napakiwas da iray totoon manggawa na anto?

¹⁴ No mamerdona iray babangatan nen Jesus,  napakiwas da iray totoo a mamerdona met. Imbaga nen Jesus: “Say pangukom a pangukom yo, sikato so kaukoman yo; tan say sukat a panukat yo, sikatoy panukat naani ed sikayo.” (Mat. 7:2) No nipaakar ed panagtrato tayo ed arum, anien tayoy intanem tayo.​—Gal. 6:7.

15. Panon ya impanengneng nen Jesus a makapuy so alabas a panagbalaw?

¹⁵ Tandaan, pian nipalinew a makapuy so alabas a panagbalaw, oniay intepet nen Jesus: “Akin a nengnengen moy taep a walad matay agim, et agmo balet imanoen so pagsen a walad matam a dili? Ono panon so pangibagam ed agim, Maya ka, ta ekalen ko so taep ed matam; et anta, walad matam a dili so pagsen?” (Mat. 7:3, 4) Say toon mabalaw et iimanoen toy melag a dutak ed ‘mata’ na agi to. Singa to ibabagan kulang na pakatalos tan pakatebek so agi to. Anggaman say kalilingoan et melmelag odino singa labat “taep,” labay na makritiko ya “ekalen” itan. Sikatoy mansimpisimpitan ya ontulong pian onlinew so pakanengneng na agi to.

16. Akin a saray Fariseo et nibagan walaay “pagsen” ed mata ra?

¹⁶ Saray lider na Judion relihyon so alablabas a mabalaw ed arum. Bilang ilustrasyon: Sanen say bulag a lakin pinaabig nen Kristo so angiyabawag a si Jesus et nanlapud Dios, manpapasnok ya inmebat iray Fariseo: “Sika niana’ka a sigpot ed saray kasalanan, et ibangat mo kami?” (Juan 9:30-34) No nipaakar ed dugan panangukom base ed estandarte nen Jehova, saray Fariseo et walaay “pagsen” ed dilin mata ra tan sigpot iran bulag. Kanian oniay impamaat nen Jesus: “Mansimpisimpitan, ekal mo nin unona so pagsen a walad matam a dili; et saman la makanengneng kan maliwliwawa a mangekal na taep a walad mata na agim.” (Mat. 7:5; Luc. 6:42) No determinado itayon gawaen so maong tan tratoen na duga so arum, ag-itayo magmaliw a makapasakit a managbalaw, a lanang ya onnenengneng ed aliling toy taep ed mata na agi tayo. Imbes, bidbiren tayo ya aliwa itayon perpekto, tan sirin et agtayo mahusga tan mabalaw ed saray agagi tayo.

No Panon Tayon Tratoen so Arum

17. Unong ed Mateo 7:12, panon so nepeg a pantrato tayo ed arum?

¹⁷ Diad Sermon ed Palandey, indanet nen Jesus ya ipapatnag na Dios so panangaro To bilang Ama ed saray lingkor To diad pangeebat ed saray  pikakasi ra. (Basaen so Mateo 7:7-12.) Sankaimano a si Jesus so angiletneg ed sayan totontonen ed kondukta: “Amin a bengatla sirin a labay yo a gawaen na totoo ed sikayo, ontan so gawaen yo met ed sikara.” (Mat. 7:12) Napaneknekan tayo labat a tua itayon papatumbok nen Jesu-Kristo no ontan so pantrato tayo ed saray totoo.

18. Panon ya impanengneng na “ganggan” a nepeg tayon tratoen so arum unong ed labay tayon pantrato ra ed sikatayo?

¹⁸ Kayarin imbaga nen Jesus a nepeg tayon tratoen so arum unong ed labay tayon pantrato ra ed sikatayo, oniay inyarum to: “Sikato ya so ganggan tan sinalita na saray propetas.” No tratoen tayoy arum unong ed paraan ya inkuan nen Jesus, onkikiwas itayo a mitunosan ed gagala na “ganggan,” salanti, saray sulat ed Biblia manlapud Genesis anggad Deuteronomio. Nilikud ni’d impangipaamta ed gagala nen Jehova a mamawala na bini a mangekal na kaugsan, akasulat ed sarayan libro so Ganggan ya inter na Dios ed nasyon na Israel diad panamegley nen Moises nen 1513 B.C.E. (Gen. 3:15) Niarum ni, impalinew na Ganggan ed saray Israelita a nepeg iran magmaliw a maptek, ag-ira manangidumaduma, tan manggawa iray maong ed saray duruka tan sankailin manaayam ed dalin da.​—Lev. 19:9, 10, 15, 34.

19. Panon ya impanengneng na saray “propetas” a nepeg itayon manggawa na maong?

¹⁹ Nen tinukoy nen Jesus iray “propetas,” say walad nonot to et saray mapropetikon libro na Hebreon Kasulatan. Akasulat ed saratan iray Mesianikon propesiya ya asumpal a mismo ed si Kristo. Ipapanengneng met na saratan a sulat a bebendisyonan na Dios iray totoo to no gagawaen day duga unong ed panmoria to, tan no tratratoen day arum ed dugan paraan. Alimbawa, say propesiya nen Isaias et manisimbawa ed saray Israelita: “Onia so kuan nen Jehova, Kawaloen yo so inkatunong, tan manggawa kayo na kaptekan. . . . Mapalar so too a manggawa na saya, tan say anak na too a mamemben ed sikato; . . . pegetan to so lima to a manggawa na anggan anto a mauges.” (Isa. 56:1, 2) On, iilaloan na Dios a saray totoo to so mantultuloy a manggawa na maong.

Lawas Manggawa na Maong ed Arum

20, 21. Anto so reaksion na saramay ondedengel ed Sermon nen Jesus ed Palandey, tan akin a nepeg mon dalepdepen iya?

²⁰ Kinonsidera tayo so pigara labat ed amayamay ya importantin punto ed agnaparaan a Sermon nen Jesus ed Palandey. Anggaman ontan, mainomay tayon natalosan so reaksion na saray dinmengel ed satan a sermon. Oniay isasalaysay na Biblia: “Et agawa, sanen asumpal nen Jesus so sarayan salita dakel a katooan so nankelkelaw ed panagbanga’to. Ta sikara so imbabanga’to a singa sakey a walaay pakauley, et aliwan singa saray eskribas da.”​—Mat. 7:28, 29.

²¹ Talagan pinaneknekan nen Jesu-Kristo a sikato imay impasakbay a ‘Makapakelaw a Mananimbawa.’ (Isa. 9:6) Say Sermon ed Palandey so manunan prueba ya amta nen Jesus so panmoria na mangatatawen ya Ama to ed saray bengatla. Bilang kaaruman nin punto ed saray apantongtongan tayo la, dakel ni isasalaysay na satan a sermon nipaakar ed tuan liket, no panon a napaliisan so imoralidad, no panon ya ipatnag so inkatunong, no anto so nepeg tayon gawaen pian nawalaay maligen tan maliket ya arapen, tan dakel ni ra. Akin ta no basaen mo lamet ya atekepay pikakasi so Mateo kapitulo 5 anggad 7? Dalepdepen so marakdakep a simbawa nen Jesus ya akasulat ditan. Iyaplikam so imbaga nen Kristo ed Sermon ed Palandey. Diad ontan et lalom a napaliket si Jehova, magmaliw a duga so panagtratom ed arum, tan makapantultuloy kan manggawa na maong.

Panon Yon Ebatan?

• Panon tayon tratoen iray kakabusol?

• Akin et kaukolan a maperdona itayo?

• Anto so imbaga nen Jesus nipaakar ed panangukom ed totoo?

• Unong ed Mateo 7:12, panon so nepeg a pantrato tayo ed arum?

[Tepetepet Parad Panagaral]

[Blurb ed pahina 10]

Amta yo kasi no akin ya imbaga nen Jesus: “Tundaan yoy mangukom”?

[Litrato ed pahina 8]

Akin et ipikasi tayo ray mamapasegsegang ed sikatayo?

[Litrato ed pahina 10]

Kasin lawas yon tratratoen so arum unong ed labay yon pantrato ra ed sikayo?