Makaaral ed Lingo na Saray Israelita

SAKBAY ya onloob iray Israelita ed Insipan a Dalin, amta da la no antoy iilaloan nen Jehova ed sikara. Oniay ingganggan na Dios ed sikara panamegley nen Moises: “Sunsonen yo ed satan a papawayen so amin a totoo a manaayam ed saman a dalin a paekalen ed arapan yo, tan deral yo so amin a ginawa a batobato, tan deral yo so amin ya imbobo a taltalintao ra, tan tebag yo so amin a paspasen da ya atagey.”​—Num. 33:52.

Saray Israelita so nepeg ya agmisisipanan nipaakar ed pikakareenan, nisay miasawa ed saray sabien da diman. (Deu. 7:2, 3) Diad tua et onia lay nipasakbay ed sarayan pinilin totoo na Dios: “Agamil mo so adia, ompan lamang no makagawa ka na sakey a sipanan ed saray manaayam diman ed dalin a laen mo, ompan lamang no sakey naani a patit ed pegley mo.” (Exo. 34:12) Ingen, saray Israelita so tinmunganga ed Dios, kanian apatitan ira. Anto ta so sengegan na sayan kalilingo? Antoran leksion so naaralan tayo manlapud asagmak da?​—1 Cor. 10:11.

Maapit a Pililimog a Nansumpal ed Idolatriya

Diad primero, sanen kakayarianen na saray Israelita so Insipan a Dalin, sikaray analo ed impilalaban da ed saray manaayam ditan. Ingen, agda sigpot a tinulok so ganggan na Dios, lapud agda pinaekal ya amin irayan kakabusol da. (Uko. 1:1–2:10) Noagta, sanen akapirmi la’ra diad limog na saramay “pitora a nasyon” a manaayam ed saman a dalin, sikaray naynay ya akituyaw ed sikara tan nansumpal itan ed pikakaaro. (Deu. 7:1) Anto so epekto na satan ed saray Israelita? Oniay ibabaga na Biblia: “Inala ra so saray bibii ya anak da pian sikara so asawa ra, tan initer da so saray dili ya anak da a bibii ed saray lalaki ya anak da na saraman, tan nanlingkor ira ed saray dirios da. Et saray anak na Israel ginawa ra so mauges ed pakanengneng nen Jehova, tan inlingwan da si Jehova a Dios da, tan nanlingkor ira ed saray Baal tan si Astarot.” (Uko. 3:5-7) Say maapit a pililimog na saray Israelita ed saray asabi ra so nansumpal ed impipiasawa ra tan impibabali da met lan mandayew ed saray talintao. Natan ta akik-kiasawa lara ed sarayan  pagano, mas lalon minmelag lay tsansan napatakyas da nira. Kanian, arutakan so puron panagdayew, tan ginapoan met lan dayewen na saray Israelita iray palson dirios.

Say impikaaro na saray Israelita ed saray totoon asabi ra’d Insipan a Dalin et angitarok ed sikara na mas baleg ya espiritual a peligro nen say samay panaon a mibabakal nira ed saratan a kakabusol. Imanoen pa so sananey nin dalan no panon a say panagdayew so arutakan.

Panagdalus a Nansumpal ed Panagdayew ed Baal

Sanen wala la’d Insipan a Dalin iray Israelita, tinmunda la iran nanteyengteyeng tan dakel so nagmaliw a dumaralos. Nayari palagin say metodo na panagdalus da et mipara ed inusar na saray Canaanita ya akaunan nandalus ed saman a dalin. Balet ta, mapatnag ya aglabat inalig na saray Israelita iratan a metodo. Lapud maapit ya impilimog da’d sikara, naingganyo met iran mangawat ed sisisiaen na sarayan pagano nipaakar ed panagdalus.

Saray Canaanita et mandadayew ed dakerakel a Baal, dirios a papanisiaan dan mamapabuna ed daralusan da. Asabi panaon, likud ni ed pamabayubo ed dalin tan panag-ani na saray Israelita, indayew da met la iratan a dirios a papanisiaan dan mamaparakel ed ani ra. Sirin, dakel ya Israelita so nankunkunwari labat a mandadayew ed si Jehova, balet diad tua et parungtalan laran manaapostata.

Mapuersan Pasakbay ed Sikatayo Natan

Nayarin diad gapo et anggapoy intension na saray Israelita a mibali ed panagdayew ed Baal tan ed saray kabandayan na satan. Ingen, ontan so nansumpalan na maapit a pipiulop da. Agta ontan met so nailaloan tayon makapuy a resulta no maapit itayon miulop ed saramay totoo a nayarin makaaro met balet ta midumay sisisiaen, moralidad, tan prinsipyo ra? On, tua a walaray kipapasen ya agtayo napaliisan so pakapilimog ed saray agkapananisiaan, singa bilang, diad trabaho, eskuelaan, odino anggan diad ayaman tayo ni ingen. Anggaman ontan, say asagmak na saray Israelita et mamasakbay ed sikatayo, a no pirawaten tayoy mikaaro ed ontan iran totoo et singa tayo manaanap na pakarisgoan tayo. Oniay agbalot nasuppiat ya ibabaga na Biblia: “Saray mauges a kaulop deralen da so saray maong ya ug-ugali.”​—1 Cor. 15:33.

Diad sayan modernon panaon, sikatayoy nidudunget ed dakel a pakasubokan a singa ed saramay asagmak na saray Israelita. Walaray indibidual tan benga-bengatla a singa la diodiosen na saray totoo, alimbawa, say kuarta, saray artista, saray sikat ed isport, saray sistema na politika, saray lider na relihyon, tan anggan saray kapamilyaan ni ingen. Dinanman ed saraya et posiblin magmaliw a manunaan ed bilay tayo. No bayuboan tayo so maapit a pikakaaro ed saray agmangaaro ed si Jehova, mansumpal itan ed kaderal na relasyon tayo’d sikato.

Say sebel a pisesekso so manunan kabiangan na panagdayew ed Baal ya akaingganyoan tan akatuksoan na dakel ya Israelita. Ontan met a patit so siansia nin pakakatuksoan na saray totoo na Dios. Singa bilang, sakey a telpek labat ed mouse na kompyuter ed abung et nabantayan la na sakey a mausyoso tan agmaalwar iray bengatlan manutak ed malinis a konsiensia to. Talagan makapaermen no say sakey a Kristiano et naayat ed pornograpiya diad Internet!

‘Mapalar Iray Mangunor na Panamintuan To’

Sikatayon mismo so mandesisyon no kasin tuloken odino sugnaren tayo si Jehova nipaakar ed panagpili na piulopan tayo. (Deu. 30:19, 20) Kanian, nepeg tayon tepetan so inkasikatayo: ‘Siopa iray kakaibak ed panaoy panag-relaks odino panagpasyar? Komustay prinsipyo ra ed bilay ontan met ed moralidad da? Dadayewen da kasi Jehova? No miulop ak ed sikara, napaseseg ak kasin paaligwasen so espiritualidad ko?’

Oniay inkanta na salmista: “Mapalar so saray ayadyari ed dalan da, sikara a manaakar ira ed loob na ganggan nen Jehova. Mapalar so saray mangunor na panamintuaan to ra, tan saray manganap ed sikato a tinekepan na simoon a puso.” (Sal. 119:1, 2) Talagan “mapalar so balang sakey ya ontakot ed Jehova, a manakar ed saray basbas to.” (Sal. 128:1) No nipaakar ed panagpili na kaulop, komon ta makaaral tayo ed lingo na saray Israelita tan sigpot itayon ontulok ed si Aman Jehova.​—Uli. 13:20.

[Litrato ed pahina 26]

Say maapit a pipiulop ed saray agmangaaro ed si Jehova et mansumpal ed idolatriya