Tepetepet na Saray Manbabasa

Nepeg kasin paliisan na sakey a Kristiano iray iinumen tan naakan a nan-caffeine?

Agsesebelan na Biblia iray Kristiano ya oninum na kape, tsa, tsokolati, tan softdrinks a nan-caffeine. Balet, itatarya na Biblia iray prinsipyo ya ontulong ed sikatayon makapanggawa na makabat a desisyon. Konsideraen tayo pa nin unona no akin a papaliisan na arum a totoo so iyinum tan pangan na saray nan-caffeine.

Say manunan rason no akin a papaliisan na arum so caffeine et lapud ipapasen dan makaapekta itan ed awawey, a gawaen ton mabilabilay so nonot. Makapaadik met itan. Onia so ibabaga na sakey a libro ya uusaren na saray parmaseutiko: “Nayarin nailuam tan naadik so laman no abayag lan dakel so iinumen tan kakanen a nan-caffeine. Saray epekto na biglan pangitunda ed iyinum tan pangan na nan-caffeine et say isakit na ulo, inkamaalipanes, pannerbiyos, inkamaaburido, tan pakakaelew. Sarayan sintoma et getman ipilaktip na publikasyon a Diagnostic and Statistical Manual of Mental Disorders bilang kabiangan ed arum nin epekto na itunda ed panagdruga. Kanian natalosan no akin ya arum a Kristiano et ag-oniinum tan agmamangan na nan-caffeine lapud ta labay dan paliisan so pakaadik ed antokaman tan labay dan ipatnag so panagdangka.​—Galacia 5:23.

Panisiaan na arum a nayarin apektaen na caffeine so bunigas na sakey a too odino say sakey a lukon. Nepeg ya aroen na saray Kristiano so Dios ‘ed amin a kamarerwa ra,’ kanian agda gagawaen so antokaman a mamatikey ed bilay da. Tan lapud niganggan met ya aroen da so kapara ran too, papaliisan da iray bengatlan mameligro ed bilay na sakey a lukon.​—Lucas 10:25-27.

Kasin makatunongan iratan a kapagaan ed bunigas? Anggaman walaray manisian say caffeine et nayarin pansengegan na dakel a sakit, aliwan amin et onabobon ed saya. Irereport ni ingen na arum a managsukimat a maong ed bunigas so kape. Nen 2006, onia so inreport na magasin a Time: “Ipapabitar na akadkauna iran impanaral a [say caffeine] et nayarin manresulta ed kanser ed birong, itagey na presyon na dala tan arum niran sakit. Balet saratan a papanisiaan et aglabat sinuppiat na agano niran asukimat noagta adiskobre ni ingen ed satan so pigaran gunggona na caffeine. Ompatnag a maong so caffeine ed altey, makatulong ed saramay walaan na sakit a Parkinson’s, diabetes, Alzheimer’s, gallstone, depresyon tan nayarin proteksion met itan sumpad arum a klase na kanser.” Onia so kuan na sakey a peryodiko nipaakar ed iyinum tan pangan na nan-caffeine: “Siempre, importante nin siansia so pagmaliw a kabkaabigan.”

Nepeg a personal a mandesisyon so kada Kristiano unong ed pakatalos to ed peles ya impormasyon nipaakar ed caffeine tan ed saray nalalanor a prinsipyo na Biblia. Singa bilang, paliisan na malukon a Kristiano so caffeine no sikatoy manisian apektaen na satan so lukon to. No nalikas na sakey a Kristiano a sikatoy magmaliw a maalipanes odino singa mansakit no ag-oninum odino agmangan na nan-caffeine, nayarin paliisan to nin magano iray nan-caffeine. (2 Pedro 1:5, 6) Saray ontan a desisyon so nepeg a respetoen na arum a Kristiano, ya agda ipipilit so panmoria ra.

Antokaman so desisyon yo nipaakar ed saray iinumen tan naakan a nan-caffeine, nodnonoten iyan simbawa nen Pablo: “Anggan mangan kayo sirin, odino oninum, odino antokaman a gawaen yo, gawa yo ya amin ed gloria na Dios.”​—1 Corinto 10:31.