Krismas Anto la so Nagagawa ed Saya?

SAMPLORA lan taon ed apalabas ed onia met a bulan, imparungtal na magasin a U.S.News & World Report so artikulon “Diad Panaanap ed Krismas” diad apis na satan. Impaimano na artikulo no kasin say Krismas et “ompapawil la ed dati, ya agla tanton pannenegosyoan.” Talaga kasin ontan so nagagawa?

Impabitar na artikulo iray rason no akin ya agtayo la nailaloan a nagawa ni itan. Oniay insalaysay na satan: “Anggapo so nisulat a salaysay nipaakar ed opisyal a panagselebra ed inkianak nen Kristo anggad asabi so komapat a siglo, sanen si Constantino . . . so emperador na Roma.” Impatnag na satan ya “anggan panon et daiset labat itan ya ebidensya a talagan anggapoy makaamta no kapigan so inkianak nen Jesus.” Inaksobi na artikulo ya “agsinalambit na saray ebanghelyo so taon, nisay eksakton bulan odino agew.” Unong ed sakey a historyador na Unibersidad na Texas, “saray sankaunaan a Kristiano so ag-interesado ed panagselebra na Inkianak [nen Jesus].”

Diad silong na paulon “Bengatlan Pinalbengan,” siningbat na artikulo “no panon a pinili na simbaan so Disyembre 25.” Binidbir na satan: “Aabobonan na karaklan so panmorian say gagala na piesta-opisyal et pian ‘pagmaliwen a Makristiano’ so Saturnalia tan arum niran paganon piesta.” “Diad impangigeter na saray lider na relihyon ed Krismas diad banda’d sampot na Disyembre, say panaon ya apasal la so totoo a manselebra, sineguro ra ya onlaknab so panagselebra ed inkianak na Manangilaban.” Diad kapegleyan na koma-19 a siglo, nidanet la ed satan a panaon so panagsaliw tan panangiter na regalo. “Say balon tradisyon a panagregalo legan na Krismas so amawala na maples a napan-anapan, tan diad kaunoran et inyalibansa la na saray komersyante tan managpatalastas so panaon [na Krismas].”

Anggapo sirin so rason pian manilalo a manguman ni so direksion na Krismas nilikud ed iyaarawi na satan ed puron Inkakristiano. Anggaman mapatpatnag la ed modernon Krismas so “alablabas a komersyalismo,” say katuaan et agbalot nailaloan iray tuan Kristiano a manselebra ed inkianak nen Jesus. Imbes, say idadanet na Biblia et say dondon ya intarya nen Kristo panamegley na impatey to tan inkioli to ed tawen. (Mateo 20:28) Sankaimportantian nin siansia itan angga ed panaon ya onsabi.