Job​—Sakey a Toon Nansungdo tan Nanmatoor

‘Inimanom ta so aripen ko a si Job? Ta anggapo so singa sikato ed dalin, a naskey tan matunong a laki, sakey a matakot ed Dios, tan pinmaliis ed mauges.’ —JOB 1:8.

1, 2. (a) Antoran ag-ilaloan a trahedya so asagmak nen Job? (b) Deskribien so bilay nen Job sakbay ton naeksperiensya iratan a trahedya.

 WALAY sakey a too ya ompatnag a wala la’d sikaton amin—kayamanan, impluensya, maong a bunigas, tan maliket a bilay na pamilya. Insan walay taloran trahedya a nantutumbokan a sinmabi ed sikato. Unona, biglan naandi so kayamanan to. Insan sinmabi so nikaduman bagyo ya inateyan na amin ya ananak to. Agnambayag et sikato so adapoan na makapadimlan sakit ya apelpelsaan so interon laman to. Nayarin kabat yo la a sayan too et si Job, say manunan karakter ed libro na Biblia a ningaran ed sikato.—Job, kapitulo 1 tan 2.

² Oniay inyey-ey to: “O komon ta wala ak a singa dia ed saray bulan nen inmuna.” (Job 3:3; 29:2) Sano onsabi so desyang, siopa so agmanpirawat ed magmaong iran panaon ed apalabas? Maptek so panagbilay nen Job, ya ompatnag ya anggapoy makapasinagem a nagawa ed sikato. Sikato so nirespeto na prominentin totoo tan kinerew da so simbawa to. (Job 29:5-11) Sikato so mayamyaman, balet balanse so panmoria to ed kuarta. (Job 31:24, 25, 28) Sanen naimano to iray mankaukolan a balo odino ulila, sikara so tinulongan to. (Job 29:12-16) Tan sikato so nansiansian matoor ed asawa to.—Job 31:1, 9, 11.

3. Panon so impangipasen nen Jehova ed si Job?

³ Say bilay nen Job et andiay-pakabalawan lapud sikatoy nandayew ed Dios. “Anggapo so singa sikato ed dalin,” so inkuan nen Jehova, “naskey tan matunong a laki, tan sakey a matakot ed Dios, tan pinmaliis a nanlapu ed mauges.” (Job 1:1, 8) Balet anggaman ed katooran nen Job ed moral, aderal so mainawan panagbilay to lapud saray trahedya. Naandi so amin a nansagpotan to, tan asubok so tuan disposisyon to lapud ot-ot tan gonigon.

4. Akin a makatulong so pannodnonot ed inkasubok nen Job?

⁴ Siempre, aliwa labat a si Job so lingkor na Dios a personal ya akasagmak na desyang. Say eksperiensya nen Job so mainomay a natalosan na dakel a Kristiano natan. Lapud satan, duaran tepet so manepeg tayon nodnonoten: Sano walay nagawa ed sikatayon trahedya, panon itayon natulongan no morekdeken tayo so subok ed si Job? Tan panon itayon nibangat na satan a magmaliw a lalon maempatya ed arum a maniirap?

 Say Isyu Nipaakar ed Katooran tan Subok ed Integridad

5. Unong ed si Satanas, akin a manlilingkor si Job ed Dios?

⁵ Nikadkaduma so kipapasen nen Job. Ag-amta nen Job a sinuppiat na Diablo so motibo to ed panlilingkor to ed Dios. Sanen walay pandaragup diad tawen, tan impaimano nen Jehova iray maabig a kalidad nen Job, oniay ebat nen Satanas: “Agka ta nanggawa na alar ed liberliber to, tan dia ed liberliber na abung to, tan ed liberliber na amin a wala ed sikato, ed amin a diking?” Inyakusa sirin nen Satanas a sinisiblet so motibo nen Job—tan impasagilig to ya ontan met so amin a lingkor na Dios. “Yunat mo so limam natan, tan diwiten mo so amin a wala ed sikato, et ikaindan to ka ed lupam,” so imbaga nen Satanas ed si Jehova.—Job 1:8-11.

6. Anton importantin isyu so pinalesa nen Satanas?

⁶ Importante itan ya isyu. Inangat nen Satanas so pangaagamil nen Jehova ed inkasoberano to. Talaga kasin posible parad Dios so panuley ed uniberso tekep na aro? Odino, unong ya impasagilig nen Satanas, kasin lawas ontalona so sinisiblet a motibo ed kaunoran? Inabuloyan nen Jehova so Diablo a mangilanor ed si Job bilang sakey a panubokan, a nanmatalekan To so integridad tan katooran na lingkor To. Kanian, tampol ya indapo nen Satanas so nantutumbokan a desyang ed si Job. Sanen agtinmalona si Satanas ed primero iran panangataki to, dinapoan to si Job na makapaot-ot a sakit. “Baog tan baog, on, amin a say too wala ed sikato iter to nipaakar ed bilay to,” so inyakusa na Diablo.—Job 2:4.

7. Diad antoran paraan a nidudunget iray lingkor na Dios natan ed saray subok a mipadpara ed si Job?

⁷ Anggaman say maslak a Kristiano natan et agmaniirap a singa ed asagmak nen Job, nanduruman klase na kairapan so sasagmaken da. Dakel so nidunget ed panamasegsegang odino problema ed pamilya. Ompatnag a makapakapuy met so kairapan na panagbilay odino sakit. Arum so angisakripisyo ed bilay da lapud pananisia ra. Siempre, agtayo ipasen a si Satanas so mismon pansesengegan na amin lan trahedya a sagmaken tayo. Diad tua, arum a problema so nayari ni ingen a makasengeg ed dilin kalilingoan tayo odino say atawir tayon kipapasen ed pisikal. (Galacia 6:7) Tan amin tayo so apektado ed saray makapakapuy ya epekto na itatakken tan saray kalamidad. Ipapalinew na Biblia a diad sayan panaon et agmamilagron sasalimbengan nen Jehova iray lingkor to manlapud sarayan kairapan.—Eclesiastes 9:11.

8. Panon ya aanamoten nen Satanas iray kairapan a sasagmaken tayo?

⁸ Anggaman kuan, nayarin usaren nen Satanas iray kairapan a sasagmaken tayo pian pakapuyen so pananisia tayo. Sinalambit nen apostol Pablo so impanirap to ed “sakey a sabit ed laman, sakey ya ibabaki nen Satanas,” a ‘manatampal’ ed sikato. (2 Corinto 12:7) Balanglan problema itan ed pisikal, a singa say makapuy a pakanengneng, odino arum ni, atalosan nen Pablo a nayarian nen Satanas ya usaren so problema tan say pakakadismaya ed satan pian naandi so gayaga tan integridad to. (Uliran 24:10) Natan, nayarin sagyaten nen Satanas iray kapamilyaan, kaeskuelaan, odino anggan saray diktador a gobierno pian pasegsegangen iray lingkor na Dios ed arum a paraan.

9. Akin ya ag-itayo nepeg a nasurprisa ed kairapan odino panamasegsegang?

⁹ Panon tayon natalonaan iratan a problema? Moriaen tayo iratan bilang pankanawnawan nipatnag so agnaumas a panangaro tayo ed si Jehova tan panagpasakop tayo ed inkasoberano to. (Santiago 1:2-4) Antokaman so pakakagonigonan tayo, napansiansia tayo so inkasimbang tayo ed espiritual no natalosan tayo so kaimportantian na katooran ed Dios. Oniay insulat nen apostol Pedro ed saray Kristiano: ‘Inararok ira, agyo komon pankelawan so inmapoy a panasali ed sikayo, ya onsabi ed sikayo bilang pakasalian, a singa bengatlan makapakelaw a nagagawa ed sikayo.’ (1 Pedro 4:12) Tan insalaysay nen Pablo: “Amin so saray malabay a manbilay ed sinasanto ed Kristo Jesus, manako’ra naani pamasegsegang.” (2 Timoteo 3:12) Si Satanas so siansia nin manusuppiat ed integridad na saray Tasi nen Jehova, a singa impanuppiat to ed si Job. Diad tua, ipapabitar na Biblia a papalooren nen Satanas  iray panangataki to ed totoo na Dios legan na sarayan kaunoran ya agew.—Apocalipsis 12:9, 17.

Lingon Impakatalos tan Arum a Makapuy a Bilin

10. Anto so sakey ya agmaabig a kipapasen ya inkidungetan nen Job?

¹⁰ Nidunget si Job ed sakey ya agmaabig a kipapasen, ya agtayo la nakaukolan a naeksperiensya, salanti, agto amta no akin a nagagawa ed sikato iratan a desyang. Lingon inisip nen Job a diad sakey a paraan et ‘si Jehova inter to, tan si Jehova inala to.’ (Job 1:21) Nayarin ginagala nen Satanas ya ipamoria ed si Job a say Dios so pansesengegan na irap to.

11. Ipaliwawa so reaksion nen Job ed saray asagmak ton desyang.

¹¹ Si Job so adismayan maong, anggaman agto minudmora so Dios, unong a pagagawa ed sikato na asawa to. (Job 2:9, 10) Imbaga ton ‘say marelmeng et singa mas maaligwas nen siak.’ (Job 21:7-9) ‘Akin a dudusaen ak na Dios?’ so inumameng to. Walaray panaon a labay to lay ompatey. “O komon ta yamot mo ak dia ed Sheol, pian niyagel mo ak a maamo-amot, angga ed say sanok mo onlabas!” so inkelyaw to. —Job 14:13.

12, 13. Panon a naapektoan si Job ed saray komento na taloran kakaiba to?

¹² Si Job so binisita na taloran kakaiba to, a singano ra “misinagem ed sikato tan manligliwa ed sikato.” (Job 2:11) Anggaman kuan, sikara so nagmaliw a ‘manamasegsegang a managligliwa.’ (Job 16:2) Nayarin nagunggonaan si Job ed saray kakaaro to a napangibesngawan to komon na saray problema to, balet saratan a talo et lalon angonigon tan anismaya ed sikato.—Job 19:2; 26:2.

¹³ Natalosan no akin ya oniay nayarin intepet nen Job ed dili to: ‘Akin a siak ni? Anto ta so agawak a makanepegan ak la’d sayan amin a trahedya?’ Saray ebat ya inter na saray kakaiba to et talagan makapalikdo. Impasen da a si Job a mismo so sengegan na paniirap to lapud sikatoy nanggawa na ambelat a kasalanan. “Siopa ta so natawtaw, anta sikato so maalas?” so intepet nen Elifaz. “Unong ed anengneng ko, saray nambaka na karelmengan, tan mantanem na gonigon, anien da so satan lanlamang.”—Job 4:7, 8.

14. Akin ya agtayo bengatbengat ya ipasen a say paniirap tayo et makasengeg ed agmanepeg a kondukta?

¹⁴ Tua, nayarin onlesa iray problema no angitanem itayo unong ed laman imbes a diad espiritu. (Galacia 6:7, 8) Ingen, diad sayan kaplesan a sistema et nayarin onlesa so problema antokaman so kondukta tayo. Niarum ni, agmet nibaga a saray andi-kasalanan et agnasabian na antokaman a desyang. Si Jesu-Kristo, ya “andi-tilol, nisian ed saray managkasalanan,” so anagmak na makapaot-ot ya ipapatey diad panamairapan a kiew, tan si apostol Santiago so anagmak na ipapatey bilang martir. (Hebreos 7:26; Gawa 12:1, 2) Lapud lingon panagkatunongan nen Elifaz tan say duaran kakaiba to, indepensa nen Job so maong a reputasyon to tan impilit to ya anggapoy kasalanan to. Siansia ni, saray agmakatunongan ya akusasyon da a manepeg labat a manirap si Job so nayarin angapekta ed panmoria to ed inkahustisya na Dios.—Job 34:5; 35:2.

Naromog so Tulong Sano Nidudunget ed Kairapan

15. Anton panagkatunongan so makatulong ed sikatayo sano nidudunget itayo ed kairapan?

¹⁵ Wala kasi so leksion a naaralan tayo ed saya? Nayarin iisipen tayon agmakatunongan so nagagawa iran trahedya, sakit, odino panamasegsegang. Ompatnag a napapaliisan na arum a totoo so dakel ed saratan a problema. (Salmo 73:3-12) No maminsan et nayarin itepet tayo irayan importantin tepet: ‘Kasin say arok ed Dios so mamapakiwas ed siak a manlingkor ed sikato antokaman so nagawa? Pampipirawatan ko kasin iter ed si Jehova so “sakey ya ebat ed samay mamabalaw ed Sikato?”’ (Uliran 27:11; Mateo 22:37) Agtayon balot aabuloyan iray botaktak a panagsalita na arum a pansengegay panduaruwa tayo ed mangatatawen ya Ama tayo. Oniay aminsan ya imbaga na sakey a matoor a Kristiano a nanirap ed graben sakit diad loob na dakel a taon: “Amtak ya antokaman ya iyabuloy nen Jehova et nasungdoan ko. Amtak ya ikdan to ak na nakaukolan a biskeg. Lawas to ak a papabiskegen.”

16. Panon a makatulong so Biblia ed saramay maniirap?

 ¹⁶ Nipaakar ed saray taktika nen Satanas, mas kabisado tayo iratan nen say si Job. “Aliwa itayon andi-kabat ed saray kasiliban to,” odino mauges iran pakana to. (2 Corinto 2:11) Niarum ni, dakel a praktikal a kakabatan so nagamoran tayo. Diad Biblia, naromog tayo iray salaysay nipaakar ed matoor a lalaki tan bibii a nansungdo ed amin a klase na irap. Oniay insulat nen apostol Pablo, a nanirap a maong nen say arum niran Kristiano: “Saray bengatla a nisulsulat nensaman, nisulat ira ya onkana ed kibanga ’tayo, ta pian lapu ed anos tan lapu ed panamaligliwa na saray Sulsulat, wala so ilalo tayo.” (Roma 15:4) Sakey a Tasi ed Europa ya impriso lapud pananisia to legan na komaduan guerra mundial so angisalat ed taloran agew a rasyon to parad sakey a Biblia. “Agaylan makapatumang itan!” so imbaga to. “Anggaman narasan ak, akaawat ak na espiritual a tagano ya amabiskeg ed siak ontan met ed arum nira diad saray subok ed sikami legan na saraman a magulon panaon. Wala ni’d siak iman a Biblia anggad natan.”

17. Antoran probisyon na Dios so makatulong ed sikatayo pian makapansungdo?

¹⁷ Nilikud ed panliligliwa ed sikatayo na Kasulatan, dakel met iray katulongan ed panagaral na Biblia a mangitatarya na makagunggonan panangigiya no panon a talonaan iray problema. No nengnengen yo so Watch Tower Publications Index, seguradon makaromog kayo na eksperiensya na sakey a kaparan Kristiano ya awalaan na mipadparan subok ed sikayo. (1 Pedro 5:9) Makatulong met no itongtong yo so kipapasen yo ed saray makatalos a mamatatken odino arum niran maespiritual a Kristiano. Manuna ed amin, diad panamegley na pikakasi, makapanmatalek  kayo ed tulong nen Jehova tan say masanton espiritu to. Panon a niresistian nen Pablo iray ‘panatampal’ nen Satanas? Inaral to so manmatalek ed pakayari na Dios. (2 Corinto 12:9, 10) Oniay insulat to: “Nayarian ko a gawaen so ganagana ed saman so mamabiskeg ed siak.”—Filipos 4:13.

18. Panon a makapangiter na mablin panamaseseg iray kaparan Kristiano?

¹⁸ Kanian walaray akaparaan a tulong, tan nepeg ya agtayon balot masuyat ya anapen itan. “No onkapuy ka ed agew na kasegsegang, say kasil mo sikato so melag,” so kuan na proverbio. (Uliran 24:10) No panon a saray tabuney et sarag dan kusboen so sakey ya abung a gawa’d tabla, say pakadismaya so nayarin mamaletey ed integridad na sakey a Kristiano. Pian nalabanan iyan kapeligroan, walay tulong ya itatarya nen Jehova ed sikatayo diad panamegley na saray kaparan lingkor na Dios. Inmapireng so sakey ya anghel ed si Jesus tan sikato so pinabiskeg to diad samay labi na inkaerel to. (Lucas 22:43) Sanen nambaroy ya amaarap ed Roma bilang sakey a priso, si Pablo so “akisalsalamat ed Dios, et binmiskeg so linawa to” sanen sikato so inabet na saray agagi diad Plaza nen Appio tan diad Taloran Taberna. (Gawa 28:15) Nanonotan ni na sakey ya Aleman a biin Tasi so impanulong ed sikato kasabi to diad panangipangawan a kampo ed Ravensbrück bilang matakot a tinedyer. “Siak so tampol ya inanap na sakey a kaparan Kristianon bii tan inabrasa to ak a maong,” so nanonotan to. “Sakey nin matoor ya agin bii so tinmulong met ed siak, tan sikato so nagmaliw ya inak ed espiritual.”

‘Mansiansia Kayon Matoor’

19. Anto so akatulong ed si Job pian naresistian to iray sagpot nen Satanas?

¹⁹ Deneskribe nen Jehova si Job bilang too a ‘bebembenan to so inkaskey’ odino integridad to. (Job 2:3) Anggaman ed impakadismaya tan agto sigpot ya impakatalos ed sinagmak to, agbalot tinmayer si Job nipaakar ed importantin isyu na katooran. Agto intalirak so amin a bengatlan nambilayan to. Oniay determinadon imbaga to: “Angga ed ompatey ak agko ekalen so inkaskey ko a manlapu ed siak.”—Job 27:5.

20. Akin a makagunggona so panagsungdo?

²⁰ No ontan met so determinasyon tayo, napansiansia tayo so integridad tayo ed antokaman a kipapasen—diad saray tukso, isusumpa, odino kairapan. “Agka ontakot na mogmo ed saray bengatla ya asingger la ya akoen mo,” so imbaga nen Jesus ed kongregasyon na Smyrna. “Nia, say Diablo asingger lay pangiyan to ed arum ed sikayo ed panangipangawan, pian nasali kayo; tan wala so irap yo ed samploy agew. Mansiansia ka [a matoor] angga ed patey, tan siak iter ko ed sika so balanget na bilay.”—Apocalipsis 2:10.

21, 22. Sano mansusungdo ed kairapan, naligliwa itayo ed anton pikakabat?

²¹ Diad sayan sistema ya uuleyan nen Satanas, nasubok so panagsungdo tan integridad tayo. Anggaman kuan, papaseguroan itayo nen Jesus ya anggapo so rason pian ontakot itayo legan a tatalaranan tayo so nagawa ed arapen. Say importante et mansiansia itayon matoor. ‘Say ermen tayo et maganggano,’ so imbaga nen Pablo, bangta say ‘gloria,’ odino tumang ya insipan nen Jehova ed sikatayo, so ‘alablabas ni ed kaatagey tan maando.’ (2 Corinto 4:17, 18) Anggan say impanirap nen Job et aganggano no ikompara ed dakel a maliket iran taon to sakbay tan kayari na inkasubok to.—Job 42:16.

²² Balet, walaray panaon ed bilay tayo a singano agla mangangga iray subok ed sikatayo tan singa agtayo la naanosan so paniirap tayo. Diad ontumbok ya artikulo, konsideraen tayo no panon itayon lalon makaaral ed eksperiensya nen Job nipaakar ed panagsungdo. Amtaen tayo met iray paraan no panon tayon pabiskegen so arum a nidudunget ed kairapan.

Panon Yon Ebatan?

• Anton importantin isyu so pinalesa nen Satanas nipaakar ed integridad nen Job?

• Akin ya agtayo nepeg a nabigla ed kairapan ya onsabi ed sikatayo?

• Panon itayon tutulongan nen Jehova pian makapansungdo?

[Tepetepet Parad Panagaral]

[Saray litrato ed pahina 23]

Makapansungdo itayo no mansukimat itayo ed saray publikasyon, mitongtong itayo ed maespiritual iran Kristiano, tan ibesngaw tayo ed pikakasi no anto so walad puso tayo