“Nakaukolan ya Unoren Mi so Dios, nen Saray Totoo”

‘Say Dios Mi so Masarag a Mangilaban ed Sikami’

SAY ebento so ginetma a mangisagyat na pandinayew. Abalbaleg ya imahen so impaalagey diad patar na Dura, a mapatnag ya asingger ed syudad na Babilonia. Say inagurasyon parad imahen et gawaen legan na espisyal a seremonya ya atendian na atatagey ya opisyal ya iilaloan ya ondakmomo ed arap na imahen sano tinmanol la iray adasig ya instrumento ed musika. Ingganggan nen Arin Nabucodonosor na Babilonia a siopaman ya agmandayew ed imahen so ompatey ed pinapetang a maong a palbaan. Siopa kasi so makpel ya onsunggay ed satan a ganggan?

Abigla iray maniimaton sanen agdinmakmomo so taloran lalaki a walaay-takot tan mandadayew ed si Jehova—si Sidrac, Mesac, tan Abdenago. Amta ra a say pandakmomo et sumlang ed nikabkabiig a debosyon da ed si Jehova a Dios. (Deuteronomio 5:8-10) Sanen impaipaliwawa ed sikara nen Nabucodonosor so agmanguman a talindeg da, oniay makpel dan inkuan: “No sikato so ontan, say Dios mi a sikato so panlingkoran mi sikato so masarag a mangilaban ed sikami ed palbaan a mandarlang ed apoy; et ilaban to kami ed limam, O ari. Balet no andi, nakabatan mo komon, O ari, ya agkami manlingkor ed saray dirios mo, agmi met igalang so balitok a talintao ya impaalagey mo.”—Daniel 3:17, 18.

Sanen nibantak ed mandarlang a palbaan so taloran Hebreo, milagro lambengat so inkiliktar na bilay da. Imbaki na Dios so sakey ya anghel pian salimbengan iratan a matoor a lingkor To. Balet pinili da la ed saman so ompatey imbes a sumlangen si Jehova. * Mipadpara so talindeg da ed saray apostol nen Jesu-Kristo, ya oniay inyabawag da ed arapan na atagey a korte na saray Judio, masulok ya anemiran siglo ed saginonor: “Nakaukolan ya unoren mi so Dios, nen saray totoo.”—Gawa 5:29.

Saray Importantin Leksion Parad Sikatayo

Maabig ya alimbawa ira di Sidrac, Mesac, tan Abdenago nipaakar ed pananisia, katutulok, tan katooran. Inagamil na sayan taloran Hebreo so pananisia ed si Jehova. Say konsiensia ra ya impasal na Kasulatan so amuger ed sikaran mibiang ed antokaman a gawa na palson panagdayew odino nasyonalistikon debosyon. Mipadpara, saray Kristiano natan so sigpot a manmamatalek ed tuan Dios. Sikaray igigiya na konsiensia ran impasal na Biblia tan ag-ira mibibiang ed saray gawa na palson panagdayew odino seremonya a sumlang ed saray ganggan tan prinsipyo na Dios.

Say taloran matoor a Hebreo so nanmatalek ed si Jehova tan agda insalat so katutulok da ed sikato parad antokaman ya opresi na Empiryo na Babilonia a singa say inkabantog, posisyon, odino gloria. Sarayan malangwer nin lalaki so mabulos a manirap tan ompatey imbes a deralen day relasyon da ed Dios. Singa si Moises a mas akauna ni nen say sikara, ‘nansiansia ira a singa da nengnengnengen so Sakey ya agnanengneng.’ (Hebreos 11:27) Iliktar man ira nen Jehova odino andi manlapud ipapatey, sikaran talo  so determinado a mansiansian matoor ed sikato imbes a mikompromiso pian iliktar so bilay da. Say alimbawa ra so mapatnag a tutukoyen nen apostol Pablo sanen sinalambit to iramay matoor a sinansakey ya “inerep da so biskeg na apoy.” (Hebreos 11:34) Say ontan a pananisia tan katutulok so ipapatnag na saray lingkor nen Jehova natan sano nasusubok so katooran da.

Naaralan tayo met manlapud eksperiensya di Sidrac, Mesac, tan Abdenago a tutumangan na Dios so pangipatnag na katooran ed sikato. Oniay inkanta na salmista: “Si Jehova . . . agto ikaindan so sasantos to [odino saray matoor ed sikato].” (Salmo 37:28) Natan et agtayo nailaloan ya iliktar itayo na Dios diad mamilagron paraan, a singa ginawa to ed saray taloran Hebreo. Ingen ta makapanmatalek itayo ya antokaman a kairapan so kipaarapan tayo, sikatayo so tulongan na mangatatawen ya Ama tayo. Nayarin paandien na Dios so problema, pabiskegen to itayo pian nasungdoan itan, odino paolien to itayo no mansiansia itayon matoor anggad ipapatey. (Salmo 37:10, 11, 29; Juan 5:28, 29) Say pananisia, katutulok, tan katooran et ontatalona sano pipilien tayon unoren so Dios nen saray totoo kapag no nasusubok so integridad tayo.

[Paimano ed leksab]

[Kahon/Litrato ed pahina 9]

KASIN AMTA YO?

• Say taloran Hebreo et ngalngali la man-30 años sanen nipaarap ira ed sayan subok ed katooran.

• Say palbaan so mapatnag a pinapetang a maomaong.—Daniel 3:19.